Tanieo 10
10
Teoso nanarifa Tanieo kobo nematamonaka.
1Siro Besia ka towisawa tohehimarika. Towisawa tohi ka ano famaha nowati ka ano ya Tanieo oha Beotesasa oha ona owa ni ya Teoso ati yana nemarika. Teoso ati omite ati fiya tonakara. Ati nihinabisaremarika owa ni ya. Manakobisa yama we one ya yama owatowahamahamaro ama oke, yama Teoso hinamoa owaharo. 2Teoso ati omiti ka oyawamaro ama oke. Oyawi ka semana 3 namaroke. 3Haha yama ya yamata kabi amosa okobaramaro oke. Bani okobarihi onahamaro oke. Fi ofarihi, otati kone siri orihi, onahamaro oke.
4Abariko taiti ka yia 24 ya owabasahamaro oke faha ehebote Tikiri tohaha witi ya. 5Teoso nanarifa owibote onahamaro oke makari riyo tohaha weye nari, tosi atori oro amosabote toahari. 6Yati oya kana nima mese nemarika, oya kanahari. Bahi yebe kani nima noko bako nemarika. Noko e nemarika, yama hiri ni isi wataha nima. Mano toha, iso toha ne oya kani e nemarika, borosi oya kani nima. Ati yana ne me tamaha me ati nima ati nemarika.
7Me ya otaba yama owahamaro oke owaharia owa. Owa ya me taba yama me awara me kakomehamaroke. Me kana ni tokomamaroke, me wahiyabone mati. 8Owaharikosamaro oke, yama nafiha owaha owa, Teoso hinamoaro. Toba onahamaro oke, owakomeha owa. Oko kiti fawa namaro oke. 9Teoso nanarifa ati omita ohabakosa osahamaro oke onokosi ya. 10Mano ya owa itimisame owahamaro oke owisi yobati ya, omano kawaha owa.
11Teoso nanarifa ati yana nemarika. "Tanieo Teoso tiwa nofi nafi ka owa yosehareka tiwa ohiyarabone owa. Tiwahi tiwisi ya, owati timitibeya", ati nemarika.
Owahamaro oke, hoyahoya kana ona owa oko nafi. 12Ati yana namatasemarika. "Tanieo watorima tinahi. Teoso ha ni yana timaro ka tiwati nafi Teoso mitate amaka, titaminaramone tina tiwa Teoso nokosi ya, tika yama watobone Teoso ta nebona tina tiwa. Okehara oke, Teoso tiwati mite ehene. 13Hinamati Besia ka mera nanarifa tohe owa mono nareka, semana terei na ya. Owaharihara oke mata, Besia ka towisawa owa me mono na owa. Faya Mikeo Teoso nanarifa me ka hiti owa tohe kakehareka owa kasomebanoho. 14Faya okehara oke yama okominabone owa tiwa ni ya, yama natehabonehe te one me ni ya. Haha yama tiwaha Teoso hinamoa yama natehaba kaminineke".
15Owa hiyare owati watara onokorisamaro oke bofe ya. 16Teoso nanarifa e nima ne obono boyo nemarika fahi. Faya owati yana namaro oke Teoso nanarifa ohiyara owa, wahari onokosi ya. "Oko hiti haha yama owaha ihi kori okasara oke, oko kiti fawa na owa. 17Himata nima owati ribe, tiwa ni ya, onafira owa, tinafiha tiwa. Oko kiti fawa nara oke. Oko hasi ni fawa nima nara oke".
18Faya owa boyo namatasemarika. Oko kiti kamahamaro oke fahi. 19Ati yana namemarika. "Teoso tiwa nofaka. Makoni tiwatorabone tike. Teoso tiwa kakatomehibonaka. Tikitahi. Tibo bayihi".
Oko kiti nafimisa owati yana namaro oke fahi. "Tiwati saihi. Tiwehene oko kiti nafike waha".
20-21Ati yana namatasemarika. "Yama tiwatoni haro oki karo, tiwa ohiyarabone owa? Okehara oke, yama hani ati okominabone owa tiwa ni ya, Teoso ka yama hani ati, ati fiya tonahaba watararo. Hiba, hinamati Besia ka mera nanarifa tohe mono onahabone oke mata. Afa yama mowa ni hawa tohi ya inamati owa Keresia ka mera nanarifa tohe tohamakebonaka. Me mowa ona owa kasomeba watakara. Mikeo ta oharika, owa kasomari, Ihayeo mera nanarifa tohahari".
Currently Selected:
Tanieo 10: jaaR
Highlight
Share
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.