Genesisi 1
1
Kuvangwa ka Sotshe, ni ka m'thu
1Kukhatani Txizimu txi vangile nzuma ni mafu.#1:1 Ni sotshe si sikuho. 2Mafu ma ti sinzi kuva ni khohe, ma ti sinzi kuva ni txilo; txidema txi ti ti fenengeta kuhokoma ka linene; se Moya wa Txizimu wu ti ti zinginika txitimwi ka mati.
3 # Wona ni ka: 2 Vak. 4:6. Se Txizimu txi to kha txona:
“Ku nave ho kuwonekela.”
Se kuwonekela ku to vaho. 4Se Txizimu txi to wona ti to kuwonekela ngunene; se Txizimu txi to hambanisa kuwonekela ni txidema. 5Se Txizimu txi to raya kuwonekela ditina daku Mitshikari; ani txidema txi to txi raya ditina daku Wusiku. Se di to swa, ditxa: Ditshiku do khata.
6Se Txizimu txi to kha txona:
“Ku nave ho mpfhuka hagari ka mati, kambe ku nave ho kuhambana ka mati ni mati.”
7Se Txizimu txi mahile mpfhuka, txi hambanisa mati a hahatshi ka mpfhuka, ni mati a txitimwi ka mpfhuka. Se eto ti to maheka. 8#Wona ni ka: 2 Ped. 3:5. Se Txizimu txi to raya mpfhuka ditina daku i nzuma; se di to swa, ditxa: Ditshiku da wumbidi.
9Se Txizimu txi to kha txona:
“Ma na sengeletane mati a hahatshi ka nzuma wukhalo wumwewo; kasi ku na maneka mtxhefa wa kuoma.” Se eto ti to maheka. 10Se Txizimu txi to raya mtxhefa ditina daku Mafu; se msengeletano wa mati txi wu dhana ku i Linene. Se Txizimu txi to wona ti to ndinene. 11Se Txizimu txi to kha txona:
“Mafu ma na milise similwa so nakana, mwasi wu wu ningako mbewu, mindonga yo veleka mihando, yo ninga mihando ngu kuhambanelana ka yona, yi ku ni tinyingi mndani ka yona, txitimwi ka mafu.”
Se eto ti to maheka. 12Se mafu ma milisile mwasi wo nakana, mwasi wo ninga mbewu ngu kuhambanelana ka wona, ni mindonga yo veleka mihando, yi ku ni tinyingi ngu kuhambanelana ka yona. Se Txizimu txi to wona taku ndinene. 13Se di to swa, ditxa: Ditshiku da wuraru.
14Se Txizimu txi to kha txona:
“Ku nave ho siwoningo ha mpfhukani ka nzuma, kasi kuhambanisa hagari ka mitshikari ni wusiku; si txi maha sikombiso sa#1:14 Mwendo: tinyango. timbimo to kari, ta masiku, ni malembe.” 15Si nava siwoningo sa ha mpfhukani ka nzuma, si na woninga mafu.
Se eto ti to maheka. 16Se Txizimu txi mahile siwoningo simbidi sa hombe: Txiwoningo txa hombe kasi ku na fuma mitshikari, ni txiwoningo txa txidotho kasi ku na fuma wusiku; ni kuvanga tinyeleti. 17Se Txizimu txi si vekile ha mpfhukani ka nzuma, kasi kuwoninga ha mafuni; 18ni kuva si txi na fuma mitshikari ni wusiku, si txi hambanisa liwoningo ni txidema. Se Txizimu txi to wona ti to ndinene. 19Se di to swa, ditxa: Ditshiku da wumune.
20Se Txizimu txi to kha txona:
“Matini ku na maneke sivangwa sasingi#1:20 Mwendo: sivangwa so hanya, asi si tsimbilatsimbilako. so hanya; se ka mpfhuka wa nzuma ku na purumapurume sinyana.”
21Se Txizimu txi to vanga vanyamrikidi,#1:21 Mwendo: vanyatudi va lineneni. ni sotshe so hanya so tsimbila ngu dibindi, sasingi ngutu, si nga maneka matini, ngu kuhambana ka sona, ni sotshe sinyana si si ku ni tibhapi, ngu tixaka ta sona. Se Txizimu txi to wona ti to ndinene. 22Se Txizimu txi to si katekisa, txi txi kha txona:
“Velekelani, mi txi anda, mi txi tata mati tineneni; se sinyana si na tale ha mafuni.”
23Se di to swa, ditxa: Ditshiku da wutxhanu.
24Se Txizimu txi to kha txona:
“Mafu ma na humise sivangwa so hanya, ngu tihunzu ta sona; sifuyo, ni si si tsimbilako ngu dibindi, ni sihari sa txitinga, ngu tixaka ta sona.”
Se tona eto ti to maheka. 25Se Txizimu txi to vanga sihari sa txitinga, ngu tixaka ta sona, ni sifuyo ngu tixaka ta sona, ni sotshe si si tsimbilako ngu dibindi ha mafuni, ngu tixaka ta sona. Se Txizimu txi to wona ti to ndinene. 26#Wona ni ka: 1 Vak. 11:7. Se Txizimu txi to kha txona:
“A hi vangeni m'thu ngu txifaniso txathu e fana ni nathu; se a na fumela sihaka sa linene, ni sinyana sa nzuma, ni sifuyo, ni otshe mafu, ni sihari sotshe so tsimbila ngu dibindi#1:26 Mwendo: si kasako. txitimwi ka mafu.”
27 # Wona ni ka: Gen. 5:1-2. Se Txizimu txi vangile m'thu ngu txifaniso txa txona; txi m'vangile e fana ni Txizimu; txi va vangile wamwamna ni wamsikati. 28Se Txizimu txi to va katekisa, txi va gela ku kha txona:
“Velekelani, mi txi anda, mi tala ha mafuni, mi txi ma fuma; fumelani sihaka sa linene, ni sinyana sa nzuma, ni sotshe sihari si si tsimbilako ha mafuni.” 29Se Txizimu txi to kha txona: “Ni mi ningile wotshe mwasi wu wu ningako mbewu, wu kuho txitimwi ka otshe mafu, ni yotshe mindonga ya mihando yi yi ningako mbewu; si na va i di sakudya sanu. 30Ni sotshe sihari sa mafu, ni sotshe sinyana sa nzuma, ni sotshe so tsimbila ngu dibindi ha mafuni, asi si hanyako, wotshe mwasi wo nakana wu na va kudya ka sona.”
Se eto ti to maheka 31Se Txizimu txi to wona totshe ti txi ngadi ti mahile, txi mana taku ndinene ngutu; se di to swa, ditxa: Ditshiku da wutxhanu ni dimwedo.
Currently Selected:
Genesisi 1: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.