ᒨᓯᓯ ᓯᕗᓪᓖᑦ 35
35
ᒎᑎᐅᑉ ᓮᒻᒪᕐᑎᑦᓯᓂᖓ ᔧᑯᒥᒃ ᐱᑎᓕᒥ
1 #
ᒨᓯᓯ ᓯᕗᓪᓖᑦ 28:11-17. ᒎᑎ ᔧᑯᒧᑦ ᐅᖃᕐᐳᖅ, “ᒪᑭᓪᓗᑎᑦ, ᐱᑎᓕᒧᑦ ᐂᓕᕆᑦ, ᑍᑲᓂᓗ ᓄᓇᑖᕐᓗᑎᑦ; ᑕᕝᕙᓂᓗ ᑐᓂᕐᕈᓯᕐᕕᓕᐅᕐᓗᑎᑦ ᒎᑎᒧᑦ ᐃᓕᖕᓄᑦ ᓴᖅᑭᓚᐅᕐᑐᒧᑦ ᕿᒫᑎᓪᓗᑎᑦ ᐊᖓᔪᖕᓂᑦ ᐄᓴᒥᑦ.”
2ᑕᕝᕙ ᔧᑯ ᓇᖕᒥᓂᕐᒥᓄᑦ ᐃᓚᒋᔭᓕᒫᒥᓄᓪᓗ ᐅᖃᕐᐳᖅ, “ᐃᓅᖃᑎᑐᖃᕆᓐᖏᑕᑦᑕ ᒎᑎᓐᖑᐊᖏᑦ ᐱᓯᒪᔭᓯ ᐃᒋᓚᐅᕐᓯᐅᒃ; ᐃᓕᑦᓯᓐᓂᒃ ᓴᓗᒻᒪᕐᓴᕆᑦᓯ, ᐊᓯᖏᓐᓂᒡᓗ ᐊᓐᓄᕌᕐᓗᓯ. 3ᑕᕝᕙᓐᖓᑦ ᐊᐅᓪᓚᕐᓂᐊᓕᕋᑦᑕ ᐱᑎᓕᒧᓐᖓᐅᓗᑕ, ᑍᑲᓂ ᑐᓂᕐᕈᓯᕐᕕᓕᐅᕐᓂᐊᕋᒪ ᒎᑎᒧᑦ ᐅᕙᓐᓂᒃ ᑐᓴᓚᐅᕐᑐᒧᑦ ᐃᓱᒪᔮᕐᓇᕐᑐᒦᑎᓪᓗᖓ ᐅᕙᓐᓂᒡᓗ ᐃᓚᕾᓐᓇᖃᑦᑕᕐᑐᒧᑦ ᓇᒧᓐᖓᕋᓗᐊᕌᖓᒪ.” 4ᑍᒤᒻᒪᑦ ᔧᑯ ᑐᓂᕚᑦ ᑕᒤᓐᓂᒃ ᐃᓅᖃᑎᑐᖃᕆᓐᖏᑕᖏᑕ ᒎᑎᓐᖑᐊᖏᓐᓂᒃ ᐱᒋᔭᒥᖕᓂᒃ, ᓯᐅᑎᒥᐅᑕᓂᒡᓗ ᐊᑐᕐᑕᒥᖕᓂᒃ; ᑖᒃᑯᐊᓗ ᔧᑰᑉ ᓴᐅᕔᑦ ᓄᓇᒧᑦ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᐊᑖᓄᑦ ᓯᑭᒻᒥᐅᑉ ᖃᓂᒋᔮᓄᑦ.
5ᑕᕝᕙᓐᖓᑦ ᐊᐅᓪᓚᓕᕐᓗᑎᒃ, ᓄᓇᓖᑦ ᖃᓂᒋᔮᓃᑦᑐᑦ ᑲᑉᐱᐊᓱᖕᓂᕐᔪᐊᕐᒧᑦ ᒎᑎᒥᑦ ᐱᔪᒧᑦ ᑎᑭᑕᐅᕗᑦ, ᒪᓕᒃᓴᖁᓇᒋᑦ ᔧᑰᑉ ᐃᕐᓂᖏᓐᓂᒃ. 6ᔧᑯᓗ ᐃᓅᖃᑎᓕᒫᖏᓪᓗ ᑎᑭᑉᐳᑦ ᓚᔾᒧᑦ, ᑕᕝᕗᖓ ᑍᔭᐅᔪᒧᑦ ᐱᑎᓕᒥᒃ, ᑬᓇᓂᒥᐅᑦ ᓄᓇᖓᓃᑦᑐᒧᑦ. 7ᑕᕝᕙᓂᓗ ᑐᓂᕐᕈᓯᕐᕕᓕᐅᕐᐳᖅ, ᑖᓐᓇᓗ ᐊᑎᖃᕐᑎᑉᐹ ᐃᓪ-ᐱᑎᓕᒥᒃ, ᑕᕝᕙᓂ ᒎᑎᐅᑉ ᓴᖅᑭᕝᕕᒋᓚᐅᕐᒪᒍ ᕿᒫᑎᓪᓗᒍ ᐊᖓᔪᒥᓂᑦ. 8ᑎᐴᕋᓗ ᕇᐱᑲᐅᑉ ᐃᑲᔪᕐᑎᖓ ᑐᖁᕗᖅ, ᐃᓗᕕᕐᑕᐅᓪᓗᓂᓗ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᐊᑖᓄᑦ ᐱᑎᓕᐅᑉ ᐊᑖᓃᑦᑐᒧᑦ; ᑖᓐᓇᓗ ᐊᑦᓯᕐᐹᑦ ᐊᑦᓘᓐ-ᐸᑯᑎᒥᒃ.
9ᒎᑎᐅᓪᓕ ᔧᑯ ᓴᖅᑭᕝᕕᒋᒃᑲᓐᓂᕐᐹ, ᐅᑎᕐᓯᒪᓕᕐᑎᓪᓗᒍ ᐸᑖᓐ-ᐊᕋᓐᒥᑦ ᓮᒻᒪᕐᑎᓪᓗᒍᓗ. 10#ᒨᓯᓯ ᓯᕗᓪᓖᑦ 32:28.ᒎᑎᐅᓪᓗ ᐅᖃᐅᑎᕚ, “ᔧᑯᒥᒃ ᐊᑎᖃᕋᕕᑦ; ᒫᓐᓇᒥᑦ ᔧᑯᒥᒃ ᑍᔭᐅᓂᐊᕈᓐᓃᕐᐳᑎᑦ, ᐃᓴᕆᐊᓕᒥᒃ ᐊᑎᖃᕐᓂᐊᓕᕐᐳᑎᑦ.” ᑍᒤᒻᒪᑦ ᐃᓴᕆᐊᓕᒥᒃ ᑍᔭᐅᕙᓕᓚᐅᕐᐳᖅ. 11#ᒨᓯᓯ ᓯᕗᓪᓖᑦ 17:4-8.ᒎᑎᐅᓪᓗ ᐅᖃᐅᑎᕚ, “ᐅᕙᖓ ᒎᑎᐅᕗᖓ ᐊᔪᒐᖃᖏᑦᑐᖅ; ᐅᓄᕐᑐᓂᒃ ᕿᑐᕐᖏᐅᕆᑦᓯ ᐅᓄᕐᓯᕙᓪᓕᐊᓗᓯᓗ; ᐃᓅᖃᑎᒌᒡᔪᐊᑦ ᐃᓅᖃᑎᒌᒐᓴᒡᔪᐊᓪᓗ ᐃᓕᖕᓂᑦ ᐱᔪᒫᕐᐳᑦ, ᐊᖓᔪᖅᑳᕐᔪᐊᓂᒡᓗ ᑭᖑᕚᖃᕈᒫᕐᐳᑎᑦ. 12ᓄᓇ ᑐᓂᓚᐅᕐᑕᕋ ᐂᑉᕋᕼᐋᒻᒧᑦ ᐂᓴᑭᒧᓪᓗ ᑐᓂᓂᐊᕆᕙᕋ ᐃᓕᖕᓄᑦ, ᑭᖑᕚᒃᓴᕐᓄᓪᓗᑦᑕᐅᖅ ᑐᓂᔪᒫᕆᕙᕋ ᑭᖑᓂᕐᓂ.” 13ᒎᑎᓗ ᑕᕝᕙᓐᖓᑦ ᖁᒻᒧᐊᒃᐳᖅ ᐅᖃᓪᓚᒌᕋᒥ ᔧᑯᒧᑦ. 14#ᒨᓯᓯ ᓯᕗᓪᓖᑦ 28:18,19.ᔧᑯᓗ ᑕᕝᕙᓂ ᓇᑉᐸᕐᓯᕗᖅ ᐅᖃᓪᓚᒡᕕᐅᕕᖕᒥᓂ, ᐅᔭᕋᖕᒥᒃ ᓇᓗᓁᒃᑯᑕᕐᒥᒃ; ᐃᒥᒃᓴᓕᐊᕆᓯᒪᔪᒥᒡᓗ ᑐᓂᕐᕈᑎᒃᓴᒥᒃ ᑯᕝᕕᕆᕚ, ᓇᐹᕐᑑᓪᓗ ᐅᕐᓱᖓᓂᒃ ᑯᕝᕕᕆᒋᓪᓗᒍ. 15ᑖᓐᓇᓗ ᔧᑰᑉ ᐊᑎᖃᕐᑎᑉᐹ ᐱᑎᓕᒥᒃ ᑕᕝᕙᓂ ᒎᑎᐅᑉ ᐅᖃᕐᕕᒋᓚᐅᕐᒪᒍ.
ᕅᒋᓕᐅᑉ ᑐᖁᓂᖓ
16ᑕᕝᕙᓐᖓᓪᓗ ᐱᑎᓕᒥᑦ ᐊᐅᓪᓚᕐᐳᑦ, ᓱᓕ ᐃᐸᕋᑦᒧᑦ ᐅᖓᓯᒃᑎᓪᓗᒋᑦ, ᕅᒋᓕᐅᑉ ᐃᕐᓂᕕᒃᓴᖓ ᓇᓪᓕᐅᑎᕗᖅ, ᐃᕐᓂᓱᒃᓗᓂᓕ ᐃᕐᓂᔪᓐᓁᓪᓕᖅᑲᓕᕐᐳᖅ ᐋᓐᓂᐊᒻᒪᕆᒃᓗᓂᓗ. 17ᐃᕐᓂᓱᒃᓗᓂᓕ ᐋᓐᓂᐊᕐᓂᖓᑕ ᐱᓗᐊᕐᓂᖓᓂ, ᐃᕐᓂᓱᒃᓰᔨᐅᑉ ᐅᖃᐅᑎᕚ, “ᑲᑉᐱᐊᓱᖏᓪᓗᑎᑦ ᐃᕐᓂᕐᑖᒃᑲᓐᓂᓕᕋᕕᑦ.” 18ᑐᖁᓕᒑᓕᕐᓗᓂᓕ ᐊᓂᕐᓇᖏᕐᓂᐊᓕᕐᓱᓂ, ᐃᕐᓂᕐᑖᓂ ᐊᑦᓯᕐᐹ ᐱᓐ-ᐆᓂᒥᒃ; ᐊᑖᑕᖓᑕᓕ ᐊᑦᓯᕐᐹ ᐱᓐᔭᒥᓂᒥᒃ.
19ᕅᒋᓕᓕ ᑐᖁᖕᒪᑦ, ᐃᓗᕕᕐᑕᐅᕗᖅ ᐃᐸᕋᑕᓕᐊᕆᐊᑉ ᐊᖅᑯᑎᖓᓂ, ᒫᓐᓇᒃᑯᑦ ᐊᑎᖃᓕᕐᑑᑉ ᐱᑦᓕᐊᒥᒃ. 20ᑕᕝᕙᓂᓗ ᔧᑯ ᐃᖅᑲᐅᒪᑦᔪᑎᒃᓴᒥᒃ ᐃᓗᕕᖓᑕ ᓇᑉᐸᖅᑯᑎᖓᓂᒃ ᓇᑉᐸᕐᓯᕗᖅ, ᐅᓪᓗᒥᒧᓪᓗ ᓱᓕ ᑎᑭᓪᓗᒍ ᑖᓐᓇ ᕅᒋᓕᐅᑉ ᐃᓗᕕᖓᑕ ᓇᑉᐸᖅᑯᑎᒋᕚ. 21ᐃᓴᕆᐊᓕᒥᐅᓪᓕ ᓱᓕ ᐃᖏᕐᕋᕗᑦ ᑕᖕᒫᕐᓗᑎᒡᓗ ᐄᑕᕆᐅᑉ ᓇᐸᔪᖓᑕ ᐃᒡᓗᒐᓮᑦ ᐅᖓᑖᓂ.
ᔧᑰᑉ ᐃᕐᓂᖏᑦ
ᑯᕉᓂᑲ ᓯᕗᓪᓖᑦ 2:1-2
22 #
ᒨᓯᓯ ᓯᕗᓪᓖᑦ 49:4. ᐃᓴᕆᐊᐅᓕ ᑕᕝᕙᓂ ᓄᓇᖃᕐᑎᓪᓗᒍ, ᕉᐱᓂ ᐃᓐᓇᖓᖃᑎᖃᕐᐳᖅ ᐱᓪᕼᐊᒥᒃ, ᐊᑖᑕᖓᑕ ᐱᔨᒋᓪᓗᒍ ᓄᓕᐊᒃᑲᓐᓂᖓᓂ; ᐃᓴᕆᐊᓪᓗ ᑕᒪᓐᓇ ᑐᓴᕐᐹ.
ᔧᑯ ᐃᕐᓂᖃᓚᐅᕐᐳᖅ 12ᓂᒃ. 23ᓕᐊᑉ ᐃᕐᓂᖏᑦ ᐅᑯᐊᖑᕗᑦ; ᕉᐱᓂ (ᔧᑰᑉ ᐃᕐᓂᖏᓐᓂᑦ ᐊᖓᔪᒃᓯᕐᐹᖅ), ᓯᒥᐅᓂ, ᓕᕔ, ᔫᑕ, ᐃᓴᑳᕆ, ᐊᒻᒪ ᓯᐳᓗᓂ. 24ᕅᒋᓕᐅᑉ ᐃᕐᓂᖏᒃ ᐅᑯᐊᖑᕗᒃ; ᔫᓯᐱ, ᐱᓐᔭᒥᓂᓗ. 25ᕅᒋᓕᐅᑉ ᐱᔨᖓᑕ ᐱᓪᕼᐊᐅᑉ ᐃᕐᓂᖏᑦ ᐅᑯᐊᖑᕗᑦ; ᑖᓐ, ᓈᑉᑕᓕᓗ. 26ᓕᐊᓪᓕ ᐱᔨᖓᑕ ᔨᐅᓪᐸᐅᑉ ᐃᕐᓂᖏᑦ ᐅᑯᐊᖑᕗᑦ; ᒑᑎ ᐋᓱᕆᓗ. ᑖᒃᑯᐊ ᔧᑰᑉ ᐃᕐᓂᖏᑦ ᐃᕐᓂᐊᖑᓚᐅᕐᐳᑦ ᐸᑖᓐ-ᐊᕋᒻᒥ.
ᐂᓴᑭᐅᑉ ᑐᖁᓂᖓ
27 #
ᒨᓯᓯ ᓯᕗᓪᓖᑦ 13:18. ᔧᑯᓗ ᐊᑖᑕᒥᓄᐊᕐᐳᖅ ᐂᓴᑭᒧᑦ ᓄᓇᒥ ᒪᒻᕆᒦᑦᑐᒧᑦ, ᐅᕝᕙᓗ ᑭᕆᐊᑦ-ᐊᕋᐸᒧᑦ ᕼᐃᐸᕋᓐᒥᒃ ᑍᔭᐅᔪᒧᑦ, ᑕᕝᕗᖓ ᐂᑉᕋᕼᐋᒻ ᐂᓴᑭᐅᓪᓗ ᓄᓇᑖᕆᓚᐅᕐᑕᖓᓄᑦ. 28ᐂᓴᑭᓕ ᐃᓅᓚᐅᕐᐳᖅ ᐊᕐᕌᒍᓂᒃ 180ᓂᒃ 29ᐂᓴᑭᓕ ᐊᓂᕐᓇᖏᕐᐳᖅ; ᑐᖁᒐᒥ ᐃᓚᒥᓄᑦ ᐅᑎᕐᐳᖅ, ᐃᑦᑐᐊᓘᓕᕐᓗᓂ; ᐃᕐᓂᖏᒃᑕᓗ ᐄᓴᐅᑉ ᔧᑰᓪᓗ ᐃᓗᕕᕐᐹ.
Selectat acum:
ᒨᓯᓯ ᓯᕗᓪᓖᑦ 35: EAIB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Eastern Arctic Inuktitut Bible © Canadian Bible Society, 2012, 2021-2023.