Luˇkaꞈ 11
11
Yeˬsuˇ guiˬ lahˬ shaˇ-eu gaˇ kawˆ mehˬ-eu
(Maꞈtehˬ 6.9-13; 7.7-11)
1Tiˬ poˆ-aˬ, Yeˬsuˇ jawˇ duˬ tiˬ tsahˇ-ahˇ guiˬ lahˬ shaˇ luꞈ-eu meh. Aˬ yawꞈ guiˬ lahˬ shaˇ gʼaˬ ngeh, aˬ yawꞈ-euˬ zaˬ lahˇ tiˬ gʼaˬ aˬ yawꞈ-ahˇ ehˇ-eu, “Sahˬpaˬ-oˇ, Yoˇhaˬ neh aˬ yawꞈ-euˬ zaˬ lahˇ deuˬ-ahˇ mehˬ nehˬ-euˬ loꞈ-ehˇ, guiˬ lahˬ aˬ joˆ-ehˇ ya shaˇ-eu gaˇ kawˆ nga maꞈ-ahˇ mehˬ nehˬ laꞈ-awˬ.”
2Aˬ yawꞈ maꞈ-ahˇ Yeˬsuˇ ehˇ nehˬ-eu, “Naw maꞈ guiˬ lahˬ shaˇ ngeh, heu loꞈ-ehˇ shaˇ-awˬ.
‘Aˬda-oˇ,
Nawˬ-euˬ tsawˇ myahˇ-ahˇ yaw zeu baw luꞈ-uˇ.
Nawˬ-euˬ Miˇ kʼahˬ keuˆ le luꞈ-uˇ.
3Aˬ yawꞈ nah yawꞈ loˬ-eu dzaˬ-eu dawˇ-eu jeˬ,
aˬ yawꞈ nah yawꞈ nga maꞈ-ahˇ biꞈ nehˬ laꞈ.
4Nga maꞈ-ahˇ kʼaˇ mˇ bahˬ laꞈ-euˬ deuˬ-ahˇ,
nga maꞈ iˬ baˇ pyehˬ nehˬ-euˬ miˇ neh,
nawˇ nga maꞈ-ahˇ iˬ baˇ pyehˬ nehˬ laꞈ.
Iˬ baˇ muˇ juˇ juˇ-eu mehˬ nah,
nga maꞈ-ahˇ taˬ bi iˇ laꞈ.”’
5Kʼoeˇ naˇ, zaˬ lahˇ deuˬ-ahˇ Yeˬsuˇ heu loꞈ-ehˇ ehˇ nehˬ-euˬ meh. “Naw maꞈ tiˬ gʼaˬ na uˬ ciꞈ sehˇ gʼahˇ yawˬ ha-euˬ cawˬ-euˬ nymˇ-ahˇ iˇ-awˇ, heu loꞈ-ehˇ ehˇ nehˬ-iˇ-euˬ ehˇ-awˬ. ‘Cawˬ-oˇ, ngaˬ-ahˇ kaˬ muˇ smˇ siˬ tiˬ poˆ biꞈ paˇ nehˬ leꞈ sheˇ. 6Gaˇ mahˇ kaˬ gaˇ jawˇ-eu ngaˬ-euˬ cawˬ tiˬ gʼaˬ ngaˇ jawˇ gaˇ laˇ keuˆ-awˇ, aˬ yawꞈ-ahˇ bi dzaˬ-eu tiˬ jeˬ-iˬ ma jaˆ nga.’ 7Kʼoeˇ ngeh, aˬ yawꞈ-euˬ cawˬ kʼoeˇ gʼaˬ iˇ kahˇ laꞈ kʼoeˇ paw jawˇ-awˇ, heu loꞈ-ehˇ ehˇ-eu ehˇ-awˬ. ‘Aˬ jeˬ paˇ laˆ bahˬ laˇ teˬ. Laˇ gʼoˆ kaꞈ tehˬ jiˇ-awˇ, ngaˬ-euˬ zaˬ deuˬ kʼawꞈ ngaˬ nehˬ-ehˇ yuꞈ kʼaˆ taˬ-euˬ miˇ neh, ngaˇ tuˇ le-awˇ nawˬ-ahˇ tiˬ jeˬ-iˬ maˬ paˇ biꞈ le nya miˇ-a.’ 8Ngaˇ naw maꞈ-ahˇ ehˇ nehˬ nyaˇ. Cawˬ aˇ naˆ ni gʼoeˇ kʼawꞈ dui-eu ngaˇ. Tuˇ laˇ-awˇ maˬ paˇ biꞈ le-eu ngaˇ lehˇ kʼawꞈ ehˇ-awˬ. Ehˇ kʼawꞈ, shaˇ-eu nui paw shaˇ tehˇ tehˬ naˇ, kʼaˇ loˬ-eu jeˬ maˬ biꞈ le-ehˇ maˬ paˇ gʼeh nya-aˇ.
9“Ngaˇ naw maꞈ-ahˇ ehˇ nehˬ nyaˇ. Shaˇ-awˬ. Shaˇ naˇ za tehꞈ-a. Poˆ-awˬ. Poˆ naˇ mawˇ tehꞈ-a. Laˇ gʼoˆ-ahˇ kʼoˆ-awˬ. Kʼoˆ naˇ pah nehˬ laꞈ tehꞈ-a. 10Aˬ jeˬ miˇ neh ehˇ naˇ, shaˇ-eu tsawˇ haˬ yawˬ gʼaˬ na luꞈ-ahˇ Miˬyehˇ biꞈ nehˬ tehꞈ-a. Poˆ-eu tsawˇ haˬ yawˬ gʼaˬ na luꞈ kʼawꞈ, poˆ mawˇ tehꞈ-a. Laˇ gʼoˆ-ahˇ kʼoˆ-eu tsawˇ haˬ-ahˇ laˇ gʼoˆ pah nehˬ tehꞈ-a. 11Naw maꞈ laꞈ kʼoeˇ, yawˬ ha-euˬ aˬ li ngaˬ shaˬ shaˇ dzaˬ gaˇ aˇ lawˇ nyehꞈ nehˬ-eu aˬ da jawˇ meh loˇ. 12Maˬ ngeuˇ naˇ, yawˬ ha-euˬ aˬ li ya uˆ shaˇ dzaˬ gaˇ boeˬ kaˬ laˬ ma nyehꞈ nehˬ-eu aˬ da jawˇ meh loˇ. 13Naw maꞈ iˬ baˇ mˇ-eu tsawˇ haˬ deuˬ kʼawꞈ, yawˬ ha-euˬ zaˬ-ahˇ yaw muiˬ jeˬ biꞈ-eu gʼaˇ duˬ kʼoeˇ naˆ ni siˬ nya naˇ, mˬ kʼoeˇ taˆ jawˇ-eu naw maꞈ-euˬ Aˬda-aˬ, aˬ yawꞈ-ahˇ kʼaˇ shaˇ-eu tsawˇ haˬ deuˬ-ahˇ Muiˬ-eu shawˇ-eu Yaw sahˇ Miˬyehˇ biꞈ-eu gʼaˇ duˬ aˇ naˆ ni paˇ siˬ nya dzehˬ nmˇ.”
Yeˬsuˇ hawˇ-eu Beˬlaˇzeˬbuˇlaˆ
(Maꞈtehˬ 12.22-30; Maˬkuˆ 3.20-27)
14Tsawˇ haˬ-ahˇ dawˬ maˬ ngehˬ nya ni aˬ dzawˬ bi dzawˬ-iˇ-eu nehꞈ tiˬ mawˇ-ahˇ Yeˬsuˇ teh doˆ luꞈ-eu meh. Nehꞈ kʼoeˇ mawˇ teh doˆ gʼaˬ ngeh, aˬ dzawˬ dzawˬ-iˇ-euˬ tsawˇ haˬ kʼoeˇ gʼaˬ dawˬ ngehˬ nya laˇ-euˬ meh. Tsawˇ haˬ aˇ maꞈ kʼoeˇ gaˇ zahˬ dui dui leˇ-euˬ meh. 15Ehˇ kʼawꞈ, tsawˇ haˬ tiˬ paˆ na deuˬ ehˇ-eu, “Nehꞈsahˬpaˬ Beˬlaˇzeˬbuˇlaˆ-euˬ baoˬ-ahˇ gʼoe-awˇ, aˬ yawꞈ nehꞈ teh doˆ-euˬ ngaˇ.”
16Tiˬ paˆ na deuˬ-aˬ, aˬ yawꞈ-ahˇ lawˬ haw-eu laꞈ kʼoeˇ, “Mˬ taˆ-euˬ zahˬ leˇ paˬ-ehˇ gʼeh-eu jeˬ jahˇ mehˬ nehˬ laꞈ sheˇ” lehˇ ehˇ-eu meh. 17Ehˇ kʼawꞈ, aˬ yawꞈ maꞈ-euˬ nui noeˬ-ahˇ aˬ yawꞈ siˬ nya-awˇ, heu loꞈ-ehˇ ehˇ nehˬ-euˬ meh. “Miˇ kʼahˬ aˬ geu kʼahˬ maˬ kaˬ, yawˬ ha yaw kaˬ aˇ muˇ muˇ paˆ-awˇ guiˇ deuˆ naˇ, gʼawˬ myahˇ ni maˬ ziꞈ-aˇ. Aˇ muˇ biˇ paˆ-eu nymˇ jiˇ kʼawꞈ, pyaˆ-iˇ shaˆ-iˇ tehꞈ-a. 18Saˬdaˬ kʼawꞈ, aˬ yawˇ yawꞈ aˇ muˇ biˇ paˆ-awˇ guiˇ deuˆ naˇ, a yawꞈ-euˬ miˇ kʼahˬ aˬ joˆ-ehˇ ziꞈ nya nmˇ. Beˬlaˇzeˬbuˇlaˆ-euˬ baoˬ-ahˇ gʼoe-awˇ ngaˇ nehꞈ teh doˆ-eu nga lehˇ naw maꞈ ehˇ-eu meh. 19Beˬlaˇzeˬbuˇlaˆ-euˬ baoˬ-ahˇ gʼoe-awˇ ngaˇ nehꞈ teh doˆ-eu ngeuˇ naˇ, naw maꞈ-euˬ zaˬ lahˇ deuˬ aˬ suˇ gʼaˬ-euˬ baoˬ-ahˇ gʼoe-awˇ nehꞈ teh doˆ ta. Naw maꞈ neh ehˇ-euˬ maˬ tsaˬ-eu gaˇ kawˆ, naw maꞈ-euˬ zaˬ lahˇ deuˬ neh mˇ-euˬ gaˇ deuˬ saˇ kiˇ kamˬ luꞈ meh. 20Miˬyehˇ-euˬ laꞈ noeˇ-ahˇ gʼoe-awˇ ngaˇ nehꞈ teh doˆ-eu ma. Heu-aˬ, Miˬyehˇ Miˇkʼahˬ naw maꞈ kʼoeˇ taˆ keuˆ le-euˬ gaˇ kawˆ saˇ kiˇ pyeuꞈ-eu meh.
21“Gʼaˬ kʼaˆ aˬ da tiˬ gʼaˬ guiˇ deuˆ-eu keu ka tiˬ kuꞈ lehˬ hmˬ-awˇ aˬ yawꞈ-euˬ nymˇ-ahˇ loꞈ piˇ luꞈ ngeh, aˬ yawꞈ-euˬ myawˬ gahˬ maˬ byoˆ-iˇ-a. 22Ehˇ kʼawꞈ, aˬ yawꞈ naˆ maˬ tseˇ kʼaˆ dzehˬ-eu tiˬ gʼaˬ deuˆ ceh ceh le-awˇ, aˬ yawꞈ-ahˇ deuˆ gʼaˬ ngeh, aꞈ yawꞈ nui ma huiˬ-euˬ aˬ yawꞈ-euˬ guiˇ deuˆ-eu keu ka dawˬ tawˆ luꞈ yuˇ geuꞈ gʼeh jiˇ-awˇ, kʼaˇ deuˆ za-euˬ jeˬ, biˇ geuꞈ tehꞈ-a.
23“Ngaˇ jawˇ paw maˬ pyawˬ-euˬ tsawˇ haˬ-aˬ, ngaˬ-ahˇ muiˇ-eu tsawˇ haˬ meh. Ngaˬ nehˬ-ehˇ tiˬ kawˆ loꞈ-ehˇ maˬ gʼoˆ uiˬ maˬ gʼoˆ bymˇ-eu tsawˇ haˬ-aˬ, byaˆ dzeh-eu tsawˇ haˬ meh.
Nehꞈ yaw jawꞈ paˇ gʼoꞈ uˇ laˇ-euˬ
(Maꞈtehˬ 12.43-45)
24“Tsawˇ haˬ tiˬ gʼaˬ laꞈ kʼoeˇ jawˇ-eu nehꞈ yaw jawꞈ tiˬ mawˇ doˆ-iˇ-awˇ, gui coˇ ni gʼeh-eu miˇ kʼahˬ-ahˇ gʼaˬ naˬ naˬ duˬ poˆ-iˇ-euˬ meh. Gʼaˬ naˬ naˬ duˬ maˬ poˆ mawˇ nya-ehˇ, ‘Ngaˬ-euˬ nymˇ-ahˇ paˇ gʼoꞈ jawˇ leˇ ma’ lehˇ, aˬ yawˇ yawꞈ ehˇ-eu meh. 25Kʼoeˇ naˇ, aˬ yawꞈ paˇ gʼoꞈ leˇ haw ngeh, nymˇ kʼoeˇ nymˇ juˇ tsui ni yaˆ juiˇ taˬ-awˇ jaˆ gaˇ ya mawˇ-euˬ meh. 26Aˬ yawꞈ paˇ doˆ-iˇ-awˇ, aˬ yawꞈ naˆ maˬ tseˇ haiˬ-eu nehꞈ shiꞈ mawˇ paˇ kuˇ ahˇ laꞈ-awˇ bi jawˇ-euˬ meh. Kʼoeˇ loꞈ-ehˇ pyeuꞈ laˇ gʼaˬ ngeh jawˇ, tsawˇ haˬ kʼoeˇ gʼaˬ yaw beh naˆ maˬ tseˇ doeˇ dzehˬ laˇ tehꞈ-a.”
Maˇ maˇ ni guiˬ lahˬ huiˬ-eu
27Yeˬsuˇ kʼoeˇ loꞈ-ehˇ ehˇ gʼaˬ ngeh, tsawˇ haˬ aˇ maꞈ laꞈ kʼoeˇ zaˬ miˬ zaˬ tiˬ gʼaˬ teˇ saˇ ui cuiˆ yaw kʼaˆ-ehˇ guˇ-awˇ ehˇ-eu, “Nawˬ-ahˇ bi dehꞈ doˆ le-awˇ aˬ coeˇ bi dawˇ huiˬ-euˬ zaˬ miˬ zaˬ kʼoeˇ gʼaˬ aˇ naˆ ni guiˬ lahˬ huiˬ-eu nga.”
28Ehˇ kʼawꞈ, Yeˬsuˇ ehˇ-eu, “Maˇ maˇ ni guiˬ lahˬ huiˬ-eu deuˬ-aˬ, Miˬyehˇ-euˬ dawˬ gaˬ-awˇ naˇ haˬ geuꞈ-eu deuˬ meh.”
Kʼaˆ jeˬ-ehˇ gʼeh-eu jeˬ bi mˇ mehˬ mawꞈ-eu
(Maꞈtehˬ 12.38-42)
29Yeˬsuˇ dawˬ peh uiˬ laˇ luꞈ-eu tsawˇ haˬ aˇ maꞈ myaˬ laˇ tehˇ tehˬ luꞈ ngeh, Yeˬsuˇ heu loꞈ-ehˇ ehˇ-eu meh. “Heu ziˇ-ahˇ dehꞈ luꞈ-eu tsawˇ haˬ heu deuˬ aˇ naˆ ni haiˬ-eu nga. Kʼaˆ jeˬ-ehˇ gʼeh-eu jeˬ mˇ mehˬ laꞈ lehˇ aˬ yawꞈ maꞈ ehˇ-eu meh. Yawˇnaˆ gaˇ kawˆ kʼaˆ jeˬ-ehˇ gʼeh-eu kʼoeˇ maˬ ngeuˇ naˇ, nui jeˬ maˬ mehˬ nehˬ. 30Yawˇ naˆ-aˬ, Niˇnaˬbeˬ meuˬ-ahˇ jawˇ-eu tsawˇ haˬ deuˬ gʼaˇ duˬ kʼaˆ jeˬ-ehˇ gʼeh-eu jeˬ pyeuꞈ-eu loꞈ-ehˇ, Tsawˇhaˬ-euˬ Zaˬmaˇ-aˬ, heu ziˇ-ahˇ dehꞈ luꞈ-eu tsawˇ haˬ deuˬ gʼaˇ duˬ, kʼaˆ jeˬ-ehˇ gʼeh-eu jeˬ pyeuꞈ tehꞈ-a. 31Yaˇ kʼaˬ daˇ-eu Aˇ nah keuˆ laˇ ngeh, Sheˬba sahˬ paˬ ma tsawˬ tuˇ laˇ-awˇ, heu ziˇ-euˬ tsawˇ haˬ deuˬ-euˬ iˬ baˇ poˆ -awˇ yaˇ kʼaˬ ja tehꞈ-a. Aˬ jeˬ miˇ neh ehˇ naˇ, sahˬ paˬ Sawˇlaˬmoˬ-euˬ zaˬ siˬ tsawˇ gahˇ byah-eu dawˬ-ahˇ naˇ haˬ laˇ-eu gʼaˇ duˬ, mˬ dzeˇ miˇ dzeˇ-ahˇ neh aˬ yawꞈ laˇ-euˬ meh. Ngaˇ naw maꞈ-ahˇ ehˇ nehˬ nyaˇ. Sawˇlaˬmoˬ naˆ maˬ tseˇ huiˬ-eu gʼaˬ heu gaˇ jawˇ luꞈ ma. 32Yaˇ kʼaˬ daˇ-eu aˇ nah keuˆ laˇ ngeh, Niˇnaˬbeˬ meuˬ-ahˇ jawˇ-eu tsawˇ haˬ deuˬ tuˇ laˇ-awˇ, naw maꞈ-ahˇ iˬ baˇ poˆ tehꞈ-a. Aˬ jeˬ miˇ neh ehˇ naˇ, Yawˇnaˆ dawˬ mehˬ mehˬ gaˇ aˬ yawꞈ maꞈ ya gaˬ ngeh, aˬ yawꞈ maꞈ iˬ baˇ noeˬ poˆ-euˬ meh. Ngaˇ naw maꞈ-ahˇ ehˇ nehˬ nyaˇ. Yawˇnaˆ naˆ maˬ tseˇ huiˬ dzehˬ-eu gʼaˬ heu gaˇ jawˇ luꞈ ma.
Gʼawˇ mawˇ-euˬ yaw shehꞈ
(Maꞈtehˬ 5.15; 6.22,23)
33“Tsiˇ kʼmˬ doꞈ-awˇ baˇ zaꞈ-ahˇ ciˬ taˬ-eu maˬ ehˇ, kʼaˆ puˬ neh moꞈ tsahˬ-eu maˬ ehˇ, tsawˇ haˬ tiˬ gʼaˬ-iˬ maˬ jahˇ-a. Ehˇ kʼawꞈ, kʼaˇ uˇ laˇ-eu tsawˇ haˬ deuˬ myaˆ nuiˆ mawˇ nya ni, tsiˇ kʼmˬ doꞈ taˬ duˬ-ahˇ ciˬ daˆ taˬ-eu meh. 34Nawˬ-euˬ myaˆ nuiˆ-aˬ, nawˬ-euˬ gʼawˇ mawˇ-euˬ tsiˇ kʼmˬ pyeuꞈ-eu meh. Nawˬ-euˬ myaˆ nuiˆ muiˬ naˇ, nawˬ-euˬ gʼawˇ mawˇ mawˇ lah-ehˇ yaw shehꞈ za tehꞈ-a. Ehˇ kʼawꞈ, nawˬ-euˬ myaˆ nuiˆ maˬ muiˬ naˇ, nawˬ-euˬ gʼawˇ mawˇ mawˇ lah-ehˇ zahˇ tsui ni gʼeh tehꞈ-a. 35Kʼoeˇ miˇ neh, nawˬ-euˬ laꞈ kʼoeˇ ahˇ-eu yaw shehꞈ zahˇ tsui ni maˬ bi pyeuꞈ-iˇ-eu gʼaˇ duˬ yahˇ-awˬ. 36Nawˬ-euˬ gʼawˇ mawˇ mawˇ lah-ehˇ yaw shehꞈ za-awˇ, yaw zahˇ tiˬ tsahˇ-iˬ maˬ baw naˇ, tsiˇ kʼmˬ-euˬ yaw shehꞈ nawˬ-euˬ kʼoeˇ taˆ bya gaˇ duˇ ni, nawˬ-euˬ gʼawˇ mawˇ mawˇ lah-ehˇ yaw shehꞈ bya tehꞈ-a.”
Paˬliˬsehˇ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ-ahˇ Yeˬsuˇ dehˬ-eu
(Maꞈtehˬ 23.1-36; Maˬkuˆ 12.38-40)
37Yeˬsuˇ dawˬ ngehˬ ngehˬ gʼaˬ ngeh, Paˬliˬsehˇ tiˬ gʼaˬ Yeˬsuˇ-ahˇ aˬ yawꞈ nehˬ-ehˇ hawˬ bi dzaˬ-eu lehˇ kuˇ-eu miˇ neh, Yeˬsuˇ uˇ leˇ-awˇ hawˬ jawˬ jawˬ-euˬ meh. 38Yeˬsuˇ hawˬ maˬ dzaˬ mi naˆ-ehˇ aˬ laꞈ maˬ dzuiꞈ gaˇ Paˬliˬsehˇ kʼoeˇ gʼaˬ mawˇ ngeh, zahˬ leˇ-euˬ meh. 39Kʼoeˇ ngeh, Sahˬpaˬ Yeˬsuˇ aˬ yawꞈ-ahˇ heu loꞈ-ehˇ ehˇ nehˬ-euˬ meh. “Naw maꞈ Paˬliˬsehˇ deuˬ-aˬ, naˬ bo hawˇ-eu kʼmˬ maˬ-ahˇ laꞈ nyiˇ paw joˆ shawˇ-eu meh. Ehˇ kʼawꞈ, naw maꞈ-euˬ laꞈ kʼoeˇ paw-aˬ, mehˇ juiˇ juiˇ-eu nui ma hawˇ-eu, yaw haiˬ jeˬ mˇ mawꞈ-eu nui noeˬ tiˬ byah ni ahˇ-eu meh. 40Aˬ dzawˬ aˇ gah deuˬ-oˇ, laꞈ nyiˇ hawˇ-eu laꞈ kʼoeˇ nyiˬ paw luꞈ aˬ yawꞈ tiˬ gʼaˬ neh beh-euˬ maˬ ngeuˇ-a loˇ. 41Ehˇ kʼawꞈ, naw maꞈ-euˬ kʼmˬ maˬ laꞈ kʼoeˇ ahˇ-eu jeˬ shaˬ-eu zahˬ-eu tsawˇ haˬ deuˬ-ahˇ gamꞈ nehˬ-awˬ. Kʼoeˇ loꞈ-ehˇ jahˇ naˇ, naw maꞈ muiˬ laˇ shawˇ laˇ tehꞈ-a.
42“Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ-aˬ, dzaˇ muiˇ dzaˇ sawˇ hawˇ-eu ka gʼawˬ ka dzaˇ deuˬ Miˬyehˇ-ahˇ tseˇ bymˇ tiˬ bymˇ damˬ-eu meh. Ehˇ kʼawꞈ, yaw tsaˬ yaw dawˇ jeˬ hawˇ-eu Miˬyehˇ-ahˇ gaˬ-eu jeˬ-ahˇ naw maꞈ byehˇ taˬ-euˬ meh. Naw maꞈ heu deuˬ-ahˇ mˇ byah-eu uˬ taꞈ, nui deuˬ-ahˇ kʼawꞈ maˬ byehˇ ni mˇ-eu tsaˬ meh.
43“Paˬliˬsehˇ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, uˬ duˬ tahˬ nymˇ laꞈ kʼoeˇ aˬ cawˬ taˬ huiˬ-eu nuiˇ mahˬ-ahˇ naw maꞈ nuiˇ mawꞈ-awˇ, lehˆ lehˆ kawˆ doe ni cah ngeh, aˬ cawˬ yaw zeu baw-eu laꞈ kʼoeˇ dawˬ ngehˬ cawˬ laˇ gaˇ geuꞈ mawꞈ-eu meh. 44Naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ-aˬ, aˬ cawˬ maˬ siˬ nya-ehˇ nawˬ tehˬ nawˬ tehˬ-ehˇ cah luꞈ-eu lmˬ bymˇ-ahˇ duˇ-eu meh.”
45Zahˇ dawˬ kʼoꞈ dawˬ mehˬ-eu saˬ laˬ tiˬ gʼaˬ Yeˬsuˇ-ahˇ ehˇ-eu, “Saˬ laˬ-oˇ, nawˇ teu loꞈ-ehˇ ehˇ-eu teu, nga maꞈ-ahˇ kʼawꞈ zaw laˇ nya.”
46Yeˬsuˇ ehˇ-eu, “Zahˇ dawˬ kʼoꞈ dawˬ mehˬ-eu saˬ laˬ deuˬ-oˇ, naw maꞈ kʼawꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ aˬ cawˬ-ahˇ maˬ pi coeˇ-eu kʼaˆ behˆ ciˬ pi-awˇ, naw maꞈ-aˬ, laꞈ noeˇ neh tehꞈ-ehˇ kʼawꞈ caw dehˬ caw toˆ nehˬ-eu maꞈ baw-a. 47Naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, naw maꞈ-euˬ aˬ poeˬ aˬ bawˇ deuˬ neh sehꞈ-euˬ Miˬyehˇ gʼaˇ duˬ ngehˬ dah-eu deuˬ-euˬ lmˬ bymˇ-ahˇ naw maꞈ gawˬ-eu meh. 48Naw maꞈ-euˬ aˬ poeˬ aˬ bawˇ deuˬ neh kʼoeˇ loꞈ-ehˇ mˇ-euˬ gaˇ nui ma tsaˬ-eu ma lehˇ, naw maꞈ yawˬ haˇ yawˬ ha saˇ kiˇ kamˬ gaˇ duˇ-eu meh. Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ-ahˇ aˬ yawꞈ maꞈ sehꞈ-euˬ gaˇ, naw maꞈ lmˬ bymˇ gawˬ caw nehˬ-eu meh. 49Kʼoeˇ baˬ da neh, Miˬyehˇ-euˬ zaˬ siˬ tsawˇ gahˇ sahˬ boꞈ laꞈ kʼoeˇ, ‘Miˬyehˇ gʼaˇ duˬ ngehˬ dah-eu deuˬ hawˇ-eu Gʼaˬ kʼehˇ deuˬ-ahˇ aˬ yawꞈ maꞈ sehꞈ-awˇ, tiˬ paˆ na deuˬ-ahˇ kʼehˬ nehˬ kʼaˆ nehˬ tehꞈ-a’ lehˇ ehˇ taˬ-euˬ meh. 50Kʼoeˇ miˇ neh, mˬ dawˬ pehˬ miˇ duˬ puˇ seu le ngeh neh bi sehꞈ ka leꞈ-euˬ Miˬyehˇ gʼaˇ duˬ ngehˬ dah-eu deuˬ-euˬ aˇ poeˬ, heu ziˇ-euˬ tsawˇ haˬ deuˬ-ahˇ kʼehˬ nehˬ kʼaˆ nehˬ tehꞈ-a. 51Muiˬ-eu shawˇ-eu Jawˇ duˬ hawˇ-eu lawˇ duˬ-euˬ yaw kaˬ-ahˇ Zaˬkaˬliˇ bi sehꞈ-euˬ gaˇ kawˆ-ahˇ keuˆ ni, aˬ yawꞈ maꞈ-ahˇ ciˬ pi nehˬ tehꞈ-a. Kʼoeˇ deuˬ dawˬ tawˆ luꞈ aˇ poeˬ, heu ziˇ-euˬ tsawˇ haˬ deuˬ-ahˇ kʼehˬ nehˬ kʼaˆ nehˬ tehꞈ-a lehˇ, naw maꞈ-ahˇ ngaˇ ehˇ-eu ma.
52“Zahˇ dawˬ kʼoꞈ dawˬ mehˬ-eu saˬ laˬ deuˬ-oˇ, naw maꞈ ya noeˬ shaˬ dui dui tehꞈ-a. Aˬ jeˬ miˇ neh ehˇ naˇ, zaˬ siˬ tsawˇ gahˇ laˇ gʼoˆ-euˬ mawˬ tawꞈ kahˬ naw maꞈ tuˆ tehˬ taˬ-awˇ, naw maꞈ maˬ uˇ leˇ-eu uˬ taꞈ, aˬ cawˬ uˇ leˇ gaˇ naw maꞈ laˆ tsoeˬ-eu meh.”
53Jawˇ duˬ kʼoeˇ tsahˇ-ahˇ neh Yeˬsuˇ doˆ-iˇ ngeh, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu Paˬliˬsehˇ deuˬ aˬ yawꞈ-ahˇ yaw kʼaˆ-ehˇ ja haw ja haw-ehˇ, gʼawˬ mya jeˬ naˇ haˬ-eu laꞈ kʼoeˇ, 54aˬ yawꞈ dawˬ ngehˬ bahˬ ni, dawˬ lahˇ ju kʼmˇ-eu lehˇ leh jeh-eu meh.
දැනට තෝරාගෙන ඇත:
Luˇkaꞈ 11: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.