Luˇkaꞈ 23
23
Yeˬsuˇ-ahˇ sahˬ paˬ Piˇlaˆ mehˬ shi sheuˬ gʼeh-euˬ
(Maꞈtehˬ 27.1,2,11-14; Maˬkuˆ 15.1-5; Yoˇhaˬ 18.28-38)
1Kʼoeˇ naˇ, tsawˇ haˬ dawˬ tawˆ luꞈ baˬ maꞈ puˇ jeˬ-ehˇ tuˇ laˇ jiˇ-awˇ, Yeˬsuˇ-ahˇ sahˬ paˬ Piˇlaˆ jawˇ gaˇ sheuˬ gʼeh-euˬ meh. 2Aˬ yawꞈ maꞈ Yeˬsuˇ-ahˇ iˬ baˇ poˆ-awˇ ehˇ-eu, “Tsawˇ haˬ heu gʼaˬ nga maꞈ-euˬ tsawˇ jeuˬ-ahˇ gaˇ ma sheuˬ bahˬ-awˇ, sahˬ paˬ Gehˇsaˬ-ahˇ kawˬ taˬ doˆ nehˬ lehˇ nga maꞈ-ahˇ laˆ tsoeˬ-eu uˬ taꞈ, yawˬ haˇ yawˬ ha Ka li lehˇ kuˇ-eu sahˬ paˬ ma lehˇ ehˇ-eu nga maꞈ mawˇ-euˬ ma.”
3Sahˬ paˬ Piˇlaˆ aˬ yawꞈ-ahˇ naˇ haˬ-eu, “Nawˇ Yuˇdaˆ tsawˇ haˬ-euˬ sahˬ paˬ ngeuˇ ma loˇ.”
Yeˬsuˇ ehˇ-eu, “Nawˇ ehˇ luꞈ ngaˇ tawˇ.”
4Kʼoeˇ naˇ, piˇ ma aˬ yuiꞈ deuˬ hawˇ-eu tsawˇ haˬ aˇ maꞈ maꞈ ma-ahˇ sahˬ paˬ Piˇlaꞈ ehˇ nehˬ-eu, “Tsawˇ haˬ heu gʼaˬ lehˬ-eu ca-eu ngaˇ maˬ mawˇ-aˬ.”
5Ehˇ kʼawꞈ, Yeˬsuˇ-ahˇ yaw lehˬ poˆ-eu tsawˇ haˬ kʼoeˇ deuˬ yaw kʼaˆ-ehˇ paˇ leh jeh laˇ-awˇ ehˇ-eu, “Yuˇdaˆ miˇ kʼahˬ kʼahˬ lah ni miˇ kʼahˬ zaˬ deuˬ luiˬ gʼa laˇ ni aˬ yawꞈ mehˬ luꞈ tsoˆ luꞈ-eu meh. Gaˬliˬlehˇ miˇ kʼahˬ-ahˇ mehˬ dahˬ beh-awˇ, nymˬ-mˇ heu gaˇ mehˬ keuˆ laˇ-euˬ meh.”
Yeˬsuˇ-ahˇ sahˬ paˬ Heˬloˆ jawˇ gaˇ bi sheuˬ gʼeh-euˬ
6Dawˬ kʼoeˇ dawˬ-ahˇ sahˬ paˬ Piˇlaˆ ya gaˬ ngeh, “Tsawˇ haˬ heu gʼaˬ Gaˬliˬlehˇ tsawˇ haˬ-a loˇ” lehˇ naˇ haˬ-euˬ meh. 7Yeˬsuˇ-aˬ, sahˬ paˬ Heˬloˆ uˆ lahˇ-eu miˇ kʼahˬ-ahˇ jawˇ-eu tsawˇ haˬ pyeuꞈ-eu gaˇ kawˆ sahˬ paˬ Piˇlaˆ ya siˬ ngeh, Yeˬluˇsaˬlehˬ meuˬ-ahˇ laˇ taˬ-awˇ jawˇ-eu sahˬ paˬ Heˬloˆ jawˇ gaˇ bi sheuˬ gʼeh-euˬ meh. 8Yeˬsuˇ-ahˇ ya mawˇ ngeh, Heˬloˆ laˬ kʼaˬ cehˇ dui dui-eu meh. Aˬ jeˬ miˇ neh ehˇ naˇ, aˬ yawꞈ Yeˬsuˇ-euˬ gaˇ kawˆ ya gaˬ haw-awˇ, aˬ yawꞈ-ahˇ mawˇ mawꞈ-eu meh. Yeˬsuˇ zahˬ leˇ paˬ-ehˇ gʼeh-eu jeˬ mˇ mehˬ laꞈ gaˇ ya mawˇ tehꞈ-a lehˇ aˬ yawꞈ noeˬ tmˬ taˬ-euˬ meh. 9Kʼoeˇ miˇ neh, aˬ yawꞈ Yeˬsuˇ-ahˇ dawˬ gʼawˬ mya dawˬ naˇ haˬ-euˬ meh. Ehˇ kʼawꞈ, Yeˬsuˇ tiˬ dawˬ-iˬ maˬ ngehˬ kʼoꞈ nehˬ-a. 10Piˇ ma aˬ yuiꞈ deuˬ hawˇ-eu, Zahˇ dawˬ kʼoꞈ dawˬ mehˬ-eu saˬ laˬ deuˬ mehˬ hu paw yawꞈ leˇ-awˇ, Yeˬsuˇ-ahˇ iˬ baˇ poˆ-eu dawˬ yaw kʼaˆ-ehˇ ngehˬ-euˬ meh. 11Heˬloˆ hawˇ-eu aˬ yawꞈ-euˬ yehˇ deuˬ Yeˬsuˇ-ahˇ yehˬ bawˬ sehˇ lu-ehˇ ehˇ-awˇ naˬ gʼa-euˬ meh. Kʼoeˇ loꞈ-ehˇ jahˇ gʼaˬ ngeh, sahˬ paˬ sahˬ ma deuˬ dm-eu muiˬ dui dui-eu mehˬ tsoeˬ bi dm-awˇ, sahˬ paˬ Piˇlaˆ jawˇ gaˇ bi sheuˬ kʼoꞈ gʼeh-euˬ meh. 12Kʼoeˇ ngeh nah, sahˬ paˬ Heˬloˆ hawˇ-eu sahˬ paˬ Piˇlaˆ aˬ nyaꞈ gʼoeˇ leˇ-euˬ meh. Dzeuˇ laˇ ngeh aˬ yawꞈ nyaꞈ tiˬ gʼaˬ tiˇ gʼaˬ muiˇ-euˬ meh.
Yeˬsuˇ-ahˇ sehꞈ-eu gʼaˇ duˬ daˇ tsehˆ-euˬ
(Maꞈtehˬ 27.15-26; Maˬkuˆ 15.6-15; Yoˇhaˬ 18.39—19.16)
13Piˇ ma aˬ yuiꞈ deuˬ, aˬ yuiꞈ aˬ tsu deuˬ hawˇ-eu, miˇ kʼahˬ zaˬ deuˬ-ahˇ sahˬ paˬ Piˇlaˆ neh kuˇ uiˬ-euˬ meh. 14Aˬ yawꞈ maꞈ-ahˇ aˬ yawꞈ ehˇ nehˬ-eu, “Tsawˇ haˬ heu gʼaˬ miˇ kʼahˬ zaˬ deuˬ-ahˇ gaˇ ma sheuˬ bahˬ-euˬ meh lehˇ naw maꞈ ehˇ-awˇ ngaˇ jawˇ gaˇ sheuˬ laꞈ-euˬ meh. Naw maꞈ-euˬ mehˬ shi aˬ yawꞈ-ahˇ ngaˇ naˇ haˬ-awˇ pyehˆ tseˇ haw ngeh, naw maꞈ ehˇ-eu loꞈ-ehˇ lehˬ-eu ca-eu ngaˇ maˬ mawˇ-aˬ. 15Sahˬ paˬ Heˬ loˆ kʼawꞈ, aˬ yawꞈ-euˬ yaw lehˬ yaw ca maˬ poˆ mawˇ nya-eu miˇ neh, aˬ dui jawˇ gaˇ paˇ bi sheuˬ kʼoꞈ ha le-euˬ meh. Aˬ yawꞈ shiˇ paˬ-ehˇ mˇ lehˬ taˬ-euˬ tiˬ jeˬ-iˬ maˬ jaˆ-a. 16Kʼoeˇ miˇ neh, aˬ yawꞈ-ahˇ yahˬ caˆ neh bi juiꞈ-awˇ pyehˬ nehˬ ma.”#23.16 Jaˇliꞈ tiˬ paˆ na deuˬ laꞈ kʼoeˇ, gaˬ naˇ yaw zaˬ heu hmˬ ahˇ-eu meh. 23.17: Baˬsaˬkaˬ Bawˬ-iˬ kʼaˇ gʼeh ngeh, tawˬ-ahˇ dawˆ taˬ-euˬ tsawˇ haˬ tiˬ gʼaˬ, aˬ yawꞈ maꞈ gʼaˇ duˬ sahˬ paˬ Piˇlaˆ ya pyehˬ nehˬ-eu meh.
18Tsawˇ haˬ aˇ maꞈ maꞈ lah-ehˇ guˇ-eu, “Aˬ yawꞈ-ahˇ sehꞈ-awˇ Baˬlaˬbaˇ-ahˇ pyehˬ doˆ nehˬ laꞈ-awˬ.” 19Baˬlaˬbaˇ-aˬ, meuˬ laꞈ kʼoeˇ miˇ kʼahˬ zaˬ deuˬ luiˬ gʼa laˇ ni jahˇ-euˬ uˬ taꞈ, tsawˇ haˬ sehꞈ-euˬ miˇ neh, tawˬ-ahˇ bi dawˆ taˬ-euˬ meh.
20Sahˬ paˬ Piˇlaˆ-aˬ, Yeˬsuˇ-ahˇ pyehˬ nehˬ mawꞈ-eu miˇ neh, aˬ yawꞈ maꞈ-ahˇ tiˬ poˆ paˇ shaˇ-euˬ meh. 21Ehˇ kʼawꞈ, aˬ yawꞈ maꞈ paˇ guˇ-eu, “Laꞈ yaꞈ kʼoeˇ taˆ taꞈ sehꞈ-awˬ. Laꞈ yaꞈ kʼoeˇ taˆ taꞈ sehꞈ-awˬ.”
22Sahˬ paˬ Piˇlaˆ aˬ yawꞈ maꞈ-ahˇ smˬ poˆ tiˬ poˆ paˇ shaˇ-awˇ ehˇ-eu, “Aˬ yawꞈ mˇ lehˬ mˇ ca-euˬ aˬ jeˬ jaˆ ta. Aˬ yawꞈ ya shiˇ paˬ-ehˇ mˇ lehˬ taˬ-euˬ tiˬ jeˬ-iˬ ngaˇ maˬ ya mawˇ-aˬ. Aˬ yawꞈ-ahˇ ngaˇ yahˬ caˆ neh bi juiꞈ-awˇ pyehˬ nehˬ ma.”
23Ehˇ kʼawꞈ, Yeˬsuˇ-ahˇ laꞈ yaꞈ kʼoeˇ taˆ bi taꞈ sehꞈ-eu gʼaˇ duˬ, aˬ yawꞈ maꞈ gʼaˬ kʼaˇ jaˆ-eu shaˇ shaˇ-ehˇ guˇ-eu miˇ neh, aˇ saˬ saˬ laˇ ngeh aˬ yawꞈ maꞈ neh guˇ gʼaˬ-euˬ meh. 24Kʼoeˇ miˇ neh, aˬ yawꞈ maꞈ geuꞈ mawꞈ-eu loꞈ-ehˇ sahˬ paˬ Piˇlaˆ yaˇ kʼaˬ daˇ tsehˆ nehˬ-euˬ meh. 25Miˇ kʼahˬ zaˬ luiˬ gʼa laˇ ni jahˇ-euˬ uˬ taꞈ, tsawˇ haˬ-ahˇ sehꞈ-euˬ miˇ neh tawˬ-ahˇ bi nyehꞈ uˇ taˬ-euˬ gʼaˬ-ahˇ-aˬ, aˬ yawꞈ maꞈ shaˇ-eu loꞈ-ehˇ pyehˬ doˆ nehˬ-euˬ meh. Ehˇ kʼawꞈ, Yeˬsuˇ-ahˇ-aˬ, aˬ yawꞈ maꞈ-euˬ nui noeˬ bi jahˇ-eu gʼaˇ duˬ, aˬ yawꞈ maꞈ-euˬ aˬ laꞈ laꞈ kʼoeˇ a nehˬ-euˬ meh.
Yeˬsuˇ-ahˇ laꞈ yaꞈ kʼoeˇ taˆ taꞈ sehꞈ-euˬ
(Maꞈtehˬ 27.32-44; Maˬkuˆ 15.21-32; Yoˇhaˬ 19.17-27)
26Aˬ yawꞈ maꞈ aˬ yawꞈ-ahˇ sheuˬ gʼeh luꞈ ngeh, pu paw neh meuˬ-ahˇ laˇ luꞈ-eu Kuˇleˬniˬ meuˬ-ahˇ jawˇ-eu Siˇmoˬ-ahˇ nyehꞈ-awˇ, laꞈ yaꞈ baꞈ daˆ nehˬ-awˇ, Yeˬsuˇ-euˬ mehˬ nah bi cah-euˬ meh.
27Tsawˇ haˬ aˇ maꞈ maꞈ ma hawˇ-eu, Yeˬsuˇ gʼaˇ duˬ noeˬ shaˬ-awˇ tsawˇ ngoeˇ ngoeˇ luꞈ-eu zaˬ miˬ zaˬ deuˬ, Yeˬsuˇ mehˬ nah caw teh luꞈ-eu meh. 28Ehˇ kʼawꞈ, aˬ yawꞈ maꞈ-ahˇ Yeˬsuˇ nahˇ gʼoꞈ gʼoꞈ haw-awˇ ehˇ-eu, “Yeˬluˇsaˬlehˬ meuˬ-euˬ zaˬ miˬ deuˬ-oˇ, ngaˬ-euˬ gʼaˇ duˬ tsawˇ ngoeˇ taˬ ngoeˇ. Naw maꞈ gʼaˇ duˬ hawˇ-eu naw maꞈ-euˬ zaˬ deuˬ gʼaˇ duˬ tsawˇ ngoeˇ ngoeˇ-awˬ. 29Aˬ jeˬ miˇ neh ehˇ naˇ, ‘Maˬ baw aˬ ma hawˇ-eu aˬ nyiˇ maˬ pi haw-euˬ uˬ maˆ hawˇ-eu, zaˬ nahˬ neh tiˬ jawˇ-iˬ maˬ bi dawˇ haw-euˬ aˬ coeˇ deuˬ guiˬ lahˬ huiˬ-eu meh’ lehˇ ya ehˇ-eu aˇ nah keuˆ le luꞈ meh. 30Kʼoeˇ ngeh jawˇ, gawˬ jawˬ-ahˇ ‘Nga maꞈ kʼoeˇ taˆ byaˆ tehˬ leꞈ-awˬ’ lehˇ ya ehˇ-awˇ, gawˬ duˇ-ahˇ ‘Nga maꞈ kʼoeˇ taˆ pymˬ tehˬ leꞈ-awˬ’ lehˇ ya ehˇ gaˇ keuˆ tehꞈ-a. 31Aˬ jeˬ miˇ neh ehˇ naˇ, aˇ bawˇ yaw jmˬ-ahˇ aˬ yawꞈ maꞈ heu naˆ ni jahˇ nehˬ naˇ, aˇ bawˇ yaw gui-ahˇ aˇ naˆ ni paˇ jahˇ nehˬ nmˇ.”
32Yaw haiˬ jeˬ mˇ-euˬ tsawˇ haˬ nyiˬ gʼaˬ-ahˇ kʼawꞈ, Yeˬsuˇ nehˬ-ehˇ taꞈ sehꞈ-eu lehˇ sheuˬ gʼeh-euˬ meh. 33Uˬ duˬ kʼmˬ lehˇ kuˇ-eu jawˇ duˬ-ahˇ le keuˆ ngeh, Yeˬsuˇ-ahˇ laꞈ yaꞈ kʼoeˇ taˆ taꞈ tehˬ-euˬ meh. Yaw haiˬ jeˬ mˇ bahˬ-euˬ tsawˇ haˬ kʼoeˇ nyiˬ gʼaˬ-ahˇ kʼawꞈ, aˬ yawꞈ-euˬ aˇ maˇ paw tiˬ gʼaˬ, aˇ caˇ paw tiˬ gʼaˬ lehˇ, laꞈ yaꞈ kʼoeˇ taˆ taꞈ tehˬ-euˬ meh. 34Yeˬsuˇ ehˇ-eu, “Aˬda-oˇ, aˬ yawꞈ maꞈ-ahˇ iˬ baˇ pyehˬ nehˬ-awˬ. Aˬ jeˬ miˇ neh ehˇ naˇ, aˬ yawꞈ maꞈ neh mˇ-euˬ jeˬ-ahˇ aˬ yawꞈ maꞈ maˬ siˬ nya-a.”
Aˬ yawꞈ maꞈ shehˆ tsaˬ tsaˬ-awˇ, Yeˬsuˇ-euˬ mehˬ tsoeˬ biˇ geuꞈ-euˬ meh. 35Tsawˇ haˬ gʼawˬ mya ni kʼoeˇ gaˇ yawꞈ-awˇ haw luꞈ ngeh, Yuˇdaˆ tsawˇ haˬ aˬ yuiꞈ aˬ tsu deuˬ Yeˬsuˇ-ahˇ naˬ gʼa naˬ gʼa-ehˇ ehˇ-eu, “Aˬ yawꞈ aˬ cawˬ-ahˇ ka kʼoꞈ-euˬ meh. Aˬ yawꞈ-aˬ, Miˬyehˇ neh Tseˇ doˆ-euˬ Gʼaˬ lehˇ ehˇ-eu Ka li ngeuˇ naˇ, yawˬ haˇ yawˬ ha ka kʼoꞈ luꞈ-uˇ.”
36Yehˇ deuˬ kʼawꞈ, aˬ yawꞈ-ahˇ yehˬ bawˬ sehˇ lu-ehˇ ehˇ niˇ gʼa-eu meh. Aˬ yawꞈ maꞈ aˬ yawꞈ jawˇ gaˇ le-awˇ, cehˇ myawˆ ni gʼeh-eu aˬ gaꞈ dzaˇ uiˇ ciˬ nehˬ-awˇ ehˇ-eu, 37“Nawˇ Yuˇdaˆ tsawˇ haˬ-euˬ sahˬ paˬ ngeuˇ naˇ, yawˬ haˇ yawˬ ha ka kʼoꞈ-awˬ tawˇ.”
38Aˬ yawꞈ-euˬ kʼoeˇ taˆ heu loꞈ-ehˇ boꞈ myahˬ taˬ-euˬ meh. “Tsawˇ haˬ heu gʼaˬ Yuˇdaˆ tsawˇ haˬ-euˬ sahˬ paˬ meh.”
39Kʼoeˇ gaˇ bi taꞈ tehˬ taˬ-euˬ tsawˇ haˬ yaw haiˬ kʼoeˇ tiˬ gʼaˬ Yeˬsuˇ-ahˇ yehˬ bawˬ sehˇ lu-ehˇ ehˇ-eu, “Nawˇ Ka li maˬ ngeuˇ loˇ. Yawˬ haˇ yawˬ ha ka kʼoꞈ-awˇ, nga nyaꞈ-ahˇ kʼawꞈ ka kʼoꞈ nehˬ laꞈ-awˬ tawˇ.”
40Ehˇ kʼawꞈ, aˬ yawꞈ-euˬ cawˬ kʼoeˇ gʼaˬ aˬ yawꞈ-ahˇ dehˬ-awˇ ehˇ-eu, “Nawˇ Miˬyehˇ-ahˇ maˬ guˆ nya loˇ. Nawˇ gʼeh aˬ yawꞈ loꞈ-ehˇ bi sehꞈ-eu gʼaˇ duˬ bi daˇ tsehˆ taˬ-euˬ tsawˇ haˬ maˬ ngeuˇ te loˇ. 41Aˇ nyaꞈ-aˬ, mˇ bahˬ-euˬ miˇ neh oꞈ-eu geuˇ-eu loꞈ-ehˇ ya daˬ luꞈ-eu ma. Ehˇ kʼawꞈ, tsawˇ haˬ heu gʼaˬ tiˬ jeˬ-iˬ mˇ bahˬ taˬ-euˬ maˬ jaˆ-a.” 42Kʼoeˇ naˇ, aˬ yawꞈ ehˇ-eu, “Yeˬsuˇ-oˇ, nawˇ Sahˬ paˬ loꞈ-ehˇ zaꞈ le ngeh, ngaˬ-ahˇ taˬ ngehˇ nehˬ laꞈ.”
43Yeˬsuˇ aˬ yawꞈ-ahˇ ehˇ nehˬ-eu, “Iˬ nah nawˇ ngaˬ nehˬ-ehˇ Baˬlaˬdiˇsuˆ#23.43 ‘Baˬlaˬdiˇsuˆ’ lehˇ ehˇ-eu-aˬ, yaw tsaˬ yaw dawˇ tsawˇ haˬ deuˬ shiˇ-awˇ maˬ gʼoꞈ dehꞈ laˇ dah mi naˆ-ehˇ, aˬ yawꞈ maꞈ-euˬ saꞈ laˇ ya jawˇ naˬ tawˬ-eu jawˇ duˬ-ahˇ ehˇ-eu meh. -ahˇ ya jawˇ tehꞈ-a lehˇ, ngaˇ nawˬ-ahˇ maˇ jawˆ ni ehˇ-eu ma.”
Yeˬsuˇ saꞈ tsehˆ leˇ-euˬ
(Maꞈtehˬ 27.45-56; Maˬkuˆ 15.33-41; Yoˇhaˬ 19.28-30)
44Nah loˆ ceh laˇ ngeh neh dahˬ beh-awˇ, uˬ ciꞈ uˬ taw paw naˬ liˬ smˇ laꞈ-ahˇ keuˆ ni, miˇ kʼahˬ kʼoeˇ kʼahˬ kʼahˬ lah-ehˇ zahˇ tsui ni jaˆ-eu meh. 45Aˬ jeˬ miˇ neh ehˇ naˇ, nahˇ ma yaw shehꞈ maˬ bya ni naˬ leˇ-euˬ meh. Uˬ duˬ tahˬ nymˇ nymˇ ma laꞈ kʼoeˇ taw taˬ-euˬ saˬ paˇ lawˆ kaˬ nyiˬ paˆ paˆ-iˇ-euˬ meh. 46Kʼoeˇ ngeh, Yeˬsuˇ yaw kʼaˆ-ehˇ guˇ-awˇ, “Aˬda-oˇ, ngaˬ-euˬ saꞈ laˇ-ahˇ nawˬ-euˬ aˬ laꞈ laꞈ kʼoeˇ a nehˬ-eu ma” lehˇ ehˇ-eu meh. Kʼoeˇ loꞈ-ehˇ guˇ gʼaˬ ngeh, aˬ yawꞈ saꞈ tsehˆ leˇ-euˬ meh.
47Kʼoeˇ loꞈ-ehˇ pyeuꞈ laˇ-euˬ gaˇ, yehˇ kʼoeˇ deuˬ kʼoeˇ taˆ aˬ yuiꞈ geuꞈ-eu gʼaˬ ya mawˇ ngeh, Miˬyehˇ-euˬ guiˬ lahˬ-ahˇ ja ceuˬ-awˇ, “Tsawˇ haˬ heu gʼaˬ aˬ diˇ aˬ maˇ iˬ baˇ maˬ ahˇ law hawˇ ngaˬ” lehˇ ehˇ-eu eh.
48Kʼoeˇ gaˇ haw laˇ-eu lehˇ kʼaˇ uiˬ laˇ-euˬ tsawˇ haˬ dawˬ tawˆ luꞈ, kʼoeˇ loꞈ-ehˇ pyeuꞈ laˇ-euˬ gaˇ ya mawˇ ngeh, noeˬ shaˬ dui dui-eu laꞈ kʼoeˇ yawˬ ha-euˬ kʼahˬ-ahˇ teˇ teˇ-ehˇ gʼoꞈ-iˇ-euˬ meh. 49Yeˬsuˇ-euˬ cawˬ deuˬ hawˇ-eu, Gaˬliˬlehˇ miˇ kʼahˬ-ahˇ neh aˬ yawꞈ-euˬ mehˬ nah caw teh laꞈ-euˬ zaˬ miˬ zaˬ kʼoeˇ deuˬ, ui cuiˆ gaˇ mahˇ kaˬ gaˇ yawꞈ-awˇ haw-euˬ meh.
Yeˬsuˇ-ahˇ baꞈ pahˬ-euˬ
(Maꞈtehˬ 27.57-61; Maˬkuˆ 15.42-47; Yoˇhaˬ 10.38-42)
50Yuˇdaˆ tsawˇ haˬ-euˬ meuˬ pyeuꞈ-eu Aˬliˇmaꞈtehˬ meuˬ-ahˇ, Yoˇsehˆ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, yaw tsaˬ yaw dawˇ tsawˇ haˬ pyeuꞈ-awˇ, Baꞈdzah#23.50 ‘Baꞈdzah’ lehˇ ehˇ-eu dawˬ tsuiꞈ, Maꞈtehˬ 26.59-ahˇ haw-awˬ. laꞈ kʼoeˇ ahˇ-eu tsawˇ haˬ tiˬ gʼaˬ meh. 51Ehˇ kʼawꞈ, Baꞈdzah neh kʼoeˇ loꞈ-ehˇ daˇ tsehˆ-awˇ mˇ-euˬ gaˇ, aˬ yawꞈ nui ma maˬ tsaˬ-a. Aˬ yawꞈ-aˬ, Miˬyehˇ Miˇkʼahˬ keuˆ le gaˇ loꞈ luꞈ-eu tsawˇ haˬ meh. 52Aˬ yawꞈ sahˬ paˬ Piˇlaˆ jawˇ gaˇ le-awˇ, Yeˬsuˇ-euˬ gʼawˇ mawˇ shaˇ leˇ-euˬ meh. 53Kʼoeˇ naˇ, Yeˬsuˇ-euˬ gʼawˇ mawˇ-ahˇ baꞈ ka-awˇ, shawˇ jehˆ ni gʼeh-eu saˬ paˇ neh mawˇ tawˆ tawˆ-awˇ, tsawˇ haˬ tiˬ gʼaˬ-iˬ maˬ baꞈ pahˬ haw-euˬ, kʼaˬ lo-ahˇ taꞈ byoe-awˇ jahˇ taˬ-euˬ lmˬ bymˇ laꞈ kʼoeˇ baꞈ pahˬ-iˇ-euˬ meh. 54Kʼoeˇ ngeh nah-aˬ, Jawˇ nah gʼaˇ duˬ lehˬ hmˬ laˆ saˆ dah-eu aˇ nah pyeuꞈ-awˇ, Jawˇ nah keuˆ le shaw-iˬ-eu meh.
55Gaˬliˬlehˇ miˇ kʼahˬ-ahˇ neh Yeˬsuˇ-euˬ mehˬ nah caw teh laꞈ-euˬ tsawˇ haˬ deuˬ Yoˇsehˆ nehˬ-ehˇ iˇ-awˇ, lmˬ bymˇ hawˇ-eu Yeˬsuˇ-ahˇ kʼoeˇ gaˇ aˬ joˆ-ehˇ baꞈ pahˬ yaꞈ-euˬ gaˇ mawˇ duˬ yaꞈ-euˬ meh. 56Kʼoeˇ naˇ, aˬ yawꞈ maꞈ gʼoꞈ leˇ-awˇ, Yeˬsuˇ-euˬ gʼawˇ mawˇ-ahˇ laˆ saˆ-eu gʼaˇ duˬ tsiˇ yaw saw gʼawˬ mya jeˬ lehˬ hmˬ leˇ-euˬ meh.
Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ, Jawˇ nah kʼoeˇ nah-ahˇ aˬ yawꞈ maꞈ gʼaˬ naˬ naˬ-euˬ meh.
දැනට තෝරාගෙන ඇත:
Luˇkaꞈ 23: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.