Locasiicha Laenai 8

Jesoso coroatajaneraauru enecuru

1Nitohaneein jetaote, itolereneein neseeuru naineein, nenaanajaauru naineein amuhemujueein Cana Coaunera cojoanonaa que ereerejeein amuhemuherejete Jesoso, lechoonca coroatajai rai afosotooru, 2chaaen coitucuchuhi caje, joaenreein cunai caje, naaonjoaihunri caje niicha rautaauri enecuru tabaauru que corihaneraain. Niichuru aina jetaote cuelu, nii caainsineein suujua cuhane coitucuchuhi sirihane jana nii Jesosohacha rautaai “Maadala bene”, naain niicha curuaateeuri Mariha, 3chaaen Erodesi amihaneeo beraichaneein nenaa Cosa comasai Joana, chaaen Sosana, naaonjoaihunri aina leeochaauru arajiin enecuru jetao, acaauruacha sirii que acaauru coroatajaneraneein cuure.

Temule jaera parabola que erenaa

(Mt 13.1-9; Mr 4.1-9)

4Nii jana jetaote, neseeuru caje cuhacoaain Jesoso coaraa cuuruha arajiin cachaaurune jaun, arajiin netaojiaauruhane jaun jetao acaauru rai: “Aonacuchene ena inara rai temule jaera parabola que erete coitucuhiche.

5Leinjiin cacha, ucuhe riaaca cuhane jaun jetaote, bero cuhane naluha nii niicha riajai nucuhene jaun shaaocure cachaauru. Chaaen tabaauru quihure tajaelinaacuru. 6Nii jana tabaauru ajeri choae nalunacaauru jetaote, omarohane sainejeein ohijiacoae. 7Tabaauru ojoa neeonjoain jana nalunacaauru jetaote, omarohane jana amurijiriin omaroha ajaenane jaun ohacoae. 8Jana tabaauru atane caohacha choae nalunacaauru jetaote, caohachaain omarohane jaun, le nucuhecuru caje le fashai ucuheneeinchuru nefae”, naain jetaote, acaauru rai tonijiaain: “Caa caitoonjoan coitucunaa jeriquichene aonacuche”, nae jetao Jesoso.

Temule jaera parabola que acaauru relaa Jesosone bajaauruhane

(Mt 13.10-17; Mr 4.10-12)

9Niritiin temule jaera que cachaauru relaa Jesosone jaun jetaote:

“Chatoanai quena nii temule jaera que cuaain cachaauru rai aitohi”, naain Jesoso caje bajaauruha aina nerelanacaaurune jaun jetaote:

10“Inaraacha quete rai Cojoanonaa coitucuerate Cana Coaunera. Nena laen, nii canu esenetana jeriheichuru cachaauru rai carijieein erenaa parabola que cuaain acaauru rai beeun, nabana coaracuruhane nihanatiin coitucuurenihane coina, niheichu aonacuruhane nihanatiin coitucuuruhane coataa.

Temule jaera parabola que cachaauru relaane biha Jesosone

(Mt 13.18-23; Mr 4.13-20)

11Nii temule ucuhe riaara que aitocoaaunne jaan erenaa parabolate, Cana Coaunera beratenojoi rijijieein ne.

12Jana nii bero cuhane nalunaa nucuhe que caitoonjoante, Cana Coaunera beratenojoi aonaain inae esenetaain neeuruhane jana, nabana nichoteeuruhane coataa acaauru coritaa uha moconajaerane jaun suujua elonaain nenacaauru cachaauru rijijie.

13Jana nii ajeri choae nalunaa nucuhe que caitoonjoante, Cana Coaunera beratenojoi aonaain, coroajeein esenetaain neeuruhane nihanatiin, carajaelanaala basiinjiincha esenetaaoriin, inae necairichanaa coaracuruhane que nererojoecaain jianeraauru rijijie.

14Jana nii ajaena jana nalunaa nucuhe que caitoonjoante, tonoraain aonacuruhane nihanatiin, jeraaen jianejeein cuaajeein, jataain niicha lateeicha que coacuhin, coriquiquiin raotojoeein neeururichaainne coacuhin, itolere bana niicha jereeicha ichajeein, jeriha Cana Coaunerane rijijieein cha chana jerelanaala nitajerai nenacaauru rijijie.

15Jana nii atane caohacha choae nalunacaauru nucuhe que caitoonjoante, nii jataain jereein aonaain, nii beratiha Cana Coaunerane rijijieein naitoonjoan ichajeein, itolere bana tonoraain laraajiin jianelanaala nenacaauru cachaauru rijijie”.

Cono que cacha relaa Jesosone

(Mr 4.21-25)

16“Nihei chuni cono mocohin bujuaihu tera. Niheichu arana asae tenaa nainihei, nabana nocohenaana turuuruha loreri asaae turunacaaurune coataa. Nitohaneein bujuaihu telanaalate ecuun te, conohanau loreri asaae enooruha turunacaaurune coina. 17Nii rijijieeintechu, ena caa inara relaanune jaan coitucuelanaala nenacaauru, rijieeoriin bana coitucuurureein.

18Aihane jaun, caohachaain aonacuche. Nii rijijieeintechu ena canuhacha tei raera jelai amuritoheriin rareein inae ecu tihane bana. Jana nii canuhacha tei latelanaala nenaate cha colane nedareein inae ecu tihane bana”, naain acaauru rai be Jesoso.

Rai neba aina Jesoso nejeraauru

(Mt 12.46-50; Mr 3.31-35)

19Niritiin cachaauru rai ereerejiha Jesosone jana jetaote, rene turuha uure neba aina rai nejeraauru. Ne jetaote, rohan turunaa nainecurene, jataain arajiin ecu turuuruha cachaaurune jaun. 20Nii jana ecu nenacaauru tabaauru jetaote:

“Taute aerene neeure ii nejeraauru, ii neba aina. Jataainte ii coaana jerecure”, naain Jesoso rai beeuruhane jana jetaote:

21“Aiha niqui. Nete Cana Coaunera beratenojoi esenetaain, rijijieein ichaohin, naintonjoa rijijieein ichara cachate, canu fojiara aina canu nejeraaurunera”, naain jetao tonoranajae Jesoso.

Fichafichanaa aina cujuana suruaa Jesosone

(Mt 8.23-27; Mr 4.35-41)

22Nii baiha jetaote: “Amaauchete caa nemuri jerau cunichaachera”, naain jetao, aina nerelanacauru aina leinjiin bote cuhane fauhin cuhin jetao, 23nemuri jera jaohajeeuruhane jana jetao, uhe cujuana tabai aina fichafichanaa. Nii jana, sinitoha Jesosone jana jetao, inae memoha acaune jaun, caaun nalunaa jere nii cuurunaja bote. 24Nii jaun jetaote nesoone caun:

“Cacha relaera, cacha relaera, inae nalurichaacheje”, naain Jesoso nocoaauruhane jaun jetao, nimichuhin cujuana aina fichafichanaa suruaa Jesosone jaun jetao, tonajelanaala cuujeeure.

25Nitohaneein cujuana aina fichafichanaa suruaain jetaote, nii aina nerelanacauru rai jetao:

“Chanuna cha esenetaeneeiche”, naa acaauru rai Jesosone jana jetao, nesoonetiin cojoelatiin jetao, “Chaneeina ne caa cacha, nere tonoraain nesuruha cujuana aina fichafichanaane coina”, naain jetao nejesinajeein ita caje bajaaure.

Jerasa batane que nenaa coitucuchuhi siricha

(Mt 8.28-34; Mr 5.1-20)

26Nirijieein cuujeein jetaote, tabiicha nemuri jera jaohin, najauriha cuure Calileea jeraniha nenaa Jerasa batane que.

27Inaen ecu turuhin najauriaain, atane choae iniha cuha Jesosone jana jetaote, nii nese caje cuhin que tacaa cue suujue cuhane coitucuchuhi siricha cacha. Nii cacha jetaote, nii chaabana cajione jiaain, niheichu loreri asae nihanatiin ichoaelanaala atane bana ichoaecha ichoae.

28Aca jetaote, Jesoso coaariin nacatiha auhaquiin semojoaain tacaain jetao:

“Coa caniha nenoaain carerojoecaara, acaihaniji nenaa Cana Coaunera Calaohi Jesoso”, nae jetao Jesoso rai, 29caje mituha, nii suujua cuhane neein asaaera coitucuchuhi coina aitoha Jesosone jaun.

Nitohanihane jaun jetaote, araai saain cadena que caohatiin biji aina tijia ichohacuruhane nihanatiin, rai molohin cacha nenajanihu amaauruha nii coitucuchuhicurune, ecu nii cacha areroo ne. 30Nitohaneein rai irihane jana jetaote:

“Tonaa ichurujuata”, naain caje curuaa bajaa Jesosone jana jetao:

“Lejion niha canu curuaara”, nae jetao nii cacha, jataain arajiin suujua cuhane neeuruha coitucuchuhicurune jaun. 31Nii arajiin suujua cuhane nenacaauru jetaote, usi jana acaauru letoaa Jesosone coataa jetao, 32-33ichatane ucuunno que arajiin lenoniha neeuruha coosichurune jaun jetao, nii coosichuru suujueniha enooruhane coina Jesoso caje bajaaure. Nii jaun jetaote, nii jereein caje bajaauruhane rijijieein jeriha Jesosone jaun jetao, nii cacha caje mituhacoaain nii coosichuru suujueniha enooruhane jaun jetao, nemuri cuhane nichorohin acauhanau naluhin ohacoaaure nii coosichuru.

34Nii coaraain jetaote, satiin jelai caje sorohin, nenaanajaauru, neseeuru, naaonjoaihunri naineein biha cuure nii coosi beraihurera cachaauru. 35Nitohaneein beeuruhane jaun, cuhin coaraa cuuruha cachaaurune jana jetaote, Jesoso tijia asae lauhaca coujuriu cacha neein necoreeteein nii suujua caje coitucuchuichuru mitunaja cachane jaun jetao, coaraain coasichure nii cachaauru.

36Nii jana, nii cacha caje mituuruha coitucuchuhicurune jana coaaraauru jetaote, esinae rauhijiriin nii nerautaane rijijieein beeure leeochaauru cachaauru rai.

37Nitohaneein coaraain jetaote, satiin nii Jerasa batane que nenacaauru cachaauru jetao, jelai caje amuha Jesosone jerecure, jataain coasichuruhane jaun.

Nii jaun jetaote, bote cuhane fauhin, jelai caje amuha Jesosone jana jetao, 38aina cunaa jere nii coitucuchuichuru mitunaja cacha. Ne jetaote, aina cuhane jerelanaala:

39“Jiaohine. Chajaaincha jelaiha chenenajaun cauhin, ii rautaain niha Cana Coaunerane beebejenihun”, nae jetao rai Jesoso.

Nii jaun jetaote, ecu nedaain, satiin nenaanajaauru naineein cuhecujueein jetao, rautaain niha Jesosone beebejeein amuhemujuen nii cacha.

Jairo cacunu. Chaaen leinjiin ene Jesoso cajione dadaera

(Mt 9.18-26; Mr 5.21-43)

40Nitohanihane baiha, jelaiha nemuri jerau cauha cuuruhane jana jetaote, jataain coroajeein Jesoso raaure, turuhane cohajeeuruhane jaun, satiin cachaaauru. 41Nii jana jetaote, turuha uhe leinjiin cacha sinacoca curuaanaa neein nenaa Jaironeein niicha curuaateeuri. Nii cacha jetaote, Jesoso tijia asae neseeoriaain jetao conujueein cotijiae, rai loreri asae turuha cuhane coina, 42jataain ohane rai niha leinjiin rai cacunu lechoonca coroata jaanacajine jaun.

Nii jaun cuha Jesosone jana jetaote, jataain arajiin sacuuruha cachaaurune jaun, sururucure cachaauru.

43Nii arajiin cunacaauru jana jetaote cue leinjiin ene lechoonca coroata jaanacaain nirijieein ichana jaohajeein cunaitein nenaa. Nii jetaote, jitariin niicha sirii coriqui jaohin necoicharate niqui. Nejetaote, rautasihurene nii chuni coichaeraauru.

44Nii ene jetaote, Jesoso caaijie cuhin, rohan nichuuntaain rai cajione auha dadae. Nii Jesoso cajione auha dadaane rijieeoritiin jetaote, inae nesurue rai ichana.

45Nitohaneein dadaane jana jetaote:

“Chatoon canu dadae”, naain bajaa Jesosone jana, satiin dadaauruhane suujueeuruhane jaun jetaote:

“Cacha relaera jataain araaicha cachane jaunte, ii sururucure jerane”, naa rai Fedorone jana jetaote:

46“Aihei bajiaa. Chunucohate jerihane canu dadae. Cacaje mituha cacha rautacaaunne jaan cajene coitucuunra”, naain jetao bajae Jesoso.

47Niritoha Jesosone jaun, nesuujuenaa nainenihane jaun jetaote, rijijijianeein Jesoso acatiha neseeorihaain: “Naaonjoaain cunaitichaaunne jaunne, nii caje nerautasinihanune jaun, ii dadaaunra. Nii ii dadaanune rijieeoritiin inae nerautaaun canu cunai cajera”, naain satiin aonajera urichoo jitariin biha nii enene jana jetaote:

48“Aihachuhisi. Jataain ii rautaanune esenetaaine jaunte, ii cunai caje nerautaaicha ene. Chajaain chaque tonajelanaala chenenajaun caunihura”, nae jetao rai Jesoso.

49Nitohaneein jaiti ereerejiha Jesosone jana jetaote, turuhin jetao:

“Coa nenacaeneein nii cacha relaera reroecaa. Inae oha ii cacunura”, naain jetao biha uhe letoaauruhane jaun leinjiin cacha, nii sinacoca curuaanaa Jairo rai.

50Niritoha nii cachane aonajeein jetaote:

“Coa tonajiha. Raujiaaincha quesenetaaute nacoaauneein ichanamiin oo caje ii cacunura”, nae jetao Jairo rai Jesoso.

51Niritiin cuhin jetaote, nii Jairo loreri asaae turuhin, Fedoro, Saantiaao, Joaan, chaaen, nii ene fojiaraauru, naaonjoaihunricha enoae jiniichaain nii loreri asae. 52Nitohaneein inae loreri asae enooruhane jana jetaote, jataain satiin coinaderaain nii ene coisichuruha nii loreri asaae nenacaaurune jaun:

“Coa chanaache. Coatiha ohane jaun aihei caa ranuna. Sinihane jaunte aicha”, naa acaauru rai Jesosone jana jetaote, 53satiin esenetaelanaala coenacure nii ecu neein coarajeeurera cachaauru, esinae rauhijiriin oha nii ranunane coaracuruhane jaun.

54Nii jana jetaote, biji que nii ranuna onaa mucuhin tonijiaain jetao: “Ranuna, chajaain nimichuura”, naa Jesosone rijieeoritiin nimichuhin jetao, 55nacoaauneein raurononeein oo caje ichanae nii ranuna. Nitohaneein ichateein jetaote, coroaateeuruhane coina aite Jesoso. 56Nii jaun jetaote, jataain cojoelatooruha rai fojiaraaurune jana jetao: “Jiaonriha caa catohaneein ichateein nihanune beeiche chuni rainera”, naain jetao suujuatenajae Jesoso.

Selectat acum:

Locasiicha Laenai 8: URA

Evidențiere

Partajează

Copiază