Pi zi tiki 1
1
Pi zi tiki na wiini hlai n'amai gaiɗi yai gaini ɗif lai
1—11
Alaw a rga hlai n'amai gaiɗi yai, gaini ɗif lai
1War pi zi tiki, won hlai n'Alaw a za hlai a tika pini aŋ rga hlai n'amai gaiɗi yai ɗa, 2yai te na fu kadai nɵa, wala warɗi kai, gegeŋ a wa tini edi midini yem paŋ, smer na gdaŋ na mini Alaw para guvula amai midini yem.
3Nɵa Alaw a muɗa: Gaglai a za, gaglai a za lai. 4Alaw a tala ɓa gaglai ɗa a wala na pɗem, nɵa a ɓurwa gaglai edi sini gegeŋ par. 5Alaw a sini yiki wiini gaglai ɗa ɓa girvudi, wiini gegeŋ ɗa ɓa duvuk lai, koskoi ktai te za, gorof par ktai te za lai, hanɗa a mefeŋ n'avut.
6Alaw a muɗa: Wala ktai na gdaŋ ta a yima arbani yem n'amai gaini na azumai ɗa kaai, aŋ za ɓraw arbani. 7A za nɵa lai, Alaw a za wala hanɗa kapai a ɓurwa yem n'amai gaini n'azumai edi sini marni par. 8Alaw a sini yiki wiini wala hanɗa ɓa hlai n'amai. Koskoi te za, gorof par te za lai, hanɗa a mefeŋ n'ag'aŋ sulu. 9Alaw a muɗa ɓa yem n'azumai a tapa war hlai ktai, a hina hlai ɗa a huula, a za nɵa lai. 10Alaw a sini yiki wiini hlai na huleŋ ɓa “afti”, wiini yem-ra n'a tapa war hlai ktai ɓa “yem-ra n'abai”. Alaw a tala hanɗa arni pɗem.
11Alaw a muɗa: Afti paŋ a va gaini sugoi n'a goɗa, gaini evek na seyemni a sisiɗa viya, gaini luwuŋ n'a wa ali pinzibani kiini kiini, gaini na seyemni a na war alini zi wii dama, a za nɵa lai. 12Afti a diya sugoi na gaini gûɗi, evek na pinzibani kiini kiini viya a sisiɗa pini seyemni gaini luwaŋai n'a wa alini gaini seyemni amlai war alini pinzibani kiini kiini lai. Alaw a tala ɓa hanɗa a pɗem. 13Koskoi te za, gorof par te za lai, hanɗa a mefeŋ n'ag'aŋ hu. 14Alaw a muɗa: Wazagai n'a za gaglai war hlai n'amai buri a ɓurwa arbani girvudi gaini duvuk, kapai a za aŋ wala zi siŋki war kitini hlai zi fet, war piɵini mefeŋ gaini buza lai, 15Kapai a za aŋ wazagai n'a za gaglai warni hlai n'amai, a ŋala midini afti, a za maini nɵa. 16Alaw a za wazagai n'abakai n'a za gaglai sulu, n'abai arbani a sumna aŋ pai na girvudi, n'agwi a sumna aŋ pai duvuk, gaini meeɵek lai. 17Alaw a mulaŋ amai arbani hlai n'amai, aŋ za gaglai midini afti. 18Aŋ miɗini girvudi gaini duvuk, aŋ ɓurwa arbani gaglai gaini gegeŋ. Alaw a tala ɓa hanɗa a pɗem. 19Koskoi te za, gorof par te za, hanɗa a mefeŋ n'ag'aŋ puɗu.
20Alaw a muɗa: Yem-ra a va gaini wazagai na karni, wala zi ɗufli a ɗufla arbani hlai n'amai, amai par midini afti. 21Alaw a rga wazagai na karni n'abakai na karni n'arni yem, wazagai na karni n'a na muguza paŋ pinzibani kiini kiini, n'a va arni yem paŋ gaini wazagai zi ɗufli zi baada, pinzibani kiini kiini lai. Alaw a tala ɓa hanɗa a pɗem. 22Alaw a ɓakaŋ a muɗa: Ki bindi maswai, ki sisiɗi viya, ki vi yem war yem-ra n'abakai, wala zi ɗufli lai a bunda viya midini afti. 23Koskoi te za, gorof par te za lai, hanɗa a mefeŋ n'ag'aŋ ɵim. 24Alaw a muɗa: Afti a wa wazagai na karni pinzibani kiini kiini, wazagai na gaini ezini puɗu puɗu n'aha gaini n'edi buza gaini wazagai na karni n'agogoi n'a hidila, a za maini nɵa. 25Alaw a za wazagai n'edi buza pinzibani kiini kiini, wazagai n'abakai n'aha pinzibani kiini kiini, wazagai n'agogoi n'a hidila azumai midini afti paŋ, pinzibani kiini kiini lai. Alaw a tala hanɗa arni pɗem. 26Alaw a muɗa: Zumu ɗif maimu tumu nɵa, ziŋgani maimu tumu nɵa lai, kapai a ŋa miɗini hilif na warni yem-ra n'abai, miɗini wazagai zi ɗufli n'arbani hlai n'amai, miɗini wazagai n'ezini puɗu puɗu paŋ, midini afti paŋ, miɗini wazagai zi hidili na midini afti paŋ lai. 27Nɵa Alaw a rga ɗif a ziŋga sini nɵa,
a rgaŋ a ziŋga sini Ni Alaw nɵa,
a rgiɗi wus gaiɗi muni.
28Alaw a ɓikiɗi a miɗiɗi: Ki sisiɗi viya, ki bindi viya, ki vi midini afti, ki ŋi midini, hilif na war yem-ra n'abai, wazagai zi ɗufli n'arbani hlai n'amai gaini wazagai na karni na midini afti paŋ, aga ki simni aŋ paakai miɗini.
29Alaw a muɗa: Tili, mu na siki evek na seyemni a na midiɗi yai paŋ, gaini luwuŋ paŋ, na seyemni a na war ali zi wii lai aŋ walaki zi simi. 30Sugoi n'a goɗa, mu saŋ aŋ simi sini wazagai na midiɗi yai ɗa paŋ, sini wazagai zi ɗufli n'arbani hlai n'amai, sini wazagai na muguza midini afti, na gaini suŋfa warni paŋ, aga a za nɵa. 31Alaw a tala sdani n'a zaŋ, a tala arni pɗem gara. Koskoi te za, gorof par te za lai. Hanɗa a mefeŋ n'ag'aŋ ɵaara.
Currently Selected:
Pi zi tiki 1: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964