JOHAN 9
9
Mitmohpaw A Dansah
1Jesu nynh po a ccia lyakhe a pui takaw te a mitmohpaw lu kheit kha a muih. 2A zuitu hae nynh, “Sazae, e paw nynh mitmohte a puipaw hynh, hum seinaw keiccu mou, amaw tou a sei, tuhkhyhze a nung te a paaw tou a sei hae?” cite a khia hae. 3Jesu nynh, “E ccungccapaw mah sei khyh, a nung te a paaw mah sei khyh hae, a tungvaw kya Pachia ryalawnaw langku khylan mitmohte yn puipaw nynh thua. 4Ninthu ccyh kya kae yn sawtupaw rya kha ah lah cih oh; hum ccungccaw nynh san rya a law kho khyh ccyh khuazi tuh yn thua cih. 5Laephi kya ka um lungkhu balyn kae tuh laephi awnaw nynh ka thua,” a ci.#Mat 5.14; Joh 8.12 6Tuhte a ho koute Jesu nynh laephi kya a tuing thoi zah tuiccua kha a rae koute mitmohpaw mit kha a noipya. 7Tuh-e paw kha, “La cceih, Siloam kuaa kya la singkuh,” a cipya. (Siloam cipaw asuilan tuh ‘Saw’ cipaw nynh thua). Tukeiccuze aning nynh cceih zah a singku, te ngawmuihte a ki. 8Tukeiccuze a innpaw hae te langmawlya looh ngiakute a um lyaze a la muih boi hae paw nynh, “E paw hynh haung zah leih a ngiakuhpaw kha thua khyh tou?” a ci hae. 9Ccungccaw abang nynh, “Amaw maw nynh thua,” a ci hae; mingccang hae nynh, “Thua khyh, amaw te a lokuh hae paw nynh thua,” a ci hae; te aning nynh, “Kamaw maw hynh nynh ka thua,” a ci. 10Tukeiccuze minmin nynh, “Pawtemou na mit a aw?” cite a khia hae. 11Aning nynh, “Jesu a ci hae paw ccungccapaw nynh tuiccua kha rae zah ka mit kya yn noipah koute, ‘Siloam kuaa kalan la cceih lah la singkuh,’ yn cipya, te ka cceih zah he ka singkuh tuh ngaw ka muih vae,” a ci. 12Minmin nynh, “Aning tuh teimou a um?” cite a khia hae. Aning nynh, “Ka nyh khyh,” a ci.
Farasi hae nynh Bya Khia Rarounaw
13Minmin nynh langmawlya a mitmohpaw kha Farasi hae kalan a cciakhae hae. 14Jesu nynh tuiccua kha rae zah tuh-e paw mit a awsah lya tuh sabbath nin nynh thua. 15Farasi hae nynh mah tuh-e paw tuh, “Pawcihtemou ngaw na muih?” cite bua a khia hae. Aning nynh minmin kha, “Aning nynh ka mit kya tuiccua yn noipah zah, he ka singbiakuh tuh ngaw ka muih vae,” a cipya hae. 16Tukeiccuze Farasi hae abang nynh, “Tuh-e ccungccapaw tuh Pachia kyate yn thuapaw thua khyh, pawccecize sabbath nin kha sung khyh,” a ci hae. Mingccang hae nynh, “Pawcihtemou miseipaw lu kheit nynh hynhcihawpaw muihsahnaw tuh a rae kho cih?” a ci hae. Te minmin laku kya phiakunaw a um. 17Minmin nynh mitmohpaw kha, “Na mit ae awsah keiccu tuh-e paw tuh pawtemou na tua?” cite bua a khia hae. Mitmohpaw nynh, “Aning tuh profeh lu kheit nynh thua,” a ci.
18Thuasalama ngaw bua a muihpaw a nung te a paaw kha a ko makhia hae tuh, aning tuh a mitmoh zah ngaw bua a muihpaw nynh thua cite Judah hae nynh zyn khyh hae. 19Minmin nynh a nung te a paaw kha, “E paw hynh a pui takaw te a mitmoh na ci oh paw nae ccapaw thua tou? Tuhteze atu pawcihtemou ngaw a muih?” cite a khia hae. 20A nung te a paaw nynh, “E paw tuh kae ccapaw thua zah, a pui takaw te a mitmohpaw nynh thua cipaw ah ny oh. 21Thuasalama pawtemou atu ngaw a muih cipaw te hum nynh mou a mit a awsah cipaw tuh kae nyh khyh; aning tuh piccan thua vae zah amaw kha khia oh, amaw maw nynh a hothya cih,” a ci hae. 22A nung te a paaw nynh Judah hae raw a ri hae keiccuze e bya hynh a ho hae; pawccecize Jesu tuh Messiah nynh thua cite a zynpaw miakaw tuh sinakok kyate dee lan cite Judah hae nynh nawccawnaw a hoi vae hae. 23Tukeiccuze a nung te a paaw nynh, “Aning tuh piccan thua vae, amaw kha khia oh,” a ci hae.
24Tukeiccuze mitmohpaw kha vae ningnaw ko hae zah, “Nang nynh Pachia kha phu-esah tua! Tuh-e paw tuh miseipaw nynh thua cipaw kae ny,” a ci hae. 25Aning nynh, “Tuh-e paw tuh miseipaw athua te thua khyh ka nyh khyh. Ccangkheit ka nypaw tuh, kae tuh ka mit a la moh, atu ngaw ka muih vae,” a ci. 26Minmin nynh, “Pawtemou aning nynh ae cyi? Pawcihtemou na mit ae awsah?” cite bua a khia hae. 27Aning nynh, “Phe kae hopya vae oh, na ngae khyh oh, pawccemou bua na thae ry oh? A zuitu lang na tang ry oh tou?” cite a khung hae. 28Minmin nynh amaw kha sarya hae zah, “Nang hynh nynh a zuitu na thua, kaening tuh Moses zuitu hae nynh kae thua. 29Pachia nynh Moses kha bya a hopya cipaw kae ny, thuasalama e paw tuh paw kyate nynh yn thua cipaw kae nyh khyh,” a ci hae. 30Tuh-e ccungccapaw nynh, “Aning nynh ka mit mang yn awsah pite aning tuh paw kyate nynh yn thua cipaw na ny khyh oh paw tuh ngaeangthua lan kou um! 31Pachia nynh misei hae bya tuh thaepah khyh hae cipaw kha ah ny oh; thuasalama Pachia kha beik zah a rynaw a raepaw bya tuh a ngaepya. 32Mitmohte a puipaw ccungccaw mit kha lukhakheit nynh phe a awsah cipaw tuh laephi thotakaw te thae boi lan um khyh. 33E ccungccapaw tuh Pachia kyate yn thuapaw a la thua khyh lanze, aning nynh pawsang mah cyih kho lan khyh,” a ci.
34Minmin nynh, “Na pyn balyn seinaw mawcci te nae puipaw nang nynh tou kaening ccangpya lan nae zuakuh?” ci hae zah sinakok kyate a dee hae.
Muisaw Mitmohnaw
35Farasi hae nynh mitmohpaw kha phe a dee hae cipaw Jesu nynh thae zah, mitmohpaw kha he a muih tuh, “Pachia Ccapaw kha na zyn tou?” cite a khia. 36Aning nynh, “Bawipaw, aning tuh hummou athua? Kae nynh ka zynthya nawlan yn hopya tua,” cite a khung. 37Jesu nynh, “Amaw kha phe na muih vae, atu nang te bya na beihkuh oh paw hynh amaw nynh thua,” a cipya. 38Aning nynh, “Bawipaw, ka zyn,” ci zah amaw kha a beik. 39Jesu nynh, “Ngawmuih lei hae paw kha ngawmuihsah lan hae zah ngawmuih hae paw kha mih mitmohsah lan hae cite byapia khylan nynh hynh-e laephi vawlan kae thua,” a ci. 40Jesu pe a um hae paw Farasi hae abang nynh hynh-e bya hynh thae hae zah Jesu kha, “Kaening so kae mitmoh tou?” cite a khia hae. 41Jesu nynh, “Mitmoh hae na la thua oh ze, seinaw na hoi cih lei oh paw; thuasalama atu nanning nynh, ‘Ngaw kae muih,’ na ci oh keiccuze nae seinaw tuh phang a um,” a cipya hae.
Currently Selected:
JOHAN 9: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.