Luke 2

Mary ꞌudechoo ooyaz whuzdliꞌ, Jesus ꞌen ꞌuntꞌoh

1ꞋEt ꞌoh daꞌ Caesar Augustus huyulhni-un, whunilhchoh keyoh dilhtsꞌine, khuni bunalh yutulhuhizyeꞌ. Tsꞌiyanne bubooziꞌ ꞌukꞌeooges ha. 2ꞋEt ꞌoh daꞌ ꞌoh whuya whudizulh whutoh, ꞌilhoghun dune Cyrenius huyulhni, ꞌen yun kꞌut Syria whumoodih inleꞌ. ꞋEt whudizulh ꞌet whutsꞌun bubooziꞌ ꞌukꞌewhe hininguz. 3ꞋInka tsꞌiyanne dukeyoh tse whehandil bubooziꞌ ꞌukꞌehuyitagus ha.

4ꞋEt Joseph cha yun kꞌut Galilee ꞌinkꞌez keyoh Nazareth, ꞌet whe dinya ꞌinkꞌez David ookeyoh, Bethlehem huwhutni, whuz whehanꞌaz Joseph David tsꞌu hainzut whe ꞌuntꞌoh ꞌet huwa. 5Mary yughu tidalh whe yutsꞌu nahizya-un, tsꞌoodun ba ꞌuntꞌoh whe yulh whinꞌaz bubooziꞌ ꞌukꞌehuyítagus-un ha. 6ꞋEt huzke whe ooyaz whutaleh-un bulh ꞌet neoodinzut. 7ꞋInkꞌez ꞌudechoo ooyaz whuzdliꞌ. Layin naih yugháꞌ ozduz ꞌinkꞌez musdoos yez ꞌaꞌalh-i be yalhti. ꞋAw tsꞌuztez bayoh nahuhóꞌalh ꞌaitꞌoh, tsꞌiyantsuk whudizbun ꞌet huwa.

NeMoodihti ootsꞌu ha yanduz-i, ndulcho whe bunat bube dindi

8ꞋEt keyoh za ꞌusbai ghunline tlꞌo kꞌut ꞌet huwhutꞌi, ꞌinkꞌez ꞌulhdzis nduwhulyiz whe dughunaꞌ highunli. 9ꞋInkꞌez whunilhꞌen, neMoodihti oolizas bubut usyin. ꞋInkꞌez neMoodihti ootsꞌu ha yanduz-i, ndulcho whe bunat bube dindi. ꞋInkꞌez tube whe hunilhjoot. 10ꞋEt lizas ꞌubulhni, “Whenoolhjut iloh! Nulhꞌen khuni unzoo-i soo tsꞌiyanne dune ye hóotatꞌeꞌ-i, ꞌi nohtsꞌú tisꞌai. 11ꞋAndit dzin David ookeyoh, nohtilhyis-un nohba whuzdli. ꞋEn Christ neMoodihti tsꞌutni-un. 12Ndiz unꞌa whe tꞌewhuntihzeh ha nohba whe hoodalꞌen dahooja-un, layin oogha ósduz ꞌinkꞌez musdoos yez ꞌaꞌalh-i, ꞌi bet ꞌusti.”

13Khuntsul lizas ꞌinkꞌez lhane lizas lhuganne, ꞌenne ndus de ha handil. ꞋEt whe Yakꞌusda ꞌon nus hiba oodílhtiꞌ whe nduhutni,

14“Yakꞌusda ꞌudedo yakꞌut, ꞌen uzdilhtiꞌ.

ꞋInkꞌez ndi yun kꞌut nedzi doghel,

ꞌi be tsꞌiyanne dune butsꞌun hoonzoo holeꞌ!”

15ꞋEt ꞌawet lizasne yakꞌuz tsꞌe bugho whenáhidil. ꞋUsbai ghunline ꞌilhodutni, “Dugweꞌ Bethlehem tsꞌuztoodilh. ꞋInkꞌez dahooja-un ꞌet neMoodihti nedaniꞌ, ꞌet la tsꞌonoolhꞌen!”

16ꞋEt ꞌa cho hutizdil. ꞋEt Mary ꞌinkꞌez Joseph ꞌinkꞌez tsꞌoodun musdoos yez ꞌaꞌalh-i bet ꞌusti whe bugho hunindil. 17Hiyanꞌen hukwꞌelhꞌaz, ntsꞌenꞌa tsꞌoodun ghun lizas ubudániꞌ, ꞌet whunat tsꞌiyanne utꞌehonalhdzin whe 18mbene la yudantsꞌone ꞌusbai ghunline daja buba hutni, tsꞌiyawh buba hooncha. 19ꞋEt Mary dahooja-un, dudzi be oodanla ꞌinkꞌez howu nuninuzut. 20ꞋEt ꞌusbai ghunline de ꞌusbai hitsꞌu whenadil. ꞋEt ndet hodantsꞌo-un, ꞌinkꞌez huhonꞌen-un cha, ꞌinkꞌez ntsꞌenꞌa bubulh yahalhduk, ꞌet huwun Yakꞌusda hidílhtiꞌ ꞌinkꞌez ꞌon nus hoonzoo kꞌunꞌa highu yalhduk.

Jesus ꞌawet yuka dune unli-i kꞌut hititꞌus

21Whulh lhkꞌu dit dzin lhaóoduja whe tsꞌoodun yuka dune unli-i kꞌut hititꞌus, ꞌinkꞌez huyooziꞌ be huyootázilh, Jesus huyulhni. ꞋAwhuz ꞌucha dinda whe ndi booziꞌ lizas yugha ídinꞌai.

Jesus lugliz whucho tsꞌe, ꞌet neMoodihti oonalhtsꞌet ha hítilhtelh

22ꞋEt Moses be ꞌudustlꞌus kꞌut daja ni whe tsꞌekoo buyaz whulih hukwꞌélhꞌaz soo náꞌhutꞌih te za lugliz danáhadaih whe Mary lhaóodinla. ꞋInkꞌez tsꞌoodun Jerusalem tsꞌe whehíyalhti neMoodihti oonalhtsꞌet ha húyoolhtelh ꞌet hukwa. 23NeMoodihti dughuni butlꞌa idanꞌai-i whuz unꞌa ꞌukꞌehúhonguz whe njan ndutni, “Duneyaz ꞌudechoo whuzdline, tsꞌiyawh neMoodihti ba ꞌudun neltine hinli wheꞌ hintꞌoh.” 24ꞋInkꞌez ndi la loodel kꞌut hidutálhkꞌun-i, “ꞋI nanki dutꞌai dove huyulhni, kꞌus nanki dutꞌaiyaz ꞌi cha pigeon huyulhni.” NeMoodihti dughuni butlꞌa idanꞌai-i, ꞌi cha whuz unꞌa za ꞌutni.

Simeon ꞌen neMoodihti ooChrist yunalhꞌen

25ꞋEt ꞌilhoghun dune Simeon tsꞌutni-un, Jerusalem whutꞌi-un. Tsꞌihꞌun unꞌa ꞌuntꞌoh ꞌinkꞌez ꞌahoolhyiz Yakꞌusda be ꞌutꞌen kꞌoh ꞌuwhulhꞌen-un. Israel ooduneꞌne kꞌenábuntaꞌoh-un, yuka tse hóoliꞌ. ꞋInkꞌez Ndoni cha yulh ꞌuntꞌoh. 26Datitsah whutso neMoodihti ooChrist tsꞌutni-un yutiꞌelh. Whuz unꞌa Ndoni whutꞌeinalhdzin. 27ꞋEt whe Ndoni be lugliz whucho daninya. ꞋInkꞌez tsꞌoodunyaz Jesus, oodusneke dahinilhti. NeMoodihti dughuni butlꞌa idanꞌai-i, butsꞌu hukwaꞌ ninzun-un, ꞌet hukwꞌu neꞌhutitꞌen ha. 28ꞋEt Simeon yilhchoot ꞌinkꞌez njan ndutni whe Yakꞌusda yudílhtiꞌ,

29“SMoodihti si nye ꞌulhna-un usdli.

ꞋInkꞌez nghuni kꞌunꞌa,

ꞌet ꞌuhoontꞌoh sdzi dizghel whe daóosah.

30ꞋAlhaꞌ sna be be nétalhyis-un hoosꞌen.

31Tsꞌiyanne dune bunalh lhaoodinla.

32ꞋUdun yun kꞌut whutꞌenne cha buba be hootꞌen-i ꞌuntꞌoh. ꞋEn be hitiꞌelh.

ꞋInkꞌez Israel ooduneꞌne, cha buba idiztiꞌ-un ꞌen ꞌuntꞌoh,” ni.

33ꞋInkꞌez yughu yatilhduk-un ꞌet huwa Joseph ꞌinkꞌez tsꞌoodun ooloo bulh buba hooncha. 34ꞋEt Simeon Yakꞌusda tsꞌu hukwaꞌ daniꞌ butsꞌun óozooꞌ ha. ꞋInkꞌez ooloo Mary ꞌen njan ndi yulhni, “Ndet huba ndun tsꞌoodun Yakꞌusda ꞌen buba ꞌutahayálhti-un ꞌuntꞌoh, ꞌet nyudutasnelh. Israel ootsꞌu hainzutne, ꞌen gha lhane nahutikulh ꞌinkꞌez lhane dunahudutádulh. ꞋInkꞌez highu tꞌeooninzun ꞌet hoontsꞌi hichꞌaz yatilhduk. 35ꞋInkꞌez nyunchꞌoh nzul saluzti be huyuzgwut leꞌ tinelh. ꞋInkꞌez lhane dudzi be daja huninzun, tsꞌiyanne nalhtsꞌet ha ootiltsꞌulh.”

Anna ꞌen cha Jesus yanꞌen ꞌinkꞌez Yakꞌusda dílhtiꞌ

36ꞋEt ꞌilhoghun tsꞌeketi, Anna huyulhni, Yakꞌusda be nus hooꞌen. Phanuel ootseꞌ, ꞌinkꞌez Asher bubulh didowh-un, ꞌilhoghun ꞌuntꞌoh. Tube yoo ꞌun uzulh. Ki titꞌelh whutso, ꞌaw dune tꞌenuszun-un ꞌuntꞌoh. Lhtakꞌantꞌit yus kꞌut duki zih indaꞌ. 37Ndun tsandilh, ꞌen lhkꞌu dit whunizyat ꞌon ꞌat dit be yus kꞌut atꞌen (84). ꞋAw lugliz whucho whuchꞌa lhiyal. Dzenis ꞌinkꞌez ꞌulhdzis ibulh soo hooni ꞌinkꞌez tenadudli whe Yakꞌusda ba neꞌutꞌen-un unli. 38ꞋOh whuya hoozulh whe daninya ꞌinkꞌez Yakꞌusda dílhtiꞌ. Jerusalem dilhtsꞌine, nabootakulhne, ꞌenne hika ítisꞌen, ꞌen ghun Anna budániꞌ.

Joseph ꞌinkꞌez Mary, tsꞌoodun bulh bukeyoh Nazareth tsꞌe whenahitꞌaz

39ꞋEt Joseph ꞌinkꞌez Mary neMoodihti dughuni butlꞌa idanꞌai-un, ꞌet tsꞌiyantsuk lhahuduja whe yun kꞌut Galilee ꞌinkꞌez bukeyoh Nazareth tsꞌe whenahitꞌaz. 40ꞋInkꞌez tsꞌoodun ꞌawet nuyeh ꞌinkꞌez ooyughi be ulhtus súliꞌ. Ye whunih-i be dizbun ꞌinkꞌez Yakꞌusda ye unzoo-i bulh ꞌuntꞌoh.

Jesus ꞌawet chilh unli whe keyoh Jerusalem usda. Yuditsꞌone tube buba hooncha suliꞌ

41ꞋEt oodusneke naoodizulh totsuk Jerusalem tsꞌe kꞌunáhutꞌus. Naꞌhutitꞌulh whe whunahutilnih butus lhuseya-un, ꞌet hukwa. 42Tsꞌoodun whunizyat ꞌon ꞌat nat be yus kꞌut (12) whe Jerusalem tsꞌe whehandil, butus lhusiya daꞌ hukwꞌunꞌa. 43ꞋEtsul ꞌuhooja whe kꞌoh nahutistꞌaz. ꞋEt hoontsꞌi ꞌawhuz tsꞌoodun Jesus Jerusalem usda. Joseph Jesus ooloo bulh ꞌaw tꞌehonúszun. 44ꞋUyoonne bulh la ꞌutꞌen huninzun. ꞋIlhudzin atꞌen nuhúzꞌaz, ꞌet hika itísꞌen. ꞋEt oonatnéke ꞌinkꞌez ookꞌekene butoh hikunúta. 45ꞋEt ꞌaw nalhuhuyílhtel ꞌinka Jerusalem tsꞌe whenáhitꞌaz, ꞌinkꞌez hikunúta. 46Tat dzin hukwꞌelhꞌaz ꞌet ꞌandit za nahuyilhti. Lugliz whucho ꞌet ꞌatsꞌo whubodulhꞌehne butoh usda. Uboozílhtsꞌai ꞌinkꞌez uboodulhkut. 47Yuditsꞌone tube buba hooncha. Tsꞌiyantsuk tꞌewhunínzun ꞌinkꞌez tsꞌiyawh tsꞌihꞌun unꞌa ubúlhni. 48Oodusneke ꞌutꞌen-un ꞌet usda whe hitilhꞌen whe buba hooncha. ꞋEt ooloo uyúlhni, “Neyeꞌ di ha whuz unꞌa nuneꞌilhꞌen? Mbá ꞌinkꞌez si tube nghu ni ídli whe nkúnita.”

49ꞋEt ubúlhni, “Di ha skunahta? ꞋAw lawk tꞌewhunuzúhzun ꞌuBá be ꞌutꞌen kꞌoh huwa óosnaꞌ hubaꞌ ꞌustꞌoh?” 50ꞋEt daja ni whe ꞌutni, ꞌaw tꞌehonúszun.

51ꞋInkꞌez bubulh whenátꞌaz. Nazareth tsꞌe whenáhidil ꞌinkꞌez butlꞌaꞌ dudilti. ꞋEt hoontsꞌi ooloo ndet ꞌuwhulhni-un, dudzi yo danla. 52ꞋInkꞌez Jesus ꞌon nus whunih cha lheh ꞌinkꞌez nus lhuniyelh. Yakꞌusda yuba hoontꞌiꞌ, ꞌinkꞌez dunene cha hiba hoontꞌiꞌ.

Selectat acum:

Luke 2: crx

Evidențiere

Împărtășește

Copiază