Luˇkaꞈ 21
21
Miˬ coeˬ miˬ ma tiˬ gʼaˬ pyuˇ damˬ-eu
(Maˬkuˆ 12.41-44)
1Yeˬsuˇ haw gʼeh ngeh, smˇ muiˬ smˇ baw deuˬ pyuˇ daˬ dawˆ duˬ-ahˇ pyuˇ daˬ dawˆ luꞈ gaˇ ya mawˇ-euˬ meh. 2Kʼoeˇ ngeh, shaˬ dui dui-eu miˬ coeˬ miˬ ma tiˬ gʼaˬ guiˬ shuiˇ maˇ byaˆ nyiˬ byaˆ dawˆ ahˇ luꞈ gaˇ aˬ yawꞈ ya mawˇ-euˬ meh. 3Yeˬsuˇ ehˇ-eu, “Shaˬ dui dui-eu miˬ coeˬ miˬ ma heu gʼaˬ aˬ yawꞈ maꞈ dawˬ tawˆ luꞈ myaˆ maˬ tseˇ damˬ-euˬ meh lehˇ, ngaˇ naw maꞈ-ahˇ ehˇ-eu ma. 4Aˬ jeˬ miˇ neh ehˇ naˇ, aˬ yawꞈ maꞈ-aˬ, gʼawˬ mya ni jaˆ-eu laꞈ kʼoeˇ yuˇ doˆ-awˇ Miˬyehˇ-ahˇ damˬ-euˬ meh. Ehˇ kʼawꞈ, aˬ yawꞈ-aˬ, shaˬ dui dui-eu laꞈ kʼoeˇ, aˬ yawꞈ yaw dehꞈ dehꞈ-eu gʼaˇ duˬ maˬ dzeˇ ni damˬ jiˇ-euˬ meh.”
Uˬ duˬ tahˬ nymˇ nymˇ ma ya cawˆ-iˇ meh lehˇ Yeˬsuˇ ehˇ-eu
(Maꞈtehˬ 24.1-2; Maˬkuˆ 13.1-2)
5Tsawˇ haˬ tiˬ paˆ na deuˬ, Uˬ duˬ tahˬ nymˇ nymˇ ma-ahˇ muiˬ dui dui-eu kʼaˬ lo gawˬ-awˇ tsoˆ taˬ-euˬ gaˇ kawˆ hawˇ-eu, kʼoeˇ gaˇ Miˬyehˇ-ahˇ aˬ joˆ-ehˇ lawˇ nehˬ shehˇ nehˬ luꞈ-eu gaˇ kawˆ ja poeˬ-eu meh. Ehˇ kʼawꞈ, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. 6“Nymˬ-mˇ naw maꞈ heu deuˬ dawˬ tawˆ luꞈ ya mawˇ luꞈ meh. Heu gaˇ kʼaˇ gawˬ taˬ-euˬ kʼaˬ lo heu deuˬ tiˬ siˬ kʼoeˇ taˆ tiˬ siˬ maˬ jaˆ ziꞈ nya ni byaˆ-iˇ jiˇ-eu aˇ nah keuˆ le tehꞈ-a.”
Shaˬ zahˬ hawˇ-eu Kʼehˬ-eu kʼaˆ-eu
(Maꞈtehˬ 24.3-14; Maˬkuˆ 13.3-13)
7Aˬ yawꞈ maꞈ Yeˬsuˇ-ahˇ naˇ haˬ-eu, “Saˬ laˬ-oˇ, kʼoeˇ loꞈ-ehˇ gʼeh-eu jeˬ aˬ myah keuˆ le ta. Kʼoeˇ loꞈ-ehˇ keuˆ le-eu lehˇ gʼeh ngeh, aˬ joˆ-ehˇ pyeuꞈ laˇ gaˇ haw-awˇ ya siˬ ta.”
8Yeˬsuˇ ehˇ-eu, “Aˬ cawˬ neh gaˇ ma maˬ bi sheuˬ bahˬ ni yaw gahˇ gahˇ-ehˇ dehꞈ-awˬ. Aˬ jeˬ miˇ neh ehˇ naˇ, ngaˬ-euˬ gʼaˇ duˬ ngehˬ dah le-euˬ ma lehˇ ehˇ-eu tsawˇ haˬ gʼawˬ mya gʼaˬ doˆ le-awˇ, ‘Ngaˇ aˬ yawꞈ ma. Aˇ nah aˇ yamˬ kʼoeˇ yamˬ keuˆ le-euˬ meh’ lehˇ ehˇ tehꞈ-a. Aˬ yawꞈ maꞈ-euˬ mehˬ nah naw maꞈ taˬ caw teh. 9Guiˇ deuˆ-eu teˇ saˇ hawˇ-eu miˇ kʼahˬ suˬ saˬ-eu gaˇ kawˆ naw maꞈ ya gaˬ ngeh, taˬ tsawˬ guˆ-iˇ. Kʼoeˇ loꞈ-ehˇ gʼeh-eu jeˬ yaw beh keuˆ le tehꞈ-a. Ehˇ kʼawꞈ, aˇ saˬ saˬ-eu aˇ yamˬ keuˆ le-euˬ maˬ ngeuˇ-a siˬ.”
10Kʼoeˇ naˇ, aˬ yawꞈ maꞈ-ahˇ aˬ yawꞈ paˇ ehˇ nehˬ-eu, “Miˇ kʼahˬ tiˬ kʼahˬ tiˇ kʼahˬ guiˇ deuˆ-awˇ, tsawˇ jeuˬ tiˬ jeuˬ tiˇ jeuˬ ceh tehꞈ-a. 11Miˇ luˆ luˆ dui dui-awˇ, yawˬ gaˇ na luꞈ mehꞈ-eu shuꞈ-eu jeˬ hawˇ-eu, yaw jaw naˇ-eu naˇ gawˇ gawˇ ma keuˆ le tehꞈ-a. Guˆ dui dui laˇ paˬ-ehˇ gʼeh-eu jeˬ hawˇ-eu huiˬ dui dui-eu bi siˬ bi mawˇ-eu jeˬ mˬ-ahˇ neh doˆ le tehꞈ-a. 12Ehˇ kʼawꞈ, kʼoeˇ loꞈ-ehˇ gʼeh-eu deuˬ maˬ keuˆ le mi naˆ-ehˇ, aˬ cawˬ naw maꞈ-ahˇ nyehꞈ-awˇ, kʼehˬ nehˬ kʼaˆ nehˬ laꞈ tehꞈ-a. Yaˇ kʼaˬ bi daˇ-eu gʼaˇ duˬ, naw maꞈ-ahˇ uˬ duˬ tahˬ nymˇ doe ni nyehꞈ gʼeh-awˇ, paꞈ kuˆ doe bi nyehꞈ uˇ tehꞈ-a. Naw maꞈ ngaˬ-euˬ tsawˇ myahˇ-ahˇ gʼoe-eu baˬ da neh, sahˬ paˬ sahˬ ma deuˬ-euˬ mehˬ shi, aˬ cawˬ naw maꞈ-ahˇ tsahˇ gʼeh tehꞈ-a. 13Kʼoeˇ-aˬ, naw maꞈ Laˬ kʼaˬ cehˇ-eu Guiˬ lahˬ dawˬ gaˇ kawˆ saˇ kiˇ kamˬ-eu gʼaˇ duˬ muiˬ-eu aˇ yamˬ meh. 14Naw maꞈ aˬ cawˬ-ahˇ aˬ joˆ-ehˇ ya ngehˬ ya tmˇ kʼoꞈ nehˬ-eu gaˇ kawˆ, aˇ yamˬ maˬ keuˆ laˇ mi naˆ-ehˇ kʼahˬ maˬ lahˇ ni jawˇ-awˬ. 15Aˬ jeˬ miˇ neh ehˇ naˇ, naw maꞈ-ahˇ muiˇ-eu deuˬ maˬ ja gʼaˬ nya-eu dawˬ hawˇ-eu zaˬ siˬ tsawˇ gahˇ, naw maꞈ-ahˇ ngaˇ biꞈ ma. 16Naw maꞈ-euˬ aˬ da aˬ ma, mehˇ nmˇ, aˬ yuiꞈ aˬ nyiˇ hawˇ-eu cawˬ deuˬ neh, naw maꞈ-ahˇ aˬ cawˬ-euˬ aˬ laꞈ laꞈ kʼoeˇ bi a nehˬ gaˇ keuˆ-awˇ, tiˬ paˆ na deuˬ-aˬ, sehꞈ gaˇ keuˆ ni ya daˬ tehꞈ-a. 17Naw maꞈ ngaˬ-euˬ tsawˇ myahˇ-ahˇ gʼoe-eu miˇ neh, tsawˇ haˬ dawˬ tawˆ luꞈ naw maꞈ-ahˇ bye tehꞈ-a.. 18Ehˇ kʼawꞈ, naw maꞈ-euˬ uˬ duˬ tsehˇ kahˇ tiˬ kahˇ tehꞈ-ehˇ kʼawꞈ, cawˆ-iˇ gaˇ maˬ keuˆ-aˇ. 19Naw maꞈ ziꞈ dah ni kamˬ coeˇ naˇ, dehꞈ-eu jeˬ-ahˇ za tehꞈ-a.
Yeˬluˇsaˬlehˬ meuˬ ya cawˆ-iˇ meh lehˇ Yeˬsuˇ ehˇ-eu
(Maꞈtehˬ 24.15-21; Maˬkuˆ 13.14-19)
20“Yeˬluˇsaˬlehˬ meuˬ-ahˇ guiˇ maꞈ deuˬ jawˬ lahˇ le-euˬ gaˇ ya mawˇ ngeh, meuˬ kʼoeˇ meuˬ ya cawˆ-iˇ-eu aˇ yamˬ keuˆ le-euˬ gaˇ siˬ nya-awˬ. 21Kʼoeˇ ngeh, Yuˇdaˆ miˇ kʼahˬ-ahˇ jawˇ-eu tsawˇ haˬ deuˬ gawˬ jawˬ paw ya cehˆ daˆ-awˇ, meuˬ laꞈ kʼoeˇ jawˇ-eu tsawˇ haˬ deuˬ meuˬ laꞈ nyiˇ ya cehˆ doˆ meh. Dahˇ taˆ jawˇ-eu tsawˇ haˬ deuˬ meuˬ-ahˇ maˬ ya uˇ le-a. 22Aˬ jeˬ miˇ neh ehˇ naˇ, kʼoeˇ-aˬ, Jaˇliꞈ laꞈ kʼoeˇ kʼaˇ ehˇ taˬ-euˬ jeˬ bi byah laˇ-eu gʼaˇ duˬ, kʼehˬ-eu kʼaˆ-eu aˇ nah deuˬ pyeuꞈ-eu meh. 23Aˇ nah aˇ yamˬ kʼoeˇ keuˆ le ngeh, aˬ nyiˇ pi luꞈ-eu zaˬ miˬ zaˬ deuˬ hawˇ-eu, zaˬ nahˬ aˬ ma deuˬ shaˬ zahˬ naꞈ dui dui tehꞈ-a. Aˬ jeˬ miˇ neh ehˇ naˇ, noeˬ shaˬ dui dui-eu jeˬ miˇ kʼahˬ heu kʼahˬ kʼoeˇ taˆ keuˆ le-awˇ, Miˬyehˇ nui ma pehˇ-eu jeˬ tsawˇ jeuˬ heu jeuˬ kʼoeˇ taˆ teuˇ le tehꞈ-a. 24Aˬ yawꞈ maꞈ mi cehˇ kʼehˬ-ahˇ ya shiˇ-awˇ, aˬ cawˬ miˇ kʼahˬ doe ni bi nyehꞈ byoˆ gʼeh tehꞈ-a. Yeˬluˇsaˬlehˬ meuˬ-aˬ, aˬ cawˬ tsawˇ jeuˬ neh bi nawˬ pahˬ tehꞈ-a. Aˬ cawˬ tsawˇ jeuˬ kʼoeˇ deuˬ-euˬ aˇ yamˬ maˬ jiˇ kʼoeˇ keuˆ ni, bi nawˬ pahˬ taˬ tehꞈ-a.
Tsawˇhaˬ-euˬ Zaˬmaˇ zaꞈ ka le-eu gaˇ kawˆ
(Maꞈtehˬ 24.29-31; Maˬkuˆ 13.24-27)
25“Nahˇ ma, ba la, aˬ guiˇ laꞈ kʼoeˇ, bi siˬ bi mawˇ-eu gʼawˬ mya jeˬ pyeuꞈ doˆ laˇ tehꞈ-a. Miˇ tsaˬ tsawˇ jeuˬ deuˬ iˬ ma laˆ shaˆ iˇ luˆ dzeh-awˇ teˇ saˇ mahˇ gaˇ guˆ dui dui-awˇ, zahˬ leˇ tsoˆ leˇ tehꞈ-a. 26Miˇ tsaˬ kʼoeˇ taˆ keuˆ le teuˇ le-eu lehˇ gʼeh-eu jeˬ-ahˇ tsawˇ haˬ zaˬ deuˬ noeˬ mawˇ-awˇ, myaꞈ leˇ tehꞈ-a. Aˬ jeˬ miˇ neh ehˇ naˇ, mˬ taˆ-euˬ baoˬ deuˬ luˆ laˇ nyeh laˇ jiˇ tehꞈ-a. 27Kʼoeˇ naˇ, Tsawˇhaˬ-euˬ Zaˬmaˇ mˬ dmˇ dziˬ-awˇ, baoˬ hawˇ-eu yaw shehꞈ kʼahˬ sehˇ huiˬ dui dui-eu laꞈ kʼoeˇ oe gaˇ ya mawˇ tehꞈ-a. 28Heu loꞈ-ehˇ gʼeh-eu deuˬ pyeuꞈ dahˬ beh laˇ ngeh, uˬ duˬ baꞈ diˇ-awˇ haw-awˬ. Aˬ jeˬ miˇ neh ehˇ naˇ, naw maꞈ-ahˇ ka kʼoꞈ le-eu aˇ yamˬ peh laˇ-euˬ meh.”
Siˬ guˬ aˇ bawˇ-ahˇ haw-awˇ yamˬ law toꞈ-awˬ
(Maꞈtehˬ 24.32-35; Maˬkuˆ 13.28-31)
29Kʼoeˇ naˇ, yaw jeˬ maˬ jeˬ heu hmˬ, aˬ yawꞈ maꞈ-ahˇ Yeˬsuˇ ja mehˬ nehˬ-euˬ meh. “Siˬ guˬ aˇ bawˇ hawˇ-eu, aˇ bawˇ dawˬ tawˆ luꞈ-ahˇ haw-awˬ. 30Aˇ bawˇ baw nmˬ nmˬ laˇ gaˇ naw maꞈ ya mawˇ ngeh, jawˇ la doˆ le shaw-iˬ meh lehˇ naw maꞈ siˬ nya meh. 31Kʼoeˇ loꞈ-ehˇ duˇ ni, gaˇ kawˆ kʼoeˇ deuˬ pyeuꞈ doˆ laˇ ngeh, Miˬyehˇ Miˇkʼahˬ keuˆ le-eu dawˬ peh peh laˇ-euˬ meh lehˇ naw maꞈ siˬ nya-awˬ.
32“Nymˬ-mˇ dehꞈ luꞈ-eu tsawˇ haˬ heu deuˬ maˬ shiˇ jiˇ mi naˆ-ehˇ, gaˇ kawˆ heu deuˬ dawˬ tawˆ luꞈ pyeuꞈ laˇ tehꞈ-a lehˇ, naw maꞈ-ahˇngaˇ maˇ jawˆ ni ehˇ-eu ma. 33Mˬ hawˇ-eu miˇ maˬ jaˆ coeˇ-ehˇ byoˆ-iˇ kʼawꞈ, ngaˬ-euˬ dawˬ tiˬ jawˇ-iˬ maˬ byoˆ-iˇ-aˇ.
Yaw beuˇ beuˇ-ehˇ loꞈ-awˬ
34“Naw maꞈ yaw beuˇ beuˇ-ehˇ jawˇ-awˬ. Maˬ ngeuˇ naˇ, dzaˬ boˆ dawˇ boˆ boˆ-eu jeˬ, dzaˬ yehꞈ dawˇ yehꞈ-eu jeˬ hawˇ-eu, yaw dehꞈ dehꞈ-eu gaˇ kawˆ kʼahˬ lahˇ-eu jeˬ naw maꞈ-euˬ nui ma-ahˇ ciˬ tehˬ taˬ-awˇ maˬ noeˬ maˬ duˇ-ehˇ jawˇ luꞈ ngeh, lahˇ ju-ahˇ paꞈ leˇ-eu loꞈ-ehˇ, aˇ nah kʼoeˇ nah naw maꞈ kʼoeˇ taˆ ja pyuˬ ni bi keuˆ le nmˬ-mˇ. 35Aˬ jeˬ miˇ neh ehˇ naˇ, miˇ tsaˬ heu kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ kʼoeˇ taˆ aˇ nah kʼoeˇ nah keuˆ le tehꞈ-a. 36Keuˆ le teuˇ le-eu gaˇ kawˆ kʼoeˇ deuˬ dawˬ tawˆ luꞈ-ahˇ, naw maꞈ dehꞈ dzeuˇ jawˇ dzeuˇ nya ni gʼaˬ tiˬ byah ahˇ-awˇ, Tsawˇhaˬ-euˬ Zaˬmaˇ mehˬ shi ya yawꞈ gaˇ dehꞈ keuˆ nya ni, aˬ myah luꞈ yaw beuˇ beuˇ-ehˇ jawˇ-awˇ guiˬ lahˬ shaˇ-awˬ.”
37Yeˬsuˇ-aˬ, yawˬ nah na luꞈ nah gʼahˇ paw Uˬ duˬ tahˬ nymˇ nymˇ ma laꞈ kʼoeˇ mehˬ nehˬ-euˬ meh. Ehˇ kʼawꞈ, uˬ ciꞈ ciꞈ le ngeh, Saˬloˬ gawˬ jawˬ-ahˇ yaꞈ leˇ-eu meh. 38Uˬ shawˬ yaw naꞈ-ehˇ tsawˇ haˬ dawˬ tawˆ luꞈ Uˬ duˬ tahˬ nymˇ nymˇ ma-ahˇ le-awˇ, aˬ yawꞈ mehˬ nehˬ tsoˆ nehˬ gaˇ naˇ haˬ leˇ-eu meh.
දැනට තෝරාගෙන ඇත:
Luˇkaꞈ 21: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.