Marocohacha Laenai 2

Leinjiin jiurona cacha rautaa Jesosone

(Mt 9.1-8; Lc 5.17-26)

1-2Nii baiha janojanoheriin catiaain jetaote, coaiteen Caferenaaon cue Jesoso. Inae ecu turuhin, loreri asaae nihane coitucuhin jetaote, rene turuha cuuruha arajiin cachaaurune jana jetao, acaauru rai Cana Coaunera ere beebeje Jesoso. Nitohaneein arajiin turuuruha cachaaurune jaun jetaote, jataain memoha loreri asajine jaun, nii acuujua rohan nihanatiin nene turuha cachane jaannu. 3Nii jana jetaote, Jesoso rene leinjiin cacha jiurona amaaure jenai cachaauru. 4Nejetaote, jataain arajiin turuha cachane jaun, Jesoso rene nii jiurona cacha turuanaa nainecurenihana jaun jetao, loreri coarana joaracaain rai nela cuhane tijichaain, nii niha Jesosone jaan jeloon nii jiurona cacha faaure. 5Nii cunaitenaa rautarichaainne esenetaain amaauruha nii amaaurerane coaraane jaun jetaote:

“Inae ii osa caje ii ichoterateein, ii que casuujua acatichaaunra cacalabi”, nae jetao nii cunaitenaa rai Jesoso.

6-7Nii jana ecu neein aonajeein jetaote: “Chanuna caritiin ere caa cacha. Nechu jataain Cana Coaunera niha nocoetohane jaunte aite. Leinjiin Cana Coauneraachate nainere osa sitaa cacha cajene”, naain jetao suujua cuhane ereerejeein laurujualaurujuaain aonajeeure Moisesa aitoonjoan que cacha relaaureraauru tabaauru. 8Niritiin suujua cuhane coaaucuruhane que nainaain jetaote:

“Chanuna niritiin inara suujua cuhane coaauquiche. 9Cha caaintanerihana nii jiurona rai: ‘Inae ii osa caje ichoteratenojoineein’, naain irihaca ne. Ainihane: ‘Nimichuhin chela seriin amuu’, naacane. 10Coarajeeuchenejian, Cana Coaunera Calaohi cachaneein nejanoanaa nichaaunne, itolere curuaanaa neein nihanu caa cana rai chauratane quene coaaratete, rai nosa caje cacha ichotena nainichaaunne coitucuhiche”, naain jetao, nii jiurona rai:

11“Ii raine aitoon. Nimichuhin chela seriin chenenajau caunihu”, naa Jesosone rijieeoritiin jetaote, 12satiin nii ecu neein coarajeeurera notaracae jetao, nimichuhin rai nela seriin jelai caje amue nii jiurona caaun cunaitenaa. Nii jaun jetaote, satiin cojoelatiin jetao: “Chabana catohani coarahaacacheta”, naain jetao Cana Coaunera coroaecure cachaauru.

Leinjiin cacha Lebi cotihaca Jesosone

(Mt 9.9-13; Lc 5.27-32)

13Nii baiha jetaote, coaiteen nemuri auhaniha cuha Jesosone jana, rene turuuruha arajiin cachaaurune jaun jetao, acaauru rai Cana Coaunera ere beebejeein acaauru relae Jesoso. 14Nii caje cuujueein jetaote, Romanocuru rai impoestonu que cacha cobaraain coriqui raeraneein nihane jaun rai rori ichoae lauhecoha Arafeeo calaohi Lebine jana coaariin jetao:

“Chajaau caniha”, naa Jesosone jaun jetao, nii rijieeoritiin nimichuhin Jesoso aina cue Lebi. 15Nii baiha jetaote, nii Lebi loreri asae lenoniha niha aina nerelanacauru aina Jesosone jana jetao, cuu nii Lebi aina lenoniha neeure arajiin leeochaauru Romanocuru rai impoestonu que cacha cobaraain coriqui raaurera, leeochaauru cachaauru- baasoneein ichaoha benojoihunuri, naaonjoainuri. 16Nitohaneein Jesoso aina lenoniha neeuruha nii nitohaneein ichaonacaauru cachaaurune coaracuruhane jaun jetaote, nii Jesoso aina nerelanacauru rai jetao:

“Chasiina taa Romanocuru rai impoestonu que cacha cobaraain coriqui raaurera, baasoneein ichaoha benojoihunuri, naaonjoaihunri aina lenone inara relaera”, naaure jetao fariseeocuru aina Moisesa aitoonjoan que cacha relaaurera, Jesoso aina nerelanacauru rai.

17Nii jana jetaote, acaauru aonajeein jetao:

“Coatiha coichaera latecuruhi rauronacaauru. Leinjiin cunaitenacaauruhachate coichaera latecure. Coatiha osa colane nenacaauru cotihaca uhaaun. Osa aina nenacaaurune cotihaca uun”, naain jetao acaauru tonorae Jesoso.

Suri couu netiin Cana Coaunera bajaauruhane

(Mt 9.14-17; Lc 5.33-39)

18Joaan Baotisita sacuurera aina fariseeocuru sacuurera jetaote niqui, suri couu netiin Cana Coaunera bajaaebajaaecure. Nii jana jetaote, Jesoso rene turuhin jetao:

“Chanuna jana chaaen, Joaan, fariseeocuru, naaonjoaihunri relanojoinuru jataain Cana Coaunera bajaae bajaecure suri couu netiin. Nete laen itolere bana ii aina nerelanacauru, coaaerai cohin, lenoneein, naaonjoaunreta”, naauruha Jesoso raine jana jetaote:

19“Aiha chuhisi niqui. Nete ene ranaa jeriha cachana jaa beseta que neeuruhane jaun, suri couu nenaa nainecurene caa cotihanohichuru, jaiti acaauru aina niha nii ene raeraanu cachane jaun. 20Nete laen inae nii ene ranaa jerera cacha amaauruhane, suri couu neein inaderaa cuurureeincha”, naain jetao: 21“Coaracuche nachuhinti, nihei chuni obiri enachasine soaain, cajione siri que counera. Nitohaneein nii obiri enachasine soaihanete, nii obiri enachasine asaaere nii cajione siri. Chaaen caohachaain nedanaa nainerihei nii obiri enachasine, nii cajione siri que couneraane. 22Nii rijijieeinchu, nihei chuni inae conaca que tiha coaaeraine jana, cuhane ichonai tera. Nitohaneein cuhane teraa ichonainete naasaaere nii coaaerati. Nitohanihane jaunte, caohachae coaaerai nejesinaneein niha coaaeraine. Chaaen ichonai, ichonai nejesinajeein nihane caohachae”, naain jetao cachaauru tonorae Jesoso.

Nebetacanaa cojoanonaa bana aroso rijijieein nenaa tirico moloonejeein quihuruha Jesoso aina nerelanacaaurune

(Mt 12.1-8; Lc 6.1-5)

23Nebetacanaa cojoanonaa bana aina nerelanacauru aina jiniiquiin temule jana situhin, amuhemuheca Jesosone jana jetaote, quihuruhane coina aroso rijijieein nenaa tirico inaa moloonejeeure aina nerelanacauru. 24Nii coarajeein jetaote:

“Chanuna nebetacanaa cojoanonaa nihane jaun cocoaeraa nitohanai ichara natiin, nitohanai ichacure nii ii aina nerelanacauru”, naauruha Jesoso rai fariseeocurune jana jetaote:

25Tana nitohanihalu Rabirine coitucuhichene: 26“Nii Rabiri jetaote, saseredotecuru curuaanaa neein niha Abiatane bana Teenforo asaae enohin Cana Coaunera que banijiaain nenaa faan quii, nii rai corihacuru aina jiniiquiin mijiitooruhane jaun, saseredotecuruhacha nii faan quinaa nainihane saijieein”, tana naain laenanohiniha Cana Coaunera Quiricha cuhanene ereretaain aonaquichene.

27-28“Nebetacanaa cojoanonaate coaaunaelu Cana Coaunera, bana nebetacanaa nainiha cachane coina. Coatiha cacha cairichaeranu que nebetacanaa cojoanonaa coaunaailu Cana Coaunera. Nii jaunne laen canu naineeun nebetacanaa cojoanonaa bana nihanatiin quiicha ichana jerei ichaain nihanune. Nitohaneeinte inara rijijieein cachaneein rai Calaohi nichaaunne cocoainaain letoae Ofa Cana Coaunera”, naain jetao fariseeocuru tonorae Jesoso.

Selectat acum:

Marocohacha Laenai 2: URA

Evidențiere

Partajează

Copiază