Ịjọọnụ 3
3
Ijeesu ọnịrị Inikodemọsị
1Â nyị Anihwarisi ọnya aanị, ana aā hị́ Inikodemọsị. Ọdọvịdị Aniju nịnị nị ọ́nị rẹ vị. 2Ịrahụ ẹkụhị ọnya dị ọ vẹ ịdị Ijeesu nị. Dị ọ va kà a yị Ijeesu ka, “Ọga, yâ yẹ ka ọzwọzịsa oni Ohomorihi tụ́ vẹ ẹhẹ ọnọnị ụ vị nị. Ẹ yị nyị ọza ịnya ana zụ mẹ ẹngụ apọtẹrẹwa ọnị ụ waa mẹ aanị, ẹ̀ yị vị ka vị Ohomorihi yà beri ọ nị.” 3Dị Ijeesu tụ́ ọ ohi, dị ọ ka, “Dị ma kà ịrẹyị ịzẹyịza wụ: ẹ yị nyị ọza ana nyẹngụ ngụ ịzị Ohomorihi yà aa mẹ ịjọva, ẹ̀ yị vị e tenyi ọọ ma.” 4Di Inikodemọsị tụ́ ohi, dị ọ ka, “Ọza ọ̀ọ sị vị ọzọkụ, a mẹmẹ re kuku zụ tenyi ọọ ma? Vị ọ́ọ́ vị ana zụ ngụ ịnị ịnẹ ọnyị anị, di è re tenyi ọ ma nị?”
5Dị Ijeesu rẹ ka, “Dị ma kà ịrẹyị ịzẹyịza yị wụ, ẹ yị nyị ọza ana zụ ngụ ịzị Ohomorihi yà aa mẹ ịjọva, ẹ̀ yị vị a sị enyi ọnịrị Ụhwẹ Ọnịnị tenyi ọọ ma. 6Ọza ọnị ọza kẹnẹ ma, rẹ vị ọza kẹnẹ; ama ọza ọnị Ụhwẹ Ọnịnị ọ̀ọ ma, ọza Ụhwẹ Ọnịnị ọ́za ọnọọ vị nị. 7Asị o hí wu irenu ka mâ kà a wụ ka: ‘Â nyị ka è tenyi wu nịnị ma’! 8Ahị vị ana aa tụ́ nọ ịzị èe zé e eyi kẹnẹ. Waa wụ́ ọọ ịrẹyị, ama wẹ yị yẹ ịzị ọ hụrẹ aa vẹ, wẹ yị rẹ yẹ ịzị aa nọ. Avọọ gẹdẹ-gẹdẹ ọ mẹ̀ rẹ yà yị ọza ọnị Ụhwẹ Ọnịnị sị ma nị.”
9Di Inikodemọsị re tụ́ ohi, dị ọ ka, “Ị́sa ẹnẹnị mẹmẹ zụ mẹ mẹ?” 10Di Ijeesu tụ́ o ohi, dị ọ ka, “Áa vị ọzwọzịsa ẹwụ vị ini Anisirẹrị nịnị, dị ụ wẹ̀ yị yẹ ịsa ẹnẹnị nịị? 11Dị ma kà ịzẹyịza wụ, ịsa ọnị ị yẹ, ị yaa kà nị, dị ị raa dọ ivenu tụ́ ịnị ịsa oni i si re nị. Ama we yi sì ka wa dọ ịrẹyị ayị nịnị. 12Màaa kà ịrẹyị ịsa ẹhẹ ọnọnịị yị wụ, dị ụ wẹ̀ yị dọ wụ́ nị; màa kụkụ va kà ịrẹyị ịsa ẹbẹẹba zụ̀ wụ, ụ mẹmẹ vaa dọ ọ wụ́? 13Ẹẹ̀ yị nyị ọza ana hịrẹ nọ ịdị Ohomorihi da, ẹ̀ yị rẹ vị ẹmị Ozi ọza onigirima kẹnẹ ana hụrẹ ẹbẹẹba ịzọọ chí vẹ. 14#Ịrị 21.9A vaa nyị ka à sị ẹmị Ozi ọza onigirimaa tụ́ ẹba, anka Ímosiisi mẹ̀ sị ẹwụ tụ́ ẹba ịnị ụnọmị ịyẹẹyẹ avọọ, 15agụvị aza ana àa sị ayị tụra mị, asị e kuku vu ẹtẹ, ama dị ẹ̀ zụ yára ị́dị Ohomorihi pooro zịna-zịna.”
16Ohomorihi ộ vavọọ sì ịrẹyị anẹhẹ pooro, ne tù ka ộ sị Ozi anị ikonya gene-gene yị anẹhẹ; ka ọza tụra ọza ana àa sị ayị tụra a, asị o kuku vu ẹtẹ, ama dị ọ̀ zụ yára ị́da Ohomorihi pooro zịna-zịna. 17Ẹ yị vị Ohomorihi tụ́ Ozi anị vẹ ẹhẹ ka ọ̀ va jị ịvị yị anẹhẹ. Vị ọ ka ọ̀ va dọ anẹhẹ há nị. 18Ọza ana àa sị ayị tụra Ozi anị ọnọọ, Ohomorihi ọ yị kụkụ vaa jị ịvịị yọ; ama ọza ẹnẹ ẹ̀ yị sị ayị tụra a, ọ sị ịvị jịị yọ da, agụvị ka ọ yị sị ayị tụra Ozi Ohomorihi ikonya gene-gene. 19Ịvị ana aza ẹnẹẹ rị, yị: Ka ẹtohweyi ộ vẹ ịnị ẹhẹ, ama aza ê sì ịrẹyị ịrahụ huna ẹtohweyi, agụvị ka ịsa odivi ẹ́ yaa mẹ nị. 20Ọza anaā mẹ̀ ịsa odivi, o mē sì ịrẹyị ẹtohweyi, ọ mā rẹ vẹ ịnị anị, agụvị ka e ve re ịsa odivi ana aa mẹ. 21Ama ọza anaā mẹ ịzẹyịza, ọnịị̄ vẹ ini ẹtohweyi, agụvị ka ee sì ka avaba ọzọza ò re e ka Ohomorihi aa mẹ ka ọnị ọ̀ọ mẹ̀ ịsa ẹnẹẹ nị.
Ijeesu ọnịrị Ịjọọnụ ọhwọzenyi
22Ẹkụhị ọnya Ijeesu ọnịrị ezirẹma anị ệ zị nọ ịnị ẹtẹ Ijudiya. Ijeesu ộ yà ịzọọ dị aa mẹ ọyịhwenyii yị aza nị. 23Dị Ịjọọnụ yà ẹkụra ana aā hị́ Enoni, ọgụrị ịzị aā hị́ Isarimi nị. Enyi ộ rụrụ tụ́ ịzọọ, dị aza ve tù Ịjọọnụ ịzọọ, dị ọ mẹ̀ ọyịhwọzenyi yị wa nị. 24#Imt 14.3; Ịmk 6.17; Irk 3.19,20Ọza ọọ̀ yị za Ịjọọnụ tụ́ ịnị ẹngwa ịnị ụmẹ ọnọọ.
25Ụmẹ ọnya, dị ezirẹma Ịjọọnụ ọnịrị Aniju ọnya aa nyị ahankata ịrẹyị ẹngụ ọyịnyịna nị. 26Di e ve tù Ịjọọnụ, dị ẹ ka, “Ọga, re, ọza ene ve tù wu ákẹnẹ Ijodani ịhị ọnọọ ọnị ụ dọ ivenu ịrẹyị anị avọọ, ọnị raa mẹ ọyịhwenyii yị aza; dị avaba aza aa nọ ịdị anị nị.” 27Dị Ịjọọnụ tụ́ wa ohi, dị ọ ka, “Ẹ yị nyị ịsị ọza nyẹngụ nyị, ẹ̀ yị vị Ohomorihi ọ̀ọ sị yọ. 28#Ịjọ 1.20Ẹwụ nịnị ụvọta vị onivenu amị ka mâ kà a ka ẹ yị vị ẹma vị Ikirisiti ọnọọ; vị a tụ́ mị dọ ọvịdị anị kẹnẹ nị. 29Ọza ana aa nyị ọnẹẹ, ọ nyị ose anị nị. Ọta anị ana jẹẹ pe e dị aa wụ́ ọngwẹ anị, ọọ̄ jẹ ẹtẹẹtẹrẹ, ọ̀ọ wụ́ ọngwẹ ọva ọnẹẹ. Avọọ m mẹ̀ yà nị, ayị amị o si hine saka-saka. 30Â nyị ka ọnị ọ̀ọ nyị ụbanyịị hu avọọ, dị ẹmị èe weyii hu avọọ.”
Ijeesu ọ hụrẹ ẹbẹẹba vẹ ẹhẹ nị.
31“Ọza ana hụrẹ ẹbẹẹba vẹ, o huna avaba aza nị. Ọza ana hụrẹ ẹhẹ vẹ, anẹhẹ kẹnẹ ọ vị nị; vị ọ rẹ vaa kà ịrẹyị anka anẹhẹ avọọ nị. Ọza ana hụrẹ ẹbẹẹva vẹ, o huna avaba aza nị. 32Ịrẹyị ọnị ọza ọnọọ re, dị ọ rẹ wụ́, ọ va dọ ivenu tụ́ nị, ama ẹ yị nyị ọza ana va dọ ịrẹyị anị. 33Ọza ana àa dọ ịrẹyị anị ộ sị ụvọ tụ́ ọọ ka Ohomorihi vị ọnịzẹyịza. 34Ọza oni Ohomorihi tụ́ vẹ ẹhẹ, vị ana aa kà ịrẹyị Ohomorihi, agụvị ka Ohomorihi ọ́ sị Ụhwẹ Ọnịnịị yọ ẹtẹẹtẹrẹ. 35#Imt 11.27; Irk 10.22Ohomorihi Ada ayị ô sì ịrẹyị Ozi anị, dị ọ rẹ sị avaba ịsavị-ịsavị chire e ụvọ nị. 36Ọza ana àa sị ayị tụra Ozi Ohomorihi ọnọọ, ộ yàra pooro zịna-zịna. Ama ọza ana àa mẹ akamawụ hi Ozi Ohomorihi ọnọọ, ọ yị vaa yàra pooro zịna-zịna.”
දැනට තෝරාගෙන ඇත:
Ịjọọnụ 3: EBTP
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Ebira First Bible © Bible Society of Nigeria, 2014.