Luke 5

Dine lho ha ꞌutꞌenne Jesus, “ꞋAnih,” ubudániꞌ

1ꞋEt ꞌilhoh dzin Gennesaret bun taba usyin whe dunene hinat ꞌilhozdil, Yakꞌusda ooghuni ꞌi hidutátsꞌo ha. 2Tsꞌi nanki yasáꞌa yunilhꞌen. ꞋEt lho ha ꞌutꞌenne ꞌudun dulembil tunáhugus. 3ꞋInkꞌez ꞌilhoghi tsꞌi bénya. ꞋI Simon ootsꞌi ꞌuntꞌoh. ꞋInkꞌez ꞌuyulhni, “Nusyaz le ꞌinleh.” ꞋInkꞌez ꞌet tsꞌi bet natlꞌa didaꞌ ꞌinkꞌez dunene whubodulhꞌeh.

4ꞋEt bubulh yalhduk-un ꞌetsul lhiduja whe Simon ꞌulhni, “Ntsꞌe takhulh-un ꞌet nlembil teninle ꞌutanlooh huba.”

5Simon nduyulhni, “Smoodih wheni ꞌulhdzis ndoohoolyiz whe ꞌutsꞌitꞌen ꞌet hoontsꞌi ꞌaw hoonliyaz lhetsꞌilooh. Dini de lhembilh ꞌilho tenaoosdlelh la.”

6Teꞌhuninla whe lho lhai huyuzdlooh. Lhai huzdlooh kꞌet bulembil lhkꞌenanuchꞌulh. 7ꞋEt ꞌonghohne lubaz bet ꞌutꞌenne ꞌanih buhutni bulaꞌ hooneh ha. ꞋEnne cha whusahanki ꞌinkꞌez nankiltꞌoh tsꞌi hidilhbun kꞌet ꞌawet tewhéninlat.

8Simon Peter whunalhꞌen whe Jesus oobut dugwutsi be neninya ꞌinkꞌez, “Smoodihti schꞌaz naindalh, si lubeshi ꞌulhꞌen-un usdli,” yúlhni. 9Peter ꞌinkꞌez yulh ꞌutꞌenne tsꞌiyawh buba hooncha lho lheltsuk whe huyuzdlooh ꞌet huwa. 10ꞋEt James ꞌinkꞌez John Zebedee ooyeꞌke ꞌenne Simon tsꞌu ditnine whe húnilhjoot. ꞋEt Jesus yulhni, “Simon khun whenoljut junih. ꞋAndit whutsꞌun dune haꞌ tantꞌelh.”

11ꞋInka yanáhuski whe tsꞌiyaitsuk ꞌet hila ditni. ꞋInkꞌez hikꞌoh tsꞌe ootꞌen ha huyuntizdil.

Ooka whulhjut-un, Jesus soo náꞌyinla

12ꞋEt hukwꞌelhꞌaz Jesus ꞌilhoghun keyoh ꞌutꞌen. ꞋInkꞌez ꞌilhoghun dune ndulcho whe ooka whulhjut-un, ꞌi leprosy huyulhni, ꞌi be nduda, ꞌen cha ꞌet keyoh whutꞌen. Jesus yutilhꞌen whe yubut nachaniti, yutsꞌu tedudli, “SMoodihti nyun hukwaꞌ ninzun de sunaꞌilhdeh,” yulhni.

13ꞋEt Jesus dula be yutꞌaíznai ꞌinkꞌez ꞌuyulhni, “A, hukwaꞌ nuszun nyunaꞌoosdeh.” ꞋEt ooka whulhjut-un ꞌaho soo naꞌuja.

14ꞋEt Jesus khuniti be njan ndúyulhni, “Khun te ꞌuyoonne dóniꞌ junih! ꞋEt kꞌus lubret ootsꞌinyalh ꞌinkꞌez nyunoolhꞌen. ꞋEt Moses be ꞌudustlꞌus kꞌut daja ni, ꞌet whuz unꞌa loodel kꞌut hoonliyaz dutálhkꞌun. ꞋEt whe la whubunolhtun dainja whe soo naꞌinja,” yulhni.

15ꞋEt hoontsꞌi be nawhutnuk-i Jesus Christ ꞌen ghun lhanꞌun te whulh ꞌúhudantsꞌo. ꞋEt whula toh tsꞌe ꞌon nus huldlai whe highudulh, ꞌinkꞌez hiye unduda-i tsꞌiyawh naitilhyih hitsꞌu hukwaꞌ ninzun. 16ꞋEt didutchꞌoh lhat disoh tsꞌe tenadutidli tsꞌu wheyaih.

Dune delhdusni-un, Jesus soo náꞌyinla

17ꞋEt ꞌilhoh dzin dune hodulhꞌeh whe ꞌinkꞌez Phariseene cha ꞌinkꞌez Moses be ꞌudustlꞌus hodulhꞌehne cha, yun kꞌut Galilee, Judea cha, ꞌinkꞌez Jerusalem cha tsꞌiyawh Jesus hiyenghoh dilhtsꞌi. ꞋInkꞌez neMoodihti ye ulhtus-i ndudane soo náꞌtilhꞌelh ha yulh ꞌuntꞌoh. 18ꞋEt dune delhdusni-un lili be whusahúyankai. ꞋInkꞌez Jesus yoh tsꞌe hitsꞌu hitoolhtelh hukwaꞌ huyulhꞌen. 19ꞋEt hoontsꞌi dune lhai kꞌet ꞌaw ꞌuhuyooleh ꞌaitꞌoh. ꞋInka bun kꞌehuyinkai. Bun hikonintsi ꞌinkꞌez whuz hukwuhinínkai. ꞋInkꞌez buniz Jesus oobut yun néhininkai.

20ꞋUbunilhꞌen ꞌet tꞌeooninzun buba ꞌalha ꞌuhoontꞌoh ꞌinkꞌez delhdusni-un ꞌuyulhni, “Dune nlubeshi mba hooloh suliꞌ.”

21ꞋEt Moses be ꞌudustlꞌus ꞌukꞌu nunáguzne ꞌinkꞌez Phariseene, huwu yawhenilhduk, “Ndun dune Yakꞌusda chꞌaz yalhduk. Mbe lubeshi ꞌuntulhdulh? Yakꞌusda didutchꞌoh za lubeshi ꞌun tulhdilh!”

22ꞋEt Jesus tꞌewhunínzun daja huninzun, ꞌinkꞌez ndúbulhni, “ꞋEt di ha nohdzi yo whe ꞌet ndunahzun? 23Ntsꞌenꞌa suba huwa lhúhoolnaꞌ kꞌunꞌa ꞌuzdooniꞌ, ‘Lubeshi mba hooloh suliꞌ,’ kꞌus, ‘Dudinyaih ꞌinkꞌez ninya?’ 24ꞋEt tꞌeoonóhzin Yinka Dune Yeꞌ, ꞌen ndi yun kꞌut oobaꞌ hoontꞌoh whe ꞌuntꞌoh lubeshi ꞌun toolhdilh hubaꞌ hoontꞌoh whe ꞌuntꞌoh,” ꞌubulhni. ꞋInkꞌez delhdusni-un, “Dudinyaih, ookwꞌusinti-i ilhchoot, ꞌinkꞌez nyoh tsꞌe naindalh!” yulhni. 25ꞋEt ꞌaho tsꞌiyanne nalh dudinya ꞌinkꞌez yukꞌusti-i cha náilhchoot ꞌinkꞌez Yakꞌusda dilhtiꞌ whe duyoh tsꞌe whe naja. 26ꞋEt tsꞌiyanne buba hooncha. Yakꞌusda hidálhtiꞌ. Tube whe hunuljut, “Tube huwa ꞌitꞌen-un tsꞌonalhꞌen,” hutni.

Jesus Levi, “ꞋAnih,” yúlhni

27ꞋEt hukwꞌelhꞌaz Jesus ꞌaz whinya ꞌinkꞌez ꞌilhoghun sooniya nalhdzooh-un, Levi huyulhni-un, ꞌutꞌen-un usda whe yunilhꞌen, ꞌinkꞌez uyúlhni, “Sunanyalh.” 28ꞋEt dudinyai, tsꞌiyaitsuk yula ditni whe yukꞌoh tsꞌe ootꞌen ha yuntizya.

29ꞋEt Levi duyoh tsꞌe Jesus ba hooncha whe dune gha náꞌuntai. ꞋEt sooniya ꞌilhunaoosꞌaihne huldlai. ꞋInkꞌez ꞌuyoonne cha lhane bubulh ꞌet dilhtsꞌi. 30ꞋEt Moses be ꞌudustlꞌus ꞌukꞌu nunáguzne ꞌinkꞌez Phariseene, didutchꞌoh highu yalhduk ꞌinkꞌez Jesus yugha hodulꞌehne, ꞌubuhútni, “ꞋEt nyoonne sooniya ꞌilhunaoosꞌaihne ꞌinkꞌez lubeshi ꞌulhꞌenne, di ha bubulh áhꞌalh ꞌinkꞌez bubulh ꞌáhtnai?”

31Jesus ꞌet ndúbulhni, “Mbene la soo ꞌúntꞌohne, ꞌaw yoo be duyun ha lheꞌhunizun. Ndudane, ꞌenne za yoo be duyun haꞌ huninzun. 32ꞋAw tsꞌihꞌun ꞌuntꞌohne dulubeshi chꞌa dudeni naháhunduntileh huba iloh whusásya. ꞋEt lubeshi ꞌulhꞌenne dulubeshi chꞌa dudeni naháhundunooleh ubudutásnelh ha, ꞌet huba whusásya.”

Dune soo hóohooni-un hukwa huyoodulhkut

33ꞋEt huyoodulhkut, “Dahoontꞌoh huwa John yugha hodulꞌehne, lhat soo hóohoonih ꞌinkꞌez tenahududli? ꞋInkꞌez Phariseene bugha hodulꞌehne cha nduhútꞌen. ꞋEt hoontsꞌi nyun ngha hodulꞌehne, ꞌuhaꞌalh chaꞌ hutꞌen ꞌinkꞌez ꞌuhutnai chaꞌ hutꞌen?”

34ꞋEt ꞌubulhni, “Mbe la ooꞌat whutáleh-un, ookꞌekene, bubulh ꞌutꞌen, whe soo húhootanih eh? 35ꞋOh de whusaootiltsꞌulh, ꞌoh de de ooꞌat whutaleh-un bughu nayitálchulh. ꞋOh de la soo hoohoonih.”

36ꞋEt be nawhutnuk ꞌi be whutsꞌodulꞌeh-i, ꞌi be bubulh yalhduk whe njan ndutni, “ꞋAw ꞌilhoghun naih ꞌandit-i tsꞌu ha yalhchꞌul ꞌinkꞌez ꞌujut-i yunaidunókalh ꞌaitꞌoh. ꞋEt whuz unꞌa ꞌet nduja de, ꞌet ꞌandit naih-i toochꞌoolh la, ꞌinkꞌez ꞌandit-i naih, ꞌinkꞌez naih jut bulh ꞌaw lhkꞌunꞌa ootꞌeꞌ ꞌaitꞌoh. 37ꞋEt doo cha, ꞌaw ꞌilhoghun ꞌandit-i tsꞌekoo tooꞌ ꞌi ꞌaw ꞌujut-i tsꞌekoo tooꞌ zus be yóolhdzeh ꞌaitꞌoh. ꞋEt de, ꞌandidi-i tsꞌekoo tooꞌ ndi ꞌujut-i tsꞌekoo tooꞌ zus ookꞌohóltalh la. ꞋEt whe tsꞌekoo tooꞌ bé ha itijulh ꞌinkꞌez ꞌuzus nintaꞌtitꞌelh. 38ꞋEt hoontsꞌi ꞌandit-i tsꞌekoo tooꞌ, ꞌandidi-i tsꞌekoo tooꞌ zus be naooldzeh hubaꞌ hoontꞌoh. ꞋEt whuz unꞌa nankiltꞌoh sooꞌ titꞌelh. 39ꞋAw ꞌilhoghun tsꞌekoo tooꞌ ꞌujut-i ꞌutnaiꞌ de, ꞌaho ꞌandit-i tsꞌekoo tooꞌ haꞌ noozin ꞌaitꞌoh. ‘ꞋUjut-i ꞌon nus ꞌuzooꞌ,’ hutni,” ubúlhni.

Selectat acum:

Luke 5: crx

Evidențiere

Partajează

Copiază