ᒨᓯᓯ ᓯᕗᓪᓖᑦ 39
39
ᔫᓯᐱᓗ ᐹᑎᐸᐅᓪᓗ ᓄᓕᐊᖓ
1ᔫᓯᐱᓕ ᐄᑦᔨᑉᑎᒧᐊᕈᑦᔭᐅᒐᒥ, ᐹᑎ-ᐸᕆᒧᑦ ᐂᑦᑑᑎᒋᔭᐅᕗᖅ, ᐰᕉᑉ ᐊᖓᔪᖅᑳᖁᑎᖓᓄᑦ, ᖃᐅᔨᓴᕐᑎᓄᑦ ᐄᑦᔨᑉᑎᒥᐅᑕᓄᑦ ᐊᖓᔪᖅᑳᖑᔪᒧᑦ, ᑖᓐᓇ ᐃᓯᒤᓕᒥᐅᓂᑦ ᓂᐅᕕᓚᐅᕐᑕᖓ ᑖᑦᓱᒥᖓ ᑎᑭᐅᑦᔨᓚᐅᕐᑐᓂᑦ. 2#ᐋᐴᓯᑕᓖᑦ 7:9.ᐊᑕᓂᐅᓪᓕ ᔫᓯᐱ ᐃᓚᒋᕚ, ᐱᓇᓱᐊᕐᑕᒥᓂᒡᓗ ᐱᕙᓪᓕᐊᑦᓯᐊᕐᑎᑉᐹ; ᐊᖓᔪᖅᑳᖓᑕᓗ ᐄᑦᔨᑉᑎᒥᐅᑕᐅᑉ ᐃᒡᓗᖓᓂᒥᐅᑕᐅᓕᕐᐳᖅ. 3ᐊᖓᔪᖅᑳᖓᑕᓕ ᖃᐅᔨᕚ ᐊᑕᓂᐅᑉ ᐃᓚᒋᖕᒪᒍ, ᐊᑕᓂᐅᓪᓗ ᖃᓄᐃᓕᐅᕐᑕᓕᒫᖏᑦ ᐱᕙᓪᓕᐊᑦᓯᐊᕐᑎᖃᑦᑕᕐᒪᒋᑦ. 4ᑕᕝᕙ ᔫᓯᐱ ᐊᖓᔪᖅᑳᖓᑕ ᖁᕕᐊᒋᑦᓯᐊᕐᐹ ᓇᖕᒥᓂᖅ ᐱᔨᑖᕆᓪᓗᒍ, ᐃᒡᓗᒥᓂᓗ ᑲᒪᔨᓐᖑᕐᑎᑉᐹ ᐊᖓᔪᖅᑳᓐᖑᕐᑎᓪᓗᒍᓗ ᑕᒤᓐᓄᑦ ᐱᖁᑎᓕᒫᒥᓄᑦ. 5ᑍᒪᓐᖓᑦ ᑲᒪᔨᓐᖑᕐᑎᑕᐅᓂᖓᓂᑦ ᐃᒡᓗᒥᓄᑦ ᐱᖁᑎᓕᒫᖏᓐᓄᓪᓗ ᐊᑕᓂᐅᑉ ᐄᑦᔨᑉᑎᒥᐅᑕᐅᑉ ᐃᒡᓗᖓ ᓮᒻᒪᕐᑎᓚᐅᕐᐹ ᔫᓯᐱ ᐱᑦᔪᑎᒋᓪᓗᒍ; ᐊᑕᓂᐅᓪᓗ ᓮᒻᒪᕐᑎᓚᐅᕆᕔᑦ ᐱᖁᑎᓕᒫᖏᑦ, ᐃᒡᓗᖓᓂ ᐱᕈᕐᓰᕕᖁᑎᖓᓂᓗ. 6ᑍᒤᒻᒪᑦ ᐱᖁᑎᓕᒫᓂ ᑕᒪᕐᒥᒃ ᔫᓯᐱᒧᑦ ᑲᒪᒋᔭᐅᑎᓕᕐᐰᑦ; ᓇᖕᒥᓂᕐᓕ ᑲᒪᖏᑦᓯᐊᓕᕐᐳᖅ ᓱᓇᓕᒫᓂᒃ ᓂᕆᓂᐊᕐᑕᒥᓂᒃ ᑭᓯᐊᓂ ᑲᒪᒋᔭᑐᐊᖃᓕᕐᓗᓂ.
ᔫᓯᐱᓕ ᐊᖑᑎᑦᓯᐊᕙᐅᓚᐅᕐᐳᖅ ᑕᑯᒥᓇᕐᑑᓪᓗᓂᓗ. 7ᐊᑯᓂᐅᕙᓪᓕᐊᓕᕐᑎᓪᓗᒍ ᐊᖓᔪᖅᑳᖓᑕ ᓄᓕᐊᖓᑕ ᔫᓯᐱ ᑕᑯᒥᓇᕆᓪᓗᒍ ᐊᖑᓐᓂᐊᕈᒪᓕᕐᐹ, ᐅᖃᐅᑎᓪᓗᒍᓗ, “ᐃᓐᓇᖓᖃᑎᒋᓚᐅᓐᖓ.” 8ᔫᓯᐱᓕ ᕿᐱᓗᒃᐳᖅ ᐊᖓᔪᖅᑳᒥᓗ ᓄᓕᐊᖓ ᐅᖃᐅᑎᓪᓗᒍ, “ᑕᑯᒋᑦ, ᐊᖓᔪᖅᑳᒪ ᐃᒡᓗᒥᓂ ᐃᓱᒪᕐᓱᕐᑎᑦᓯᐊᕐᐹᖓ ᐃᓱᒫᓗᖏᑦᓯᐊᕐᓗᓂᓗ, ᐱᖁᑎᓕᒫᒥᓄᓪᓗ ᑲᒪᔨᓐᖑᕐᑎᓯᒪᓪᓗᖓ; 9ᐃᒡᓗᖓᓂᓗ ᐅᕙᓐᓂᑦ ᐊᖓᔪᖅᑳᖑᓂᕐᓴᕐᑕᖃᓐᖏᓚᖅ, ᓱᓇᓕᒫᒥᓂᒡᓗ ᐃᓪᓕᕈᑎᖏᑦᓯᐊᕐᓗᓂᖓ ᐃᕝᕕᑐᐊᖅ ᐂᑦᑑᑎᒋᓯᒪᓐᖏᓛᑎᑦ, ᑖᑦᓱᒪ ᓄᓕᐊᕆᖕᒪᑎᑦ; ᖃᓄᕐᓕ ᑍᒫᒃ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᕈᓐᓇᕐᐳᖓ, ᐊᔪᕐᑐᓕᓗᖓᓗ ᒎᑎᒧᑦ?” 10ᐊᕐᓇᕐᓕ ᖃᐅᑕᒫᑦ ᔫᓯᐱᒧᑦ ᑍᒤᓕᐅᖃᑦᑕᕋᓗᐊᕐᑎᓪᓗᒍ, ᓈᓚᓚᐅᓐᖏᓛ, ᐃᓐᓇᖓᖃᑎᖃᕈᒪᓇᓂ ᐱᖃᑎᖃᕈᒪᓇᓂᓗ ᑖᑦᓱᒥᖓ.
11ᐅᓪᓗᐃᓪᓕ ᐃᓚᖓᓐᓂ ᔫᓯᐱ ᐃᒡᓗᒧᐊᕋᒥ ᐱᓕᕆᔭᕐᑐᕐᓗᓂ ᐱᓇᓱᐊᑦᑎᐅᖃᑦᑕᕐᑐᓂᒃ ᑕᕝᕙᓃᑦᑐᖃᓚᐅᓐᖏᓚᖅ, 12ᑕᕝᕙ ᐊᕐᓇᐅᑉ ᐊᓐᓄᕌᖓᒍᑦ ᑎᒍᕚ, ᐅᖃᕐᓗᓂᓗ, “ᐃᓐᓇᖓᖃᑎᒌᓚᐅᓐᖓ.” ᐊᓐᓄᕌᓂᓕ ᐊᕐᓇᐅᑉ ᑎᒍᒥᐊᕐᑕᖓ ᐲᕐᓱᒍ, ᕿᒪᒃᓯᕗᖅ ᐃᒡᓗᒥᓪᓗ ᐊᓂᓪᓗᓂ. 13ᑕᕝᕙ ᐊᕐᓇᖅ ᖃᐅᔨᓕᕋᒥ ᐊᓐᓄᕌᓂ ᕿᒪᖕᒪᒍ, ᑎᒍᒥᐊᕐᑎᓪᓗᓂᐅᒃ, ᕿᒫᓪᓗᓂᓗ ᐃᒡᓗᒥᑦ, 14ᐊᖑᑎᓂᒃ ᐃᒡᓗᒥᓃᑦᑐᓂᒃ ᕾᖁᔨᕗᖅ ᐅᖃᐅᑎᓪᓗᒋᓪᓗ, “ᑕᑯᓕᕆᑦᓯ, ᐂᑉᐸᕐᒪ ᐅᕗᓐᖓᕐᑎᓯᒪᔭᖓᑕ ᐄᑉᕉᖑᔫᑉ ᒥᑕᐅᑎᒋᓕᕐᐹᑎᒍᑦ; ᐅᕙᓐᓄᑦ ᐃᑎᕐᓗᓂ ᐃᓐᓇᖓᖃᑎᖃᕋᓱᖅᑲᐅᕗᖅ, ᓂᐱᖅᑯᕐᑐᓪᓗᖓᓕ ᓂᓪᓕᐊᓕᕋᒪ; 15ᑐᓴᓕᕋᒥ ᓂᐱᖅᑯᕐᑐᓪᓗᖓ ᕾᖁᔨᓕᕋᒪ, ᐊᓐᓄᕌᓂ ᕿᒪᒃᓗᓂᐅᒃ ᕿᒪᒃᓯᕗᖅ ᐊᓂᓪᓗᓂᓗ ᐃᒡᓗᒥᑦ.”
16ᐊᓐᓄᕌᖓᓕ ᓴᓂᒥᓄᑦ ᐃᓕᕚ ᐊᖓᔪᖅᑳᖓ ᐊᖏᕐᕋᓚᐅᖏᓐᓂᖓᓂ, 17ᕾᖕᒪᑦ, ᐅᖃᐅᑎᕚ ᑍᒫᑦᓮᓐᓇᖅ, ᐅᓂᒃᑳᕐᓱᓂ, “ᐄᑉᕉᖑᔫᑉ ᐱᔨᕕᑦ, ᐅᕙᑦᑎᓐᓅᕐᓯᒪᔭᕕᑦ, ᐅᐹᒃᓗᓂᖓ ᒥᑕᐅᑎᒋᓯᒪᕚᖓ; 18ᓂᐱᖅᑯᕐᑐᓪᓗᖓᓕ ᕾᖁᔨᓕᕋᒪ, ᐊᓐᓄᕌᓂ ᐅᕙᓐᓄᑦ ᕿᒪᒃᓗᓂᐅᒃ, ᕿᒪᒃᓯᖅᑲᐅᕗᖅ ᐊᓂᓪᓗᓂᓗ ᐃᒡᓗᒥᑦ.”
19ᐊᖓᔪᖅᑳᖓᑕᓕ ᓄᓕᐊᒥ ᐅᖃᐅᓯᕆᔭᖏᑦ ᑐᓴᕋᒥᒋᑦ ᐅᖃᕐᒪᑦ, “ᑕᕝᕙ ᐱᔨᕕᑦ ᑍᒤᓕᐅᕐᕕᒋᕚᖓ,” ᓂᓐᖓᒃᑐᐊᓘᕗᖅ. 20ᐊᖓᔪᖅᑳᖓᑕᓗ ᔫᓯᐱ ᑎᒍᓪᓗᓂᐅᒃ ᑎᒍᔭᐅᓯᒪᕕᖕᒧᐊᕐᑎᑉᐹ, ᐊᖓᔪᖅᑳᕐᔪᐊᑉ ᑎᒍᔭᐅᓯᒪᔪᖁᑎᖏᑕ ᐃᓂᖓᓐᓄᑦ, ᑕᕝᕙᓃᓕᕐᓗᓂᓗ. 21#ᐋᐴᓯᑕᓖᑦ 7:9.ᐊᑕᓂᐅᓪᓕ ᔫᓯᐱ ᐃᓚᒋᓚᐅᕐᐹ, ᓇᒡᓕᖕᓂᕐᒥᓂᒡᓗ ᓱᖁᓯᔪᐃᑦᑐᒥᒃ ᖃᐅᔨᒪᑎᓪᓗᒍ, ᖁᕕᐊᒋᔭᐅᓕᕐᑎᓪᓗᒍᓗ ᑎᒍᔭᐅᓯᒪᕕᐅᑉ ᐊᖓᔪᖅᑳᖓᓄᑦ. 22ᑎᒍᔭᐅᓯᒪᕕᐅᓪᓗ ᐊᖓᔪᖅᑳᖓᑕ ᑎᒍᔭᐅᓯᒪᔪᓕᒫᑦ ᔫᓯᐱᒧᑦ ᑲᒪᒋᔭᐅᑎᓕᕐᐰᑦ; ᖃᓄᑐᐃᓐᓇᕐᓗ ᐱᔭᕆᐊᖃᕐᑐᖃᕌᖓᑦ, ᑖᑦᓱᒧᖓ ᐱᓇᓱᐊᕐᑕᐅᑎᖃᑦᑕᕐᐰᑦ; 23ᑎᒍᔭᐅᓯᒪᕕᐅᑉ ᐊᖓᔪᖅᑳᖓ ᔫᓯᐱᐅᑉ ᐱᓇᓱᐊᕐᑕᓕᒫᖏᓐᓂᒃ ᐃᒃᐱᒍᓱᒋᐊᖃᖃᑦᑕᓚᐅᓐᖏᓚᑦ, ᐊᑕᓂᐅᑉ ᐃᓚᒋᓚᐅᕐᒪᒍ; ᖃᓄᑐᐃᓐᓇᕐᓗ ᐱᓇᓱᐊᑐᐊᕌᖓᑦ, ᐊᑕᓂᐅᑉ ᐱᕙᓪᓕᐊᑦᓯᐊᕐᑎᖃᑦᑕᓚᐅᕐᐹ.
Selectat acum:
ᒨᓯᓯ ᓯᕗᓪᓖᑦ 39: EAIB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Eastern Arctic Inuktitut Bible © Canadian Bible Society, 2012, 2021-2023.