Matiu 9
9
Yisa kaah nan teb Tigbanann kpiindaan Pɔɔg man
(Mag 2:1-12; Lug 5:17-26)
1Le Yisa nan kɔɔ kuŋaluŋ, ki don limɔgilin a dool liba paam, ki kun u tiŋin. 2Lig, bininfob biba nan ŋmag; tigbanann kpiindaan uba ki ta u paan kikpaarig bu, ki ta u dan Yisa ban. Yisa kaah kan ke bi ŋa u yada man ni, le u bei ubaarin ke, “N bija, che a sufu li pɔɔu ke n jiɛn a bir ki periŋa.”
3Lig, le ban wɔɔnn Uwonbɔr a siimin a ni biba nin tiɛr bi sufu-n ke! “U sugir Uwonbɔr le nmɔn.”
4Yisa ma nan biɛ baah tiɛr man na, le ki baan bi ke, “Ba ŋa wee ni tiɛr tipotiɛbir nan ni sufu-n naa? 5Maah bei ubaarin ke, n jiɛn u bir ki per waan, bee maah bi li bei u ke, fiim ki li choon n naa, ti bɔr tilee nan ti la ba pɔɔ? 6Amaa wee ni biɛ ke Uninfosaal a Big jɔɔ tininkper a pɔɔm kutingbɔŋ nan yaan ki li fir jiɛn bininfob a bir ki per bi…” Le ki bei uja wan wee u gbanann kpo nan ke, “Fiim wee ki yuur a wan dɔɔn waŋ ki li kun na.” 7Le uja nmɔn fii ki kun. 8Kuninfogbaluŋin kaah kan man ni, le bijawaam choo bi, le bi pag Uwonbɔr nin waah sei uninfosaal tininkper a pɔɔm nan a booli.
Yisa kaah nan yin Matiu man
(Mag 2:13-17; Lug 5:27-32)
9Le Yisa nyan nin yaan ki chaa, ki tan kan uja uba, le bi yi u ke Matiu, ki miin u ka u toon yin le bilanpogaab a nanbonn; le Yisa bei u ke, “Fii ki li nɔɔm ni.” Le u fii ki nɔɔ u.
10Yisa kaah nan be Matiu a niin ki ji kujɔɔg a jiir n-yonn man ni, le bilanpogaab biba nin tibirdam takpem kɔɔn ki nan kal kpiɛ Yisa nin u bɔɔnɔɔbin bu ki ji bi ban. 11Farasii yaab kaah nan kan man ni, le bi baan u bɔɔnɔɔbin ke, “Ba ŋa wee wan wɔɔnn ni nmɔn lagin ji nin bilanpogaab nin ‘tibirdam’ ban naa?”
12Le Yisa gbir baah pag man nmɔn le ki len ke, “Ban pɔɔ kaa ban utebiri, see ban bu-n. 13Amaa ni li chaau ki tan tinn ki biɛ ni taai: ‘N ban linyunyunbasanl le, naa ye kumanugi.’#Hozaya 6:6 Nan bu-n maa dan ke n nan yin bibuchim le, amaa tibirdam.”
Nbinbaan ki jiin Limɔlol paam
(Mag 2:18-22; Lug 5:33-39)
14Le Jɔnn Wan nan Fu Bininfob Uwonbɔr a Nyunfulin nan a bɔɔnɔɔb dan Yisa ban ki nan baan u ke, “Tim nin Farasii yaab lolig bimɔb le n-yonn biɛn; ke ba ŋa wee a bɔɔnɔɔbin ma kaa lolig gaa?”
15Le Yisa jiin ki baan bi ke, “Lipiichanil be ke, bicham le jɔɔ npoobiin, n-yonn man wee lipiichanil daan la be bi ban nan naa? Aai. N-yonn chaan, le bi na li nyan lipiichanil daan ni ban, iyaayoo le bi yin lol imɔɔŋ.
16“Uba kaa li ta litanl pɔnl ki legin daala kpegi, ni ye u ŋa man ke, litanl pɔnlin li chiɛ daala kpegin, le nchiɛm nmɔn mann ki yann. 17Uba mu kaa yin chee ki ta ndapɔm ki ŋuun libokpegilin ni, ni ye wan ŋa man wee ndapɔmin nan mɔɔ ke, min yin pɔɔ liboolin le, le ndaamin wur, le liboolin mu n bii. Aai bi jɔɔ ndapɔm ki ŋu liboopɔnlin le, wee ni biɛn n laa bii.”
Uyudaan uba a bisa nin Upii wan nan maa Yisa a daala takpeŋ nan a bɔr
(Mag 5:21-43; Lug 8:40-56)
18Yisa kaah la nan be pag ki tenn bi n-yonn man ni, lig, ki miin uyudaan uba dan ki nan gbaan u nintogil, ki bei u ke, “N bisa le kpo; mambu, dan ki nan ta a nɔɔ ki paan u bu-u, wee un kan limiɛfol.” 19Le Yisa nan fii nin u bɔɔnɔɔb le bi nɔɔ u jon.
20Ki miin upii uba mu nan kan tipiir ke taa diɛri, ki tan kpaa ibin piig nin ilee; le u nan dan Yisa ban ki linn Yisa a bɔɔn le ki maa u daala takpeŋ a gbaam. 21Upii nmɔn nan tiɛr u sufu ni ke, “Ni ye n le pii u daala a gbaam ki maa ke, n li kan kutebug.”
22Le Yisa gbiɛ lig ki kan u, le ki len ke, “N bisa, che a sufu li pɔɔu. Ŋaah ŋaam yada-n bu le a kan kutebug.” Libol nmɔn, le u sin kan kutebug.
23Yisa kaah nan tan kɔɔ uyudaan a niin n-yonn man ni, le u kan biwopeeb pee iwol, le kuninfogbaluŋ mu mɔr tikpemɔr ki fabin, 24le u ke, “Ni li chaau. Kibisiɛgin kaa kpo, u jiɛn le.” Amaa le bi laa u. 25Baah nan ŋɔɔr bininfobin ki nyan a bɔɔn; le Yisa kɔɔ ki choo kibisiɛgin a nɔɔ, le u fii sir paab. 26Le bi nan mɔɔn tibɔr nmɔn kutingbɔŋ nmɔn a gbanann biɛn.
Yisa kaah ligir Bijɔɔm bilee a num man
27Yisa kaah nan nyan niin ki nan jo chaa nintogil nan, le bijajɔɔm bilee nan paa u bɔɔn, le ki yin u ki len ke, “Fin Defid a yaabil! San ti kunyunyunbaag ni.”
28Yisa kaah nan chaa ki tan kɔɔ iniin iba ni n-yonn man ni, le bijɔɔmin foon ki nan kɔɔ niin. Le u baan bi ke, “Ni ŋa yada ke n li fir sei ni kutebugaa?”
Le bi jiin ki ke, “Nn, Uyudaan.”
29Le u ta u nɔɔ ki maa binumbili, ki ke, “Naah ŋa yada man ni, nin tun man ki sei ni”; 30le binumbili ligir, le u kpaan bi nbamɔm ke, “Ni li nyi ni bei uba nan tun nan bu.”
31Amaa le bi nyan ki mɔɔn u bɔr nmɔn kutingbɔŋ nmɔn yaan biɛn.
Yisa kaah nan che Kubirug pag man
32Baah nan fii ki nyan n-yonn man ni, le ki miin bi ŋmag uja uba ki dan Yisa ban, wan wee kinaanbiig nan be u ni wee waa fin pagi. 33Le Yisa nyan kinaanbiigin uja nmɔn ni, le u ni nan piin ki pag. Ni nan gar kuninfogbaluŋin le, le bi nin pag ke, “Taa la nyi kan nan ni, tim Iziral a tiŋ nan yaan ni.”
34Amaa le Farasii yaab len ke, “Nnaanbiim a bɔru le sei u npɔɔn ke un nyan nnaanbiim bininfobin.”
Yisa kaah san Bininfob Kunyunyunbaag man
35Yisa nan choon ki gɔnn ntintakpem nin ntinbum biɛn nin, ki kɔɔ tiwonjiɛndirin, ki mɔɔn Uwonbɔr a naam a bɔŋann ni ki wɔɔn bininfob, ki che ban bu iwiɛn a booli kan kutebug. 36Waah nan kan kuninfogbaluŋin, le kunyunyunbaag choo u, nan bu-n ni nan mugir bi le bi be kaa jɔɔ wan li ter bi, ki nann ipee yan kaa jɔɔ upeekpaari. 37Le u bei u bɔɔnɔɔbin ke, “Idi-n beer ki yaba, amaa le bidichiɛbin waar. 38Mambu, ni li miɛ bukpaab nmɔn daan na wee un kpiɛn bidichiɛb u kpaab nmɔn yaan ni.”
Currently Selected:
Matiu 9: KUGL
Highlight
Share
Copy
Want to have your highlights saved across all your devices? Sign up or sign in
Komba New Testament © Bible Society of Ghana, 2014.