Aˇ dahˬ 14
14
Aˬbyaˬ Lawˇtaˬ-ahˇ ka kʼoꞈ-euˬ
1Baˬbuˇloˬ sahˬ paˬ Aˬlaˬpeˬ -laˇ, Eˇlaˬsaˬ sahˬ paˬ Aˬliˇoˬ, Eˇlamˬ sahˬ paˬ Sheˬdawˇlawˇmaˬ, Gawˇiˆ sahˬ paˬ Tiˇdaˬ, heu oeˬ gʼaˬ gm leˇ-awˇ, 2Sawˇdoˬ sahˬ paˬ Beˇlaˬ, Gawˇmawˇlaˆ sahˬ paˬ Beuˬshaˬ, Aˬdaˬmaˬ sahˬ paˬ Shiˇ -nahˬ, Zeˬbaiˬ sahˬ paˬ Shehˬmiˇbaˬ hawˇ-eu Beˬlaˬ sahˬ paˬ, heu ngaˬ gʼaˬ-ahˇ guiˇ deuˆ-euˬ meh. 3Sahˬ paˬ heu ngaˬ gʼaˬ gm leˇ-awˇ, Siˇdmˬ deh ga ga ma-ahˇ, aˬ yawꞈ maꞈ-euˬ guiˇ maꞈ deuˬ-ahˇ tiˬ gaˇ tehꞈ-ehˇ kuˇ uiˬ taˬ-euˬ meh. Kʼoeˇ ngeh yamˬ-ahˇ, Siˇdmˬ deh ga ga ma-aˬ, nymˬ-mˇ Shiˇ-euˬ iˬ ma laˆ shaˆ jaˆ luꞈ-eu kʼoeˇ tsahˇ nyiˬ paˆ-ehˇ jaˆ-euˬ meh. 4Sahˬ paˬ kʼoeˇ ngaˬ gʼaˬ, sahˬ paˬ Sheˬdawˇlawˇmaˬ uˆ lahˇ-eu uˬ moˆ jawˇ luꞈ-eu tseˇ nyiꞈ kʼoꞈ byah laˇ gʼaˬ-euˬ meh. Ehˇ kʼawꞈ, tseˇ smˇ kʼoꞈ tiˬ kʼoꞈ-ahˇ uˇ leˇ ngeh, aˬ yawꞈ maꞈ aˬ yawꞈ-ahˇ puiˬ-euˬ meh. 5Tseˇ oeˬ kʼoꞈ tiˬ kʼoꞈ keuˆ laˇ ngeh jawˇ, sahˬ paˬ Sheˬdawˇlawˇmaˬ hawˇ-eu aˬ yawꞈ-ahˇ nui ma taꞈ-eu sahˬ paˬ deuˬ oe ka-awˇ, Aˬshaˇteˬyoˇkaˬneˬ meuˬ-ahˇ jawˇ-eu Leˬpeˬ tsawˇ jeuˬ-ahˇ maˬ ehˇ, Haˬmaˇ meuˬ-ahˇ jawˇ-eu Zuˬzmˬ tsawˇ jeuˬ-ahˇ maˬ ehˇ, Kiˇlaˬdeˬ meuˬ-euˬ deh ga-ahˇ jawˇ-eu Eˇmiˬ tsawˇ jeuˬ-ahˇ maˬ ehˇ, 6Eˬdoˬ meuˬ-euˬ gawˬ jawˬ gawˬ duˇ doe ni jawˇ-eu Hawˇlaˆ tsawˇ jeuˬ-ahˇ maˬ ehˇ, deuˆ gʼaˬ jiˇ-awˇ, bawˇ tsahˬ bawˇ dahˇ dawˬ peh jaˆ-eu Eˇpaˬlaˬ meuˬ-ahˇ keuˆ ni teh keuˆ gʼeh-euˬ meh. 7Kʼoeˇ naˇ, aˬ yawꞈ maꞈ naˇ kʼah paw paˇ gʼoꞈ kʼoꞈ laˇ-awˇ, Kaˬdeˬshaˇ meuˬ-ahˇ iˇ-euˬ meh. Kʼoeˇ ngeh yamˬ-ahˇ, Kaˬdeˬshaˇ meuˬ-ahˇ Eˬmiˇshaˬpaˇ meuˬ lehˇ kuˇ-euˬ meh. Aˬ yawꞈ maꞈ-aˬ, Aˬmaˬlehˇ miˇ kʼahˬ kʼahˬ lah ni-ahˇ maˬ ehˇ, Haˬzaˬzoˇdaˬ -maˇ meuˬ-ahˇ jawˇ-eu Aˬmawˇliˆ tsawˇ jeuˬ-ahˇ maˬ ehˇ, deuˆ gʼaˬ-euˬ meh.
8Kʼoeˇ naˇ, Sawˇdoˬ sahˬ paˬ, Gawˇmawˇlaˆ sahˬ paˬ, Aˬdaˬmaˬ sahˬ paˬ, Zeˬbaiˬ sahˬ paˬ, Beˬlaˬ sahˬ paˬ kʼoeˇ deuˬ-aˬ, aˬ yawꞈ maꞈ-euˬ guiˇ maꞈ deuˬ-ahˇ Siˇdmˬ deh ga ga ma-ahˇ sheuˬ ka taˬ-awˇ, guiˇ deuˆ-eu gʼaˇ duˬ lehˬ hmˬ taˬ-euˬ meh. 9Sahˬ paˬ kʼoeˇ ngaˬ gʼaˬ-euˬ guiˇ maꞈ deuˬ hawˇ-eu, Eˇlamˬ sahˬ paˬ, Gawˇiˆ sahˬ paˬ, Baˬbuˇloˬ sahˬ paˬ, Eˇlaˬsaˬ sahˬ paˬ heu oeˬ gʼaˬ yaw kaˬ guiˇ deuˆ-euˬ meh. 10Deh ga kʼoeˇ ga laꞈ kʼoeˇ, ju jaˬ ni gʼeh-awˇ, juˇ dui dui-eu duˬ kʼahˬ tiˬ byah ni jaˆ-eu meh. Sawˇdoˬ sahˬ paˬ hawˇ-eu Gawˇmawˇlaˆ sahˬ paˬ aˬ nyaꞈ guiˇ maˬ deuˆ gʼaˬ nya-ehˇ, cehˆ dzeuˇ-eu lehˇ cehˆ ngeh, duˬ kʼahˬ kʼoeˇ deuˬ-ahˇ ga ahˇ-euˬ meh. Ehˇ kʼawꞈ, sahˬ paˬ nui deuˬ kʼoeˇ smˇ gʼaˬ-aˬ, gawˬ jawˬ paw cehˆ daˆ-awˇ cehˆ dzeuˇ-euˬ meh. 11Guiˇ deuˆ gʼaˬ-euˬ sahˬ paˬ kʼoeˇ oeˬ gʼaˬ-aˬ, Sawˇdoˬ meuˬ hawˇ-eu Gawˇmawˇlaˆ meuˬ laꞈ kʼoeˇ kʼaˇ jaˆ-eu jeˬ dawˬ tawˆ luꞈ hawˇ-eu, dzaˬ-eu dawˇ-eu jeˬ dawˬ tawˆ luꞈ yuˇ-awˇ doˆ-iˇ-euˬ meh. 12Kʼoeˇ ngeh, Aˬbyaˬ-euˬ aˬ duˇ Lawˇtaˬ gʼaˬ Sawˇdoˬ meuˬ-ahˇ jawˇ luꞈ-eu miˇ neh, sahˬpaˬ kʼoeˇ deuˬ aˬ yawꞈ-ahˇ nyehꞈ gʼeh-awˇ, aˬ yawꞈ-euˬ pyuˇ shuiˇ myawˬ gahˬ dawˬ tawˆ luꞈ yuˇ jiˇ gʼeh-euˬ meh.
13Ehˇ kʼawꞈ, tsawˇ haˬ tiˬ gʼaˬ cehˆ dzeuˇ-awˇ, Aˬmawˇliˆ tsawˇ jeuˬ Mamˬliˬ-euˬ muiˬ-eu shawˇ-eu aˇ bawˇ bawˇ yaˇ dawˬ peh jawˇ-eu Heˬbyehˇ tsawˇ haˬ Aˬbyaˬ-ahˇ, gaˇ kawˆ kʼoeˇ dzawˇ nehˬ leˇ-euˬ meh. Mamˬliˬ, Eˇshaˬkawˇlaˆ, Aˬneˬlaˆ aˬ ha smˬ mehˇ nmˇ-aˬ, Aˬbyaˬ nehˬ-ehˇ aˬ byahˇ gʼoeˇ-euˬ meh. 14Lawˇtaˬ-ahˇ aˬ cawˬ nyehꞈ gʼeh-euˬ gaˇ kawˆ Aˬbyaˬ ya gaˬ ngeh, aˬ yawꞈ nehˬ-ehˇ jawˇ-eu guiˇ kʼaˇ deuˆ nya-eu tsawˇ haˬ deuˬ kuˇ uiˬ-euˬ meh. Guiˇ deuˆ-eu tsawˇ haˬ dawˬ tawˆ luꞈ smˬ yaˇ tseˇ yehꞈ gʼaˬ doˆ laˇ-awˇ, sahˬ paˬ kʼoeˇ oeˬ gʼaˬ-euˬ mehˬ nah Daˬ meuˬ-ahˇ keuˆ ni caw teh-euˬ meh. 15Kʼoeˇ gaˇ iˇ keuˆ ngeh, aˬ yawꞈ-euˬ tsawˇ haˬ deuˬ-ahˇ aˇ muˇ biˇ paˆ-awˇ, sahˬ paˬ kʼoeˇ deuˬ-ahˇ uˬ ciꞈ paw deuˆ-awˇ deuˆ gʼaˬ-euˬ meh. Daˬmaˬsehˇ meuˬ laꞈ taˆ paw pyawˬ-ahˇ jaˆ-eu Hawˇbaˬ meuˬ-ahˇ keuˆ ni, sahˬ paˬ kʼoeˇ deuˬ-euˬ mehˬ nah aˬ yawꞈ teh-euˬ meh. 16Kʼoeˇ naˇ, aˬ yawꞈ maꞈ neh yuˇ gʼeh-euˬ pyuˇ shuiˇ myawˬ gahˬ dawˬ tawˆ luꞈ paˇ za kʼoꞈ jiˇ-euˬ uˬ taꞈ, Lawˇtaˬ-ahˇ kʼawꞈ aˬ yawꞈ-euˬ pyuˇ shuiˇ myawˬ gahˬ deuˬ nehˬ-ehˇ tiˬ kawˆ loꞈ-ehˇ sheuˬ kʼoꞈ doˆ laꞈ-euˬ meh. Aˬ cawˬ neh bi nyehꞈ gʼeh-euˬ zaˬ miˬ zaˬ deuˬ hawˇ-eu nui deuˬ-ahˇ kʼawꞈ, Lawˇtaˬ nehˬ-ehˇ tiˬ kawˆ loꞈ-ehˇ sheuˬ-awˇ gʼoꞈ laˇ-euˬ meh.
Aˬbyaˬ-ahˇ Maˬlaˬkiˇsaˬdehˇ dawˬ ngehˬ gʼeh nehˬ-euˬ
17Sahˬ paˬ Sheˬdawˇlawˇmaˬ hawˇ-eu aˬ yawꞈ-euˬ cawˬ sahˬ paˬ deuˬ-ahˇ Aˬbyaˬ guiˇ deuˆ gʼaˬ-awˇ gʼoꞈ laˇ ngeh, Sawˇdoˬ sahˬ paˬ gʼaˬ Shaˬbehˇ deh ga ga ma-ahˇ keuˆ ni oe keuˆ-awˇ ha laˬ le-euˬ meh. Deh ga kʼoeˇ ga-ahˇ sahˬ paˬ-euˬ deh ga lehˇ kʼawꞈ kuˇ-eu meh. 18Kʼoeˇ ngeh, Huiˬ dui mahˇ dui dui-eu Miˬyehˇ-euˬ piˇ ma pyeuꞈ-eu Saˬleˬ sahˬ paˬ Maˬlaˬkiˇsaˬdehˇ-aˬ, kaˬ muˇ hawˇ-eu aˬ gaꞈ dzaˇ uiˇ yuˇ-awˇ, Aˬbyaˬ jawˇ gaˇ laˇ-euˬ meh. 19Aˬbyaˬ-ahˇ aˬ yawꞈ heu loꞈ-ehˇ dawˬ ngehˬ gʼeh nehˬ-euˬ meh. “Mˬ hawˇ-eu miˇ-ahˇ beh-euˬ yaw sahˇ pyeuꞈ-eu Huiˬ dui mahˇ dui dui-eu Miˬyehˇ, Aˬbyaˬ-ahˇ guiˬ lahˬ biꞈ luꞈ-uˇ. 20Nawˬ-ahˇ muiˇ-eu deuˬ-ahˇ nawˇ gʼaˬ leˇ nya ni caw ba nehˬ-euˬ gʼaˬ pyeuꞈ-eu, Huiˬ dui mahˇ dui dui-eu Miˬyehˇ-ahˇ aˬ cawˬ ja ceuˬ luꞈ-uˇ” lehˇ ehˇ-eu meh. Kʼoeˇ ngeh, guiˇ deuˆ gʼaˬ-awˇ kʼaˇ deuˆ za kʼoꞈ-euˬ pyuˇ shuiˇ myawˬ gahˬ dawˬ tawˆ luꞈ laꞈ kʼoeˇ, tseˇ bymˇ tiˬ bymˇ Aˬbyaˬ yuˇ doˆ-awˇ, Maˬlaˬkiˇsaˬdehˇ-ahˇ damˬ nehˬ-euˬ meh.
21Kʼoeˇ naˇ, Aˬbyaˬ-ahˇ Sawˇdoˬ sahˬ paˬ ehˇ-eu, “Kʼaˇ za kʼoꞈ-euˬ pyuˇ shuiˇ myawˬ gahˬ dawˬ tawˆ luꞈ nawˇ geuꞈ jiˇ-awˬ. Ngaˬ-ahˇ ngaˬ-euˬ tsawˇ haˬ bi sheuˬ kʼoꞈ laꞈ naˇ gʼaˬ-aˇ.”
22Ehˇ kʼawꞈ, Aˬbyaˬ ehˇ-eu, “Huiˬ dui mahˇ dui dui-eu Miˬyehˇ pyeuꞈ-eu Sahˬpaˬ Miˬyehˇ mehˬ shi ngaˇ heu loꞈ-ehˇ kamˬ tsehˆ-eu ma. 23‘Aˬbyaˬ-ahˇ ngaˬ neh smˇ muiˬ laˆ muiˬ nehˬ-euˬ ma’ lehˇ aˬ kaˇ tiˬ nah nawˇ maˬ ya ehˇ-eu gʼaˇ duˬ, saˬ kahˇ saˬ lah tiˬ lah-ahˇ neh sehˬ nawˆ aˇ caˆ tiˬ caˆ-ahˇ keuˆ ni, nawˬ-euˬ mˇ myawˬ tiˬ jeˬ-iˬ ngaˇ maˬ yuˇ. 24Ngaˬ-euˬ tsawˇ haˬ deuˬ neh zmˬ dzaˬ gʼaˬ dzeuˇ-euˬ jeˬ maˬ ngeuˇ naˇ, ngaˬ-euˬ gʼaˇ duˬ tiˬ jeˬ-iˬ maˬ paˇ yuˇ ma. Ehˇ kʼawꞈ, ngaˬ nehˬ-ehˇ tiˬ kawˆ loꞈ-ehˇ guiˇ deuˆ-euˬ Aˬneˬlaˆ, Eˇshaˬkawˇlaˆ, Mamˬliˬ aˬ ha mehˇ nmˇ-aˬ, yawˬ ha-ahˇ kʼaˇ oꞈ kʼaˇ geuˇ-eu loꞈ-ehˇ yuˇ geuꞈ luꞈ-uˇ.”
දැනට තෝරාගෙන ඇත:
Aˇ dahˬ 14: AHK
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Akha Bible Revision (Latin Script) © Thailand Bible Society, 2011.