Kusintii Andunya 4
4
Kaɛ̃ɛ do Abɛli
1Adamu do aboɛ Ɛfa à tɔtɔɔ nɔ Ɛfa í nɛ asĩ ŋɔi í bí Kaɛ̃ɛ. Nɔ í ni, do sobii Aɔ̃ Lafɛ̃ɛi ǹ bíò amanɛ. 2Si anyiɛ ŋɔi í na í nɛ asĩ má, nɔ í bí Abɛli ifɔi Kaɛ̃ɛ.
Waati iyi à na à lá, Abɛli angudã ŋai í ya maa degbe, nɔ Kaɛ̃ɛ mɔ í jɛ woo logoo. 3Iyi í ce ajɔ minji ŋɔi Kaɛ̃ɛ í dɛ amaajɛ wa í naa í ceaò Aɔ̃ Lafɛ̃ɛ kuwee. 4Nɔ Abɛli mɔ í naaò titɛɛ wa. Í cica angudã ŋa iyi à bí sinte ŋau. Nɔ í cea Aɔ̃ Lafɛ̃ɛ kuwee do koko ŋa iyi à la à re ŋau. Nɔ Aɔ̃ Lafɛ̃ɛ í cɔ Abɛli do iju jiida na saabui kuweeɛu, 5amma kù cɔ Kaɛ̃ɛ do iju jiida domi kù saalu amuaɛu. Ŋɔi idɔi Kaɛ̃ɛ í kɔ̃, í bɛjɛ waju. 6Ŋɔi Aɔ̃ Lafɛ̃ɛ í bee Kaɛ̃ɛ í ni, na mii í ce ì jɔ̀ idɔɛ wa kɔ̃, nɔ ì bɛjɛ waju. 7Bɛɛbɛi bii ì ce daa jiida, í gbe wajuɛ ku sĩa, bii laalɔ mɔi ì waa ce, dulum nii í wa andɛ ileɛ bɛi iŋa buu, wa zagaɛ, amma jɔ̀ i kãmiaɛ.
8Amma baa do iyi Ilaaɔ̃ í ni bɛɛbɛ fei, ajɔ nŋu gɔ Kaɛ̃ɛ í sɔ̃ ifɔɛ Abɛli í ni, ka bɔ iko. Ŋɔi à fita à koo. Waati iyi à wa bɛ, ŋɔi Kaɛ̃ɛ í fo í bata ifɔɛu í kpaa.
9Ŋɔi Aɔ̃ Lafɛ̃ɛ í bee Kaɛ̃ɛ í ni, iwoi Abɛli ifɔɛu í wa.
Ŋɔi í jɛ í ni, ǹ mài? Amui ǹ jɛ woo degbe ifɔm?
10Ŋɔi Aɔ̃ Lafɛ̃ɛ í ni, mii ì ce bɛ. Inunui njɛi ifɔɛ í to wa sim hee ihɛ̃ hai ilɛ wa. 11Nsɛi, an ceekpeɛ nɔ n leleɛ hai si ilɛu ihɛ̃ iyi í mɔ njɛi ifɔɛ iyi ì kpau. 12Baa bii ì waa logoo i kaa ba ngɔgɔ. Aa ya sa i maa dabii bii fei si andunyau ihɛ̃.
13Ŋɔi Kaɛ̃ɛ í sɔ̃ Aɔ̃ Lafɛ̃ɛ í ni, ijuukpãm í la í caa, n kaa n yɔkɔ n soo. 14Wee nnyi ì waa lelem hai si ilɛ jiida, í gbe n sa n manjiɛ ku jĩ. An ya n maa n sai n maa n dabii si andunyau ihɛ̃, inɛ iyi í na í yɛm fei á maa dɛ ku kpam nii.
15Amma Aɔ̃ Lafɛ̃ɛ í sɔ̃ɔ í ni, inɛ iyi í kpaɛ an sãɛ gbese zakai isɛ gbɛɛje. Ŋɔi í cea Kaɛ̃ɛ nyinda ku ba inɛ iyi í yɔɔ fei ku maà ti ku dɛ ku kpaa má. 16Nɔ Kaɛ̃ɛ í dede í saa Aɔ̃ Lafɛ̃ɛ í bɔ hee jĩijĩ í koo í buba si ilɛi Nɔdu ikpa nunui daakɔi Edɛni.
Dimii Kaɛ̃ɛ ŋa
17Kaɛ̃ɛ do aboɛ à tɔtɔɔ nɔ í nɛ asĩ í bí Enɔku. Ŋɔi Kaɛ̃ɛu í ma ilu gɔ nɔ í sɔɔ Enɔku bɛi wa kpe amaɛu. 18Nɔ Enɔku mɔ í bí Iradi, Iradi mɔ í bí Mɛhuyaɛli. Mɛhuyaɛli mɔ í bí Mɛtusaɛli. Mɛtusaɛli mɔ í bí Lemɛki. 19Lemɛki mɔ í so abo minji. Irii inɛ akãi Ada, inɛ akã mɔ Sila. 20Ada í bí Yabali. Yabaliu nŋui í jɛ balai woo sɛ̃ mɛɛmu ŋa iyi à wa si ilei acɔ ŋau. 21Irii ifɔɛ mɔi í jɛ Yubali. Nŋu mɔi í jɛ balai inɛ ŋa iyi à ya maa cã mɔɔlɔ do woo fã yee ŋa fei. 22Sila mɔi í bi Tubali-Kaɛ̃ɛ. Nŋu mɔi í jɛ gbɛdɛ nŋa, í ya maa ce jĩnɛ dimi ikã ikã fei do isɔ nkpa do isɔ má. Irii wecĩɛi Naama. 23Ajɔ nŋu gɔ Lemɛki í sɔ̃ Ada do Sila aboɛ ŋa í ni,
iŋɛ abom ŋa,
i de itĩ i gbɔ iyi ǹ wa n sɔ̃ ŋɛ.
Bii inɛ í mɛɛm an kpaa
an nɔ n kpa ama awaasũ bii í ce sim agbɛ #4:23 Bii inɛ í mɛɛm... bii í ce sim agbɛ Si feei Ebɛɛ, ide ŋau ihɛ̃ aa ka yɔkɔ ka kpaasiɛ ka ni, ǹ kpa inɛ iyi í mɛɛm, nɔ ǹ kpa ama awaasũ iyi í ce sim agbɛ. Fei ndɛɛ fei ide akãu mbɛ..
24Bii aa sãa inɛ iyi í kpa Kaɛ̃ɛ gbese isɛ gbɛɛje,
ti amu mɔ á to isɛ kitaò fɛɛwa do mɛɛje.
Sɛti do Enɔsi
25Adamu do aboɛ à tɔtɔɔ má nɔ Ɛfa í bí ama inɛmɔkɔ. Ŋɔi í ni, Ilaaɔ̃ í nyi í muum ama inɛmɔkɔ má í jɛ nsũi Abɛli iyi Kaɛ̃ɛ í kpau. Ŋɔi í jɔ̀ à sɔɔ Sɛti. #4:25 Sɛti Yaasei iriui í jɛ amuai Ilaaɔ̃. 26Ŋɔi Sɛti takaɛ í bí ama inɛmɔkɔ, nɔ í sɔɔ Enɔsi. Waati bɛɛbɛi inɛ ŋa à sinti Aɔ̃ Lafɛ̃ɛ ku tɔɔ.
Currently Selected:
Kusintii Andunya 4: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB