Matey 16

Tej t-xi kyqanin aj il jun techil tipin Jesús

(Mr. 8:11-13; Lc. 12:54-56)

1Juntl majl, i bꞌaj pon chmet Parisey kaꞌyil tiꞌj Jesús junx kyukꞌa junjun Sadusey. Noq tuꞌn tkubꞌ tzꞌaq kyuꞌn toj til, xi kyqanin te, tuꞌn tkubꞌ tbꞌinchin jun tbꞌanil techil tipin twutz kyaꞌj, tuꞌn tyekꞌin qa te Dios tzajnin.#Mt. 12:38; Lc. 11:16.

2Me xi ttzaqꞌwin Jesús kye: ¿Tzeꞌntzin tten n-el kynikyꞌa tiꞌjjo qꞌij? Quꞌn qa manyor chikyꞌx twutz kyaꞌj qale, nkyqꞌmaꞌn qa tbꞌanilx qꞌij nchiꞌj. 3Ex qa qlixje, nya wen k-elixe qꞌij jaꞌlin, chi chijiꞌy, quꞌn manyor chikyꞌx twutz kyaꞌj, ex manyor qꞌaq mujilx. Qa n-el kynikyꞌa tiꞌjjo techil te twutz kyaꞌj, ¿Tzeꞌntzin tten mi n-el kynikyꞌtza tiꞌjjo tzeꞌntzin t-xilin techiljo tqꞌijil jaꞌlin? 4Ayeꞌ xjal tzaluꞌn manyor aj ilqex ex aj pajilqe. Nkyqanin tuꞌn tkubꞌ nbꞌinchiꞌn jun tbꞌanil techil wipiꞌn kywutz, me mixla kbꞌantil; oꞌkxjo tzeꞌn bꞌaj tiꞌj qtzan Jonás ojtxe.#Jon. 3:4-5; Mt. 12:39-41; Lc. 11:29-30. Ex bꞌeꞌx i kyij ttzaqpiꞌn antza.

Ajo kyxnaqꞌtzbꞌil Parisey ex Sadusey

(Mr. 8:14-21)

5Tej qjlajinxa tjlajxi nijabꞌ, bꞌeꞌx el naj toj qkꞌuꞌja tuꞌn t-xi qiꞌn qwaꞌy. 6Tzaj tqꞌmaꞌn Jesús qeꞌy: Bꞌaꞌnqexa. Kykaꞌyink kyibꞌa noq cheꞌxa tiꞌjjo ttxꞌamsbꞌil kywa Parisey ex Sadusey.#Lc. 12:1.

7Me bꞌeꞌx o bꞌaj jaw yolin awoꞌy t-xnaqꞌtzbꞌin qxolxa, ex qqꞌmaꞌy: Ma tzaj tqꞌmaꞌn qe, tuꞌn tok qkaꞌyin qibꞌ, bꞌalaqa tuꞌn mi saj qiꞌn qwa; yaj qa saj kyqꞌoꞌnku Parisey qwa, exsin qa tiꞌku xi kyqꞌoꞌn toj.

8Ex bꞌeꞌx el tnikyꞌ Jesús teꞌ qbꞌisa, ex tzaj tqꞌmaꞌn qeꞌy: ¿Tiquꞌn nkubꞌ kybꞌisiꞌn qa ntiꞌ kywaꞌy qꞌiꞌn? Ntiꞌxla chꞌin kyeꞌ tqꞌuqbꞌil kykꞌuꞌj wiꞌja. 9Naꞌmxsin tel kynikyꞌa te. ¿Ma mitzin naꞌn kyuꞌn kyiꞌj jweꞌ wabꞌj, ayej i kubꞌ nsipiꞌn kyxoljo jweꞌ mil xjal? ¿Jteꞌn chiꞌl jaw chmet, tej kybꞌaj waꞌnxjal?#Mt. 14:17-21. 10Ex ¿Ma mitzin naꞌn kyuꞌn kyiꞌjjo wuq wabꞌj, ayej i kubꞌ nsipiꞌn kyxoljo kyaje mil xjal? ¿Jteꞌxsin chiꞌljo jaw chmet, tej kybꞌaj waꞌnxjal?#Mt. 15:32-38. 11¿Yajtzin qetz, ma nlan qo waꞌntz wuꞌn qkyaqilx? Qalaꞌ nya tiꞌjjo wabꞌj te twutz txꞌotxꞌ nchin yoline weꞌ, tej xi nqꞌmaꞌn: Kykaꞌyink kyibꞌa tiꞌjjo ttxꞌamsbꞌil kywa Parisey ex Sadusey.

12Tzmaxitzin el qnikyꞌjiꞌy tiꞌj, qa mi nyolintaq Jesús tiꞌjjo juntl txꞌamsbꞌil wabꞌj, qalaꞌ tiꞌjjo kyxnaqꞌtzbꞌil Parisey exqetziꞌn Sadusey.

Tej t-xi tqꞌmaꞌn Pegr qa Kolil te Jesús

(Mr. 8:27-30; Lc. 9:18-21)

13Atzaj teꞌ qkaniꞌn toj txꞌotxꞌ te Cesarea te Filipo, tzaj tqanin Jesús qeꞌy: ¿Ankyeqiꞌn, a Tkꞌwal Ichin, toj kywutzjo xjal?

14Xi qtzaqꞌwiꞌn: At junjun nqꞌmante qa ajiy qtzan Juan, a Jawsil Aꞌ, ma jaw anqꞌintl, ex junjuntl nqꞌmante qa ajiy Elías, moj qa ajiy Jeremías, mo juntl yolil Tyol Dios.#Mt. 14:2; Mr. 6:14-15; Lc. 9:7-8.

15¿Yajtzin kye toj kywutz? ¿Ankyeqiꞌn? chi Jesús.

16Xi ttzaqꞌwin Pegr: Atejiy Crist, a Tkꞌwaljo Dios itzꞌ te jun majx, a skꞌoꞌnxix tuꞌn, tuꞌn tul tzaluꞌn twutz txꞌotxꞌ.#Jn. 6:68-69.

17Xi ttzaqꞌwin Jesús: Kyꞌiwlinxix te, ay Simun, a tkꞌwal Jonás; quꞌn mix aꞌl jun xjal saj qꞌmante tey, qalaꞌ a nMaꞌn, a at toj kyaꞌj. 18Ex kxel nqꞌmaꞌn tey, qa a tbꞌiy Pegr, a abꞌj tzꞌelpine. Ex tibꞌajjo abꞌj lo kjawile nbꞌinchiꞌn Ntanima. Ex nlayx kubꞌ tiꞌj tuꞌn tkyaqil tipin kyimin. 19Ex kxel woqxeninjiꞌy Nxnaqtzbꞌila tey nyakutlaj jun tal tal tjpel ja, tuꞌntzintla noq tiꞌj ktqꞌmaꞌbꞌila, tzꞌele kynikyꞌxjal tiꞌjjo Tbꞌanil Tqanil Tkawbꞌil Dios. Ex qa ma kotpitjo xjal tuꞌn toj kyil, noq tuꞌn ktqꞌmaꞌbꞌila tzaluꞌn twutz txꞌotxꞌ, ex aj kyok toj paꞌbꞌin twutz Dios toj kyaꞌj, kchi kotpajil te jun majx. Ex qa mi xi kynimin a ktqꞌmaꞌbꞌila, ma chi kꞌlet tuꞌn kyil tzaluꞌn twutz txꞌotxꞌ, ex aj kyok toj paꞌbꞌin twutz Dios toj kyaꞌj, chi xel toj najin te jun majx.#Mt. 18:18; Jn. 20:23.

20Ex xi toqxenin Jesús qeꞌy, a awoꞌy t-xnaqꞌtzbꞌin, tuꞌn mi qo ok teꞌn qꞌmalte kye jniꞌ xjal, qa ataq Jesúsjo Crist, a Kolil, quꞌn naꞌmxtaq tul tqꞌijil.

Tej tyolin Jesús tiꞌj tkyimlin

(Mr. 8:31—9:1; Lc. 9:22-27)

21Axsa, oke ten Jesús xnaqꞌtzil qeꞌy, a awoꞌy t-xnaqꞌtzbꞌin, qa iltaq tiꞌj tuꞌn t-xiꞌ toj Jerusalén, ex iltaq tiꞌj tuꞌn tikyꞌx tuꞌn antza kyuꞌn kynejil xjal ex kyuꞌn kynejil pale junx kyukꞌa xnaqꞌtzil tiꞌj ojtxe kawbꞌil. Ex tzaj tqꞌmaꞌn qeꞌy, qa iltaq tiꞌj tuꞌn tkubꞌ bꞌyoꞌn kyuꞌn. Me toj toxin qꞌij, bꞌeꞌxtaq tuꞌn tjatz anqꞌin juntl majl.

22Me bꞌeꞌx ex telsin Pegr tjunalx, ex ok tentz qꞌol tumil te Jesús: WAjaw, nlay taqꞌ te Diosjo ikyjo. Nlay bꞌajte ikyjo tiꞌjach.

23Me bꞌeꞌx ajtz meltzꞌaj Jesús tiꞌj Pegr, ex xi tqꞌmaꞌn te: ¡Pegr! Ayetziꞌn tyola ikyjo, tyol tajaw il, quꞌn a taj tajaw iljo tuꞌn tbꞌantjo kyaj xjal, ex nya a taj Dios. ¡Laqꞌemila nkꞌatza, tajaw il! Quꞌn ma tzꞌoka te jun tolsbꞌil, tuꞌn nkubꞌ tzꞌaqach.

24Tbꞌajlinxiꞌ ikyjo, tzaj tqꞌmaꞌn Jesús qeꞌy, a awoꞌy t-xnaqꞌtzbꞌin: Ankye jun taj tuꞌn tok te nxnaqꞌtzbꞌiꞌn, il tiꞌj tuꞌn tel tiꞌn toj tkꞌuꞌj tkyaqil tajbꞌil, ex tuꞌn t-xi tqꞌoꞌn tibꞌ, tuꞌn t-xi lipe wiꞌja toj tkyaqil, exla qa ma kyim twutz cruz.#Mt. 10:38; Lc. 14:27. 25Ikytziꞌn, ankyeꞌ taj noq tuꞌn tkubꞌ tbꞌinchin tajbꞌil tzaluꞌn twutz txꞌotxꞌ, kxeꞌl toj najin te jun majx. Ex ankyeꞌ kꞌwel ttzyuꞌn tibꞌ tiꞌj tkyaqiljo at tajbꞌin kyexjal tzaluꞌn twutz txꞌotxꞌ, noq tuꞌn npaja, ktenbꞌil tchwinqil te jun majx.#Mt. 10:39; Lc. 17:33; Jn. 12:25. 26Quꞌn ¿tiꞌxsila tajbꞌin tuꞌn tkanbꞌit tkyaqiljo ajbꞌil tzaluꞌn twutz txꞌotxꞌ, exsin tuꞌn tnaj tanmin? ¿Ma akutzin tzꞌok tkyaqil tqꞌinimil te klol tanmin? 27Quꞌn tzul kanin jun qꞌij tuꞌn wula, ayiꞌn Tkꞌwal Ichin, tukꞌa tkyaqil tqoptzꞌajiyil nMaꞌn ex kyukꞌa jniꞌ angel. Ex kxel nqꞌoꞌn chojbꞌil teyile junjun, tzeꞌnkuxjo ntqanin kybꞌinchbꞌin.#Sal. 62:12; Mt. 25:31-46; Ro. 2:6; 14:10; 2Co. 5:10; Tchi. 2:23. 28Twutzxix kxel nqꞌmaꞌn kyeꞌy, at junjun iteꞌ tzaluꞌn wukꞌiy, mi kyli kyimin, tzmaxiꞌ aj kylonte aj wula, a ayiꞌn Tkꞌwal Ichin, kawil tibꞌaj tkyaqil.

Selectat acum:

Matey 16: mamC

Evidențiere

Partajează

Copiază