LUK 15
15
Nmhenkela Tanyü Gü
(Mt 18:12-14)
1Tsükatsü khajana keshvu nyu lo kemunyu aphu a-jo nyü titseo a-kho nni ryü. 2Tsüselo Farisinyu lo tha keshatsin nyu ju le tsü kenyon-o, “Temi higü hile kemu nyue zen-o tyütsü kehü hile la!” 3Tsontsin a-le jokejvü higü hi pe anyugun nthon-o:
4“Hagun dan nyu temi peha le tanyü tsi le bin-o tsü dan nyu nme nmhenla yatselo, henteküo tekü ju khepe tehenyu shülao gü nmhen kela gü hyulo kemvuthen fü hü kemvu segü le bin nla? 5Tson-o a-le tsügü tsü hyulo yatselo khipe a-buthun ge shülo njüo, a-sherhün sa bin hünyo. 6Tson-o a-le pen gunryüo ka tilo ntsin a-pvü a-shen lo a-kazonkazin ko kequen külo njüo anyugun ka, ‘Hagun ko ngun kengüo sherhünlo nu, kechamvule ale a tanyü nmhen kelagü hyunilo kela genyu,’ tson hü. 7Ale hagun ka zo tsentsü shüti, tsühontse nyunkelu kethyü senmvue gwa tsekethyü temi kentsen kegwa henteküo tekü nyeki-e kemunyu nmele a-nyunkelu kelo genyu tsanggenyu le a-sherhün ti.
N mhenkela Pisa
8“Tsüntimvule tenunyu nme le doli tseryü le bin-o nme nmhenla yatselo, mah nbenlo njüo a-le tsügü hyulo kemvuthen fü hü kemvu tenunyu segü le bin nla? 9Tson-o a-le tsü hyulo yatselo, a-pvü a-shen lo a-kazonkazin kokequen lo njüo, ‘Hagun ko ngun kengüo ngun sherhünlo nu; kechamvule ale adoli nmhen kela gü hyunilo kela genyu!’ 10Tsühontse ale hagun ka zoshü ti, kemunyu nme le a-nyunkelu kelo genyu Sunggigü lokethyünyu yhühyu kae sherhün hünyo.”
N mhenkela Nyugü
11Tsükatsü a-le zonishü, “Temi nme le a-nyu le mihvu le bin. 12Nchegü le a-pvü kazo, ‘Apvü nkenya ajün thyü nrün kho khipe atsüla lo.’ 13Tsüselo a-pvü le a-hon kenjün pe au tsüla. Lo jon thon sari kemvu ka nyu nchegü le a-hon aphu sen-o rünyi nithen nme ki gü ntsen serimvuo tsünyu a-hon nke bula. 14Lo a-hon tsü aphu jwen tyü lobu ntsin rünyi tsünyu chenda ketetsin nme le soryüla; lo a-le tha ndila. 15Tsügenyu a-le gü rünyi tsünyu sun nyünyu nme kachün thyü tinla; tsüselo temi tsügü le a-nipe a-low nyu shüo a-no tebo khwenlo tseshü. 16Tsükatsü a-le tebo chvü thyü kehü rhütsi yhun-e tyüo a-ginyü kelo nnyü sola; ai temi nme-e tsüe pe a-tsü mvu. 17Tsontsin a-le a-nyun ntsenlo njüo a-npvü a-nthon-o, ‘Apvü nyu le temi kechon jonshye zen kehü aphu a-ketyü ketsü le kesükela thyü bin nyo, lo tsünye ki-e chonsa bin nyo; ai awe hinyu khünsi güzhü laso! 18Ale solo-o apvü ki nigun gü a-ka, Apvü, ale Sunggigü mhundyü kae lo nmhundyü kae mu laso. 19Ale nno ale nnyu letse kethyüe kolo kümvu la sele, nle ano njonshye nyu nme-e thyülo ta,’ tson sola. 20Tson-o a-le solo-o apvü ki gun laryü.
“A-le nithen ki kehü ka a-pvü le a-hyushüo n ton gü a-gwen penlo-o a-mbo sola. 21Tsüselo a-nyugü tsüle a-pvü ka, ‘Apvü, ale Sunggigü mhundyü kae mhundyü kae mu laso; ale nno alope nnyu letse kethyüe zolo kümvu laso,’ tsonso. 22Ai a-pvü le a-gonyu ju ka zo-o, ‘Hagun whütse gü phi kegwa tsin sen ryüo a-no ben lochi; lo benkhin nme pe a-ben nyu shü, lo phaje-e pe a-no pvülo. 23Lo gü methunyu aphou kegwa gü tsü hü sen ryüo dushvulo, tson-o n gun aphu tyütsü-o sherhün tile nu! 24Kechamvule anyugü hile sila laryü, rhünnilo laso; nmhenla laryü hyunilo kela genyu.’ Tson-o anyugun kengüo anyugun shekerhün thyü bin.
25“Tsükatsü a-tsagü le tsügü low ki hü; tson-o a-le ka kho nni ryü kezhü ka mele lüthyü lo kechwen keyü thyü kebin nyülo. 26Tsüselo a-le a-gonyu nme koshüo, ‘Nyu genyu tsühontse bin yo?’ tsekethyü ketsoshü laryü, 27gogü le a-ka, ‘Nsikezen gü le niryü laso; lo npvü le n sikezengü le gwa sherhün bin-o hyuni kelo genyu methunyu a-phou kegwa gü dushvu tyü bin nle!’ tsonshü.
28“Ai a-le a-nyunntao kanyu gü mvula. Tsügenyu a-pvü le chwiry"yo tenge tse a-jvü so. 29Ai a-le a-pvü ka zo-o, ‘Hire, ale chen hitsüla ki nlothyü ryü, lo khenyüme-e njo zen kemvu thyü hümvu; tson hüe nle tenyünyu nme-e khipe atsüo ano pe apvü ashen zen-o shekerhün thyü shwi mvu. 30Ai nnyu higü we tenunyu serikemvunyu zen-o nhon nke tyü bulo njüo ryü laryü, nle nthunyu aphou kegwagü dushvu pe a-tsü bin laso!’ 31Tsüselo a-pvü le a-ka zo-o, ‘Anyugü, nle azen zin hü teso, ahon aphu le nhon le la. 32Ai n sikezengü le sila laryü rhünnilo, nmhenla laryü hyunilo; tsügenyu n gun le n sherhün lo nnyunnyü bin hüzü le.’ ” tson.
දැනට තෝරාගෙන ඇත:
LUK 15: REGSBSI
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.