Joni 4

O Jisu kei na Yalewa ni Samaria

1Era sa rogoca na Farisi na nona sa rawai ira ka papitaisotaki ira tiko e lewe vuqa cake na tisaipeli o Jisu mai vei Joni. 2(Ia sa sega ni veipapitaisotaki o Jisu, o iratou ga na nona tisaipeli.) 3Ni sa rogoca oqo o Jisu, sa qai biuti Jutia ka lesu tale ki Kalili; 4ka sa tiki ni nona gaunisala na loma ni vanua o Samaria.

5Sa mani yaco sara o Jisu ki na dua na koro kei Samaria, ka yacana o Saika; e voleka ki na tiki ni vanua ka a solia o Jekope vei Iosefo na luvena.#Vteki 33.19; Josua 24.32 6E tiko kina na i keliwai i Jekope. Ia ni sa oca ena taubale o Jisu, sa qai la'ki dabe toka ena bati ni keliwai ni rauta na tinikarua na kaloko ena siga levu tutu.

7Sa qai lako yani ki kea e dua na yalewa ni Samaria me la'ki taki wai, ka sa kaya vua o Jisu, “Au kerea mada me'u gunu.” 8(E ratou sa lako tu na nona tisaipeli me la'ki voli kakana ki na koro ena gauna o ya.)

9Sa qai kaya vua na yalewa ni Samaria, “E rawa vakacava vei iko, ni o kai Jutia, mo kere wai vei au, ni'u yalewa ni Samaria?” (Ni sa sega ni rawa vei ira na Jiu me ra vakayagataka vata na bilo kei na i takitaki era sa vakayagataka na kai Samaria.)#4.9 Ni sa sega ni rawa vei ira na Jiu… na kai Samaria; se Ni ra sa sega ni veiriti o ira na Jiu kei ira na kai Samaria. #Esera 4.1-5; Nie 4.1-2

10Sa qai sauma o Jisu ka kaya vua, “Kevaka walega o sa kila na i solisoli ni Kalou kei koya sa kere gunu tiko oqo vei iko, ke o sa kerekere vua, ena solia vei iko o koya na wai ni bula.”

11Sa qai kaya vua na yalewa, “E sega saka tu na nomuni i takitaki, ka sa titobu na i keliwai, o ni na kauta mai vei na wai ni bula? 12O ni sa uasivi cake beka vei Jekope na tama i keimami, ka a solia vei keimami na toevu, ka a gunu kina o koya, kei iratou na luvena, kei na nona manumanu?”

13Sa qai sauma o Jisu ka kaya vua, “O koya ena gunu ena wai oqo ena viagunu tale; 14ia o koya ena gunu ena wai au na solia vua ena sega ni viagunu ka tawamudu; ia na wai au na solia vua ena yaco me wai vure ena lomana ka tovure yani ki na bula tawamudu.”

15Sa qai kaya vua na yalewa, “Ni solia saka mai vei au na wai oqori, me'u kakua kina ni viagunu tale, se lako tale mai ki ke me'u taki.”

16Sa qai kaya vua o Jisu, “La'ki kaciva mada mai na watimu mo drau lako mai ki ke.”

17A sauma na yalewa ka kaya, “E sega na watiqu.”

Sa qai kaya vua o Jisu, “O sa kaya dina, ‘E sega na watiqu,’ 18ni o sa vakawati oti kei na lima na tagane, ka sega ni watimu dina o koya o drau tiko vata oqo. Sa dina sara na nomu vosa ena vuku ni ka oqo.”

19Sa qai kaya vua na yalewa, “Au sa raica rawa saka ni oi kemuni e dua na parofita. 20Era dau lotu na neimami qase ena ulunivanua oqo, ia o ni kaya ni tikoga mai Jerusalemi na tikina e dodonu me da lotu kina.”

21Sa qai kaya vua o Jisu, “Yalewa, vakabauti au, sa roro tiko mai na gauna o ni na sega ni lotu kina vua na Tamada ena ulunivanua oqo se mai Jerusalemi. 22O ni sa lotu tiko vei koya o ni sega ni kila; keimami sa lotu vei koya keimami sa kila; ka ni na lako mai vei ira na kai Jutia na veivakabulai. 23Ia ena yaco mai na gauna, ka sai koya sara ga oqo, ni ra na lotu vakayalo ka vakaidina vei Tamada o ira era sa lotu dina, ni sa qara o Tamada me ra vakaoqo o ira era lotu vua. 24A yalo na Kalou, o ira era lotu vua e dodonu me ra lotu vakayalo ka vakaidina.”

25Sa qai kaya vua na yalewa o ya, “Au sa kila ni na lako mai ena dua na gauna na Mesaia; ia ena gauna sa yaco mai kina, ena mai tukuna vei keda na veika kecega.”

26Sa qai kaya vua o Jisu, “Oi au ga ka'u vosa tiko oqo vei iko, na Mesaia.”

27Ena gauna sara ga o ya, e ratou sa yaco mai kina na nona tisaipeli, ka ratou kurabui ni veivosaki tiko o koya kei na dua na yalewa; ia sa sega ga ni dua me taroga, “Na cava o vinakata?” se “A cava o ni vosa tiko kina vua?”

28Sa qai biuta tu na nona saqa ni wai na yalewa ka lesu tale ki na koro, ka sa kaya vei ira na tamata mai kea, 29“Lako mai ka raica mada na tamata ka tukuna vei au na veika kecega au dau cakava tu. E rawa beka ni o koya oqo na Mesaia?” 30Era sa qai biuta na koro ka lako vei Jisu.

31Ia ni ra se bera yani, e ratou sa qai cikevi Jisu na tisaipeli, ka kaya, “Vakavuvuli, mo ni kana mada!”

32Sa qai kaya vei iratou o koya, “Sa tu vei au na kakana me'u kania, ia dou sa sega ni kila.”

33E ratou sa qai veitarogi kina na tisaipeli ka kaya, “E dua beka na tamata sa rairai kau kakana mai vua?”

34Sa qai kaya vei iratou o Jisu, “Na kequ kakana sai koya me'u cakava na loma i koya sa talai au mai, ka vakaotia na nona cakacaka. 35E sega li ni o ni dau kaya, ‘Sa vo ga e va na vula me qai yaco mai na gauna ni tatamusuki.’ Raica, au sa kaya vei kemudou, dou tacake ka rai yani ki na i teitei ka ra tu oqori; era sa matua mai ka ra sa waraka tu me ra tamusuki. 36O koya sa tatamusuki sa saumi sara tiko ka sa kumuna tiko na vuata ki na bula tawamudu; me rau marau vata kina na daukabukaburaki kei koya na dautatamusuki. 37Sa dina kina na vosa o ya, ‘E dua sa kaburaka, ka dua tani a qai tamusuka.’ 38Au a talai kemudou mo dou tamusuka na ka dou a sega ni cakacakataka; era a cakacaka kina eso tani, ia dou sa mai tauca na vua ni nodra cakacaka.”

39Era sa vakabauti Jisu e lewe vuqa na kai Samaria ena koro o ya baleta na vosa i koya na yalewa o ya, ni sa kaya vakaoqo: “A sa tukuna vei au o koya na ka kecega au sa cakava.” 40Era sa lako mai kina na kai Samaria ki vua, ka cikevi koya me tiko vata mada kei ira; ka sa mani tiko kina o koya ka siga rua.

41Era a lewe vuqa sara tale era a qai vakabauta ena vuku ni vosa i Jisu; 42ka ra a kaya vua na yalewa, “Oqo keimami sa vakabauta, e sega ni baleta na nomu vosa, ia baleta ga ni keimami sa qai rogoci koya sara oi keimami, ka kila ni sai koya oqo na i Vakabula kei vuravura.”

Sa Vakabula o Jisu e Dua na Gone Tagane

43Ia ni sa oti e rua na siga, sa qai lako sara ki Kalili o Jisu. 44A sa tukuna oti o koya, “Sa sega ni dau dokai na parofita ena nona vanua.”#Maciu 13.57; Mari 6.4; Luke 4.24 45Ia ni sa yaco ki Kalili, era sa marautaki koya na tamata, baleta ni ra a raica na veika kece ka a cakava o koya mai Jerusalemi ena gauna ni Solevu ni Lakosivia; ka ni ra a lako talega ki na solevu o ira oqo.#Joni 2.23

46Sa qai lako tale o Jisu ki Kena mai Kalili, na koro ka a vukica kina na wai me waini. A tiko kina e dua na i vakailesilesi ni matanitu ka sa tauvimate tiko na luvena tagane mai Kapenaumi.#Joni 2.1-11 47Ni sa rogoca o koya ni sa lako tani mai Jutia ki Kalili o Jisu, sa qai lako vua, ka kerea me lako sobu mada me la'ki vakabula na luvena, ni sa voleka ni mate. 48Sa qai kaya vua o Jisu, “Ena sega ni dua vei kemuni ena vakabauta rawa ka vakavo duadua ga kevaka sa sarava e matana na cakacaka mana kei na ka veivakurabuitaki.”

49Sa qai kaya vua na i vakailesilesi, “Me daru mai lako sobu saka, ni bera ni mate na luvequ.”

50Sa qai kaya vua o Jisu, “Lako ga, sa bula na luvemu!”

A sa vakabauta na vosa i Jisu na tamata o ya ka sa lako yani. 51Ni sa lako tiko ki na nona vale, e ratou sa mai tavaki koya na nona tamata ka kaya vua, “Sa bula cake mai o luvemu!”

52Sa qai vakataroga vei iratou o koya se gauna cava sa tekivu me bula cake kina na gone. E ratou a qai kaya vua, “Sa takali vua na katakata ena dua na kaloko ena yakavi ena noa.” 53A sa qai nanuma sara o tama ni gone ni sa gauna vata o ya ka a tukuna kina vua o Jisu, “Sa bula na luvemu.” Sa mani vakabauta kina o koya kei ira kece na nona lewe ni vuvale.

54Sa i koya oqo na i karua ni cakacaka mana sa cakava o Jisu ni sa lesu ki Kalili ena nona a tiko mai Jutia.

Selectat acum:

Joni 4: FNVDC12

Evidențiere

Partajează

Copiază