Santali Bible © Bangladesh Bible Society, 2021.

Jakob doe ańjom tiyokʼkeda Labanren hoponko do noa kathako lại baṛayeda je, Jakob do onkoren apatakʼ sanamakʼe hatao akada ar onkoren apatakʼ sompotti iạtege nunạkʼ ḍher hoyakantaea.
Jakob do noa hõe ạri bạndhikeda, Laban do lahate leka acʼre kusi bạnuea mente. Unre Probhu Isor do Jakobe metadea, “Am do amren hapṛamkoakʼ disạmren hoṛko ṭhen ruạṛ calakʼme. Iń do am são sãotegeń tahena.”
Jakob do hoṛ kolkate okare mĩhũ-merom palko tahẽkantae onḍe Lea ar Rahele hoho ạguketʼkinạ. Ona tayom unkine metatʼkinạ, “Ińiń ńeletʼa abenren babawakʼ mẽtʼãhã do pạhil leka kharsala ińre bạnukʼtaea, menkhan iń babaren Isor do iń sãote menaea. Ar noa hõben baḍaegea iń do ińakʼ goṭa daṛete abenren babawakʼ iń kạmiakada, menkhan uni doe eṛe akadińạ ar gel dhao ińakʼ betone bodol akatʼtińạ. Menkhan, Isor do ińakʼ jãhãnakʼ bae loksan ocoakatʼtińạ. Abenren baba do tinreye menleda, ‘okoeko bhiḍi ar merom do kạṭicʼ kạṭicʼ kabra kabra chapanko hoyokʼ onko do ińakʼ betonko hoyokʼa,’ unre palren sanam bhiḍi-merom do onka lekageko hopon akatʼkoa. Arhõ tinreye menkeda, ‘ińakʼ beton do kabra kabra bhiḍi-meromkoge hoyokʼa,’ ar unre sanam bhiḍi-meromko do kabra kabrako hoponketʼkoa. Isor do abenren babawakʼ palren bhiḍi-meromko khon nonkage ińe emakawạdińa.
“Mĩhũ-meromkoko midokʼkan tahẽkanre iń do mitʼṭecʼ kukmũń ńelkeda. Iń doń ńelkeda, merom pạṭhi cetanre okoeko bodako dejokʼkan tahẽkan onko do kabra kabra kạṭicʼ ar lạṭu chapanko tahẽkana. Kukmũ talarege Isorren goḍet do ińe hohowạdińạ, ‘E Jakob.’ Unre ińiń menkeda, ‘Hẽ minạńgea.’ Uniye metadińạ, ‘beṅgetʼkate ńelme, merom pạṭhiko cetanre okoe bodako dejokʼkan onko do kabra kabra lạṭu ar kạṭicʼ chapan kanako. Ar Laban amre okae ceka akatʼ ona do jotogeń ńelakada. Iń doń Isor kana okoe do Bethelre am ṭheniń ńel ocolente ar oka dhiri khunṭire sunum dulkate iń ṭhenem kiriạlen. Am do ńitokʼ noa disạm bạgikate amakʼ bukạ topa ṭhạ̃ite ruạṛ calakʼme.’ ”
Noa katha ańjomkate Rahel ar Lea dokin menkeda, “Babawakʼ sompotti reakʼ okaṭakʼ hĩsge ạliń do ńithõ bạnukʼ tạlińa ar tayomtehõ baṅ tahẽna. Uni ma bahreren hoṛ lekageye hudisliń, ente uni doe ạkhriń akatʼlińạ ar okam ńamakatʼ ona mam jomakatʼ. Onate ạlińren babawakʼ sompotti khon Isor okae hatao akatʼ ona do khạṭige ńitokʼ ạliń ar ạlińren gidrạkoakʼ kana. Onate Isor okae metamkan onage onkaeme.”
Noa tayom Jakob do acʼren hopon ar hoponerako ar bạhuko ũṭreye decʼketʼkote Kanan disạmte acʼren baba Isahak ṭhene mohnḍayena. Ar mĩhũ-merom palko ar eṭakʼ dhonko tinạkʼ do Padam-Aramreye labletʼ onako sanamakʼe soṅge torakeda. Unre Laban do acʼren bhiḍikoakʼ upʼ kạpciy tako lạgitʼe calao akan tahẽkanre Rahel do acʼ apatakʼ gharońjren murhutʼkoe kombṛoketʼkoa. Ar Jakob do acʼakʼ calakʼ reakʼ katha Laban bae baḍae ocoledea. Nonkate Jakob do acʼakʼ sanam jinisko hataokateye dạṛkeda. Uni do Phurạt gaḍae paromketʼte Gilead reakʼ mitʼṭecʼ buru ṭoṭha secʼe sen idiyena.

Niạ pe din hilokʼ Laban doe baḍaekeda baṅma, Jakob doe dạṛkeda. Unre uni do acʼren peṛa pạrbhạkowante Jakobe khudạu idiketete eae din reakʼ horte senkate Gileadkoakʼ buru ṭoṭhareye tiyokʼkedea. Menkhan Isor do ńindạ jokhecʼ kukmũte Labane metadea, “Sontorokʼme! Jakob do boge-bạṛicʼ jãhãnakʼ cetʼge alom metaea.”
Jakob okare tạmbu ṭaṅgaokateye ḍera akan tahẽkan, onḍege Laban do senkate uniye sapʼ tiyokʼkedea. Laban ar uniren peṛa-pạrbhạko hõ Gilead reakʼ ona bururege tạmbuko ṭaṅgaokeda. Ar Laban do Jakobe metadea, “Noa do cetʼ ben cekakeda? Cedakʼ ben eṛeketʼ lińa ar lạṛhạire bondi akan hoṛ leka ạlińren hoponera ben ạguketʼkinạ? Oko okote dạṛkate cedakʼ ben eṛe mojaketʼ lińạ? Ạliń ben metaliń khan ạliń do rạskạte, sereńate, kortal ru ar taranakʼ banamate aben liń bidạkebena. Aben do ạlińren goṛom gidrạko hõ baben cokʼ ocowatʼlińạ; ente lelha hoṛ lekaben kạmikeda. Apeakʼ loksantape reakʼ ektiạri bạnukʼ tạliń ona do baṅa. Menkhan Abenren hapṛamkoren Isor do hola ńindạ ạlińe menakawatʼ lińa, “Men sontorokʼme! Jakob do boge bạṛicʼ jãhãnakʼ cetʼge alom metaea.” Bhagegea, aben ạpumakʼ oṛakʼ calakʼ iạte jiwi lokʼkan tabena ar onateben oḍok hecʼakana, menkhan ạliń gharońjren murhutʼko do cedakʼ ben kombṛo ạguakatʼkoa?”
Jakobe roṛ ruạṛkeda, “Ạliń doliń botorokʼkan tahẽkana, ente liń hudisetʼ tahẽkana hoedaṛeakʼa aben do abenren hoponerakin ạliń khon ben recʼ doholińạ. Ar onate ạliń doliń dạṛ akada. Ar okoe ṭhen abenren onko murhutʼ ben ńamko uni doe gocʼ ocokʼma. Ạlińakʼ sanam jinisko talare abenakʼ jãhãnakʼ tahen eman khan enḍekhan aleren peṛa-pạrbhạko samaṅrege sendrae ben.” Menkhan Jakob do bae baḍaekan tahẽkana Rahel do onko boṅga murhutʼkoe kombṛo ạguakatʼkoa mente.
Unre Laban do mimitʼ mimitʼte Jakob, Lea ar uniren banar kạ̃ṛmĩyakʼ tạmbureye boloyena menkhan celege bae ńamletʼkoa. Ar Leawakʼ tạmbu khon oḍok kate Rahelakʼ tạmbuteye boloyena. Rahel do menkhan onko boṅga murhutʼko ũṭ reakʼ godi latarreye oko dohoakatʼko tahẽkana ar unre uni do ona godi cetanreye duṛupʼ akan tahẽkana. Laban do uniyakʼ tạmbu reakʼ sanam jaegareye sendraketʼkoa menkhan onḍehõ celege bae ńam letʼkoa. Sesre Rahel do acʼ babae metadea, “Ńelme, bạń beretʼ daṛeakʼkante alom ạṛisokʼa, ente iń do candoteakʼ hoyokʼ kantińạ.” Laban do sucʼ sutrucʼ sendrakate hõ onko boṅga murhutʼ do bae ńamletʼkoa.
Unre Jakob do raṅgaoente ãṭ aṛaṅteye menkeda, “Ạliń do cetʼ liń dos akada, ar cetʼ liń behok akatʼte nonka ben khudạu ạguketʼlińa? Ạlińakʼ sanam jinisko hạtṛạukate cetʼ abenakʼ gharońj reakʼ jãhãnakʼ ben ńamkeda? Arben ńamakatʼ khan ạliń ar abenren peṛa-pạrbhạko samaṅre ona dohoy ben jemonko bicạr daṛeakʼ. Ạliń do bargel bochor aben sãote liń khemao akada. Unre abenren jãhãn bhiḍi se meromakʼ kukhi hõ baṅ bạṛicʼlena, se abenakʼ palren jãhãn bhiḍi se meromhõ bạliń gocʼ jomletʼkoa. Se, bir janwar hoteteko gocʼ ocoakan bhiḍi-merom hõ aben ṭhen do bạliń ạguletʼkoa. Menkhan ona reakʼ loksan do ạliń geliń ladeana. Abenren bhiḍi se merome kombṛolenre sińkan ar ńindạ kan aben do ạliń ṭhen khon khuti purun ben hatao akada. Ạliń do siń cando reakʼ lolote ar ńindạ do rabaṅ iạte lin thakaolena, jạ̃pitʼhõ mońjte bạliń jạpitʼ daṛeakʼkan tahẽkana. Ar nonkage liń tahenkan tahẽkana. Oka bargel bochor aben ṭhen liń tahẽkan ona reakʼ gelpon bochor do abenakʼ liń kạmileda abenren banar hoponera ben lạgitʼ, ar turui bochor liń khaṭaolena abenren mĩhũ-meromko lạgitʼ. Onako dinre aben do gel dhao ạlińakʼ beton ben bodolleda. Ạliń babaren Isor, okoe do Abraham ar Isahakren Isor kan, uni do ạliń sãote bae tahẽlen khan enḍekhan khạṭige aben do ńitokʼ eken ti ben bidạkelińa. Isor do ạlińakʼ khaṭaokʼ ar kosṭoe ńelakada. Ar onatege calaoen ńindạ do noa reakʼ bhageye bicạr akada.”

Noa kathare Laban do Jakobe metadea, “Nukin do ạlińren hoponera kanakin, ar noko gidrạko do ạlińren goṛom gidrạko kanako, ar noko mĩhũ-merom palrenko hõ ạlińrenge. Nonḍe jãhãnakʼge ben ńeletʼkan noako joto do ạlińakʼ kana; enhõ teheń do ạlińren hoponera kin se unkinren gidrạko babotre ạlińakʼ jãhãnakʼ cekae reakʼ cetʼge bạnukʼ tạlińa. Ona khon bickom dela, alaṅ talare mitʼṭecʼ bondobos laṅ bandhaoa jemon alaṅ talare goha leka tahen.”
Unre Jakob do mitʼṭecʼ dhiri hataokate khunṭi lekae teṅgokeda ar acʼren peṛakoe metatʼkoa, “Thoṛa dhiri ạgu jarwaepe.” Unre onko do dhiri ạgu jarwakate mitʼ ṭhenko ḍhipikeda ar sanamkoge ona aṛereko jom-ńũkeda. Laban do ona ḍhipi reakʼ ńutum Jegar Sahadutạiye ńutumkeda (metakʼme “Goha ḍhipi”). menkhan Jakob do acʼakʼ pạrsite ona reakʼ ńutum do Goled (metakʼme “Goha ḍhipiye dohokeda”).
Labane menkeda, “Teheń do noa ḍhipige alaṅ talare goha tahẽyena.” Ona iạte noa ḍhipi reakʼ ńutum do Galedkin dohokeda. Ona chaḍa noa reakʼ ńutum do Mispa hõko dohokeda (metakʼme “Horho jaega”), ente Labane metade tahẽkana, “Tinre balaṅ ńelokʼa unre Probhu Isorakʼ mẽtʼge alaṅ cetanre tahenma. Ar ạlińren hoponera sãote bạṛicʼben beohar, enḍekhan hoponerakin tahenrehõ eṭakʼ maejiuko hataoko ben, ar okoehõ alaṅ sãote bae tahenrehõ disại ben, Isor do alaṅren gohae tahẽyena.
Laban do Jakob arhõe metadea, “Noa ḍhipi secʼ beṅged ben, noa dhiri khunṭi do aben ar ạliń talare dohoyena. Noa ḍhipi ar dhiri khunṭi do noa goha mente tahẽyena, noa ḍhipi paromkate ạliń do abenakʼ cetʼge bạliń loksan tabena, ar aben hõ noa ḍhipi paromkate ạlińakʼ jãhãnakʼ cetʼge bạliń loksantạlińa. Arben onkale khan Abrahamren Isor ar Nahorren Isor ar onkoren hapṛamkoren Isorge jemonko bicạrlaṅ.” Menkhan Jakob do acʼ apatren Probhu Isor ńutumteye kiriạyena.
Niạ tayom Jakob do ona burure dãṛẽye samaṅkeda ar peṛa-pạrbhạko jom-ńũ lạgitʼe goṛoatʼkoa. Arko jom-ńũketʼ khan ona bururegeko tahẽ aṅgayena. Dosar hilokʼ ạḍi setakʼre beretʼkate Laban do acʼren hoponerakin ar goṛomtetʼ gidrạkoe cokʼatʼkoteye bhoratʼkoa. Ar ona tayom do bidạ hataokate acʼakʼ oṛakʼteye ruạṛ calaoena.

සවන් දෙන්න Genesis 31