KENESE, 7
7
O LE MATAUPU VII.
O le lolo.
1Ua fetalai atu Ieova ia Noa. Ina ulu atu ia o oe atoa ma lou aiga uma i le vaa; auā ua ou iloa oe o le amiotonu i o‘u luma i lenei tupulaga. 2Ia e ave e taifitu i manu vaefa uma e mamā, o le manu poa ma le manu fafine; a o manu vaefa e le mamā e tailua ia, o le manu poa ma le manu fafine. 3O manu felelei foi e taifitu, o le manu poa ma le manu fafine, ia ola mai ai a latou fanau i le fogāeleele uma. 4Auā e toe fitu aso ona ou faatotoina ifo ai lea o le ua i le lalolagi e fagafulu ona ao e fagafulu foi ona po; ou te soloiesea foi i le fogāeleele o mea ola uma ua ou faia. 5Na faia foi e Noa e tusa ma mea uma na poloai atu ai Ieova ai te ia. 6O le ono selau o tausaga o Noa na oo ai le lolo i le lalolagi. 7Ua ulu atu Noa, ma ona atalii, ma lana avā, ma avā a ona atalii faatasi ma ia i le vaa ona o le lolo. 8O manu vaefa e mamā, ma manu vaefa e le mamā ma manu felelei, atoa ma mea uma e fetolofi i le eleele, 9ua tailua ona ulu atu i latou ia Noa i le vaa, o le manu poa ma le manu fafine, e faapei ona poloai atu ai le Atua ia Noa. 10Ua oo foi i le aso fitu, ona oo ai lea o le vai o le lolo i le lalolagi. 11O le tausaga e ono selau o le olaga o Noa, o le masina e lua, o le aso e sefulu ma le fitu o le masina, o le aso lava lea na lepeti ai o punāvai uma o i le moana sausau, ma ua faaavanoaina pupuni o le lagi. 12Sa i ai le uaga i le lalolagi i ao e fagafulu ma po e fagafulu. 13O le aso lava lea na ulu atu ai Noa, ma atalii o Noa, o Semu, ma Hamo, ma Iafeta, ma le avā a Noa, ma avā e toatolu a ona atalii, e faatasi ma i latou, i le vaa; 14o i latou nei, ma manu o le vao uma e taitasi ma lona uiga, ma manu vaefa fanua uma e taitasi ma lona uiga, ma mea fetolofi uma e fetolofi i le eleele e taitasi ma lona uiga, ma manufelelei uma e taitasi ma lona uiga, o mea felelei uma e taitasi ma uiga, eseese, 15ua latou ulu atu foi ia Noa i le vaa, e tailua i mea ola uma o i ai le mānava ola. 16Ua latou ulu atu, o le poa ma le fafine i mea ola uma, ua latou ulu atu, e faapei ona poloai atu le Atua ia te ia; ona pupuni ai lea e Ieova ia te ia. 17Sa i ai foi le lolo i le lalolagi i ona aso e fagafulu; ua faatuputeleina le vai, ma ua opeopea ai le vaa, ua neetia foi i luga o le eleele. 18Ua malo lava le vai, ma ua matuā faateleina i le lalolagi; ua alu foi le vaa i le fogāvai. 19Ua matua malo tele lava le vai i le lalolagi; ma ua ufitia ai mauga maualuluga uma o i lalo o le lagi uma. 20E sefulu ma le lima kupita na malo ai le vai i luga, ma ua ufitia ai mauga. 21Ona faauma ai lea o le ola o mea ola uma na feoai i le lalolagi, o manu felelei, ma manu vaefa fanua, ma manu feai, ma mea fetolofi uma na fetolofi i le eleele, 22atoa ma tagata uma; na faauma le ola o mea uma sa i ai le mānava o le ola i o latou pogaiisu i mea uma sa i le eleele matutu. 23Na faaumatia o mea ola uma sa i le fogāeleele, o tagata, ma manu vaefa, ma mea fetolofi, atoa ma manu felelei; na faaumatia i latou ai le lalolagi; na o Noa, i le ma i latou sa i le vaa ma ia ua totoe. 24Sa malo le vai i le lalolagi i ona aso e selau ma le limagafulu.
Currently Selected:
KENESE, 7: SOV
Highlight
Share
Copy
Want to have your highlights saved across all your devices? Sign up or sign in
Samoan Edited Old Version © Bible Society of the South Pacific, 2017.