Luke 6

Yinka Dune Yeꞌ, natsꞌulyis dzin, huMoodihti unli whe ꞌuntꞌoh

1ꞋEt whulh nat dune nalyis dzin. ꞋUdechoo-un hukwꞌelhꞌaz, whe Jesus ꞌinkꞌez higha hodulꞌehne bulh tlꞌo kꞌut ꞌoh whuya hidulh whe, tlꞌo maiꞌ huhoonuyin. ꞋInkꞌez dula kꞌet hinulhguk ꞌinkꞌez huyaꞌalh. 2ꞋEt whulohne Phariseene hubuhútni, “Dahtꞌen whe ꞌahtꞌen? ꞋAndit dzin natsꞌulyis dzin ꞌuhoontꞌoh! ꞋAw nduhóotꞌen huba lheꞌhootꞌoh!”

3Jesus ubúlhni, “Lerwe David daja-un ꞌaw lawk hukwꞌu yalhuzulhduk. ꞋOh daꞌ David ꞌinkꞌez yulh ꞌutꞌenne buye ꞌíltsꞌul, 4Yakꞌusda ooyoh daninya. Lhes ꞌi Yakꞌusda oogha yutꞌaih-i, lhes lubretne za huyooꞌalh hubaꞌ hoontꞌoh. ꞋInkꞌez ꞌi yilhchoot ꞌinkꞌez yanꞌal. ꞋInkꞌez dulh ꞌutꞌenne, cha yuloh bugha nínꞌai.” 5ꞋInkꞌez Jesus ꞌubulhni, “Yinka Dune Yeꞌ, ꞌen natsꞌulyis dzin, ꞌet cha huMoodihti unli whe ꞌuntꞌoh.”

Natsꞌulyis dzin ꞌet Jesus Christ dune oola únduda-un soo náꞌyinla

6ꞋEt hukwꞌelhꞌaz ꞌon ꞌat natsꞌulyis dzin Lizwif lugliz daninya ꞌinkꞌez whubodulhꞌeh. ꞋIlhoghun dune ꞌen cha ꞌet usda. Oola nailhni tsꞌe ꞌaw yé nulheꞌustꞌen. 7ꞋInka Moses be ꞌudustlꞌus ꞌukꞌu nunáguzne ꞌinkꞌez Phariseene cha soo cho highunli daooneh suba. Dune nalyis-un dzin ꞌet tilah soo naꞌyooleh. ꞋEt whe hoonliyaz highu nahootáꞌalh hukwaꞌ hutꞌen. 8ꞋEt hoontsꞌi daja huninzun tꞌeooninzun. ꞋInkꞌez dune oola yunulheꞌustꞌen-un ꞌuyulhni, “Dudinyaih ꞌinkꞌez njan sinyin.” ꞋInka dudinya ꞌinkꞌez buniz neninya.

9ꞋInkꞌez Jesus ꞌubulhni, “ꞋIlhoghun hukwa nohoodutaskut. Natsꞌulyis-un dzin, ntsꞌenꞌa netlꞌa hóoltsꞌut, ꞌet tsꞌihꞌun unꞌa ꞌuztinelh, kꞌus hoontsiꞌ kꞌunꞌa ꞌuztinelh? Dune ye khuna-i uztilhyih kꞌus daztilhtsa?”

10ꞋInkꞌez tsꞌiyawh ꞌubunilhꞌen. ꞋEt dune ꞌuyulhni, “Nla lhtsꞌeh díntsih!” ꞋEt ndúja ꞌinkꞌez oola kwꞌuz tsꞌe dalhitꞌoh, whuz unꞌa ndunája. 11ꞋEt ꞌonghohne tube howunílchꞌe, ꞌinkꞌez howu yahalhduk Jesus dahítileh-un ꞌet huwun.

Whunizyane ꞌon ꞌat nane whelꞌaꞌne, Jesus ꞌutahábanla

12ꞋOh daꞌ ꞌet dzin, Jesus shus kꞌut tenadutidli ha whuz whinya. ꞋUlhdzis nduwhulyiz Yakꞌusda tsꞌun tenadidli. 13ꞋEt yulhkai-un higha hodulꞌehne, ꞌanih ꞌubulhni. ꞋEt butoh whunizyane ꞌon ꞌat nane ꞌutahábanla. ꞋEnne whelꞌaꞌne bubooziꞌ súlhtsi. 14Simon, ooziꞌ Peter cha yugha ídinꞌai. ꞋInkꞌez bulhutsin Andrew, James ꞌinkꞌez John, Philip ꞌinkꞌez Bartholomew. 15Matthew ꞌinkꞌez Thomas. James Alphaeus ooyeꞌ, ꞌinkꞌez Simon ꞌen huwu daóoditꞌoh-un huyulhni. 16Judas James ooyeꞌ, ꞌinkꞌez Judas Iscariot, ꞌen ꞌutja buchꞌaz nedinja.

Lhane undudane ꞌinkꞌez ntsiꞌ-i nududeh-i be dzoh nudehne, Jesus soo náꞌbalhꞌen

17ꞋEt whududlun-un ndus de yugha hodulꞌehne bubulh hainya ꞌinkꞌez lhtsꞌe oodizꞌa-un nehunindil. Yun kꞌut Judea whutꞌenne, Jerusalem whutꞌenne cha, ꞌinkꞌez yatoo ba keyoh Tyre ꞌinkꞌez Sidon whutꞌenne cha huldlai. Hiyootuzálhtsꞌilh ꞌinkꞌez soo naꞌbutilhꞌelh hukwa ꞌilhuhozdil. 18ꞋInkꞌez mbene la ntsiꞌ-i nududeh-i be dzoh nudehne cha ꞌet hudilhtsꞌi, ꞌinkꞌez soo naꞌbalhꞌen. 19Tsꞌiyanne hitꞌa oonalh hukwaꞌ hutꞌen. Ye ulhtus-i ootsꞌu ha idiltsꞌut, ꞌi be tsꞌiyawh budadaꞌ soo naꞌbinla.

Jesus ꞌubulhni, “ꞋUkꞌenus hoonzoo-un nohbulh ꞌuhooja”

20Jesus ꞌet yugha hodulꞌehne, butunuyúꞌen whe njan dúbulhni,

“Nohni telꞌenne Yakꞌusda whe lerwe unli, ꞌet nohni nohchꞌeꞌ ꞌuhoontꞌoh.

ꞋEt huwa ꞌukꞌenus hoonzoo-un nohgha whultsꞌut.

21Nohni ooyeꞌúltsꞌilhne, untihdai ꞌukꞌenus hoonzoo-un nohgha whultsꞌut.

Mbene la ꞌandit utsone tihdloh ꞌet huwa dawhuldzooꞌ-un nohgha whultsꞌut.

22Dune nohtsꞌo dutitni ꞌinkꞌez ꞌaw bubulh óohtꞌeꞌ ꞌaitꞌoh nohohulhtsi.

ꞋInkꞌez nohchꞌaz yahutilhduk whe Yinka Dune Yeꞌ,

ꞌen gha nohooziꞌ dutsun hitilhtselh ꞌinkꞌez ꞌun hitilhdulh.

ꞋEt whuz unꞌa ndunóhuhulhꞌen de, ꞌukꞌenus hoonzoo-un nohgha whultsꞌut.

23ꞋEt dzin hootahtꞌiꞌ ꞌinkꞌez hoonahtꞌeꞌ kꞌet do tóolhuk. ꞋAlha ꞌuhoontꞌoh yakꞌuz hooncha whe nohba ꞌukꞌelha whutaleh. Whuz unꞌa za ndunohotilhꞌelh, nduntꞌohne butsodaꞌne cha nus hooꞌen, whuz unꞌa za ndubuhalhꞌen ꞌet huwa.”

Whulohne ꞌukꞌenus hoontsiꞌ-un bugha whútalhtsꞌulh

24“ꞋEt hoontsꞌi nohni hoonzooꞌ ꞌuntꞌohne soo cho howahli!

Be hoonahtꞌiꞌ-i

be ꞌudaꞌ tsꞌiyawh nohba ꞌukꞌelha whuzdliꞌ.

25Nohni soo ꞌaꞌalhne,

nohni cha soo cho howahli!

Nohyéꞌtiltsꞌulh! Mbene la udlóhne howahli!

Nohdzi dúntidaꞌ ꞌinkꞌez tihtso!

26ꞋEt huwahli mbene la sóo nohghu yalhdukne.

ꞋOh daꞌ nus hooꞌenne naꞌdudilꞌine cha

butsodaꞌne ndúbuhutni.”

Nohchꞌaz ditnine bukꞌehtsiꞌ

27“ꞋEt hoontsꞌi nohdusni, nohchꞌaz ditnine bukꞌehsiꞌ. Mbene la nohtsꞌu dutnine sóo neꞌbulhꞌen. 28Mbene la nohkꞌehuyihne, Yakꞌusda butsꞌun óozooꞌ ha buba tenadoohdli. Mbene la dzoh neꞌnohulhꞌenne cha buba tenadoohdli. 29Mbene la nohnimbus kꞌut nohnizkukne, buba ꞌawh nandunahtꞌah ꞌinkꞌez ookwꞌuz tsꞌe cha ꞌunohuhooleh. Mbe la ndzoot nghu halchooz-un, ndzooztꞌan cha oochꞌa yóntun junih. 30Tsꞌiyanne hoonli nohtsꞌu ka ꞌutni de, bugha íyohlelh. Nohchꞌeꞌ ꞌuyoonne yílhchoot de, butsꞌo ookwanaꞌ doohtniꞌ junih. 31Ntsꞌenꞌa hukwaꞌ nahzun dune danohotilhꞌelh-un, whuz unꞌa za nohni cha néꞌboolhꞌen.

32Mbene la nohkꞌensiꞌne, ꞌenne za bukꞌehsiꞌ de, whuz unꞌa hoonzoo nahzun eh? ꞋAwundooh! Lubeshi ꞌulhꞌenne hoontsꞌi bukꞌensiꞌne bukꞌehinsiꞌ. 33Mbene la soo neꞌnohulhꞌenne za soo neꞌbulhꞌen de, whuz unꞌa hoonzoo nahzun eh? ꞋAwundooh! ꞋEt lubeshi ꞌulhꞌenne cha whuz unꞌa nduhútꞌen. 34ꞋEt mbene la nohtlꞌa nátiꞌalh nahzun de, ꞌenne za bughe zulhꞌai, whuz unꞌa hoonzoo nahzun eh? ꞋAwundooh! Lubeshi ꞌulhꞌenne hoontsꞌi lubeshi ꞌulhꞌenne gheꞌ hulhꞌai ꞌinkꞌez ꞌet ꞌultsuk za butlꞌa náhaꞌaih. 35ꞋEt hoontsꞌi nohchꞌaz ditnine bukꞌeoohsiꞌ, ꞌinkꞌez soo neꞌboolhꞌen. Bughe ꞌoolhlaꞌ ꞌinkꞌez hoonli nohtlꞌunátiltsꞌulh hukwa tse hólhleꞌ junih. ꞋInkꞌez hooncha whe nohba kꞌelha whutaleh. ꞋEt mbe la yakꞌuz soo ꞌudedo ꞌuntꞌoh-un, ꞌen ooyeꞌke tihleh. ꞋAlhaꞌ mbene la musi lhdusnine ꞌinkꞌez ntsiꞌne cha, tsꞌiyawh butsꞌun unzoo. 36ꞋInka nohBá ntsꞌenꞌa la teꞌninzun, nohni cha whuz unꞌa za teꞌnoohzin.”

ꞋUyoonne ba nahoohyeh junih

37“ꞋUyoonne ba nahoohyeh junih, ꞌet de ꞌaw nohba nahoodeh ꞌaitꞌoh. ꞋUyoonne kꞌehohꞌalh junih, ꞌet de ꞌaw nohkꞌeholtsꞌit ꞌaitꞌoh. ꞋUyoonne ba whunaoodolnoh, ꞌinkꞌez nohni cha nohba whunaoodutitnoh. 38ꞋUyoonne gha náhꞌai, ꞌi nohtlꞌa nátikulh whe ꞌuntꞌoh. Lhtꞌusúkat ꞌinkꞌez lhai cho tileh. ꞋEt nudúlꞌus whe bé ha itikat. ꞋEt ꞌultsuk whe nohbut nehítakalh. Daltsuk oogha náhꞌai ꞌet ꞌultsuk nohtlꞌa nátikulh ꞌet huwa.”

39Be nawhutnuk-i be whútsꞌodulꞌeh-i, ꞌi be bubulh yalhduk, “Soo eh hoos̱ꞌen-un ꞌuyoon hoos̱ꞌen-un nutíguz? ꞋAlhaꞌ nahúltꞌoh la ha hóokai-un ꞌahooltsꞌit! 40Hodulꞌeh-un ꞌinkꞌez whuyodulhꞌeh-un ꞌaw yando lheꞌítꞌoh. ꞋEt hoontsꞌi tsꞌihꞌun unꞌa hodilꞌehne hubodalhꞌeꞌ-un kꞌunꞌa ꞌuhutitꞌelh.

41ꞋEt di ha nyulhutsin lhezyaz oona kꞌet uslai, ꞌi nilhꞌen, ꞌet hoontsꞌi ꞌaw tꞌeoonuzinzun nyunchꞌoh duchun cho nyuna kꞌet diztan? 42Ntsꞌenꞌa nyulhutsin ꞌudutanelh, ‘Sulhutsin nyo tsunyaz nyuna kꞌet ha náoosalh.’ Nyunchꞌoh duchun cho nyuna kꞌet diztan-i ꞌaw lhuzanꞌen. Nyunchꞌoh duba naꞌindzooꞌ! ꞋUdechoo duchun cho nyuna kꞌehanadintih. ꞋEt de la soo hónꞌen whe nyulhutsin oona kꞌet yuzꞌai ꞌi oona kꞌéhanaiyonꞌalh.”

Dune di la oodzi yo be whudizbun, ꞌi be la yatilhduk

43“ꞋEt duchun dinzoo-i ꞌaw mai ꞌutsiꞌ-i ooghu nootꞌai ꞌaitꞌoh. ꞋAw duchun dintsiꞌ-i mai unzoo-i ooghu nootꞌai ꞌaitꞌoh. 44ꞋEt oomaiꞌ gha duchun dantꞌoh-i ꞌuntꞌoh tꞌenudzun. Mai unzoo-i, figs huyulhni, ꞌaw whus chun ghun huyoonoyin ꞌaitꞌoh. ꞋInkꞌez whus cho chun, ꞌaw duje ndo ꞌutꞌen-i ooghu oononyin ꞌaitꞌoh. 45Dune unzoo-un unzoo-i dudzi yo hoonli-i, ꞌi gha khuni unzoo-i be yalhduk. ꞋInkꞌez dune unsiꞌ-un untsiꞌ-i oodzi yo hoonli-i, ꞌi be khuni untsiꞌ-i be yalhduk. Dune di la oodzi yo be whudizbun, ꞌi be yaoolhduk.”

Jesus Christ ooghuni soo cho whulh tsꞌooyin

46“ꞋInkꞌez di ha ‘SMoodihti, sMoodihti,’ sudahni, ꞌinkꞌez daja nohdusni la, ꞌaw húkwꞌu nulheꞌzahtꞌen? 47Mbene la stsꞌun túyaih ꞌinkꞌez soo zilhtsꞌai ꞌinkꞌez hukwꞌú neꞌutꞌenne, ꞌet mbe ndahultoꞌ whunóhuntistun. 48Ndiz whuz unꞌa ꞌet duhintꞌoh. Dune yoh ꞌuwhutilelh whe, yoo yo cho ha hónkai ꞌinkꞌez yoh ookꞌu whuzꞌai-i tse kꞌut newhútaꞌalh, dudatilhtꞌo de, ꞌet ninli ulhtus-i yoh whutꞌaiznai, ꞌet hoontsꞌi yoh ꞌaw dalhuhoonel. Tse kꞌut neooninꞌai ꞌet huwa. 49ꞋEt hoontsꞌi mbe sghuni yoozilhtsꞌaine ꞌinkꞌez ꞌaw hikꞌu nulheꞌustꞌen de, njan nduhintꞌoh. Dune yun kꞌut yoh ꞌuhoonla. ꞋInkꞌez yoh ookꞌu whuzꞌai-i ꞌaw lheꞌílel. Ninli ulhtus-i yoh whutꞌaiznai whe ꞌaho naóonitꞌai. Tube wheóonujut whe yoh nintaꞌwhutatꞌelh.”

Selectat acum:

Luke 6: crx

Evidențiere

Partajează

Copiază