Yoˇhaˬ 18
18
Yeˬsuˇ-ahˇ nyehꞈ-euˬ
(Maꞈtehˬ 26.47-56; Maˬkuˆ 14.43-50; Luˇkaꞈ 22.47-53)
1Yeˬsuˇ kʼoeˇ loꞈ-ehˇ guiˬ lahˬ shaˇ gʼaˬ ngeh, aˬ yawꞈ-euˬ zaˬ lahˇ deuˬ sheuˬ-awˇ, Giˇdaˬloˬ lawˇ gawˆ nui baˬ paw iˇ-euˬ meh. Kʼoeˇ gaˇ yaˇ kmˇ tiˬ kmˇ jaˆ-awˇ, Yeˬsuˇ hawˇ-eu aˬ yawꞈ-euˬ zaˬ lahˇ deuˬ yaˇ kmˇ kʼoeˇ kmˇ laꞈ kʼoeˇ uˇ leˇ-euˬ meh. 2Yeˬsuˇ-ahˇ ahˬ dzaˬ-euˬ Yuˇdaˆ kʼoeˇ gʼaˬ kʼawꞈ, yaˇ kmˇ kʼoeˇ kmˇ jaˆ-eu jawˇ duˬ siˬ nya-eu meh. Aˬ jeˬ miˇ neh ehˇ naˇ, Yeˬsuˇ aˬ yawꞈ-euˬ zaˬ lahˇ deuˬ-ahˇ yaˇ kmˇ kʼoeˇ kmˇ laꞈ kʼoeˇ gʼawˬ mya poˆ mawˇ dzoeˇ haw-euˬ meh. 3Yuˇdaˆ-aˬ, Loˇmaˆ yehˇ yehˇ maꞈ tiˬ maꞈ hawˇ-eu, piˇ ma aˬ yuiꞈ deuˬ hawˇ-eu Paˬliˬsehˇ deuˬ neh kʼehˇ gʼeh leꞈ-euˬ Uˬ duˬ tahˬ nymˇ nymˇ ma-ahˇ loꞈ-eu yehˇ deuˬ sheuˬ-awˇ, yaˇ kmˇ kʼoeˇ kmˇ-ahˇ iˇ-euˬ meh. Aˬ yawꞈ maꞈ-aˬ, guiˇ deuˆ-eu keu ka yuˇ-awˇ, tsiˇ kʼmˬ hawˇ-eu tsiˇ du keuˬ-awˇ iˇ-euˬ meh. 4Yeˬsuˇ-aˬ, aˬ yawꞈ-euˬ kʼoeˇ taˆ keu le luꞈ-eu yawˬ jeˬ na luꞈ-ahˇ siˬ nya-eu miˇ neh, mehˬ hu paw le doˆ-awˇ, “Naw maꞈ aˬ suˇ gʼaˬ-ahˇ poˆ te” lehˇ ehˇ nehˬ-euˬ meh.
5“Naˬzaˬlehˇ meuˬ-ahˇ jawˇ-eu Yeˬsuˇ-ahˇ poˆ-eu ma” lehˇ aˬ yawꞈ maꞈ ehˇ-eu meh.
“Ngaˇ Yeˬsuˇ ma” lehˇ aˬ yawꞈ ehˇ kʼoꞈ nehˬ-euˬ meh.
Yeˬsuˇ-ahˇ ahˬ dzaˬ-euˬ Yuˇdaˆ gʼeh, tsawˇ haˬ kʼoeˇ deuˬ nehˬ-ehˇ yawꞈ luꞈ-eu meh. 6“Ngaˇ Yeˬsuˇ ma” lehˇ aˬ yawꞈ maꞈ-ahˇ Yeˬsuˇ ehˇ nehˬ ngeh, aˬ yawꞈ maꞈ naˇ kʼah paw jiˆ kʼoꞈ-iˇ-awˇ sehˇ pyaˆ-ehˇ coˬ-iˇ-euˬ meh. 7“Naw maꞈ aˬ suˇ gʼaˬ-ahˇ poˆ te” lehˇ Yeˬsuˇ tiˬ poˆ paˇ naˇ haˬ-euˬ meh.
“Naˬzaˬlehˇ meuˬ-ahˇ jawˇ-eu Yeˬsuˇ-ahˇ poˆ-eu ma” lehˇ aˬ yawꞈ maꞈ paˇ ehˇ-eu meh.
8Yeˬsuˇ ehˇ-eu, “Ngaˇ Yeˬsuˇ ma lehˇ naw maꞈ-ahˇ ehˇ nehˬ luꞈ-eu ma tawˇ. Naw maꞈ ngaˬ-ahˇ poˆ-eu ngeuˇ naˇ, ngaˬ-euˬ mehˬ nah caw teh-eu tsawˇ haˬ heu deuˬ-ahˇ maˬ nyehꞈ ni bi goꞈ-iˇ-awˬ.” 9Yeˬsuˇ kʼoeˇ loꞈ-ehˇ ehˇ-eu kʼoeˇ-aˬ, “Aˬda-oˇ, nawˬ neh ngaˬ-ahˇ biꞈ laꞈ-euˬ tsawˇ haˬ tiˬ gʼaˬ-iˬ maˬ bi byoˆ-iˇ-aˬ” lehˇ, aˬ yawꞈ neh ehˇ taˬ-euˬ dawˬ kʼoeˇ dawˬ bi byah laˇ-eu gʼaˇ duˬ pyeuꞈ-eu meh.
10Siˇmoˬ Beˬtuˆluˆ mi cehˇ tiˬ kahˇ ahˇ-eu meh. Aˬ yawꞈ mi cehˇ kʼoeˇ kahˇ gʼawˇ doˆ-awˇ, Piˇ ma Yaw huiˬ gʼaˬ-euˬ zaˬ kʼaˆ-ahˇ coeˇ-awˇ, naˬ paꞈ aˇ maˇ pyawˬ coeˇ tsehˆ dzeh-euˬ meh. Zaˬ kʼaˆ kʼoeˇ gʼaˬ-euˬ tsawˇ myahˇ-aˬ, Maˬlaˬkuˇ meh. 11Beˬtuˆluˆ-ahˇ Yeˬsuˇ ehˇ nehˬ-eu, “Nawˬ-euˬ mi cehˇ paˇ soeˬ ahˇ kʼoꞈ-awˬ. Nga Da neh ngaˬ-ahˇ bi dawˇ laꞈ-euˬ kʼaˬ dui dui-eu kʼmˬ maˬ heu-ahˇ ngaˇ maˬ dawˇ-aˇ lehˇ nawˇ noeˬ te loˇ.”
Yeˬsuˇ-ahˇ Aˬna mehˬ shi sheuˬ ha leˇ-euˬ
12Kʼoeˇ ngeh, Loˇmaˆ yehˇ kʼoeˇ maꞈ hawˇ-eu aˬ yawꞈ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ, Uˬ duˬ tahˬ nymˇ nymˇ ma-ahˇ loꞈ-eu yehˇ deuˬ nehˬ-ehˇ tiˬ kawˆ loꞈ-ehˇ, Yeˬsuˇ-ahˇ nyehꞈ-awˇ paꞈ-euˬ meh. 13Kʼoeˇ naˇ, Aˬna jawˇ gaˇ jeˬ huˬ sheuˬ gʼeh-euˬ meh. Aˬ na-aˬ, kʼoeˇ ngeh kʼoꞈ-ahˇ Piˇ ma Yaw huiˬ gʼaˬ geuꞈ luꞈ-eu Gaˬyaˬpaˇ-euˬ tsawˇ mawˬ meh. 14Tsawˇ jeuˬ tiˬ jeuˬ jeuˬ lah ni ya cawˆ-iˇ-eu dah zaˇ tsawˇ haˬ tiˬ gʼaˬ bi shiˇ dah-eu muiˬ dzehˬ meh lehˇ, Yuˇdaˆ tsawˇ haˬ aˬ yuiꞈ aˬ tsu deuˬ-ahˇ ja noeˬ nehˬ-euˬ gʼaˬ-aˬ, Gaˬyaˬpaˇ meh.
Yeˬsuˇ-ahˇ maˬ siˬ lehˇ Beˬtuˆluˆ pyehˇ-euˬ
(Maꞈtehˬ 26.69,70; Maˬkuˆ 14.66-68; Luˇkaꞈ 22.55-57)
15Siˇmoˬ Beˬtuˆluˆ hawˇ-eu zaˬ lahˇ yawˬ gʼaˬ yawˬ Yeˬsuˇ mehˬ nah caw teh gʼeh-euˬ meh. Zaˬ lahˇ kʼoeˇ gʼaˬ Piˇ ma Yaw huiˬ gʼaˬ-ahˇ yaw muiˬ paˬ-ehˇ siˬ nya-eu miˇ neh, Piˇ ma Yaw huiˬ gʼaˬ-euˬ nymˇ-ahˇ kmˇ cehˇ gawˬ lahˇ taˬ-euˬ laꞈ kʼoeˇ, Yeˬsuˇ mehˬ nah caw teh uˇ gʼeh-euˬ meh. 16Beˬtuˆluˆ-aˬ, laꞈ nyiˇ paw lahˇ kʼehˬ dawˬ peh jawˇ yaꞈ-euˬ meh. Zaˬ lahˇ kʼoeˇ gʼaˬ paˇ gʼoꞈ poˆ-iˇ-awˇ, lahˇ kʼehˬ-ahˇ loꞈ-eu zaˬ miˬ zaˬ-ahˇ ehˇ nehˬ-awˇ, Beˬtuˆluˆ-ahˇ sheuˬ uˇ gʼeh-euˬ meh. 17Lahˇ kʼehˬ-ahˇ loꞈ-eu zaˬ miˬ zaˬ kʼoeˇ gʼaˬ Beˬtuˆluˆ-ahˇ ehˇ-eu, “Nawˇ gʼeh tsawˇ haˬ kʼoeˇ gʼa-euˬ zaˬ lahˇ deuˬ laꞈ kʼoeˇ ahˇ-eu maˬ ngeuˇ loˇ.”
Beˬtuˆluˆ ehˇ-eu, “Ngaˇ maˬ ahˇ.”
18Yaw gaˆ gaˆ-eu miˇ neh, zaˬ kʼaˆ deuˬ hawˇ-eu loꞈ luꞈ-eu yehˇ deuˬ kʼaˬ gʼeu baw doꞈ-awˇ, tiˬ jawˬ yawꞈ-awˇ yaw gaˆ lmˇ-euˬ meh. Beˬtuˆluˆ gʼeh, kʼoeˇ gaˇ yawꞈ leˇ-awˇ aˬ yawꞈ maꞈ nehˬ-ehˇ yaw gaˆ lmˇ-euˬ meh.
Piˇ ma Yaw huiˬ gʼaˬ Yeˬsuˇ-ahˇ pyehˆ tseˇ naˇ haˬ-euˬ
(Maꞈtehˬ 26.59-66; Maˬkuˆ 14.55-64; Luˇkaꞈ 22.66-71)
19Piˇ ma Yaw huiˬ gʼaˬ Yeˬsuˇ-ahˇ, aˬ yawꞈ-euˬ zaˬ lahˇ deuˬ gaˇ kawˆ hawˇ-eu aˬ yawꞈ neh mehˬ-euˬ tsoˆ-euˬ gaˇ kawˆ deuˬ pyehˆ tseˇ naˇ haˬ-euˬ meh. 20Yeˬsuˇ ehˇ-eu, “Ngaˇ aˬ cawˬ-ahˇ dawˬ kʼaˇ ngehˬ cawˬ ngeh, tsawˇ haˬ gʼawˬ mya ni jawˇ-eu mehˬ shi bya cehˆ ni ngehˬ cawˬ-euˬ ma. Tsawˇ haˬ dawˬ tawˆ luꞈ uiˬ laˇ-eu jawˇ duˬ pyeuꞈ-eu uˬ duˬ tahˬ nymˇ deuˬ hawˇ-eu, Uˬ duˬ tahˬ nymˇ nymˇ ma laꞈ kʼoeˇ tehꞈ-ehˇ ngaˇ mehˬ-euˬ tsoˆ-euˬ ma. Yaw zaꞈ-ahˇ ngehˬ kʼoeˬ tmˇ kʼoeˬ-euˬ tiˬ jeˬ-iˬ maˬ jaˆ. 21Aˬ jeˬ miˇ neh nawˇ ngaˬ-ahˇ pyehˆ tseˇ naˇ haˬ te. Ngaˬ-euˬ dawˬ-ahˇ ya gaˬ-euˬ tsawˇ haˬ deuˬ-ahˇ ngaˇ aˬ jeˬ ehˇ ta lehˇ naˇ hawˬ-awˬ.”
22Yeˬsuˇ kʼoeˇ loꞈ-ehˇ ehˇ ngeh, kʼoeˇ gaˇ loꞈ luꞈ-eu yehˇ tiˬ gʼaˬ aˬ yawꞈ-euˬ baˬ ba-ahˇ tehˆ-awˇ ehˇ-eu, “Nawˇ Piˇ ma Yaw huiˬ gʼaˬ-ahˇ teu loꞈ-ehˇ ehˇ kʼmˬ ta loˇ.”
23Piˇma Yaw huiˬ gʼaˬ-ahˇ Yeˬsuˇ ehˇ-eu, “Ngaˬ neh ngehˬ-euˬ maˬ ngeuˇ naˇ, maˬ ngeuˇ-a lehˇ heu gaˇ jawˇ-eu tsawˇ haˬ yawˬ gʼaˬ na luꞈ mehˬ shi ehˇ duˬ-awˬ. Ehˇ kʼawꞈ, ngaˬ neh ngehˬ-euˬ ngeuˇ naˇ, aˬ jeˬ miˇ neh ngaˬ-euˬ baˬ ba-ahˇ bi tehˆ te.”
24Kʼoeˇ naˇ, aˬ yawꞈ-ahˇ paꞈ tawꞈ taˬ-euˬ maˬ puiˇ nehˬ ni, Aˬna neh aˬ yawꞈ-ahˇ Piˇ ma Yaw huiˬ gʼaˬ pyeuꞈ-eu Gaˬyaˬpaˇ jawˇ gaˇ bi sheuˬ ha-iˇ-euˬ meh.
Yeˬsuˇ-ahˇ maˬ siˬ lehˇ Beˬtuˆluˆ tiˬ poˆ paˇ pyehˇ-euˬ
(Maꞈtehˬ 26.71-75; Maˬkuˆ 14.69-72; Luˇkaꞈ 22.58-62)
25Beˬtuˆluˆ-aˬ, kʼoeˇ gaˇ yawꞈ-awˇ yaw gaˆ lmˇ luꞈ-eu meh. Aˬ cawˬ a yawꞈ-ahˇ naˇ haˬ-eu, “Nawˇ gʼeh tsawˇ haˬ kʼoeˇ gʼaˬ-euˬ zaˬ lahˇ maˬ ngeuˇ loˇ.”
Beˬtuˆluˆ tsawˇ pyehˇ pyehˇ-awˇ ehˇ-eu, “Ngaˇ maˬ ngeuˇ.”
26Beˬtuˆluˆ neh naˬ paꞈ bi coeˇ tsehˆ-euˬ gʼaˬ-ahˇ aˬ yuiꞈ aˬ nyiˇ taꞈ-eu, Piˇ ma Yaw huiˬ gʼaˬ-euˬ zaˬ kʼaˆ tiˬ gʼaˬ Beˬtuˆluˆ-ahˇ ehˇ-eu, “Nawˇ gʼeh Yeˬsuˇ nehˬ-ehˇ yaˇ kmˇ laꞈ kʼoeˇ jawˇ luꞈ-eu ngaˇ mawˇ-euˬ ma.”
27Beˬtuˆluˆ tsawˇ pyehˇ paˇ pyehˇ-awˇ ehˇ-eu, “Maˬ ngeuˇ.” Aˬ yawꞈ kʼoeˇ loꞈ-ehˇ ehˇ gʼaˬ-eu maˬ dah ni, ya poeˇ doeˇ doˆ laˇ-euˬ meh.
Yeˬsuˇ-ahˇ saˬ paˬ Piˇlaˆ mehˬ shi sheuˬ gʼeh-euˬ
(Maꞈtehˬ 27.1,2,11,14; Maˬkuˆ 15.1-5; Luˇkaꞈ 23.1-5)
28Yawˬ nah yawˬ uˬ shawˬ yaw naꞈ-ehˇ, Yeˬsuˇ-ahˇ Gaˬyaˬpaˇ-euˬ nymˇ-ahˇ neh sheuˬ doˆ gʼeh-awˇ, sahˬ paˬ-euˬ hawˇ nymˇ-ahˇ sheuˬ gʼeh-euˬ meh. Yuˇdaˆ tsawˇ haˬ aˬ yuiꞈ aˬ tsu deuˬ-aˬ, Baˬsaˬkaˬ Bawˬ-iˬ dzaˬ gaˇ uˇ leˇ-eu gʼaˇ duˬ yawˬ ha-euˬ gʼawˇ mawˇ maˬ bi jawꞈ-iˇ-ehˇ shawˇ jehˆ ni bi jaˆ mawꞈ-eu miˇ neh, sahˬ paˬ-euˬ hawˇ nymˇ laꞈ kʼoeˇ maˬ uˇ keuˆ leˇ ni jawˇ-euˬ meh. 29Kʼoeˇ miˇ neh, sahˬ paˬ-euˬ mawˇ do laꞈ nyiˇ doˆ le-awˇ ehˇ-eu, “Tsawˇ haˬ heu gʼaˬ aˬ geu jeˬ lehˬ nga lehˇ naw maꞈ ehˇ te.”
30Aˬ yawꞈ maꞈ ehˇ-eu, “Tsawˇ haˬ heu gʼaˬ yaw haiˬ jeˬ mˇ taˬ-euˬ maˬ jaˆ law nmˇ-aˬ, aˬ yawꞈ-ahˇ nawˇjawˇ gaˇ nga maꞈ maˬ sheuˬ ha laˇ nya-aˇ.”
31Sahˬ paˬ Piˇlaˆ ehˇ-eu, “Toˆ-ehˇ ngeuˇ naˇ, naw maꞈ aˬ yawꞈ-ahˇ sheuˬ kʼoꞈ gʼeh-awˇ, naw maꞈ-euˬ zahˇ sahˇ kʼoꞈ kʼaˇ jaˆ-eu loꞈ-ehˇ yaˇ kʼa daˇ-awˬ.”
Aˬ yawꞈ maꞈ ehˇ-eu “Nga maꞈ tsawˇ haˬ maˬ sehꞈ kʼmˬ-a.”
32Yeˬsuˇ aˬ yawꞈ aˬ joˆ-ehˇ ya shiˇ-eu gaˇ kawˆ aˬ yawˇ yawꞈ ehˇ taˬ-euˬ jeˬ byah laˇ nya ni, aˬ yawꞈ maꞈ dawˬ kʼoeˇ jeˬ-ehˇ ngehˬ-eu jeˬ pyeuꞈ-eu meh.
33Sahˬ paˬ Piˇlaˆ hawˇ nymˇ laꞈ kʼoeˇ paˇ gʼoꞈ kʼoꞈ leˇ-awˇ, Yeˬsuˇ-ahˇ kuˇ-awˇ naˇ haˬ-eu, “Nawˇ Yuˇdaˆ tsawˇ haˬ-euˬ Sahˬ paˬ ma loˇ.”
34Yeˬsuˇ ehˇ-eu, “Dawˬ teu dawˬ maˇ maˇ ni nawˬ-euˬ dawˬ ma loˇ. Maˬ ngeuˇ naˇ, ngaˬ-euˬ gaˇ kawˆ aˬ cawˬ neh nawˬ-ahˇ ehˇ nehˬ laꞈ-euˬ dawˬ-ahˇ gʼoe-awˇ ngehˬ loˇ.”
35Sahˬ paˬ Piˇlaˆ ehˇ-eu, “Ngaˇ Yuˇdaˆ tsawˇ haˬ nga loˇ. Nawˬ-euˬ tsawˇ jeuˬ hawˇ-eu piˇ ma aˬ yuiꞈ deuˬ neh nawˬ-ahˇ ngaˬ-euˬ aˬ laꞈ laꞈ kʼoeˇ a nehˬ laꞈ-euˬ meh. Nawˇ aˬ jeˬ mˇ teˬ.”
36Yeˬsuˇ ehˇ-eu, “Ngaˬ-euˬ miˇ kʼahˬ-aˬ, miˇ tsaˬ heu-ahˇ taꞈ-eu jeˬ maˬ ngeuˇ. Ngaˬ-euˬ miˇ kʼahˬ miˇ tsaˬ heu-ahˇ taꞈ-eu jeˬ law nmˇ-aˬ, ngaˬ-ahˇ Yuˇdaˆ tsawˇ haˬ aˬ yuiꞈ aˬ tsu deuˬ neh maˬ bi nyehꞈ ni ngaˬ-euˬ tsawˇ haˬ deuˬ guiˇ deuˆ tehꞈ-a. Ngaˬ-euˬ miˇ kʼahˬ-aˬ, miˇ tsaˬ heu-ahˇ maˬ taꞈ.”
37Kʼoeˇ ngeh, sahˬ paˬ Piˇlaˆ aˬ yawꞈ-ahˇ naˇ haˬ-eu, “Nawˇ sahˬ paˬ ngeuˇ ma loˇ.”
Yeˬsuˇ ehˇ-eu, “Ngaˇ sahˬ paˬ nga lehˇ ehˇ-euˬ-aˬ, naw maꞈ meh. Ngaˇ miˇ tsaˬ heu kʼoeˇ taˆ zaꞈ le-awˇ dehꞈ le-euˬ-aˬ, yaw tsaˬ yaw dawˇ jeˬ ngehˬ le tmˇ le-euˬ tehꞈ ma. Yaw tsaˬ yaw dawˇ jeˬ-ahˇ kʼaˇ taꞈ-eu tsawˇ haˬ-aˬ, ngaˬ-euˬ dawˬ naˇ haˬ geuꞈ-eu meh.”
38Sahˬ paˬ Piˇlaˆ ehˇ-eu, “Yaw tsaˬ yaw dawˇ ehˇ-eu aˬ jeˬ-a.”
Yeˬsuˇ-ahˇ sehꞈ-eu gʼaˇ duˬ daˇ tsehˆ-euˬ
(Maꞈtehˬ 27.15-31; Maˬkuˆ 15.6-12; Luˇkaꞈ 23.13-25)
39Kʼoeˇ naˇ, hawˇ nymˇ-euˬ laꞈ nyiˇ jawˇ-eu deuˬ jawˇ gaˇ sahˬ paˬ Piˇlaˆ iˇ-awˇ, heu loꞈ-ehˇ ehˇ nehˬ-euˬ meh. “Tsawˇ haˬ heu gʼaˬ-euˬ yaw lehˬ ngaˇ maˬ poˆ mawˇ nya nya. Ehˇ kʼawꞈ, Baˬsaˬkaˬ Bawˬ-iˬ kʼaˇ keuˆ le ngeh, naw maꞈ gʼaˇ duˬ tsawˇ haˬ tiˬ gʼaˬ ngaˇ ya pyehˬ nehˬ-eu zahˇ sahˇ kʼoꞈ jaˆ-eu ma. Naw maꞈ gʼaˇ duˬ Yuˇdaˆ tsawˇ haˬ-euˬ Sahˬ paˬ heu gʼaˬ-ahˇ bi pyehˬ nehˬ mawꞈ-eu nya loˇ.”
40Aˬ yawꞈ maꞈ yaw kʼaˆ-ehˇ guˇ-awˇ ehˇ-eu, “Aˬ yawꞈ-ahˇ taˬ pyehˬ. Baˬlaˬbaˇ-ahˇ pyehˬ-awˬ.” Baˬlaˬbaˇ-aˬ, Loˇmaˆ sahˬ paˬ-ahˇ puiˬ-euˬ tsawˇ haˬ tiˬ gʼaˬ pyeuꞈ-eu meh.
දැනට තෝරාගෙන ඇත:
Yoˇhaˬ 18: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.