ᒨᓯᓯ ᓯᕗᓪᓖᑦ 33
33
ᔧᑰᑉ ᑲᑎᓯᓂᖓ ᐄᓴᒥᒃ
1ᔧᑰᓪᓗ ᕿᓂᕋᒥ ᑕᐅᕗᖓ, ᑕᑯᒋᑦ, ᐄᓴ ᑕᑯᕚ ᑎᑭᓕᕐᑐᖅ, ᐃᓚᖃᕐᓗᓂ 400ᓂᒃ ᐊᖑᑎᓂᒃ, ᑍᒤᒻᒪᑦ ᕿᑐᕐᖓᓂ ᐊᒡᒍᕐᐰᑦ ᓕᐊᑉ ᕿᑐᕐᖓᖏᑦ, ᕅᒋᓕᐅᓪᓗ, ᒪᕐᕉᒡᓗ ᐱᔩᒃ ᕿᑐᕐᖓᖏᑦ. 2ᐊᕐᓈᒡᓗ ᐱᔩᒃ ᒪᕐᕉᒃ ᕿᑐᕐᖓᖏᓪᓗ ᓯᕗᓪᓕᕐᐸᐅᑎᑉᐰᑦ, ᑭᖑᓪᓕᐅᑎᓪᓗᒍ ᓕᐊ ᕿᑐᕐᖓᖏᓪᓗ, ᑭᖑᓪᓕᕐᐸᐅᑎᓪᓗᒍ ᕅᒋᓕᓗ ᔫᓯᐱᓗ. 3ᓇᖕᒥᓂᕐᓕ ᓯᕗᓂᖓᓐᓄᐊᕐᓗᓂ, ᓄᓇᒧᑦ ᐅᑯᖃᑦᑕᕐᐳᖅ ᐊᖓᔪᒥᓄᑦ ᖃᒡᓕᕙᓪᓕᐊᓪᓗᓂ 7ᐃᑐᕐᓗᓂ. 4ᐄᓴᐅᓪᓕ ᐅᓪᓚᒃᓗᓂ ᐸᕐᕆᐊᕐᐹ, ᐃᕿᓪᓗᓂᐅᒡᓗ ᑯᓂᒃᐹ, ᑕᒪᕐᒥᒡᓗ ᕿᐊᓕᕐᓗᑎᒃ. 5ᐄᓴᓗ ᑕᑯᓴᕋᒥ ᑕᑯᕗᖅ ᐊᕐᓇᓂᒃ ᕿᑐᕐᖓᖏᓐᓂᒡᓗ, ᐊᐱᕆᓪᓗᓂᓗ, “ᐅᑯᐊᓕ ᑭᓇᒃᑯᑦ ᐃᓚᒋᔭᑎᑦ?”
ᔧᑰᑉ ᑭᐅᕚ, “ᐅᑯᐊ ᒎᑎᐅᑉ ᐱᑦᓯᐊᕐᓂᕐᒥᓄᑦ ᐱᔨᖕᓄᑦ ᑐᓂᓯᒪᔭᖏᑦ.”
6ᑕᕝᕙ ᐊᕐᓈᒃ ᐱᔩᒃ ᕿᑐᕐᖓᓂ ᐃᓚᒋᓪᓗᒋᑦ ᕾᕗᑦ, ᐅᑯᓪᓗᑎᒡᓗ; 7ᑍᒫᒃᑕᐅᖅ ᓕᐊ ᕿᑐᕐᖓᒥᓂᒃ ᐃᓚᖃᕐᓗᓂ ᕾᒋᕗᑦ ᐹᒻᒪᒃᓗᑎᒡᓗ; ᑭᖑᓪᓕᕐᐸᐅᓪᓗᑎᒃ ᔫᓯᐱᒃᑯᒃ ᕅᒋᓕᒃᑯᒃ ᕾᒋᕘᒃ ᐹᒻᒪᒃᓗᑎᒡᓗ.
8ᑕᕝᕙ ᐄᓴ ᐅᖃᕐᐳᖅ, “ᐃᒃᑯᐊᓕ ᓯᕗᓪᓖᑦ ᑲᑎᖃᑦᑕᖅᑲᐅᔭᒃᑲ ᖃᓄᐃᓕᐅᕈᑎᑎᑦ?”
ᔧᑰᑉ ᑭᐅᕚ, “ᐃᒃᑯᐊ ᐊᖓᔪᖅᑳᓐᓄᑦ ᖁᕕᒋᔭᐅᑦᔪᑎᒋᓇᓱᒃᑕᒃᑲ.”
9ᐄᓴᓕ ᐅᖃᕐᐳᖅ, “ᐱᖁᑎᖃᕐᑐᖓ ᓈᒻᒪᒃᑐᓂᒃ, ᖃᑕᓐᖑᑏᒃ; ᐱᖁᑎᑎᑦ ᐱᓯᒪᑐᐃᓐᓇᓕᒃᑭᑦ.”
10ᔧᑯ ᐅᖃᕐᐳᖅ, “ᐋᒃᑲ, ᖁᕕᐊᒋᒍᕕᖓ, ᑐᓂᕐᕈᑎᒃᑲ ᐃᓚᓕᐅᓕᒃᑭᑦ; ᑮᓇᕐᓂᒃ ᑕᑯᑎᓪᓗᖓ ᒎᑎᐅᑉ ᑮᓇᖓᓂᒃ ᑕᑯᔪᑎᑐᑦ ᑍᒤᓐᓇᒪ, ᖁᕕᐊᓱᑦᓯᐊᕐᓱᑎᑦ ᐃᓚᓕᐅᕋᕕᖓ. 11ᐊᑏ ᑐᓂᕐᕈᑎᒃᓴᒃᑲ ᓇᒃᓴᕐᓯᒪᒐᒃᑭᑦ ᐃᓕᖕᓄᑦ ᐃᓚᓕᐅᓕᒃᑭᑦ; ᒎᑎᒧᑦ ᐱᑦᓯᐊᕐᕕᐅᓯᒪᒐᒪ, ᐱᒋᔭᓐᓂᒡᓗ ᓈᒻᒪᒃᓯᓯᒪᓪᓗᖓ.” ᔧᑰᓪᓗ ᐱᔭᐅᖁᓪᓚᕆᖕᒪᒋᑦ, ᑕᕝᕙ ᐄᓴᐅᑉ ᐱᑖᕆᕔᑦ.
12ᑕᕝᕙ ᐄᓴ ᐅᖃᕐᐳᖅ, “ᐊᑏ ᐊᐅᓪᓚᓕᕐᑕ, ᐃᓕᖕᓂᑦ ᓯᕗᓪᓕᐅᓗᖓ ᐊᐅᓪᓚᕐᓂᐊᕐᐳᖓ.”
13ᔧᑰᓪᓕ ᑭᐅᕚ, “ᖃᐅᔨᒪᒐᕕᑦ ᓱᕈᓰᑦ ᓴᓐᖐᑦᑑᖕᒪᑕ, ᓰᐲᓪᓗ ᐃᒻᒧᒃᓯᐅᒊᓪᓗ ᐊᒫᒪᒃᑎᑦᓯᔪᑦ ᑲᒪᒋᔭᕆᐊᖃᕐᓗᒋᑦ; ᐅᓪᓘᑉ ᐊᑕᐅᓯᐅᑉ ᐅᖓᑖᓄᑦ ᐱᓱᐃᓐᓇᕈᑎᒃ, ᐆᒪᔪᓕᒫᑦ ᑐᖁᒐᔭᕐᒪᑕ. 14ᐊᖓᔪᖅᑳᕋ ᐱᔨᒥᓂᑦ ᓯᕗᓪᓕᐅᓗᓂ ᐃᖏᕐᕋᓕᕐᓕ, ᒪᓕᖕᓂᐊᕐᐳᖓ ᓱᒃᑬᑦᑑᓗᖓ, ᐃᖏᕐᕋᓂᐊᕋᒪ ᐆᒪᔪᑦ ᐱᓱᖕᓂᖏᑦ ᒪᓕᒡᓗᒋᑦ ᓯᕗᓂᓐᓃᑦᑐᑦ, ᓱᕈᓰᓪᓗ ᐱᓱᖕᓂᖏᑦ ᒪᓕᒡᓗᒋᑦ, ᐊᖓᔪᖅᑳᓐᓄᑦ ᐊᓐᖑᑎᓚᐅᖏᓐᓂᓐᓂ ᓰᐊᕆᒧᑦ.”
15ᐄᓴᓗ ᐅᖃᕐᐳᖅ, “ᑍᒤᒻᒪᑦ ᐃᓄᖁᑎᒪ ᐃᓚᖏᓐᓂᒃ ᕿᒤᕕᒋᓕᕐᓚᒋᑦ.”
ᔧᑰᓪᓕ ᑭᐅᕚ, “ᓱᓇᒧᓪᓕ ᐊᑐᕐᓂᐊᕐᒪᑕ? ᐊᖓᔪᖅᑳᓐᓄᓪᓕ ᖁᕕᐊᒋᔭᐅᓕᑦᓴᕈᒪ ᐊᑭᓱᒃᑐᖓ.” 16ᑕᕝᕙ ᐄᓴ ᑕᕝᕙᓂ ᐅᓪᓗᒥ ᐅᑎᕆᐊᓯᕗᖅ ᓰᐊᕆᒧᑦ. 17ᔧᑯᓕ ᐃᖏᕐᕋᒐᒥ ᑕᖕᒫᕐᐳᖅ, ᑕᕝᕙᓂᓗ ᓇᖕᒥᓂᕐᒥᓂᒃ ᐃᒡᓗᓕᐅᕐᐳᖅ, ᐆᒪᔪᖁᑎᓂᓗ ᐃᓂᓕᐅᕐᓗᒋᑦ; ᑍᒤᒻᒪᑦ ᓄᓇ ᐊᑦᓯᕐᑕᐅᓚᐅᕐᐳᖅ ᓱᑰᑎᒥᒃ.
18ᔧᑯᓗ ᖃᓄᐃᖏᑦᓯᐊᕐᓗᓂ ᑎᑭᓚᐅᕐᐳᖅ ᐃᒡᓗᒐᓴᖕᓄᑦ ᓯᑭᒻᒥᒃ ᐊᑎᓕᖕᓄᑦ, ᑬᓇᓂᐅᑉ ᓄᓇᖓᓃᑦᑐᒧᑦ, ᐸᑖᓐ-ᐊᕌᒻᒥᑦ ᐱᓪᓗᓂ; ᐃᒡᓗᒐᓮᓪᓗ ᖃᓂᒋᔮᓂ ᑕᖕᒫᕐᑎᓚᐅᕐᐳᖅ. 19#ᔮᓱᐊ 24:32; ᔪᐊᓇᓯ 4:5.ᓄᓇᓗ ᑕᖕᒫᕐᕕᒋᔭᓂ ᓂᐅᕕᐊᕆᕚ ᕼᐊᒧᕆᐅᑉ ᑭᖑᕚᖏᓐᓂᑦ, ᓯᑭᒻᒥᐅᑉ ᐊᑖᑕᖓᓂᑦ, ᓯᐅᓪᕕᕆᓄᑦ 100ᓄᑦ. 20ᑕᕝᕙᓂᓗ ᑐᓂᕐᕈᓯᕐᕕᓕᐅᕐᐳᖅ ᐊᑦᑎᕐᓱᓂᐅᒡᓗ ᐃᓪ ᐃᓗᕼᐃ-ᐃᓴᕆᐊᓪᒥᒃ.
Selectat acum:
ᒨᓯᓯ ᓯᕗᓪᓖᑦ 33: EAIB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Eastern Arctic Inuktitut Bible © Canadian Bible Society, 2012, 2021-2023.