LUK 4
4
Jisu Kesemen
(Mt 4:1-11; Mk 1:12-13)
1Tsüselo Jisu le Kenshün Kapu no a-sü pvü tse Jordan züri nken ryü zhü; tsontsin kapu gü no a-nsü zen-o tehen nyu gü, 2jon henzi Satan no a-semen. Lo tsügwünkho tsü aphu a-le thame tyü mvu; lo jon tsü pen kela siki we a-le nnyon la.
3Tsontsin Satan le a-ka, “Nle Sunggigü Nyugü yatselo, tso higü ka jozo shüo no tensü ngwalo chi!”
4Tsontsin Jisu le a-ka, “Temi le tensü genyu nti rhünlo hümvu, tsonkethyü thu njü,” tsonla.
5Tsüselo Satan le a-zen-o ketetso nme ge nsinlo-o kazü nyu rünyi keda aphu gwüngwa nme thyü tsin pe a-hi. 6Tson-o Satan le a-ka, “Ale nno hi aphu so keda thyülo kegwa kekvu lo hinyu tha kegwa aphu pe ntsü lati; kechamvule tha hidan hi aphu pe atsü laso, lo ale pe akenyünyu tsülo gwa kela si genyu. 7Tsügenyu nle nkhün tsügü a mhundyü nyu arüshvu yatselo hi aphu pe nhon thyü lati!” tsonni.
8Tsüselo Jisu le a-ka, “Nle n Npugü Sunggigü rüshvulo, lo a-lo nti thyülo mvulo shvu,” tsonkethyü thu njü nyo.
9Lo tsüsika Satan le a-zen-o Jerusalem ki gü a-no Jerusalem Kershvuka pesun ge binlo-o a-ka, “Nle Sunggigü Nyugü yatselo nle hige hiche tsü chi. 10Kechamvule, ‘A-le ngenyu a-jolonyu nishüo anyugun no n ntsenlo ti,’ 11lo nno tso ge chetsü njon nthyü mvulo nrün genyu anyugun ben pe nkhi pen loti, tsonkethyü thu kenjü genyu.”
12Tsüselo Jisu le a-ka, “Nle Npugü Sunggigü semen loshvu, tsonkethyü zo pe bin la sele,” tsonla.
13Lo Satan le a-semen nrün pe a-semen penla ntsin a-khelao tinla.
Jisu Le Galil Kazü Nyu A-thothyü Keso
(Mt 4:12-17; Mk 1:14-15)
14Tsüselo Jisu le Kapu gü kekvu nyu rani sen-o Galil kazü nyu gunla. Tsükatsü tsükho liki hiki kebin temi aphu a-rüla zo nyhun gunla. 15Lo a-le anyugun sinagog ka nyu me senthyü lo me-e a-shwen kü.
Nazaret Nyu Jisu Kenikela
(Mt 13:53-58; Mk 6:1-6)
16Tson-o a-le nduka gü yhun kethyü rünyi Nazaret nyu tsü ryü. Lo Sabbath jon nyü a-jvü hontse a-le sinagog ka nyu yülo, lo jo nme swü titse solo. 17Lo mele sidyükeshagü Isaya lesü khipe a-ben nyu shü. Tsüselo a-le lesü tsügü he yügü, jo hidan hi hyulo:
18“Npugü Kapu le age bin;
lo a-le ano jolokegwa gü pe
kendinyu senthyü lotse
lo a-yhükepo nyu no tha hyu lotse
kethyü genyu akejü lo.
A-le ano do kethyünyu ho nishü
nrün,
lo meno nshwen kehünyu no bwenlo nrün
jo gü zope mezen lotse
19tson-o Npugü le kenilo nrün gü chen
zope me hizin shülo tseo anishü!”
20A-le tsonshüo lesü hekeminlao pe me chülo thyü kehü gü tsülao bin tinla. Lo tsükatsü sinagog kanyu kebin nyu aphu a-nri ryü bin. 21Tsügenyu a-le anyugun ka, “Nthu hagun le sha kebin ka ketsin lesü jo higü le pen laso.”
22Tsontsin anyugun aphu a-mün nyu chwikeryü temi shwikenjün jo tsügenyu anyugun dun thyüo a-shwen sola. Tson-o anyugun le, “Higü hile Josef nyugü kemvu ole?” tson.
23Tsüselo a-le anyugun ka, “Dawa kesha gü, nle n npvü nkenilo chi, tsonkethyü mele zo kehü hontse hagun ko aka zo ti; tsüntimvule hagun le ahi no, nle Kapernaum nyu thyükeshü, tsüdan tsü nkazü nyue thyüshü chi, tson-e ti.” 24Lo a-le, “Ale hagun ka zo tsentsü shüti le, sidyükeshanyu nme-e a-npvü a-sunphen nyu we me le a-no gwa letse hü mvu.
25“Tsüntimvule ale hagun ka zotsentsü shüti; nduka Elia phou ka Israel nyu dan nyu maginyu kechon le bin hü tsükatsü chenshen-o shye tsero tsangkenri khinla; tsüselo kazü tsünyu chenda thyü pe ketetsin thyü ryü. 26Ai Elia nipe Sodin kazü nyu Zarepta rünyi nyu maginyu nme ka nyu keshü nyeki magi kechanyu nme-e kanyu shü mvu. 27Lo Elisha sidyükesha phou ka Israelnyu dan nyu nyun le ketyünyu kechon le yhun hü, ai Sirianyu Naman tsekethyü gü nyeki, kechanyu nme-e thyü kenshün shü shwimvu.”
28Tsontsin sinagog kanyu kebin nyu aphu jo tsügü sha pe anyugun kenyü mvusalo, 29Tson-o anyugun le phen nyu tsü a-hüla, tson-o a-sü zen-o anyugun le rünyi thyü kebin rincho a-khin pvü din kethyü nme ka gun, kechamvule anyugun le a-kewhen pe tsünyu shüla kenyü genyu. 30Ai a-le anyugun dan nyu tsonchü chwio a-npvü a-kenyü ki gunla.
Nshünkemvu Kapu Le Temi Nme Zenkehü
(Mk 1:21-28)
31Tson-o a-le Galil kazü Kapernaum rünyi nyu nshyeryülo, tson-o a-le Sabbath jon nyü me senthyü. 32Lo anyugun le a-le anyugun senkethyü jo genyu anyugun dun thyüla; kechamvule a-jo le kvusa kethyü genyu. 33Tsükatsü nshünkemvu kapu kezen nme le sinagog ka nyu bin-o nra sen-o, 34“Ei, Nazaretnyu Jisu, ngun kengüo nyu thyü mon? Nle agun nkela titse ryü ole? Nle segü yo ale nsha; nle Sunggigü temi kenshün gü le.”
35Tsontsin Jisu le a-kesüo, “Nle matse tinla, tson-o a-nyuki tinchwila chi!” tsonshü. Tsüselo tero gwakemvu gü tsüle temi gü pvükelilao a-npvü temi tsügü nthyünnyü simvu tse a-ge chwila.
36Tsügenyu temi aphu a-dun thyüla, tson-o anyugun khinyunyu ka, “Temi higü jo hile nyu tsethyü hihontse la? Kechamvule temi higü hile kekvu sen-o zen mvulo keho johoshü pe nshünkemvu kapu dan tsü shülo anyugun le a-jo zen-o tinla kehü hile.” 37Tsüselo tsü temhun rünyi thyü kebin aphu a-rüla zope kesü thyülo la.
Jisu Le Temi Kechon Thyü Ngwakeshü
(Mt 8:14-17; Mk 1:29-34)
38Tsüselo a-le sinagog kanyu chwilo njüo Simon kanyu yü, tsükatsü Simon nu a-jvü le rüka sabin. Lo anyugun le a-rüla zo pe Jisu hishü. 39Tson-o a-le tsügi khoka bin-o kerüka tsü kesüshü ntsin, a-le rüka mvula. Tson-o tsügi le whütse sogü anyugun lothyü tinla.
40Lo yhüko che nrün münki we temi kehokenyü nyu aphu zen-o a-ki ryü; lo a-le aben shwen pe anyugun ge shüo anyugun aphu thyü ngwashü. 41Tsükatsü tero gwakemvu dan le temi kechon ge chwiryüo nra nhyuo, “Nle Sunggigü Nyugü le,” tson. Ai anyugun le a-le Khrista gü letse kethyü shalo kela genyu a-le tsüdan kesülao anyugun no jozo mvula.
Jisu Le Jünzo Kechwi
(Mk 1:35-39)
42Lo tsangbenlo ntsin a-le mele hü kemvu bin nme ki gun, tsontsin temi dan me le a-fü ryüo a-tilo tson-o anyugun le a-khin zen bin nyü sola. 43Ai a-le anyugun ka, “Ale Sunggigü jolokegwa pe rünyi kechanyue senthyü shü mvulo shvu; kechamvule tsügenyu a nikeshü genyu.” 44Lo a-le tsükitsü le Galil kazü nyu me senthyü kehü gwünzin.
දැනට තෝරාගෙන ඇත:
LUK 4: REGSBSI
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.