Genèse 21
21
Isaaki màaltam
1Ŋyunti bāań ní ti-Dindaan bīiǹ Saara boon ní ki lafun ŋá min u nìn pōoǹee ki tīī-u. 2Nì min kɔkɔ Abraam nìn púĺ tikpilee, Saara cáá dipool ki màl̄-u kibininjabiki ŋyunti ŋun Unimbɔti nìn pée yóoǹ Abraamee deedee#21.2 Kpèè 18.10, Eebru 11.11.. 3Ní Abraam pú kibiki kin Saara màl̄-uee diyindi yii Isaaki. 4Kibikee ŋá iwiin iniiyee ní Abraam gíí-kì dikpancandi kii Unimbɔti nín nìn tùkū-u yii ú ŋá puee#21.4 Kpèè Atuun 7.8.. 5Abraam nìn cáá abin dilaataal ní ki nín màl̄ u-biki Isaaki. 6Ní Saara bí yii: «Unimbɔti yāntì m láń! Míǹ ní bin kɔkɔ làá gbìl̄ m-bɔti neeyee mun làá lā.» 7Ní ki gíti bí yii: «Ŋma di nìn ŋūǹ kí lì Abraam cee yii man Saara dāa bí kí ŋmàb̄ kibiki? Ama nì míǹ kɔkɔee, m màl̄-u kibininjabiki u-puti poon!»
Bi jìn̄ Agaar nì u-biki Isimaayeel
8Isaaki cíkitì, ní bi gíí-u dibiil. Ŋwiin ŋun bi gíí-u dibiilee ní Abraam yāntì bi jíń jiŋaakpaan ubɔ.
9Saara kpēēyee, Agaar un sá Eejipiti tiŋkinee biki kin u màl̄ Abraamee di bí ki lāā Isaakee. 10Ní Saara bí Abraam yii: «Jà uyumbu nee nì u-biki. Di sá yii u-biki nì man biki Isaaki kaa máaǹ ki kpāfì kí jī a-fakal#21.10 Kpèè Gala 4.29-30..»
11An bɔtee nìn wùn̄ Abraam tikpil, kun puee Isimaayeel mun nìn sá u-biki ní. 12Ní Unimbɔti bí-u yii: «A-jipɔɔn Isimaayeel nì u-na bɔti ń taa wà-si. Gbìl̄ kí tīiǹ Saara, kun puee an sá Isaaki di làá dāá màal̀ a-naantiibi bin làá dāá fōō a-yindee#21.12 Kpèè Room 9.7, Eebru 11.18.. 13Ama, m làá yàntī uyumbu bikee mun ń dāá kpántí ditimbuŋkpaandi baa, kun puee u sá a-maaliŋun ní.»
14Kutaafaau pɔ̀lpɔlee ní Abraam yíkì ki nyàab̄ kpɔnɔb, ní ki dū nnyim ki gbéeǹ kuloou ki dūu būkuǹ Agaar, ní ki nyántì u nì u-biki. Agaar búntì ki tú ki yìiǹ kuteeu pu Beerseeba#21.14 Beerseeba taapu ŋūǹ kí nīn sá yii: «dipùtil lɔkɔu àá biluli lɔkɔu». jandi pú. 15Nnyim dāa dóò kuloou poonee ní Agaar cáá u-biki ki bíl̀ kisubiki kiba taapu mboonni. 16Ní ki sútì ki cūtìi kāl̀ ŋkpaanceeti, kun puee u lī u-neen yii: «Maa là kí ká kibiki nee nín làá kpú puee.» An puee u kāń ndan ní ki sūǹ ki yīkintí. 17Niinee Unimbɔti gbìl̄ kibikee bíi sūǹ, ní u-tuuŋŋu kālìń yilpu ki yíiń Agaar ki bí-u yii: «Agaar, ba kpá-si ní? Taa fàŋkì tiba, kun puee laakin a-biki bí nee, ki-siim bàn̄ Unimbɔti. 18Yīkì kí cùú yòon̄ kibiki kí nīn ŋúb́-kì tiŋan, kun puee m làá yàntī kí dāá nīn sá ditimbuŋkpaandi baa ní.» 19Ní Unimbɔti yāntì u-nimbiliŋ ŋāatì ní u wál̀ dinyimbɔbil nì nnyim, ní ki cūtì ki lúń ki gbéeǹ kuloou ní ki cáań ki nyūntì u-biki.
20Unimbɔti yúl̀ kibikee boon ní kì wíiǹ ki gbíntì kupɔɔun ki kóò, ní ki kpántì ukpan ki tòó ipiin. 21U nìn kóò kupɔɔu kun nìn bí Paaran tiŋkinee ní u-na dāa cáá unimpu Eejipiti ki tīī-u.
Abraam nì Abimeeleeki pūtì ki pōoǹ tɔb
22Ŋyunti gbantee ní Abimeeleeki nì u-janjakpiliu Piikool dɔ́miń Abraam cee ní Abimeeleeki bí-u yii: «Ti ká yii tin kɔkɔ a bí ki ŋáańee, Unimbɔti bí a-cee. 23Míǹ puee pùtī nì Unimbɔti doo nee yii aa làá nyā man nì m-biyaamu nì m-naantiibi boon, ní ki làá ŋá man nì m-tiŋki kin poon a kóò nee tiŋan kii ti mun nín ŋá-si tiŋan puee.» 24Ní Abraam kíí-u yii: «M pūtì yii m làá ŋá míǹ».
25Ama ní Abraam dū lɔkɔ un u gbìn̄ ní Abimeeleeki tɔntɔnliibi ŋá mpɔn ki fōōyee bɔti ki bíl̀ u-nimbiin. 26Ní Abimeeleeki bí-u yii: «Maa nyí un di túń an tundee. Si mun a-ba kaa lī tibɔti gbanti m-cee, maa tí gbìl̄-tì ubɔ cee dalba, see díǹ.» 27Niinee Abraam cúú ipii nì iŋoobu nì inaa ki tīī Abimeeleeki, ní bi-liitil pūtì ki pōoǹ tɔb. 28Ní Abraam gāntì ipisal iluli ki yóoǹ. 29Abimeeleeki ká mimmee ní ki bālifì-u yii: «Ba pu ní a gāntì ipisal iluli nee?» 30Ní Abraam kíí-u yii: «M gāntì-i ki síiǹ kí tīī-si án nīn sá kudaaŋŋu yii man di gbìn̄ lɔkɔ nee.» 31An pu ní bi yíì mpaan gbanti yii Beerseeba, kun puee niin ní bi-liitil nìn pūtì.
32Bi nín pūtì ki pōoǹ tɔb Beerseeba niinee, ní Abimeeleeki nì u-janjakpiliu Piikool fātìi nín kùǹ bi-dumpu Fiiliistii yab tiŋkin. 33Ní Abraam cóoǹ busubu bun bi yíì yii tamariisee Beerseeba ní ki jáam̀ ti-Dindaan Unimbɔti un pée bí kí nīn cá jaanjaanee. 34Abraam nìn kāl̀ Fiiliistii yab tiŋkin ki yúntì tikpil.
දැනට තෝරාගෙන ඇත:
Genèse 21: BASSARDC
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
BIBLE EN N'TCHAM (Bassar) © Alliance Biblique du Togo, 2013.