Yoˇhaˬ 13
13
Yeˬsuˇ zaˬ lahˇ deuˬ-euˬ aˬ kuiˇ dzuiꞈ nehˬ-euˬ
1Baˬsaˬkaˬ Bawˬ-iˬ keuˆ le-eu mehˬ hu ngeh nah, aˬ yawꞈ miˇ tsaˬ heu-ahˇ gʼawˬ-iˇ-awˇ, Aˬda jawˇ gaˇ ya gʼoꞈ leˇ-eu aˇ yamˬ tsaˬ laˇ-euˬ gaˇ kawˆ Yeˬsuˇ siˬ nya-eu meh. Miˇtsaˬ kʼoeˇ taˆ jawˇ-eu aˬ yawꞈ-ahˇ jah-eu tsawˇ haˬ deuˬ-ahˇ aˬ yawꞈ gaˬ-awˇ, aˇ saˬ saˬ ngeh keuˆ ni gaˬ-euˬ meh.
2Yeˬsuˇ hawˇ-eu aˬ yawꞈ-euˬ zaˬ lahˇ deuˬ ciꞈ hawˬ dzaˬ luꞈ-eu meh. Siˇmoˬ Iˇsaˬgaˬliˬoˆ-euˬ aˬ li Yuˇdaˆ-euˬ nui ma laꞈ kʼoeˇ, Yeˬsuˇ-ahˇ ahˬ dzaˬ mawꞈ-eu nui ma Nehꞈsahˬpaˬ neh dawˆ ahˇ gʼaˬ nehˬ-euˬ meh. 3Aˬda neh Yeˬsuˇ-ahˇ baoˬ tiˬ byah ni biꞈ taˬ-euˬ gaˇ kawˆ Yeˬsuˇ siˬ nya-eu meh. Aˬ yawꞈ Aˬda jawˇ gaˇ neh oe-awˇ, Aˬda jawˇ gaˇ ya gʼoꞈ leˇ-eu gaˇ kawˆ kʼawꞈ, siˬ nya-eu meh. 4Kʼoeˇ miˇ neh, aˬ yawꞈ hawˬ jeh-ahˇ tuˇ-awˇ, kʼoeˇ taˆ dm luꞈ-eu pehˇ kʼahˬ pehˇ mahˇ lehˆ-awˇ, joꞈ-ahˇ paˇ jeh paꞈ-euˬ meh. 5Kʼoeˇ naˇ, kʼmˬ maˬ shehˇ byehˇ-ahˇ iˇ cuꞈ shehˆ ahˇ-awˇ, zaˬ lahˇ deuˬ-euˬ aˬ kuiˇ dzuiꞈ nehˬ-awˇ, joꞈ-ahˇ paꞈ taˬ-euˬ paˇ jeh neh shiˆ gui nehˬ-euˬ meh. 6Siˇmoˬ Beˬtuˆluˆ jawˇ gaˇ iˇ keuˆ ngeh, heu loꞈ-ehˇ ehˇ-eu meh. “Sahˬpaˬ-oˇ, nawˇ ngaˬ-euˬ aˬ kuiˇ dzuiꞈ-eu lehˇ gʼeh te loˇ.”
7Yeˬsuˇ ehˇ-eu, “Ngaˇ mˇ luꞈ-eu heu nawˇ nymˬ-mˇ maˬ gʼoˆ shaw-a siˬ. Ehˇ kʼawꞈ, ni shawˇ pehˬ siˬ nya laˇ tehꞈ-a.”
8Beˬtuˆluˆ ehˇ-eu, “Nawˬ neh ngaˬ-euˬ aˬ kuiˇ tiˬ jawˇ-iˬ maˬ bi dzuiꞈ.”
Yeˬsuˇ ehˇ-eu, “Nawˬ-euˬ aˬ kuiˇ ngaˇ maˬ ya dzuiꞈ nehˬ naˇ, nawˇ ngaˬ-ahˇ maˬ paˇ taꞈ nya meh.”
9Siˇmoˬ Beˬtuˆluˆ ehˇ-eu, “Sahˬpaˬ-oˇ, toˆ-ehˇ jeˬ maˬ-iˬ, ngaˬ-euˬ aˬ kuiˇ tehꞈ-ehˇ maˬ ngeuˇ ni, aˬ laꞈ hawˇ-eu uˬ duˬ jiˇ dzuiꞈ nehˬ laꞈ-awˬ.”
10Yeˬsuˇ ehˇ-eu, “Iˇ cuꞈ dzuiꞈ gʼaˬ-euˬ tsawˇ haˬ-aˬ, yaw shawˇ miˇ neh, aˬ kuiˇ maˬ ngeuˇ naˇ dzuiꞈ-eu maˬ paˇ loˬ meh. Naw maꞈ laꞈ kʼoeˇ tiˬ gʼaˬ maˬ ngeuˇ naˇ dawˬ tawˆ luꞈ yaw shawˇ meh.” 11Aˬ geu gʼaˬ aˬ yawꞈ-ahˇ ahˬ dzaˬ-eu lehˇ gʼeh-eu gaˇ kawˆ Yeˬsuˇ siˬ duˬ taˬ-euˬ miˇ neh, “Naw maꞈ laꞈ kʼoeˇ tiˬ gʼaˬ maˬ ngeuˇ naˇ dawˬ tawˆ luꞈ yaw shawˇ meh” lehˇ ehˇ-eu jeˬ pyeuꞈ-eu meh.
12Yeˬsuˇ aˬ yawꞈ maꞈ-ahˇ aˬ kuiˇ dzuiꞈ nehˬ jiˇ gʼaˬ ngeh, pehˇ kʼahˬ pehˇ mahˇ paˇ dm-awˇ, aˬ yawꞈ-euˬ nuiˇ duˬ-ahˇ hawˬ jawˬ paˇ jawˬ leˇ-awˇ, heu loꞈ-ehˇ ehˇ-eu meh. “Naw maꞈ-ahˇ ngaˬ neh mˇ nehˬ-euˬ heu naw maꞈ gʼoˆ shaw ma loˇ.” 13Naw maꞈ ngaˬ-ahˇ ‘Saˬ laˬ-oˇ’, ‘Sahˬpaˬ-oˇ’ lehˇ kuˇ-eu meh. Naw maꞈ kʼoeˇ loꞈ-ehˇ kuˇ-eu tsaˬ meh. Aˬ jeˬ miˇ neh ehˇ naˇ, ngaˇ-aˬ, naw maꞈ kuˇ-eu loꞈ-ehˇ naw maꞈ-euˬ saˬ laˬ hawˇ-eu Sahˬpaˬ pyeuꞈ-eu ma. 14Naw maꞈ-euˬ Sahˬpaˬ hawˇ-eu naw maꞈ-euˬ saˬ laˬ pyeuꞈ-eu ngaˇ-aˬ, naw maꞈ-euˬ aˬ kuiˇ dzuiꞈ nehˬ gʼaˬ-euˬ ma. Kʼoeˇ miˇ neh, naw maꞈ kʼawꞈ tiˬ gʼaˬ tiˇ gʼaˬ aˬ kuiˇ dzuiꞈ nehˬ-eu tsaˬ meh. 15Naw maꞈ ngaˬ-ahˇ dzaw geuꞈ-awˇ mˇ nya ni, ngaˇ naw maꞈ-ahˇ mˇ mehˬ nehˬ gʼaˬ-euˬ ma. 16Ngaˇ naw maꞈ-ahˇ maˇ jawˆ ni ehˇ nehˬ nyaˇ. Zaˬ kʼaˆ-aˬ baw leˬ naˆ maˬ tseˇ maˬ huiˬ dzehˬ-aˇ. Myawˬ kʼehˇ gʼoˆ le-euˬ gʼaˬ-aˬ, aˬ yawꞈ-ahˇ kʼehˇ gʼeh leꞈ-euˬ gʼaˬ naˆ maˬ tseˇ maˬ huiˬ dzehˬ-aˇ. 17Nymˬ-mˇ, gaˇ kawˆ heu deuˬ naw maꞈ ya siˬ gʼaˬ jiˇ-euˬ meh. Siˬ nya-eu loꞈ-ehˇ mˇ naˇ, naw maꞈ aˇ naˆ ni guiˬ lahˬ huiˬ-eu nga.
18“Naw maꞈ dawˬ tawˆ luꞈ gaˇ kawˆ ngaˇ ehˇ luꞈ-eu maˬ ngeuˇ. Ngaˬ neh tseˇ doˆ-euˬ tsawˇ haˬ deuˬ ngaˇ siˬ nya ma. Ehˇ kʼawꞈ, Jaˇliꞈ laꞈ kʼoeˇ ehˇ taˬ-euˬ, ‘Ngaˬ nehˬ-ehˇ gʼawˬ nyoeˇ kʼmˬ maˬ taꞈ-eu gʼaˬ ngaˬ-ahˇ puiˬ-eu meh’ lehˇ ehˇ-eu dawˬ kʼoeˇ dawˬ maˬ byah laˇ-ehˇ maˬ gʼeh nya-a. 19Aˬ diˇ aˬ maˇ pyeuꞈ laˇ ngeh jawˇ, ngaˬ neh ehˇ-euˬ loꞈ-ehˇ ngaˇ-aˬ ngaˇ law hawˇ nga lehˇ naw maꞈ siˬ nya ni, maˬ pyeuꞈ laˇ mi naˆ-ehˇ naw maꞈ-ahˇ ehˇ kʼmˬ taˬ-eu ma.” 20Ngaˇ naw maꞈ-ahˇ maˇ jawˆ ni ehˇ nehˬ nyaˇ. Ngaˬ neh kʼehˇ gʼeh-euˬ tsawˇ haˬ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ ha geuꞈ gaˇ duˇ-awˇ, ngaˬ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ kʼehˇ gʼeh leꞈ-euˬ gʼaˬ-ahˇ ha geuꞈ gaˇ duˇ-eu meh.”
Aˬ yawꞈ-ahˇ ahˬ dzaˬ tehꞈ-a lehˇ Yeˬsuˇ ehˇ-eu
(Maꞈtehˬ 26.20-25; Maˬkuˆ 14.17-21; Luˇkaꞈ 22.21-23)
21Yeˬsuˇ kʼoeˇ loꞈ-ehˇ ehˇ gʼaˬ ngeh jawˇ, aˬ yawꞈ-euˬ nui ma shaˬ zahˬ mˇ dui dui-eu laꞈ kʼoeˇ, heu loꞈ-ehˇ bya cehˆ ni ehˇ doˆ nehˬ-euˬ meh. “Ngaˇ naw maꞈ-ahˇ maˇ jawˆ ni ehˇ-eu ma. Naw maꞈ laꞈ kʼoeˇ tiˬ gʼaˬ ngaˬ-ahˇ ahˬ dzaˬ tehꞈ-a.”
22Zaˬ lahˇ deuˬ tiˬ gʼaˬ tiˇ gʼaˬ haw haw-ehˇ, aˬ yawꞈ aˬ suˇ gʼaˬ-ahˇ ehˇ mawꞈ-eu maˬ siˬ lehˇ zahˬ leˇ-euˬ meh. 23Yeˬsuˇ gaˬ-euˬ zaˬ lahˇ tiˬ gʼaˬ Yeˬsuˇ-euˬ dawˬ peh nuiˇ luꞈ-eu meh. 24Siˇmoˬ Beˬtuˆluˆ neh zaˬ lahˇ kʼoeˇ gʼaˬ-ahˇ laꞈ dzawˇ dzawˇ nehˬ-awˇ, “Aˬ suˇ gʼaˬ-ahˇ ehˇ mawꞈ te lehˇ aˬ yawꞈ-ahˇ tiˬ poˆ naˇ haˬ-iˬ sheˇ” lehˇ ehˇ nehˬ-euˬ meh.
25Zaˬ lahˇ kʼoeˇ gʼaˬ Yeˬsuˇ dawˬ peh jiˆ tuˆ leˇ-awˇ, “Sahˬpaˬ-oˇ, aˬ suˇ gʼaˬ-ahˇ ehˇ mawꞈ te” lehˇ naˇ haˬ-euˬ meh.
26Yeˬsuˇ ehˇ-eu, “Ngaˇ kaˬ muˇ yuˇ-awˇ gʼawˬ nyoeˇ-ahˇ tahˬ lehꞈ-awˇ biꞈ nehˬ ma. Ngaˬ neh biꞈ nehˬ-euˬ kʼoeˇ gʼaˬ-aˬ, ngaˇ ehˇ-eu kʼoeˇ gʼaˬ meh.” Kʼoeˇ naˇ, aˬ yawꞈ kaˬ muˇ yuˇ-awˇ gʼawˬ nyoeˇ-ahˇ tahˬ lehꞈ-awˇ, Siˇmoˬ Iˇsaˬgaˬliˬoˆ-euˬ aˬ li Yuˇdaˆ-ahˇ biꞈ-euˬ meh. 27Kaˬ muˇ kʼoeˇ-ahˇ Yuˇdaˆ yuˇ-eu nehˬ-ehˇ, Saˬdaˬ aˬ yawꞈ-euˬ laꞈ kʼoeˇ uˇ leˇ-euˬ meh. “Nawˇ mˇ-eu lehˇ gʼeh-eu jeˬ-ahˇ yaw kawˇ-ehˇ mˇ-awˬ” lehˇ, aˬ yawꞈ-ahˇ Yeˬsuˇ ehˇ nehˬ-euˬ meh. 28Aˬ jeˬ miˇ neh Yeˬsuˇ aˬ yawꞈ-ahˇ kʼoeˇ loꞈ-eh ehˇ nehˬ-eu gaˇ kawˆ, hawˬ jawˬ jawˬ luꞈ-eu tsawˇ haˬ nui deuˬ maˬ siˬ nya-a. 29Yuˇdaˆ-aˬ, pyuˇ pawˬ behˆ tawˬ-eu pyuˇ jeˬ hmˬ-eu gʼaˬ pyeuꞈ-eu miˇ neh, Yeˬsuˇ aˬ yawꞈ-ahˇ kʼehˇ-awˇ, Bawˬ-iˬ gʼeh gaˇ zmˬ-eu jeˬ maˬ ngeuˇ naˇ, shaˬ zaˬ zahˬ zaˬ-ahˇ biꞈ-eu tiˬ jeˬ paˬ bi zeuˇ-iˇ-eu lehˇ ehˇ-eu paˬ lehˇ, zaˬ lahˇ tiˬ paˆ na deuˬ noeˬ-euˬ meh.
30Yuˇdaˆ-aˬ, kaˬ muˇ kʼoeˇ jehꞈ yuˇ-awˇ doˆ-iˇ-euˬ meh. Kʼoeˇ ngeh, sehˇ gʼahˇ ceh laˇ taˬ-euˬ meh.
Zahˇ dawˬ kʼoꞈ dawˬ yaw shuiꞈ
31Yuˇdaˆ doˆ-iˇ dzeuˇ ngeh, Yeˬsuˇ heu loꞈ-ehˇ ehˇ-eu meh. “Nymˬ-mˇ poˆ jawˇ-aˬ, Tsawˇhaˬ-euˬ Zaˬmaˇ-euˬ yaw shehꞈ kʼahˬ sehˇ-ahˇ ya mawˇ tehꞈ-a. Zaˬmaˇ-euˬ laꞈ kʼoeˇ, Miˬyehˇ-euˬ yaw shehꞈ kʼahˬ sehˇ-ahˇ ya mawˇ tehꞈ-a. 32Tsawˇhaˬ-euˬ Zaˬmaˇ laꞈ kʼoeˇ Miˬyehˇ-euˬ yaw shehꞈ kʼahˬ sehˇ ya mawˇ-eu jeˬ ngeuˇ naˇ, Miˬyehˇ-euˬ laꞈ kʼoeˇ Tsawˇhaˬ-euˬ Zaˬmaˇ-euˬ yaw shehꞈ kʼahˬ sehˇ pah mehˬ le tehꞈ-a. Miˬyehˇ yaw kawˇ-ehˇ pah mehˬ le tehꞈ-a. 33Ngaˇ gaˬ-eu ngaˬ-euˬ zaˬ deuˬ-oˇ, ngaˇ naw maꞈ nehˬ-ehˇ gʼawˬ myahˇ ni maˬ paˇ ya jawˇ meh. Naw maꞈ ngaˬ-ahˇ poˆ tehꞈ-a. Yuˇdaˆ tsawˇ haˬ aˬ yuiꞈ aˬ tsu deuˬ-ahˇ ngaˬ neh ehˇ nehˬ-euˬ dawˬ ngaˇ naw maꞈ-ahˇ paˇ ehˇ nehˬ nyaˇ. ‘Ngaˇ le-eu lehˇ gʼeh-eu jawˇ duˬ-ahˇ naw maꞈ maˬ le nya-a.’ 34Nymˬ-mˇ ngaˇ naw maꞈ-ahˇ zahˇ dawˬ kʼoꞈ dawˬ yaw shuiꞈ biꞈ yaꞈ-eu ma. Tiˬ gʼaˬ tiˇ gʼaˬ gaˬ-awˬ. Ngaˇ naw maꞈ-ahˇ gaˬ gaˇ duˇ ni, naw maꞈ tiˬ gʼaˬ tiˇ gʼaˬ ya gaˬ meh. 35Naw maꞈ tiˬ gʼaˬ tiˇ gʼaˬ gaˬ-eu jeˬ ahˇ naˇ, naw maꞈ ngaˬ-euˬ zaˬ lahˇ ngaˇ lehˇ tsawˇ haˬ dawˬ tawˆ luꞈ siˬ nya tehꞈ-a.”
Yeˬsuˇ-ahˇ maˬ siˬ lehˇ Beˬtuˆluˆ pyehˇ tehꞈ-a
(Maꞈtehˬ 26.31-35; Maˬkuˆ 14.27-31; Luˇkaꞈ 22.31-34)
36Siˇmoˬ Beˬtuˆluˆ ehˇ-eu, “Sahˬpaˬ-oˇ nawˇ aˬ gaˇ le-eu lehˇ gʼeh te.”
Yeˬsuˇ ehˇ-eu, “Ngaˇ le-eu lehˇ gʼeh gaˇ nawˇ nymˬ-mˇ mi naˆ-ehˇ maˬ caw teh laˇ nya-a siˬ. Ehˇ kʼawꞈ, aˬ kaˇ caw teh laˇ nya tehꞈ-a.”
37Beˬtuˆluˆ ehˇ-eu, “Sahˬpaˬ-oˇ, aˬ jeˬ miˇ neh ngaˇ nawˬ-euˬ mehˬ nah nymˬ-mˇ mi naˆ-ehˇ maˬ caw teh laˇ nya ta. Ngaˇ nawˬ-euˬ gʼaˇ duˬ shiˇ dah peuˬ ma.”
38Yeˬsuˇ ehˇ-eu, “Nawˇ ngaˬ-euˬ gʼaˇ duˬ aˬ diˇ aˬ maˇ shiˇ dah peuˬ ma loˇ. Ngaˇ nawˬ-ahˇ maˇ jawˆ ni ehˇ-eu ma. Ya poeˇ maˬ doeˇ laˇ mi naˆ-ehˇ, ngaˬ-ahˇ maˬ siˬ lehˇ smˬ poˆ keuˆ ni nawˇ pyehˇ tehꞈ-a.”
දැනට තෝරාගෙන ඇත:
Yoˇhaˬ 13: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.