KO SĒNESI 7
7
Ko e Lōmakí
1PEA folofola ‘a Sihova kia Noa, Hū koe mo ho fāmili kotoa ki he ‘a‘ake; he ko koe kuo u mamata ki ai ‘i he to‘utangata ni ‘oku tonu ho‘o fakafeangai kiate au. 2‘Ilonga ‘a e fa‘ahinga manu ngofua te ke hanga ‘o ma‘u mei ai ‘o taki fitunga‘ahoa, ko e manu tangata mo ‘ene fefine; kae tautau toko ua pē mei he manu ‘oku ‘ikai ngofua, ‘a e tangata mo ‘ene fefine. 3Ko e manupuna foki ‘o e ‘atā te ke taki fitunga‘ahoa mei ai, tangata mo fefine; mo fakaili ki he ngaahi fa‘ahinga ke nofo ‘i he funga fonua kotoa. 4He ‘oku toe pē ‘a e ‘aho ‘e fitu, pea u faka‘uha ki he fonua ‘o ‘aho fāngofulu mo pō fāngofulu; pea te u tafi mei he funga kelekele ‘a e me‘a mo‘ui kotoa pē kuo u ngaohi. 5Pea na‘e fai ‘e Noa ki he me‘a kotoa pē kuo tu‘utu‘uni ‘e Sihova kiate ia.
6Pea kuo a‘u ‘a Noa ki hono onongeau ta‘u, pea hoko ‘a e lōmaki vai ki he fonua. 7Pea hū ‘a Noa ki he ‘a‘ake, mo hono ngaahi foha mo hono uaifi mo e ngaahi uaifi ‘o hono ngaahi foha, telia ‘a e ngaahi vai ‘o e Lōmaki.#Māt 24.38-39; Luk 17.27 8Pea ko e ni‘ihi ‘i he manu na‘e ngofua, mo e ni‘ihi ‘i he manu na‘e ‘ikai ngofua, mo e ni‘ihi ‘i he manupuna, mo e ngaahi fa‘ahinga kehekehe ‘oku totolo ‘i he kelekele, 9na‘a nau hū tauhoa kia Noa ki he ‘a‘ake, ko e tangata mo e fefine; ‘o hangē ko e tu‘utu‘uni ‘a e ‘Otua kia Noa. 10Pea hili ‘a e ‘aho ‘e fitu, na‘e toki hoko ki he fonua ‘a e ngaahi vai ‘o e Lōmaki.
11‘I he ta‘u ko hono onongeau ‘o e mo‘ui ‘a Noa, ‘i hono ua ‘o e māhina, pea mo hono ‘aho hongofulu mā fitu ‘o e māhina, ‘i he ‘aho ko ia na‘e fakapā ai ‘a e ngaahi matavai ‘o e moana lahi, pea na‘e tangaki ‘a e ngaahi kātupa ‘o e langi.#2 Pit 3.6 12Pea na‘e lōvai ki māmani ‘o ‘aho fāngofulu mo pō fāngofulu. 13Ko e ‘aho pē ko ia kuo hū ‘a Noa ki he ‘a‘ake, pea mo Semi mo Hami, pea mo Sēfeti, ko e ngaahi foha ‘o Noa, pea mo e uaifi ‘o Noa, mo e ngaahi uaifi ‘e toko tolu ‘o hono ngaahi foha; 14pea na‘e ‘i ai mo kinautolu ‘a e manu kaivao kehekehe ‘o fakafa‘ahinga, mo e ngaahi manu lalata, fakafa‘ahinga, mo e manu kehekehe ‘oku totolo ‘i he funga fonua ‘o fakafa‘ahinga, mo e ngaahi manupuna, fakafa‘ahinga, ‘a e fanga ki‘i manupuna kehekehe, ‘io, ‘a e me‘a kotoa pē ‘oku kapakau. 15Pea na‘a nau hū kia Noa ki he ‘a‘ake, ko e tautau toko ua mei he kakano kotoa pē ‘oku ‘i ai ha mānava mo‘ui. 16Pea ko kinautolu na‘e hū na‘a nau hū ha tangata mo ha fefine mei he kakano kotoa pē, ‘o hangē ko e tu‘utu‘uni ‘a e ‘Otua kiate ia. Pea ko ‘ene hū leva, pea tāpuni ‘e Sihova.
17Pea na‘e lolo ki he fonua ‘a e lōmaki, ‘o ‘aho fāngofulu; pea na‘e hake ‘a e vai, ‘o fakama‘anu ‘a e ‘a‘ake ke mama‘o mo e funga fonua. 18Pea hu‘a ‘a e vai, pea ne fu‘u hake ki he fonua; pea na‘e tēkina ‘a e ‘a‘ake ‘i he fukahi vai. 19Pea hu‘a ‘aupito ‘a e vai ki he fonua; pea na‘e lōfia kotoa pē ‘a e ngaahi mo‘unga mā‘olunga ‘i lalo langi kātoa. 20Pea hu‘a pē ‘a e vai ‘o faai hake, ko e kiupite ‘e hongofulu mā nima, hili ‘a e lōfia ‘o e ngaahi mo‘unga. 21Pea na‘e mate ‘a e kakano kotoa pē na‘e ngalengale ‘i he fonua; pe ko e manupuna, pe ko e manu lalata, pe ko e manu kaivao, pe ko e manu kehekehe ‘oku totolo ‘i he fonua, kae‘uma‘ā ‘a e tangata kotoa pē. 22‘Ilonga ha me‘a ‘i he mōmoa, ‘a ia na‘e ‘i hono ava‘i ihu ‘a e mānava mo‘ui ma‘u mei he matangi, na‘e mate ia. 23‘Io, na‘e matafi ‘a e me‘a mo‘ui kotoa pē na‘e ‘i he funga kelekele, fai mei he tangata ki he manu, mo e me‘a totolo, mo e manupuna ‘o e ‘atā; ‘io, na‘e matafi kotoa pē mei he fonua; pea na‘e fakatoe ‘a Noa pē, mo kinautolu na‘e ‘iate ia ‘i he ‘a‘ake. 24Pea ko e hu‘a ‘a e vai ki he fonua ko e ‘aho ‘e teau mā nimangofulu.
Currently Selected:
KO SĒNESI 7: TMB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fsi.png&w=128&q=75)
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.