Luk̆a 5
5
Yesoşi İptineri Mamguralepe
1Ar ndğas Yeso Genisaret̆işi T̆oba k̆ala dgit̆u. Xalk̆i kogapinu. Yesok hentepes Ğormotişi nenape up̆aramitamt̆u. 2Yesok t̆obaş p̆icis jur feluk̆a kaz̆iru. Maçxomepek kogamaxtes do mosape mutepeşi çxumt̆es. 3Yeso, Simonişi feluk̆as kogexedu. Hemus, “T̆obaş p̆icişen ar ç̆ut̆a dimendrani”-ya uʒ̆u. Uk̆ule kodoxedu do feluk̆aşen, let̆as na renan k̆oçepes ovaizus kogyoç̆k̆u. 4Osinapu muşi oçodinuşk̆ule Simonis, “Derinişa idit. Çxomi oç̆opuşeni mosape ʒ̆k̆aris kodolot̆k̆oçit”-ya uʒ̆u.
5Simonik, “Mance çkuni, mteli seris binç̆işit, çkar mutu var maç̆opes. Mara nena skanis giucare do mosape ʒ̆k̆aris dolop̆t̆k̆oçare”-ya uʒ̆u. 6Maçxomepek Yesos duceresşk̆ule, dido çxomi oç̆opes, t̆ora mosape axaret̆es. 7Majura feluk̆as na ren magverderepe mutepeşis, memişvelit-ya do koducoxes. Hentepeti komoxtes do juri feluk̆ati çxomepete opşes. T̆ora feluk̆a ʒ̆k̆aris gyant̆onet̆u.
8Haya z̆iruşi Simon P̆et̆rek “E Mance çkuni, çkimden mendra dodgiti. Ma k̆rimoni k̆oçi bore”-ya do Yesoşi burgulepe k̆ala gyandruk̆u. 9Mus do hemu k̆ala na renanpes, hak̆o çxomi na ç̆opesşeni goişaşesdort̆un. 10Simonişi magverderepe na renan Zevedaiş skirepe Yak̆ovi do Yaniti Simonisteri goişaşesdort̆un. Yesok Simonis “Mot gaşkurinet̆as, haʒ̆işk̆ule çxomi var, k̆oçi ç̆opare”-ya uʒ̆u.
11Hentepeti feluk̆ape t̆obaşen kogamiones, iri-xolo naşkves do Yesos ek̆aones.
Yesok Msursuyari Ar Mitxani Ok̆aams
12Yeso ar noğas rt̆uşi, msursuyari ar mitxani keʒ̆agu. K̆oçik Yeso z̆iruşi p̆icik̆op̆a keinciru do Yesos, “Mance çkimi, si ginonna ma domoʒ̆imindanam”-ya do oxveʒ̆u.
13Yesok xe gontxu, k̆oçis kononʒ̆u do “Si na iʒ̆imindanare minon”-ya uʒ̆u. K̆oçi hem oras msursuşen muçitu. 14Yesok k̆oçis “Hantepe miti k̆ala mot zop̆on. İdi, p̆ap̆as kiz̆iri! Msursuşen na iʒ̆imindani hentepes ognapinuşeni Mosek na geçinadu tisyape komeçi”-ya uʒ̆u.
15Mara, Yesoşi ambaepe mteli svalepes godgitu. Dido k̆oçepek hemus oucinu do zabunobaşen moçituşeni hemuşa mulut̆es. 16Mukti, dido orapes uk̆oçeli svalepeşa ulut̆u do ixvamamt̆u.
Felci Geçameri Mitxanişi Ok̆au
17Ar ndğas Yesok ivaizamt̆u. Galileaşi do Yudeaşi mteli oput̆epeşen do Yeruşalimişen na moxtesdort̆un Farisurepe do Ʒ̆k̆onda K̆anonepeşi mamgurapalepe hemus guxet̆es. Yesok, Manceşi mencelite zabunepe ok̆aamt̆u. 18Hem oras, k̆oçepek selaces gencireli felci na ağodu ar mitxani Yesoşa moonuşeni inç̆işet̆es. 19Mara Yesoşi gomtis hek̆o k̆oçepe gompit̆es ki, Yesoşa var amaones do otvaşa kextes. K̆eremindepe doʒ̆k̆es do zabuni k̆oçi oncire muşite Yesoşi ʒ̆oxleşe, meydanişe kogyonç̆es. 20Hentepes haşo ocera na uğunan z̆iruşi Yesok, “Ç̆e k̆oçi, k̆rimape skani dixat̆irinu!”-ya uʒ̆u.
21Maç̆aralepe do Farisurepek “Mi ren Ğormotis na ogorams ham k̆oçi? Ğormotişen çkva mitis k̆rimape varp̆a axat̆iren!”-ya do izmones.
22Mara Yesos, hentepek guris na dolingonespe kuçkit̆u do haşo uʒ̆u: “Muşeni haşope izmont? 23Namu çkva k̆olai ren, ‘K̆rimape skani dixat̆irinu’ otkvalui, varna ‘Keiseli do igzali’ otkvalui? 24Mara, K̆oçişskiris dixas k̆rimape oxat̆iruşi xeʒala na uğun giçkit̆an”-ya do zabuni k̆oçis “Si giʒ̆umer, keiseli! Oncire skani dokot̆i do oxori skanişa igzali!”-ya uʒ̆u.
25K̆oçi, irişi ʒ̆oxle manişa eiselu, dokot̆u selace muşi, Ğormoti omʒku do oxori muşişa igzalu. 26İri gak̆virdes do kodoskidesdort̆un. Ğormoti omʒkvamt̆es do doşkurineri “Handğa gok̆vironi mutxanepe kobz̆irit!”-ya zop̆ont̆es.
Levi Yesoşi Mamguralepes Elak̆aten
27Ham dulya ivuşk̆ule Yeso gale kogamaxtu. Levi na coxons ar taxsildari kaz̆iru. Vergi na k̆orobuman k̆alivis molaxet̆u. Yesok hemus “Ma ek̆emaoni!”-ya uʒ̆u. 28Hemuti iri-xolo naşku, eiselu do Yesos naonu.
29Uk̆ule Levik, oxori muşis Yesoşeni ar didi ç̆anda kododgu. Magidas dido taxsildarepe do çkva mitxanepeti koxet̆es. 30Farisurepe do Maç̆aralepek Yesoşi mamguralepes haşo elubarbales: “Tkva muşeni taxsildarepe do k̆rimonepe k̆ala ipxort do şumt?”
31Yesok hentepes “Saği k̆oçis xekimi varp̆a unon, zabuni k̆oçis xekimi uk̆orems. 32Ma ʒ̆ori k̆oçepe var, k̆rimonepe Ğormotişa goktinuşeni mopti”-ya uʒ̆u.
Yesos P̆içvaşeni K̆itxoman
33Hentepek Yesos “Yanişi mamguralepek dido ip̆içvaman do ixvamaman. Farisurepeşi mamguralepeti xolo heşo. Mara skanepek k̆at̆a oras ipxonan do şuman”-ya uʒ̆ves.
34Yesokti hentepes haşo uʒ̆u: “Noğame, mutepe k̆ala kort̆aşi, musafirepes ‘İp̆içvit’ gatkvenani? 35Mara noğame hentepe k̆ala na va rt̆asen ndğalepeti moxtasen, hentepe hem oras, hem ndğalepes ip̆içvanoren.”
36Yesok hentepes haşo memgapura meçu: “Mitik ağani dolokunu meç̆k̆orums do mcveşi dolokunus var gyoburams. Heşo dovasna ağani dolokunuti daxaren, ağani mebureriti mcveşi dolokunus var namskvanen. 37Mitiksani ağani ğvini mcveşi gudapes var dolobams. Varna ağani ğvinik guda gamaç̆k̆idoms. Ğviniti kodiben do gudati gondunun. 38Hamuşeni ağani ğvini ağani gudas dolibinen. 39Do çkar mitik, mcveşi ğvini şvaşk̆ule ağani ğvini var gorums. ‘Mcveşi ğvini ucgin’-ya zop̆ons.”
Currently Selected:
Luk̆a 5: LZZ
Highlight
Share
Copy
Want to have your highlights saved across all your devices? Sign up or sign in
Laz Luke © Bible Society in Turkey (Kitabı Mukaddes Şirketi) 2020