Tuk 10
10
Gaat gan Nowa
(1 Kuɛ̈n 1:5-23)
1Täämɛ ti̱ti̱ kɛ kɛn ciööt gan Nowa ni Cɛm kɛ Ɣɛ̈m kɛ Ya-pɛth tëë ci kɛn kɛ di̱eth kɛ kɔr nyɔac.
2Gaat Ya-pɛth kɛn ti̱n, Go-mɛr kɛ Ma-gog kɛ Ma-dhay kɛ Ya-wan kɛ Tu-bal kɛ Mɛ-cɛk kɛ Ti-rath. 3Go-mɛr gaatkɛ kɛ Ac-kä-nadh kɛnɛ Ri-path kɛ To-gar-ma. 4Kä Ya-wan gaatkɛ kɛ Ɛ-li-ca kɛ Tar-cic kɛ Ki-tim kɛ Ro-da-nim. 5Tɔ̱tɔ̱ kɛ kɛn diëëth nɛɛni tin ciaŋkɛ ni gëk bäpdiit. Tɔ̱tɔ̱ kɛ kɛn pek gan Ya-pɛth rölikiɛn kɛ ciëëŋkiɛn kɛ döörikiɛn kɛ thukiɛn ti gööl.
6Gaat Ɣɛ̈m ti̱n, Kuc kɛ I-jëp kɛnɛ Put kɛ Kɛ-naan. 7Cu gaat Kuc a Thɛba kɛnɛ Ä-wi-la kɛ Thab-ta kɛnɛ Rɛɛma kɛ Thab-tä-ka. Cu gaat Rɛɛma a Cɛba kɛnɛ Dɛ-dan. 8Kä cu Kuc Nim-rɔd di̱eth, kä cuɛ la jio̱l nɛɛni tëë bum ni kɛn ɛlɔ̱ŋ wi̱i̱ muɔ̱ɔ̱n. 9Cu Nim-rɔd a kääk le̱e̱ni mi lia̱a̱ nhiam Kuɔth Nhial. Ɛ jɛn ɛ ni̱n la wa i̱, “Päärɛ kɛ Nim-rɔd mëë mɔ kääk le̱e̱ni mi lia̱a̱ nhiam Kuɔth Nhial.” 10Cu wi̱i̱ tëë ruaacɛ rɔ lɔth ni rɛɛk Ba-bɛl kɛ Ɛ̈-rɛk kɛnɛ A-kad, te kɛn diaal rɛy rööl Ci-nar. 11Cuɛ jiɛɛn ɛn ro̱o̱l ɛmɔ kä cuɛ wä ro̱o̱l A-thi-ri-ya, kä cuɛ Ni-nɛ-be täth kɛ Rɛ-böth-ir kɛ Kala 12kɛ Rɛ-thɛn kam Ni-nɛ-be kɛnɛ Kala, min la rɛk in di̱t ni jɛn. 13Cu I-jëp Lu-dim di̱eth kɛnɛ Ä-na-mim kɛ Lɛɛ-bim kɛnɛ Nap-tu-im, 14kɛ Pa-ru-thim, kɛ Ka-thä-lim kɛnɛ Ku-riit kɛ min mɔ gua̱ndɔɔŋ ji̱ Pi-li-thɛt.
15Gaat Kɛ-naan kɛ Dhi-don min la gatdɛ min kɛ̱̈ɛ̱̈ kɛnɛ Ɣɛ̈th, 16kä cu Kɛ-naan a gua̱ndɔɔŋ ji̱ Yɛ-buth kɛ ji̱ Ɛ-mor kɛ ji̱ Gir-gac 17kɛ ji̱ Iwi kɛ ji̱ Arka kɛ ji̱ Thiin 18kɛ ji̱ Ar-wad kɛ ji̱ Dhɛ-mar kɛnɛ ji̱ Ä-math. Kɛ gua̱a̱th ëë wä nhiam cu thuk duëli gan Kɛ-naan rɔ däkä piny 19a cu pe̱k këth dhɔaariɛn rɔ lɔth ni kä Dhi-don a wä nikä Gɛ-raar a räth ni Gadha, kä a lɛnɛ nikä Thɔ-dɔm kɛnɛ Go-mo-ra kɛ A-dɛ-ma kɛnɛ Dhɛ-bo-yim a räth ni Laca. 20Tɔ̱tɔ̱ kɛ kɛn gaat Ɣɛ̈m kɛ rölikiɛn kɛ ciëëŋkiɛn kɛ dho̱rikiɛn kɛ thukiɛn ti gööl.
21Kä Cɛm däman Ya-pɛth in di̱i̱t cuɛ lɛni tekɛ gaat, kä ɛ jɛn gua̱ndɔɔŋ gan E-bɛr diaal. 22Gaat Cɛm kɛ kɛn Ee-lam kɛ A-cur kɛ Ar-pak-cad kɛ Lud kɛnɛ Ä-ram. 23Cu gaat Ä-ram a Udh kɛ Ɣul kɛ Gɛ-thɛr kɛnɛ Mac. 24Cu Ar-pak-cad a gua̱n Cɛla, kä cu Cɛla E-bɛr di̱eth. 25Cu E-bɛr gaat da̱ŋ rɛw di̱eth, gat kɛl cɔalɛ Pɛ-lɛg kɛ ɣöö ni̱nikɛ cua naath diaal däk gööli wi̱i̱ muɔ̱ɔ̱n, kä cu ciöt däman a Yɔk-tan. 26Cu Yɔk-tan Al-mo-dhad di̱eth kɛnɛ Cɛ-lɛp kɛ Ä-dhar-ma-wɛth kɛ Yara 27kɛ Ä-do-ram kɛ U-dhal kɛ Diik-la 28kɛ O-bal kɛ Ä-bi-meel kɛ Cɛba 29kɛ O-për kɛ Ä-wi-la kɛnɛ Yo-bab. Kɛn tɔ̱tɔ̱ diaal kɛ kɛn gaat Yɔk-tan. 30Kä cu gua̱a̱th ëë cikɛ cieŋ thi̱n rɔ lɔth ni kä Meca min wä Thɛ-par a räth päämni lotdä känyä ca̱ŋ. 31Tɔ̱tɔ̱ kɛ kɛn gaat Cɛm rölikiɛn kɛ ciëëŋkiɛn dho̱rkiɛn kɛ thukiɛn ti gööl.
32Ti̱ti̱ kɛ kɛn gaat Nowa kɛ kɔr nyɔac kɛ pe̱k karikiɛn kɛnɛ dho̱rkiɛn. Kä kɛ cu döör wec muɔ̱ɔ̱n diaal rɔ di̱eth kɛ kɔr nyɔac.
Currently Selected:
Tuk 10: nusNHB
Highlight
Share
Copy
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.