Luˇkaꞈ 15
15
Byoˆ-iˇ-euˬ yawˇ gaˇ kawˆ
(Maꞈtehˬ 18.12-14)
1Tiˬ nah-aˬ, kawˬ taꞈ-eu tsawˇ haˬ deuˬ hawˇ-eu, iˬ baˇ zaˬ lehˇ sawˇ dzeh taˬ-euˬ tsawˇ haˬ deuˬ, Yeˬsuˇ dawˬ mehˬ mehˬ gaˇ naˇ haˬ-eu lehˇ, aˬ yawꞈ-euˬ dawˬ peh jiˆ uˇ laˇ luꞈ-eu meh. 2Kʼoeˇ ngeh, Paˬliˬsehˇ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ Yeˬsuˇ-ahˇ iˬ baˇ taˬ-awˇ ehˇ-eu, “Tsawˇhaˬ heu gʼaˬ iˬ baˇ zaˬ lehˇ sawˇ taˬ-euˬ deuˬ-ahˇ ha geuꞈ-eu uˬ taꞈ, tiˬ kawˆ loꞈ-ehˇ dzaˬ taꞈ dawˇ taꞈ-eu nga.” 3Kʼoeˇ ngeh, Yeˬsuˇ aˬ yawꞈ maꞈ-ahˇ yaw jeˬ maˬ jeˬ heu hmˬ ja mehˬ nehˬ-euˬ meh.
4“Naw maꞈ laꞈ kʼoeˇ, tsawˇ haˬ tiˬ gʼaˬ na yawˇ tiˬ yaˇ mawˇ jawˇ-awˇ, tiˬ mawˇ byoˆ-iˇ naˇ, gʼoeˬ tseˇ gʼoeˬ mawˇ-ahˇ bawˇ tsahˬ-ahˇ bi jawˇ yaꞈ-awˇ, byoˆ-iˇ-euˬ kʼoeˇ mawˇ-ahˇ maˬ mawˇ kʼoeˇ mawˇ ni maˬ poˆ loˇ. 5Poˆ mawˇ ngeh jawˇ, laˬ kʼaˬ cehˇ dui dui-awˇ baꞈ pu kʼoeˇ taˆ baꞈ tehꞈ-a. 6Iˇ kahˇ gʼoꞈ keuˆ laˇ ngeh jawˇ,aˬ yawꞈ-euˬ cawˬ deuˬ hawˇ-eu aˬ yawꞈ-euˬ dawˬ peh jawˇ-eu tsawˇ haˬ deuˬ-ahˇ kuˇ-awˇ, ‘Byoˆ-iˇ-euˬ ngaˬ-euˬ yawˇ kʼoeˇ mawˇ poˆ mawˇ kʼoꞈ-euˬ miˇ neh, ngaˬ nehˬ-ehˇ laˬ kʼaˬ caw cehˇ laˇ-awˬ’ lehˇ ehˇ nehˬ tehꞈ-a. 7Kʼoeˇ loꞈ-ehˇ duˇ ni, iˬ baˇ noeˬ poˆ-eu maˬ loˬ-eu yaw tsaˬ yaw dawˇ tsawˇ haˬ gʼoeˬ tseˇ gʼoeˬ gʼaˬ-ahˇ naˆ maˬ tseˇ, iˬ baˇ noeˬ poˆ-euˬ iˬ baˇ zaˬ tiˬ gʼaˬ-ahˇ mˬ kʼoeˇ taˆ laˬ kʼaˬ cehˇ dzehˬ tehꞈ-a lehˇ, naw maꞈ-ahˇ ngaˇ ehˇ-eu ma.
Byoˆ-iˇ-euˬ pyuˇ maˇ byaˆ
8“Zaˬ miˬ zaˬ tiˬ gʼaˬ pyuˇ maˇ byaˆ tseˇ byaˆ ahˇ-eu tiˬ byaˆ ga byoˆ naˇ, tsiˇ kʼmˬ keuˬ-awˇ nymˇ-ahˇ yaˆ pyawˇ yaˆ yaˆ-ehˇ maˬ mawˇ kʼoeˇ mawˇ ni maˬ poˆ-aˇ loˇ. 9Aˬ yawꞈ poˆ mawˇ ngeh, aˬ yawꞈ-euˬ cawˬ deuˬ hawˇ-eu aˬ yawꞈ-euˬ dawˬ peh jawˇ-eu tsawˇ haˬ deuˬ-ahˇ kuˇ uiˬ-awˇ, ‘Ngaˬ neh bi ga byoˆ-euˬ pyuˇ maˇ byaˆ kʼoeˇ byaˆ paˇ mawˇ kʼoꞈ-euˬ miˇ neh, ngaˬ nehˬ-ehˇ laˬ kʼaˬ caw cehˇ laˇ-awˬ’ lehˇ ehˇ nehˬ tehꞈ-a. 10Kʼoeˇ gaˇ duˇ ni, iˬ baˇ zaˬ tiˬ gʼaˬ iˬ baˇ noeˬ poˆ-euˬ gaˇ, Miˬyehˇ-euˬ mˬ taˆ gʼaˬ kʼehˇ deuˬ laˬ kʼaˬ cehˇ-eu meh lehˇ, naw maꞈ-ahˇ ngaˇ ehˇ-eu ma.”
Byoˆ-iˇ-euˬ aˬ li tiˬ gʼaˬ
11Yeˬsuˇ ehˇ-eu, “Tsawˇ haˬ tiˬ gʼaˬ aˬ li nyiˬ li jawˇ-eu meh. 12Aˬ li aˬ nyiˇ gʼaˬ aˬ yawꞈ-euˬ aˬ da-ahˇ, ‘Aˬ da-oˇ, ngaˬ-ahˇ oꞈ-eu jeˬ biˇ nymˬ-mˇ biꞈ nehˬ laꞈ-awˬ’ lehˇ shaˇ-eu meh. Kʼoeˇ ngeh, aˬ da gʼaˬ aˬ nyaꞈ nmˇ-ahˇ jeˬ biˇ biˇ paˆ nehˬ-euˬ meh. 13Gʼawˬ mya nah maˬ gʼeh-ehˇ, aˬ li aˬ nyiˇ gʼaˬ aˬ yawꞈ kʼaˇ jaˆ-eu yuˇ jiˇ-awˇ, gaˇ mahˇ kaˬ-eu miˇ kʼahˬ-ahˇ doˆ-iˇ-awˇ, kʼaˇ dehꞈ mawꞈ-eu dehꞈ-awˇ, aˬ yawꞈ-euˬ pyuˇ shuiˇ myawˬ gahˬ zmˬ dzeh jiˇ-euˬ meh. 14Kʼaˇ ahˇ-eu dawˬ tawˆ luꞈ zmˬ dzeh jiˇ ngeh jawˇ, miˇ kʼahˬ kʼoeˇ kʼahˬ-ahˇ mehꞈ dui shuꞈ dui dui-eu jeˬ keuˆ le-awˇ, aˬ yawꞈ tiˬ jeˬ-iˬ maˬ jaˆ ni shaˬ dui dui-euˬ meh. 15Kʼoeˇ ngeh, miˇ kʼahˬ kʼoeˇ kʼahˬ-ahˇ jawˇ-eu tsawˇ haˬ tiˬ gʼaˬ jawˇ gaˇ jawˇ-iˇ-awˇ, tsawˇ haˬ kʼoeˇ gʼaˬ aˬ yawꞈ-ahˇ deh yaˇ-ahˇ aˬ zaꞈ bi bo-euˬ meh. 16‘Aˬ zaꞈ-ahˇ biꞈ-euˬ aˇ behˆ kʼoeˇ tiˬ dehˆ ya dzaˬ law nmˇ-aˬ’ lehˇ aˬ yawꞈ noeˬ-euˬ meh. Ehˇ kʼawꞈ, tiˬ gʼaˬ-iˬ aˬ yawꞈ-ahˇ aˇ behˆ kʼoeˇ maˬ bi dzaˬ-a. 17Aˬ li kʼoeˇ gʼaˬ aˬ yawˇ yawꞈ noeˬ gahˇ laˇ-awˇ, ‘Ngaˬ da-ahˇ gʼaˬ mahˇ mahˇ dzaˬ-eu tsawˇ haˬ deuˬ maˬ dzaˬ maˬ dawˇ jiˇ coeˇ-a. Ehˇ kʼawꞈ, ngaˇ-aˬ, heu gaˇ hawˬ dzahˬ sehꞈ shaw-iˬ miˇ-a. 18Ngaˇ tsawˬ tuˇ-awˇ ngaˬ da jawˇ gaˇ gʼoꞈ leˇ-awˇ, “Aˬ da-oˇ, Miˬyehˇ mehˬ shi hawˇ-eu nawˬ-euˬ mehˬ shi ngaˇ iˬ baˇ mˇ-euˬ ma. 19Ngaˬ-ahˇ nawˬ li lehˇ bi kuˇ-eu maˬ paˇ geuˇ miˇ-a. Nawˬ-ahˇ gʼaˬ mahˇ mahˇ dzaˬ-eu tsawˇ haˬ tiˬ gʼaˬ loꞈ-ehˇ sawˇ nehˬ laꞈ-awˬ” lehˇ ehˇ nehˬ leˇ ma’ lehˇ, yawˬ haˇ yawˬ ha ehˇ-eu meh. 20Kʼoeˇ naˇ, aˬ yawꞈ tsawˬ tuˇ laˇ-awˇ, aˬ yawꞈ-euˬ aˬ da jawˇ gaˇ gʼoꞈ leˇ-euˬ meh.
“Aˬ yawꞈ gaˇ mahˇ kaˬ gaˇ gʼoꞈ laˇ luꞈ ngeh neh, aˬ yawꞈ-euˬ aˬ da aˬ yawꞈ-ahˇ haw mawˇ-awˇ, gʼawˬ shaˬ gaˬ dui dui-eu miˇ neh cehˆ coeˬ coeˬ gʼeh-awˇ, aˬ yawꞈ-ahˇ byaˇ cuꞈ-awˇ ha-eu laꞈ kʼoeˇ, mehˬ cuˇ cuˇ nehˬ-euˬ meh. 21Aˬ li kʼoeˇ gʼaˬ aˬ da-ahˇ ehˇ nehˬ-eu, ‘Aˬ da-oˇ, Miˬyehˇ mehˬ shi hawˇ-eu nawˬ-euˬ mehˬ shi ngaˇ iˬ baˇ mˇ-euˬ ma. Ngaˬ-ahˇ nawˬ li lehˇ bi kuˇ-eu maˬ paˇ geuˇ miˇ-a.’ 22Ehˇ kʼawꞈ, aˬ da gʼaˬ aˬ yawꞈ-euˬ zaˬ kʼaˆ deuˬ-ahˇ kuˇ-awˇ ehˇ-eu, ‘Aˬ cawˬ naˆ maˬ tseˇ muiˬ dzehˬ-eu pehˇ kʼahˬ pehˇ mahˇ yuˇ leꞈ-awˇ ngaˬ li-ahˇ yaw kawˇ-ehˇ bi dm sheˇ. Laꞈ behˬ gʼeh bi behˬ-awˇ, sehˬ nawˆ gʼeh bi nawˆ-awˬ. 23Kʼoeˇ naˇ, aˬ cawˬ naˆ maˬ tseˇ tsuˇ-eu mawˇ neˇ mawˇ gaw zaˬ tsahˇ leꞈ-awˇ sehꞈ-awˬ. Aˬ dui maꞈ laˬ kʼaˬ tiˬ cehˇ dzaˬ taꞈ dawˇ taꞈ kaˇ-euˇ. 24Aˬ jeˬ miˇ neh ehˇ naˇ, ngaˬ li heu gʼaˬ shiˇ-euˬ kʼawꞈ, nymˬ-mˇ paˇ gʼoꞈ dehꞈ laˇ-euˬ meh. Aˬ yawꞈ byoˆ-iˇ-euˬ kʼawꞈ, nymˬ-mˇ paˇ mawˇ kʼoꞈ-euˬ ma.’ Kʼoeˇ naˇ, aˬ yawꞈ maꞈ laˬ kʼaˬ tiˬ cehˇ dzaˬ taꞈ dawˇ taꞈ-euˬ meh.
25“Kʼoeˇ ngeh, aˬ li aˬ yuiꞈ gʼaˬ yaˇ ngeh iˇ-euˬ meh. Aˬ yawꞈ gʼoꞈ laˇ-awˇ, nymˇ dzeˇ gʼoꞈ keuˆ laˇ ngeh, caˇ dawˬ caˇ caˇ-ehˇ gaˇ nyeh nyeh-eu teˇ saˇ ya gaˬ-euˬ meh. 26Kʼoeˇ miˇ neh, zaˬ kʼaˆ tiˬ gʼaˬ-ahˇ aˬ yawꞈ kuˇ-awˇ, ‘Aˬ jeˬ gʼeh luꞈ ta’ lehˇ naˇ haˬ-euˬ meh. 27Zaˬ kʼaˆ kʼoeˇ gʼaˬ aˬ yawꞈ-ahˇ ehˇ-eu, ‘Nawˬ-euˬ aˬ nyiˇ gʼoꞈ laˇ-euˬ meh. Aˬ yawꞈ tiˬ jeˬ-iˬ maˬ gʼeh ni gʼoꞈ keuˆ laˇ-euˬ miˇ neh, nawˬ da laˬ kʼaˬ cehˇ-awˇ cu tsuˇ taˬ-euˬ mawˇ neˇ mawˇ gawˬ zaˬ kʼoeˇ mawˇ sehꞈ-euˬ meh.’
28Dawˬ kʼoeˇ dawˬ-ahˇ ya gaˬ ngeh, aˬ li aˬ yuiꞈ kʼoeˇ gʼaˬ nui ma pehˇ dui dui laˇ-awˇ, iˇ kahˇ laꞈ kʼoeˇ maˬ gʼoꞈ uˇ leˇ-a. Aˬ da gʼaˬ doˆ le-awˇ, iˇ kahˇ laꞈ kʼoeˇ gʼoꞈ uˇ laˇ-awˬ lehˇ gʼaˇ duˬ shaˇ dui dui-euˬ meh. 29Ehˇ kʼawꞈ, aˬ yawꞈ-euˬ aˬ da-ahˇ aˬ yawꞈ ehˇ nehˬ-eu, ‘Heu myaˆ kʼoꞈ heu myaˆ la nawˬ-ahˇ ngaˇ zaˬ kʼaˆ loꞈ-ehˇ mˇ cu-euˬ uˬ taꞈ, nawˬ-euˬ ehˇ dawˬ maˬ naˇ haˬ-euˬ tiˬ poˆ-iˬ maˬ jaˆ haw-aˬ. Ehˇ kʼawꞈ, ngaˬ-euˬ cawˬ deuˬ nehˬ-ehˇ dzaˬ taꞈ dawˇ taꞈ-eu gʼaˇ duˬ, ciꞈ myehꞈ ciꞈ zaˬ tiˬ mawˇ tehꞈ-ehˇ kʼawꞈ nawˇ ngaˬ-ahˇ tiˬ jawˇ-iˬ maˬ biꞈ laꞈ haw-aˬ. 30Ehˇ kʼawꞈ, nawˬ-euˬ pyuˇ shuiˇ myawˬ gahˬ deuˬ-ahˇ, meh maˬ laˇ nehˬ-ehˇ byawˬ gʼa byawˬ gʼa-ehˇ zmˬ dzeh jiˇ-euˬ nawˬ li heu li gʼoꞈ laˇ-euˬ gaˇ, cu tsuˇ taˬ-euˬ mawˇ neˇ mawˇ gaw zaˬ kʼoeˇ mawˇ sehꞈ nehˬ-euˬ nga laˬ.’ 31Aˬ da gʼaˬ ehˇ-eu, ‘Aˬ li-oˇ, nawˇ-aˬ, aˬ myah luꞈ ngaˬ nehˬ-ehˇ jawˇ-awˇ, ngaˇ kʼaˇ jaˆ-eu jeˬ dawˬ tawˆ luꞈ nawˬ-euˬ tehꞈ meh. 32Laˬ kʼaˬ tiˬ cehˇ dzaˬ taꞈ dawˇ taꞈ-eu heu-aˬ, jahˇ paˬ-ehˇ gʼeh-eu tiˬ jeˬ meh. Aˬ jeˬ miˇ neh ehˇ naˇ, nawˬ-euˬ aˬ nyiˇ heu gʼaˬ shiˇ-euˬ kʼawꞈ, nymˬ-mˇ paˇ gʼoꞈ dehꞈ laˇ-euˬ meh. Aˬ yawꞈ byoˆ-iˇ-euˬ kʼawꞈ, nymˬ-mˇ paˇ mawˇ kʼoꞈ-euˬ ma.”’
දැනට තෝරාගෙන ඇත:
Luˇkaꞈ 15: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.