ᒨᓯᓯ ᓯᕗᓪᓖᑦ 37
37
ᔫᓯᐱ ᐊᖓᔪᖏᓪᓗ
1ᔧᑯᓕ ᓱᓕ ᓄᓇᖃᓚᐅᕐᐳᖅ ᑬᓇᓂᒥ, ᑕᒫᓂ ᐊᑖᑕᖓᑕ ᓄᓇᒋᓚᐅᕐᑕᖓᓂ, 2ᑕᒪᑦᔭᓗ ᔧᑰᑉ ᐃᓚᒋᔭᖏᑕ ᐅᓂᒃᑳᕐᑕᐅᓂᖏᑦ ᑕᒫᓂ ᐅᖃᐅᓯᐅᓯᒪᕗᑦ.
ᔫᓯᐱ ᐃᓅᓱᒃᑐᖅ ᐊᕐᕌᒍᖃᕐᓗᓂ 17ᓂᒃ, ᐆᒪᔪᓂᒃ ᒥᐊᓂᕐᓯᖃᑕᐅᓚᐅᕐᐳᖅ ᐊᖓᔪᓂ ᐃᓚᒋᓪᓗᒋᑦ, ᑖᒃᑯᐊ ᐱᓪᕼᐊᑉ ᔨᐅᓪᐸᐅᓪᓗ ᐃᕐᓂᖏᑦ, ᔧᑰᑉ ᓄᓕᐊᒃᑲᓐᓂᖏᑕ; ᐊᑖᑕᒥᓄᓪᓗ ᐅᓐᓂᕐᓗᒃᓴᓚᐅᕐᐳᖅ ᐊᖓᔪᖏᑕ ᐱᑦᓯᐊᖏᓐᓂᖏᓐᓂᒃ.
3ᐃᓴᕆᐊᓕᐅᑉ ᔫᓯᐱ ᓇᒡᓕᒋᓂᕐᓴᕆᓚᐅᕐᒪᒍ ᕿᑐᕐᖓᒥᓂᑦ ᑕᒤᓐᓂᑦ, ᐃᓄᑐᖃᐅᓕᕐᓗᓂ ᐃᕐᓂᕐᑖᕆᓯᒪᒐᒥᐅᒃ; ᐊᓐᓄᕌᒃᓴᖓᓂᒡᓗ ᓴᓇᓚᐅᕐᐳᖅ ᑕᑭᔪᒥᒃ ᐂᖅᑯᕐᑐᔪᒥᒃ.#37:3 ᑖᓐᓇ ᑕᑭᔪᖅ ᐂᖅᑯᕐᑐᔪᖅ ᐃᓱᒪᒋᔭᐅᔪᖅ ᐊᖓᔪᖅᑳᑦ ᕿᑐᕐᖓᖏᓐᓄᑦ ᐊᑐᕐᑕᐅᓲᑎᑐᑦ ᓴᓇᓯᒪᔪᕆᔭᐅᓪᓗᓂ, ᐃᑦᔪᔪᑦ ᐃᓔᓐᓇᖏᑦ ᐅᖃᕐᒪᑕ ᖁᐱᓴᕈᐊᑦᑐᒥᒃ ᐅᕝᕙᓗ ᑕᕐᓯᕐᑐᕐᓯᒪᔪᒥᒃ 4ᐊᖓᔪᖏᓪᓕ ᖃᐅᔨᓕᕋᒥᒃ ᐊᑖᑕᖓᑕ ᓇᒡᓕᒋᓂᕐᓴᕆᖕᒪᒍ ᐃᕐᓂᓕᒫᒥᓂᑦ ᑕᒤᓐᓂᑦ, ᑕᕝᕙ ᐆᒥᒋᓕᕐᐹᑦ ᐊᒡᓛᑦ ᑐᓐᖓᓇᕐᑐᓂᒃ ᐅᖃᐅᑎᔪᓐᓁᓪᓕᓪᓗᒍ.
5ᔫᓯᐱᓕ ᓯᓐᓇᒃᑐᓚᐅᕐᐳᖅ, ᐊᖓᔪᓂᓕ ᑕᒪᑐᒥᖓ ᐅᓂᒃᑳᕐᕕᒋᖕᒪᒋᑦ, ᑖᒃᑯᓄᖓ ᐆᒥᒋᔭᐅᒋᐊᓪᓚᑐᐃᓐᓇᕐᐳᖅ. 6ᐅᓂᒃᑳᕐᕕᒋᓕᕐᐰᑦ ᐅᖃᕐᓗᓂ, “ᓯᓐᓇᒃᑐᕆᓚᐅᕐᑕᓐᓂᒃ ᑐᓵᓚᐅᕆᑦᓯ; 7ᑕᑯᒋᑦ, ᓂᐊᖂᔭᒃᓴᓂᒃ ᑲᑎᕐᓱᕐᓯᒪᔪᓂᒃ ᕿᓚᒃᓱᐃᑎᓪᓗᑕ ᐱᕈᕐᓰᕕᖕᒥ, ᑲᑎᓯᒪᔭᒃᑲᓕ ᕿᐱᑍᑦ ᓇᑉᐸᕋᒥᒃ ᓇᐸᑦᓯᐊᓕᕐᐳᑦ; ᐃᓕᑦᓯᓗ ᑲᑎᓯᒪᔭᓯ ᑲᑎᓯᒪᔭᒪ ᐊᕙᑖᓄᐊᕐᓗᑎᒃ ᑕᕝᕗᖓ ᐅᑯᕗᑦ.”
8ᐊᖓᔪᖏᑕᓗ ᐊᐱᕆᕚᑦ, “ᐅᕙᑦᑎᓐᓄᑦ ᐊᖓᔪᖅᑳᓐᖑᓛᕐᑐᕆᕖᑦ? ᐊᐅᓚᑦᓯᓕᕐᓗᑎᓪᓗ ᐅᕙᑦᑎᓐᓂᒃ?” ᑕᕝᕙ ᐆᒥᒋᒋᐊᓪᓚᓕᕐᐹᑦ ᓯᓐᓇᒃᑐᕐᓂᖓᓄᑦ ᐅᖃᐅᓯᖏᓐᓄᓪᓗ.
9ᑕᕝᕙ ᔫᓯᐱ ᓱᓕ ᓯᓐᓇᒃᑑᒪᒃᑲᓐᓂᓚᐅᕐᐳᖅ, ᐊᖓᔪᒥᓄᓪᓗ ᐅᖃᐅᓯᕆᓪᓗᓂᐅᒃ, ᐅᖃᕐᓗᓂ, “ᑕᑯᒋᑦ ᓯᓐᓇᒃᑑᒪᒃᑲᓐᓂᓚᐅᕐᐳᖓ; ᑕᑯᒋᑦ, ᓯᕿᓂᖅ, ᑕᖅᑭᕐᓗ, ᐅᓪᓗᕆᐊᓪᓗ 11ᐃᑦ ᐅᕙᓐᓄᑦ ᐹᒻᒪᒃᑎᓚᐅᕐᐳᑦ.”
10ᑕᒪᑐᒥᖓᓕ ᐊᑖᑕᓂ ᐊᖓᔪᓂᓗ ᐅᓂᒃᑲᐅᑎᖕᒪᒋᑦ, ᐊᑖᑕᖓᑕ ᓱᐊᒡᓗᒍ, ᐅᖃᐅᑎᕚ, “ᓯᓐᓇᒃᑐᐃᓄᓇ ᖃᓄᖅ ᑐᑭᓕᒃ? ᐊᓈᓁᓪᓗ ᐊᖓᔪᑎᓪᓗ ᑍᒤᓪᓚᕆᒋᐊᖃᕐᐱᑖ ᓄᓇᒧᑦ ᐹᒻᒪᒃᑎᕐᑐᒃᓴᐅᕕᑖ ᓵᖕᓂ?” 11#ᐋᐴᓯᑕᓖᑦ 7:9.ᐊᖓᔪᖏᑕᓗ ᓯᒡᒐᑎᓕᕐᐹᑦ, ᐊᑖᑕᖓᑕᓕ ᑕᒪᓐᓇ ᐃᓱᒪᒥᐅᑕᕆᓕᕐᐹ.
ᔫᓯᐱᐅᑉ ᓂᐅᕐᕈᑕᐅᓂᖓ ᐄᑦᔨᑉᑎᒧᓪᓗ ᐊᐅᓪᓚᕈᑦᔭᐅᓂᖓ
12ᐊᖓᔪᖏᓪᓕ ᐊᑖᑕᖓᑕ ᓰᐱᖁᑎᖏᓐᓂᒃ ᓂᕆᑎᑦᓯᔭᕐᑐᓚᐅᕐᐳᑦ ᓯᑭᒻᒥᐅᑉ ᖃᓂᒋᔮᓄᑦ. 13ᐃᓴᕆᐊᓕᐅᓪᓗ ᔫᓯᐱ ᐅᖃᐅᑎᕚ, “ᐊᖓᔪᑎᑦ ᓰᐱᓂᒃ ᓂᕆᑎᑦᓯᔭᕐᑐᕐᓯᒪᓐᖏᓛᑦ ᓯᑭᒻᒥ? ᑍᒃᑯᓄᖓ ᑎᓕᔪᒪᕙᒋᑦ.”
ᑖᑦᓱᒪᓕ ᐅᖃᐅᑎᕚ, “ᐊᑐᐃᓐᓇᐅᕗᖓ.”
14ᐅᖃᐅᑎᕚᓗ, “ᑍᒃᑯᓄᓐᖓᓚᐅᕆᑦ, ᑕᑯᔭᕐᑐᕐᓗᑎᑦ ᐊᖓᔪᑎᑦ ᓰᐱᖁᑎᕗᓪᓗ ᖃᓄᐃᖏᑦᓯᐊᕋᓗᐊᕐᒪᖔᑕ; ᐅᑎᕈᕕᑦ ᑐᓴᕐᑎᑦᓱᒫᕋᕕᖓ.” ᑕᕝᕙᓐᖓᑦ ᕼᐃᐸᕋᓂᐅᑉ ᓇᕐᓴᖓᓂᑦ ᑎᓕᖕᒪᒍ, ᓯᑭᒻᒧᐊᓕᕐᐳᖅ. 15ᐊᖑᒻᒧᓪᓗ ᑕᑯᔭᐅᒐᒥ ᐱᕈᕐᓰᕕᖕᒥ ᐅᑎᕐᑕᕐᑎᓪᓗᒍ; ᐊᖑᑎᐅᑉ ᐊᐱᕆᕚ, “ᓱᓇᒦᒃ ᕿᓂᕐᐱᑦ?”
16ᑭᐅᕚ, “ᐊᖓᔪᒃᑲ ᕿᓂᕐᐸᒃᑲ, ᐅᖃᐅᑎᓚᐅᓐᖓ, ᓇᓃᒃᑯᐊ ᓰᐱᓂᒃ ᒥᐊᓂᕐᓯᔪᑦ?”
17ᐊᖑᑎᐅᑉ ᐅᖃᐅᑎᕚ, “ᑕᒫᓐᖓᑦ ᓅᓯᒪᓕᕐᐳᑦ, ᐅᖃᕐᑎᓪᓗᒋᑦ ᑐᓴᓚᐅᕐᑕᒃᑲ, ‘ᑑᑖᓂᒧᐊᓚᐅᕐᑕ.’” ᑕᕝᕙ ᔫᓯᐱ ᐊᖓᔪᒥᓂᒃ ᒪᓕᒃᓴᕐᐳᖅ, ᑑᑖᓂᒥᓗ ᓇᓂᕔᑦ.
18ᓱᓕᓕ ᐅᖓᓯᒃᑎᓪᓗᒍ ᑕᑯᕚᑦ, ᖃᒡᓕᓚᐅᕐᑎᓐᓇᒍ ᓱᓕ ᑕᕝᕙ ᐃᓱᒪᓕᐅᖃᑎᒌᓕᕐᐳᑦ ᑐᖁᑦᓱᒪᓪᓗᒍ. 19ᐃᒻᒥᖕᓄᑦ ᐅᖃᖃᑦᑕᐅᑎᕗᑦ, “ᓯᓐᓇᒃᑐᑎ ᕾᓕᕐᐳᖅ. 20ᐊᑏ ᑲᑐᑎᓗᒍ, ᑐᖁᓚᐅᕐᓚᕗᑦ ᐃᑎᕐᓴᒧᓪᓗ ᑲᑕᒃᑎᓪᓗᒍ; ᐅᖃᓛᕋᑦᑕ ᐆᒪᔪᒧᑦ ᐃᕐᓯᓇᕐᑐᒧᑦ ᓂᕆᔭᕕᓂᐅᓂᕋᕐᓗᒍ, ᑕᕝᕙ ᖃᐅᔨᓛᕐᐳᒍᑦ ᓯᓐᓇᒃᑐᕆᓚᐅᕐᑕᖏᑦ ᖃᓄᐃᓕᖓᓛᕐᒪᖔᑕ.”
21ᕉᐱᓂᓕ ᑕᒪᑐᒥᖓ ᑐᓴᕋᒥ, ᑖᒃᑯᓇᓐᖓᑦ ᓴᐳᑎᕚ, ᐅᖃᕐᓗᓂ, “ᐅᓇ ᑐᖁᓐᓇᑎᒍ.” 22ᕉᐱᓂᐅᑉ ᐅᖃᐅᑎᒃᑲᓐᓂᕐᐰᑦ, “ᑐᖁᖏᓪᓗᒍ; ᐅᕗᖓ ᐃᑎᕐᓴᒧᑦ ᑲᑕᒃᑎᓚᐅᕐᓯᐅᒃ ᐃᓄᖃᖏᑦᑑᒦᑦᑐᒧᑦ, ᖃᓄᐃᓕᖏᓪᓗᒍ.” ᑍᒤᓕᓚᐅᕐᐳᖅ ᑖᒃᑯᓇᓐᖓᑦ ᓴᐳᑎᔪᒪᒐᒥᐅᒃ, ᐊᑖᑕᖓᓄᓪᓗ ᐅᑎᕐᑎᑦᓱᒪᓪᓗᒍ. 23ᑕᕝᕙ ᔫᓯᐱ ᐊᖓᔪᒥᓄᑦ ᑎᑭᒻᒪᑦ, ᐅᓕᖓ ᐊᑐᕐᑕᖓ ᐲᕐᐹᑦ, ᑕᑭᔪᖅ ᐂᖅᑯᕐᑐᓪᓗᓂ;#37:23 ᑖᓐᓇ ᑕᑭᔪᖅ ᐂᖅᑯᕐᑐᔪᖅ ᐃᓱᒪᒋᔭᐅᔪᖅ ᐊᖓᔪᖅᑳᑦ ᕿᑐᕐᖓᖏᓐᓄᑦ ᐊᑐᕐᑕᐅᓲᑎᑐᑦ ᓴᓇᓯᒪᔪᕆᔭᐅᓪᓗᓂ, ᐃᑦᔪᔪᑦ ᐃᓔᓐᓇᖏᑦ ᐅᖃᕐᒪᑕ ᖁᐱᓴᕈᐊᑦᑐᒥᒃ ᐅᕝᕙᓗ ᑕᕐᓯᕐᑐᕐᓯᒪᔪᒥᒃ 24ᑎᒍᓪᓗᒍᓗ ᐃᑎᕐᓴᒧᑦ ᑲᑕᒃᑎᑉᐹᑦ. ᐃᑎᕐᓴᕐᓕ ᓱᓇᖃᓐᖏᓚᖅ, ᐃᒪᖃᕋᓂᓗ.
25ᑕᕝᕙ ᐃᖏᑉᐳᑦ ᓂᕆᓇᓱᐊᓕᕐᓗᑎᒃ; ᑕᑯᓴᕋᒥᒡᓗ ᑕᑯᕗᑦ, ᐃᓯᒤᓕᒥᐅᓂᒃ ᐅᓄᕐᑐᓂᒃ ᐃᖏᕐᕋᖃᑎᒌᒃᑐᓂᒃ, ᓄᓇᒥᑦ ᒋᓕᐊᑎᒥᑦ ᐱᔪᓂᒃ ᑳᒥᓕᒃᑯᑦ ᐃᖏᕐᕋᔪᓂᒃ, ᑎᐱᑦᓯᐊᕆᒃᓴᐅᑎᓂᒃ ᓇᒃᓴᕐᑐᑦ, ᐹᓪᒥᓂᒃ, ᒧᕆᓂᒡᓗ, ᐄᑦᔨᑉᑎᒧᓐᖓᐅᑎᔭᒥᖕᓂᒃ. 26ᑕᕝᕙ ᔫᑕ ᖃᑕᓐᖑᑎᒥᓄᑦ ᐅᖃᓕᕐᐳᖅ, “ᓱᓇᒥᒃ ᐱᕙᓪᓕᕈᑎᖃᕋᔭᕐᐱᑕ ᓄᑲᕗᑦ ᑐᖁᒃᑲᔭᕈᑦᑎᒍ, ᐊᐅᖓᓗ ᐊᓐᖏᐊᕆᓗᒍ? 27ᓂᐅᕐᕈᑎᒋᓚᐅᕐᓚᕗᑦ ᐃᓯᒤᓕᒥᐅᓄᑦ, ᐊᒡᒐᑦᑎᓐᓄᑦ ᖃᓄᐃᓕᖏᓪᓗᒍ, ᓄᑲᕆᒐᑦᑎᒍ, ᓇᖕᒥᓂᕆᓪᓗᑎᒍᓗ.” ᑕᕝᕙ ᖃᑕᓐᖑᑎᖏᑕ ᐊᖏᖃᑎᒋᕚᑦ. 28#ᐋᐴᓯᑕᓖᑦ 7:9.ᑍᒤᒻᒪᑦ ᒥᑎᐊᓂᒥᐅᑦ ᑕᐅᕐᓰᔩᑦ ᐊᖅᑯᓵᓕᕐᐳᑦ; ᑕᕝᕙ ᔫᓯᐱ ᐃᑎᕐᓴᒥᑦ ᐊᒧᓪᓗᒍ ᐊᓂᑎᑉᐹᑦ, ᓂᐅᕐᕈᑎᒋᓪᓗᒍᓗ ᐃᓯᒤᓕᒥᐅᓄᑦ 20ᓂᒃ ᓯᐅᓪᕕᕆᓂᒃ ᐊᑭᖃᕐᓱᓂ; ᑖᒃᑯᐊᓗ ᔫᓯᐱ ᓇᒃᓴᓕᕐᐹᑦ ᐄᑦᔨᑉᑎᒧᑦ.
29ᕉᐱᓂᓕ ᐅᑎᕋᒥ ᐃᑎᕐᓴᒧᓪᓗ ᑕᑯᒋᐊᕋᒥ ᔫᓯᐱ ᑕᑯᓐᖏᓛ, ᐊᓐᓄᕌᓂᓗ ᐊᓕᒃᐰᑦ. 30ᖃᑕᓐᖑᑎᒥᓄᓪᓗ ᐅᑎᕋᒥ, ᐅᖃᕐᐳᖅ, “ᐃᓅᓱᒃᑐᖅ ᑍᑲᓃᑦᓱᓐᓃᕐᐳᖅ, ᖃᓄᐃᓐᓂᐊᓕᕐᑐᖓᓕ, ᓇᒧᓐᖓᕐᕕᒃᓴᖃᕈᓐᓃᕐᐳᖔ?”
31ᑕᕝᕙ ᔫᓯᐱᐅᑉ ᐅᓕᖓ ᑖᒃᑯᐊ ᑎᒍᕚᑦ, ᒎᑦᓯᒥᒡᓗ ᑐᖁᑦᓯᓪᓗᑎᒃ, ᐅᓕᒡᓗ ᐊᐅᖕᒧᑦ ᒥᓱᒃᑎᕐᐹᑦ. 32ᐅᓕᒡᔪᐊᖅ ᑕᑭᔪᖅ ᐂᖅᑯᕐᑐᔪᖅ#37:32 ᑖᓐᓇ ᑕᑭᔪᖅ ᐂᖅᑯᕐᑐᔪᖅ ᐃᓱᒪᒋᔭᐅᔪᖅ ᐊᖓᔪᖅᑳᑦ ᕿᑐᕐᖓᖏᓐᓄᑦ ᐊᑐᕐᑕᐅᓲᑎᑐᑦ ᓴᓇᓯᒪᔪᕆᔭᐅᓪᓗᓂ, ᐃᑦᔪᔪᑦ ᐃᓔᓐᓇᖏᑦ ᐅᖃᕐᒪᑕ ᖁᐱᓴᕈᐊᑦᑐᒥᒃ ᐅᕝᕙᓗ ᑕᕐᓯᕐᑐᕐᓯᒪᔪᒥᒃ ᓇᒃᓴᕐᐹᑦ ᐊᑖᑕᒥᖕᓄᑦ, ᐅᖃᐅᑎᓪᓗᒍᓗ, “ᐅᓇ ᓇᓂᓚᐅᕐᑕᕗᑦ; ᑕᑯᒍᒃ ᐃᕐᓂᕐᐱᑦ ᐊᓐᓄᕌᕆᖕᒪᖔᒍ ᐊᓐᓄᕌᕆᖏᒻᒪᖔᒍᓗ?”
33ᑖᑦᓱᒪᓗ ᐃᓕᑕᕆᕚ, ᐅᖃᕐᓗᓂᓗ, “ᐅᓇ ᐃᕐᓂᕐᒪ ᐅᓕᖓ; ᐃᕐᓂᕋ ᐆᒪᔪᒧᑦ ᐃᕐᓯᓇᕐᑐᒧᑦ ᓂᕆᔭᐅᓐᓂᕐᐳᖅ; ᔫᓯᐱ ᓇᓗᓇᓐᖏᓚᖅ ᓄᖑᑕᐅᑦᓯᐊᕐᑐᕕᓂᖅ.” 34ᑕᕝᕙ ᔧᑰᑉ ᐊᓐᓄᕌᓂ ᐊᓕᒃᐰᑦ, ᖃᓪᓗᓈᕐᑕᒥᒡᓗ ᐳᑐᕐᓛᒥᒃ ᐊᑎᓯᓪᓗᓂ, ᐃᕐᓂᓂᓗ ᕿᒃᓵᒍᑎᒋᕚ ᐅᓪᓗᓂᒃ ᐅᓄᕐᑐᓂᒃ. 35ᐃᕐᓂᖏᑕᓕ ᐸᓂᖏᑕᓗ ᑕᒪᕐᒥᒃ ᓮᒻᒪᕐᓴᕋᓱᐊᕋᓗᐊᕐᐹᑦ; ᓮᒻᒪᕐᓴᕐᑕᐅᔪᒪᓐᖏᓚᕐᓕ, ᐅᖃᕐᓗᓂᓗ, “ᕿᒃᓵᒻᒪᕆᒡᓗᖓ ᑐᖁᖓᔪᑦ ᐃᓂᖓᓄᐊᖔᕈᒪᓕᕐᐳᖓ ᐃᕐᓂᕋ ᐅᐸᒡᓗᒍ.” ᑕᕝᕙ ᐊᑖᑕᖓᑕ ᑍᒫᒃ ᕿᒃᓴᕕᒡᔪᐊᕈᑎᒋᓚᐅᕐᐹ.
36ᑍᑦᓱᒪᓂᐅᑎᓪᓗᒍᓕ ᒥᑎᐊᓂᒥᐅᑦ ᓂᐅᕐᕈᑎᒋᕚᑦ ᐄᑦᔨᑉᑎᒥ ᐹᑎ-ᐸᕆᒧᑦ, ᐰᕉᑉ ᐊᖓᔪᖅᑳᖁᑎᖓᓄᑦ, ᐊᖓᔪᖅᑳᒃᑯᕕᖕᒥ ᖃᐅᔨᓴᕐᑏᑦ ᐊᖓᔪᖅᑳᖓᓐᓄᑦ.
Selectat acum:
ᒨᓯᓯ ᓯᕗᓪᓖᑦ 37: EAIB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Eastern Arctic Inuktitut Bible © Canadian Bible Society, 2012, 2021-2023.