Mateeocha Laenai 24

Nitajerichaain Teenforone biha Jesosone

(Mr 13.1-2; Lc 21.5-6)

1Inae Teenforo caje mituhin jelai caje amuhane rai niha Jesosone janane, rohan nichuuntaacoain caohatiin ichanohiniha nii Teenforone coaracaanu aina nerelanaa nichaanune.

2Nii jaunte: “Caohatiin ichanohiniha caa Teenforonena coarajeeiche. Esinae rauhijiriine inara rai aitoon, coatiha nii leinjiinniji ita ichoae nerinaain caa ena inaraacha coarajei ajeri, inae satiin nitajerichaaine jaun”, nae aina nerelanaa nichaanune rai Jesoso.

Nacoauneein tururichaain Curisitone bajaauruha aina nerelanacaaurune

(Mr 13.3-23; Lc 21.7-24; 17.22-24)

3Nii baihane, Oliboneein acaauruacha curuaatei ichatane ucuunno cuhacaanu, ecu turuhin jelai lauhecoha Jesosone jana, rohan nichuuntaacaanu aina nerelanaa nichaanune. Nitohaneein rohan nichuuntaain:

“Canacaanu rai nii chaitoonjoan beeinene jerichaanu Curuaanaa. Chabana nacoauneein cau tururiquiin. Chatohanaicha inae turue lalajeeine jana, ii turu cojoinaca beraneein coaarichaanuhin, inae saaelalajiha cana janonaane bana”, naain caje bajaacaanune janate:

4“Caohachaain necohalajiin neeuche, nabana inara coritaauruha chunocohacurune coataara. 5Arajiin cachaaurute, canu niha nocoetiin inara coritana jerecurureein: ‘Canune Curisito Mesihasineeunra’, naainte, arajiin cachaauru coritaaurureeincha. 6Niha sonaana cau, tajiha, naaonjoaaine coitucuhichene, jiaonriha nesoonetohichenera, nitohanihate cureein nii ajinihara. Nete, nitohanihane nihanatiin, jaiti cana janonaa satono que turuhenereeincha. 7Nejelau lauri nenacaauru ainate, sonaana que neeurureein leeocha lauri nenacaaurura. Nejelau atane que nenacaauruniha natiinte, leeocha atane que nenacaauru aina sonaana que neeurureeincha. Chaaen techu, itolere sacuritaain niha mijitenane jana, araai laurii atanecuru que niha cureein carorara. 8Nitohaneeinte nunuheca cureein, inae cana cojoanonaa satono que turuelalajihane jana, jataain inaderaauruha cachaaurune jaan cojoanonaara.

9Nii jana inarate tenojoiniha curiquicheein cocoainanacaihuri rai, inara faojoaain, inara atinaain, naaonjoaain inara teeuruhane coina. Chaaen techu, satiin cachaauru, canu coreniha inara que nererojoecaaeriin neeurureeincha. 10Nii banate, arajiin canu esenetaera nequichene, inaraacha esenetai jianeein, ita que nererojoecaain, nejesinajeein ita colurujueein ita teriquicheein cocoainanacaihuri rai.

11Arajiinte profetaniha nocoetiin turuhin namute cachaauru coritaauruhane, acaauru esenetaaurureein arajiin cachaauru. 12Nitohaneeinte, jataain baaso coacuhin inae ita belaihuruhane jianeein niha cuurureein cachaauru. 13Nete laen, nii niicha esenetai esenetaane nunuhetihane caje coaauneein, jerichanejeein satono que tiaain sacuera nichotereeincha. 14Caa ena nenaa ichaonaa erenaa raotono quiicha beebejei Cana Coaunera Cojoanonaate, satiin chauratane sacuritaain benojoinereein, satiin cachaauru inae coitucuuruhane jana, besaute que turuha cana cojoanonaane coinara.

15 Profeta Danieriicha laenailu ereretaain coaarate nii coitucuhin nichotenaa nainereein. Aihana jaun, inae nii Teenforo asaae jelai teein Cana Coaunera que banijiaain altar ichoae ecooca Cana Coaunera que nejeratenaa casicheine coaraquichene, 16Jodeau nenacaauru sorooruhine ichatane ucuunno que cuhincha. 17Jana, rai loreri janori ichoae nenaa, jiaonriha fauhin rai rucuhele raane. 18Jana rai nocoana jana nenaa, jiaonriha rai nenajau cauhin rai cajione ranaa coaaucane. 19Jataainte cairichaaojoaaurureein nii cojoanonaa que turuhane bana ausirineein nenacaauru enecuru, sisiajeein canaanai sirichaauru enecuru, naaonjoainuri. 20Cana Coaunera bajaauche, nabana jelaronaa bana, niheichu nebetacanaa cojoanonaa, naaonjoain bana niha nii sorohichene jaan cojoanonaane coataa. 21Nitohaneeinte niha cureein jataain necairichanaa tabai, cana necoaauna caje coaauneein nii chabana niha nitohanaine que airijiin niheichu nerinaain nii baiha. 22Jana, nii cojoanonaa sarotiaeniha Cana Coaunerane, satiin cachaauru nichotenaa nainecururihei. Nete, atiin sarotiareein, janijiin niicha ranojoihunru belaitohane jaun acaauru coreniha.

23Chunocoha inara rai: ‘Caute ne Curisito Mesihasicha. Chajaau tejian coanicha’, naa inara raine, jiaonriha esenetaaichene. 24Turuururichaain inara rene casajeeuru profetaniha nocoetonacaauru aina Curisito mesihasiniha nocoetonacaauru. Nitohaneein turuhinte, itolere cojoelanaacojoai ichacurureein, janijiin Cana Coauneraacha ranojoihunrune maajeein coritana nainecuruhane coritaauruhane coina. 25Nitohanihane ajinihane inara rai beeun, caje coitucuhin nainaain ichaohichene coina. 26Aihane jaun, inara rai: ‘Nota tajiha cacha areroote ne’, naauruhane nihanatiin jiaonriha cuhichene. Niheichu: ‘Nocoa caute ne nasiincha’, naa inara rai chunine, jiaonriha esenetaaichene. 27Charijieein teeinti, enoto mitu nichajai caje jilenetoha jiacane enoto soo nichaae cuhine, satiin coaanojoi ne. Nii rijijieeinte, satiin coaanojoiniha cureein, inae nacoauneein cau turuhanu acaihaniji Cacha Calaohineein nejanoanaa nichaaunne bana. 28Charijieein teeinti, niha canii setune que fauha ichotarine caje coitucuerae. Nii rijijieeinte coitucunojoinereein turuhanu canu Curisitonichaaunne bana.

Tururichaain acaihaniji cacha calaohineein nejanohanaane

(Mr 13.24-37; Lc 21.25-33; 17.26-30, 34-36)

29Inae nitohaneein niha nii necairichanaa tabai cojoanonaane janate, nocohenaneein nerotoreein enoto cono. Atene netonaite, conohane jianereein nii cojoanonaa bana. Jana arasijieeurute, dede caje naluurureein. Dedeeu nenacaauru nihanatiinte nerurujuaaurureein.

30Nitohanihane janate laen, inanacareein dede caje inae fauha uhanu canu acaihaniji Cacha Calaohineein nenaa nichaaunne bera. Nii jana, satiin chauratane sacuritaain nenacaauru cachaaurute, jataain coasinacaaun chanaain coaracuruhane janane, dede sacari jana uhin fauha ureeunni acaihaniji Cacha Calaohineein nenaa nichaaunne, jataain necaohachaain itolere ichana naineein nelateein. 31Nitohaneein turuhinne canu letonocuru anjeraauru letoareeunni, tonijiaain jaiha toteein, satiin chauratane sacuritaain, itolereneein satono tinonoritiin nenacaauru janijiin canu ranojoinuri cachaauru taojiaauruha canu raine coina.

32Aihana jaun, caa uhera que inara relaanune jaan que nerelaauche. Charijieein teeinti, inae rai nunecuru caohatonanaain alohacoaain ujuanihane caje, inae cataainjia ajaanaane coitucuhiche. 33Nii rijijieein, caa inara rai caitoonjoan tocohanihane coaraquichene, inae turuhelalajihanu acaihaniji Cacha Calaohineein nejanoanaa nichaaunne que nainacuche. 34Esinae rauhijiriinte, jaiti ooreniha caa enene nenacaauru cachaaurune jana aicheein. 35Dede aina chauratanete nitajeeurureein. Nete laen, nitajenereein, caa caitoonjoan nainaane reentiaain, canu ere. 36Coatiha laen nihei chuni, rai cojoanonaa aina, ‘Naaonjoain rijiu tiaainte aicheeincha’, naain nii coitucuera. Niheichu, Cana Coaunera letonocuru anjeraauru dedeeu nenacaauru nihanatiin coitucuuruhi; niheichu canu- Calaohinichaaune saijieein coitucuhaaun canuhetonai. Acaihaniji canu Inaca Cana Coauneraachate, nii coitucuhin ne.

37Nihalu Nohene bana aihalune tocohaneeinte aicheein, inae nacoauneein turuha urichaauni acaihaniji Cacha Calaohineein nenaa nichaaunne cojoanonaa que turuhane bana. 38Coaracuche nachuhinti, jaiti uheniha elo tabaine jana, rai bote cuhane fauhin enoha Nohene que tiaaojoaain, raotojoeein lenoneein, acau cohin, necoansajiaain, naaonjoaaunruhalu cachaaurune. 39Nejetaote laen, urichaain elo tabaine coaaujeeurenihane jana, uha elo tabaine jaun jetao, jitariin acaauru joocalu ne. Nii rijijieein nechu, coohatejeeureniha cachaaurune jana, nacoauneein turureeunni acaihaniji Cacha Calaohineein nejanoanaa nichaaunne. 40Nii turuhanune rijieeoritiinte, ocoana jana neeurureein coroatajai cachaauru. Leinjiinte, amanojoinihane jana, leeocha ratirinojoinereein. 41Nii jana, coroatajai enecurute, tutune jaa neeuruhane jana, leinjiin amanojoinihane jana, leeocha ratirinojoinereein.

42Nitohaneein: ‘Cuu tiaainte, turuha ureein canu Curuaanaa’, naain coitucuheneeichene jaun, tururichaaunine que nainaain ichaaoche. 43Charijieein teeinti, leinjiin cacha: ‘Cuu tiha janotiin janate turuha ureein cau asijiato’, naain coitucuhane que nainaane jaun, nii chuni rai loreri asae enohane jerelanaala caohatiin rai loreri beraihane jaun, nenere basijiaera. Nii rijijieein inara netonai jatoroaain neeuche. 44Aihane jaun, Cana Coaunera Calaohi cacha caje nejanoanaa nichaaunne turu cojoanonaa coitucuheneeichene jaun, inara netonai nainaain jatoroaain canu cohacuche.

Fatoroon ere tonoraain nenaa cacha aina, fatoroon ere tonoraelanaala nenaa cacha

(Lc 12.41-48)

45Cha teeinti letoaain ratiriha rai fatoroonne tonoraain, inae cuu tihane jana rai loreri asaae nenacaauru cachaauru coroaate, 46nii jataain raotojoeein neeine, nii letoaain ratirihane jaan ichajihane jana eruha nii rai fatoroonne. 47Nitohaneein rai fatoroon aitoonjoa tonoraain icharate, esinae rauhijiriin satiin rai niicha sirii beraichaneein tereein rai fatoroon. 48-49Nete laen: ‘Jaitijiecha carajareein rai fatoroon’, naain nii leeochaauru letonocuru faojoaain sonajaain, ajetoriaacuru aina netaojiaain lenoneein ajeein, naaonjoaan, 50cha cohatejelanaala nihane jana turuhane, nii nechu aansai letono casetecareein rai fatoroon, 51caseteco coaracuruha nechu cacha coritaa Cana Coaunera coitucuha nocoetonacaaurune rijijieein. Ecute catu rihoneein chanareein”, nae jetao aina nerelanacauru rai Jesoso.

Selectat acum:

Mateeocha Laenai 24: URA

Evidențiere

Partajează

Copiază