Luka 21

Bobo honna ge gwale kumur ne

(Mar 12:41-44)

1Swaga ge Jeso ne he na pala digi, kwa naa ge gan ma ne hon bama bobo ma sandu ge zok ge mbegeya zi ne go. 2Kwa gwale kumur ge a̰se a̰me ne dol na sile ma azi me, 3jan go: «Fareba mbi jan aŋ, gwale kumur ge a̰se mbe no, do kaŋ waɗe naa pet, 4Ago nama mbe ma no pet a ka̰ bama kaŋ pe ge ne gá ma baŋ, amma gwale mbe, woɗegeya ge na ne zi, ho̰ kaŋ ge na ne ma mwaɗak, kaŋ ge na ne ka ne na pe ma.»

Jeso waage burmiya ge zok ge mbegeya ne

(Mat 24:1-2, Mar 13:1-2)

5Ne jo̰ naa a̰me ma a ka jan fare ge zok ge mbegeya ne, na siŋli ne na njal ma, na pul hormo ne bobo ge naa ne ho̰ ma. Jeso jan go: 6«Dam ma mbo ya, na ge aŋ ne kwa na mbe no, njal a̰me mbo gá na kon pala digi to, a mbo burmi uzi.»

Kaŋ ma ge ne ŋgay gwanna ge Jeso ne ya

(Mat 24:3-14, Mar 13:3-13)

7A ele Jeso go: «Bage hateya, kaŋ mbe ma mbo mbo ya ma swaga go ɗaa? A ma kaŋ ŋgay ne go kaŋ mbe ma mbo mbo ya ɗaa?» 8Jan go: «Ke me haŋgal, na kaage ndu a̰me ya̰me aŋ to! Naa gḛ a mbo mbo ya ne dḭl ge mbi ne, a mbo jan go: ‹mbi Kris ne!› Swaga mbe yan ja, kare me nama pe to. 9Swaga ge aŋ ne mbo ɗage ya za̰ pore mballa ma, ne gage ma, iigi me ta to. Ago ŋgat kaŋ mbe ma mbo ya, amma a be pe aya ne to gale.» 10Gwan jan nama go: «Pehir ma mbo ɗage ne ho̰l digi ta buwal zi, suwal ma mbo ɗage ne pore ta ta. 11Suwar ndatɗa ge ɓaŋlaŋ ma mbo ke, baktar ma ne mbogom mbo ke swaga ma go cucub, kaŋ ge ajab ma ne kaŋ ŋgayya ge ɓaŋlaŋ ma mbo ke pḭr digi. 12Amma kaŋ mbe ma ndwara zḛ pet, a mbo wan aŋ, a mbo ke aŋ yál, a gene aŋ Sinagog ma zi, ne kan aŋ daŋgay ma zi, a zwal aŋ ya gan ma ne naa ge a ne dó bama ndwara ne suwar pal ma ndwara se ne dḭl ge mbi ne pe. 13Kaŋ mbe ma no, a mbo hon aŋ viya̰ ge ke sayda ge mbi ne nama ta. 14E me aŋ pala zi go, aŋ mbo nṵsi ta nṵsi zḛ ne fare ge aŋ ba mbo ɗaŋge ta pe ne nama to. 15Ago mbi mbo hon aŋ fare janna ne zwama ge aŋ naa ge ho̰l ma ne mbyat ge gage na ko ne ɗaŋgre na to. 16Ko aŋ bá ma, ne aŋ ná ma, ne aŋ ná vya ma, ne aŋ sele ma, ne aŋ kondore ma, a mbo hun naa gḛ ne aŋ buwal zi. 17Naa pet a mbo kwane aŋ ne mbi dḭl pe. 18Amma ko aŋ pala susu myalam ɗu puy, mbo hal uzi to bat. 19Wa̰ me ta! A go no ge aŋ dḛ ba má ta.»

Waageya ne burmiya ge suwal Ursalima ne pe

(Mat 24:15-21, Mar 13:14-19)

20«Swaga ge aŋ ne mbo kwa asagar ya ver Ursalima se, kwa me go burmiya ge na ne yan ja gwa. 21Naa ge a ne mbo katɗa suwal Yuda go ma, nama sya mbo njal ma pala digi ya, nama ge ne mbo katɗa suwal Ursalima diŋ ma, nama sya zum, nama ge ne mbo katɗa ful zi ya, nama gwa̰ ya suwal diŋ to. 22Ago mbo kat dam ma ge geleya ne, ne da pe fare ge ne njaŋge ne maktub zi ma wak wi. 23Woo naa zaab ge ne mbo katɗa ne emel ma, ko ne nama ge ne mbo katɗa hon vya pam dam mbe ma pul zi ma! Ago yál ge baŋlaŋ mbo det suwar pal, laar ol ge Dok ne mbo det ɓase mbe ma pal. 24A mbo su pore zi, a mbo pál nama suwal ma teteŋ, pehir ge ɗogle ma mbo twacwage suwal Ursalima bama koo zi, ɗiŋ dam ge a ne e na ne pehir ge ɗogle ma pe wak wi ne ɓya.»

Gwanna ge Vya ge ndu ne ya

(Mat 24:29-31, Mar 13:24-27)

25Kaŋ ŋgayya mbo kat gyala ma ne saba ma ne guwa̰r ma ta digi, suwar pal, pehir ma mbo kat ne iigiya, vo mbo wan nama ne ko̰r ge maŋgaɗam ga̰l yuwam ne ma ne na sḭḭl. 26Vo mbo hun naa swaga da̰re kaŋ ge ne ɓyare det suwar pal go. Ago pool ge ne pḭr digi ma mbo ndat. 27Go no, aŋ mbo kwa Vya ge ndu ne mborra ya pḭr pal, ne pool gḛ, ne hormo gḛ me. 28Swaga ge kaŋ mbe ma ne mbo ɗage ya mborra ya, nṵsi me ta, e me aŋ ndwara se, ne da pe zurra ge aŋ ne ga gwa.

Ame me hateya ne fere ta

(Mat 24:32-35, Mar 13:28-31)

29Jeso gwan ke nama fare sḭ mbe no: «Ndi me fere ma ne uwara ge may ma pet. 30Swaga ge a ne ɗage ɗufiya, aŋ kwa kwa go gyala pul ga gwa. 31Go no me, swaga ge aŋ ne mbo kwa kaŋ mbe ma kerra ya, kwa me go, muluk ge Dok ne ga gwa. 32Fareba mbi jan aŋ, kaŋ mbe ma no pet a mbo mbo ya be ge doŋ pe mbe no kale to gale. 33Digi ma ne suwar mbo kale uzi, amma fare ge mbi ne ma mbo kale uzi to bat.»

Ka me yaŋyaŋ

34Ke me haŋgal, na kaage aŋ e aŋ dulwak ene ma, ne fereya ma, ne dwatɗa ge dunya ne ma pal to, ne da pe dam mbe na mbo ya tan aŋ tukcuk to. 35Dimma ne boy go, ago mbo kan naa ge ne suwar se ma pal pet. 36Amma ka me yaŋyaŋ, kaɗe me ɗaɗak, ne da pe aŋ ba ɓol pool ge ɓurra ne kaŋ ge ne mbo ya mbe ma go pet, aŋ ba mḛ tandal ge Vya ge ndu ne ndwara se me.

37Gyala, ka hate zok ge mbegeya zi, ɗaal me, ka mbo dwam njal olive pala digi ya me. 38Cya̰wak vḛ naa pet, a ka mbo ya zok ge mbegeya zi za̰ na.

Selectat acum:

Luka 21: FGN2013

Evidențiere

Partajează

Copiază