ᒨᓯᓯ ᓯᕗᓪᓖᑦ 29
29
ᔧᑰᑉ ᑎᑭᓐᓂᖓ ᓔᐸᓂᐅᑉ ᐊᖏᕐᕋᖓᓄᑦ
1ᔧᑯᓗ ᐅᐸᒃᑕᒥᓄᑦ ᐂᓕᕆᕗᖅ, ᑎᑭᓪᓗᓂᓗ ᐃᓄᖕᓄᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓄᑦ. 2ᕿᓂᕋᒥᓗ, ᓇᑎᕐᓇᒥ ᐃᒥᕐᑕᕐᕕᖕᒥᒃ, ᓰᐱᓂᒡᓗ ᐊᕚᑖᓂ ᐊᖁᐱᔪᖃᕐᐳᖅ ᐱᖓᓲᓕᖅᑲᖓᔪᓂᒃ; ᑕᕝᕙᓐᖓᓪᓗ ᓰᐲᑦ ᐃᒥᕐᑕᕐᕕᖕᒥᑦ ᐃᒥᕐᑎᑕᐅᕙᒃᐳᑦ, ᐅᔭᕋᖕᒥᒡᓗ ᐊᖏᔪᒥᒃ ᖄᖓᒍᑦ ᒪᑐᓯᒪᓪᓗᓂ. 3ᓰᐲᓪᓗ ᑲᑎᑕᐅᔭᕌᖓᑕ ᑕᕝᕗᖓ, ᓰᐱᓕᕆᔨᓂᑦ ᒪᑐᐊ ᐊᒃᓴᑲᕐᑎᑕᐅᕙᒃᓱᓂ ᐃᒥᕐᑕᕐᕕᐅᑉ ᐹᖓᓂᑦ, ᓰᐱᖁᑎᑎᒃ ᐃᒥᕐᑎᑉᐸᒃᓗᒋᑦ, ᐱᔭᕇᕌᖓᒥᒃ ᐅᔭᕌᓗᒃ ᐅᑎᕐᑎᑉᐸᒃᑭᓪᓗᒍ ᐹᖓᓄᑦ.
4ᔧᑰᓪᓗ ᐊᐱᕆᓕᕐᐰᑦ, “ᖃᑕᓐᖑᑎᒃᑲ ᓇᑭᓐᖔᕐᓯᒪᕕᓰ?”
ᑖᒃᑯᐊ ᑭᐅᕗᑦ, “ᕼᐊᕋᓐᒥᓐᖔᕐᓯᒪᕗᒍᑦ.”
5ᑕᕝᕙ ᐊᐱᕆᒃᑲᓐᓂᕐᐰᑦ, “ᖃᐅᔨᒪᕕᓯᐅᒃ ᓔᐸᓂ ᓇᕼᐅᕆᐅᑉ ᐃᕐᓂᖓ?”
ᑖᒃᑯᐊ ᑭᐅᕙᑦ, “ᑍᓐᓇ ᖃᐅᔨᒪᔭᕗᑦ.”
6ᐊᐱᕆᒋᕔᑦ, “ᖃᓄᐃᖏᒃᑲᓗᐊᕐᐹ?”
ᑖᒃᑯᐊ ᑭᐅᕚᑦ, “ᖃᓄᐃᖏᑦᑐᖅ; ᑕᑯᓕᕈᒃ ᑕᕝᕙ ᐸᓂᖓ ᕅᒋᓕ ᕾᓕᕐᐳᖅ ᓰᐱᖁᑎᖏᓐᓂᒃ ᓇᒃᓴᕐᓗᓂ.”
7ᔧᑯ ᐅᖃᕐᐳᖅ, “ᑕᒃᑰᒃ ᓱᓕ ᐅᓪᓗᑐᖃᐅᓂᐊᕐᒪᑦ, ᓰᐱᓂᒡᓗ ᑲᑎᑎᕕᒃᓴᖅ ᓈᒻᒪᒃᓯᖏᓪᓗᓂ; ᓱᖕᒪᑦ ᐃᒥᕐᑎᓚᐅᕐᓗᒋᑦ ᓂᕆᕕᒋᕙᒃᑕᖏᓐᓄᑦ ᐊᐅᓪᓚᕈᑎᒃᑲᓐᓂᓐᖏᓚᓯᐅᒃ?”
8ᑖᒃᑯᐊ ᑭᐅᕚᑦ, “ᑍᒤᑦᑐᓐᓇᖏᑦᑐᒍᑦ ᓰᐱᓕᒫᑦ ᑕᒪᐅᓐᖓᓚᐅᖅᑳᖏᓐᓂᖏᓐᓂ, ᐅᔭᕋᒡᓗ ᐃᒥᕐᑕᕐᕕᐅᑉ ᒪᑐᐊ ᐹᖓᓂᑦ ᓴᓂᕐᕙᒃᑕᐅᒃᐸᑦ ᑭᓯᐊᓂ ᐃᒥᕐᑎᑦᓯᔪᓐᓇᕐᓂᐊᕐᐳᒍᑦ ᓰᐱᓂᒃ.”
9ᔧᑯᓕ ᓱᓕ ᐅᖃᖃᑎᖃᕐᑎᓪᓗᒍ ᑖᒃᑯᓂᖓ, ᕅᒋᓕ ᑎᑭᐅᑎᕗᖅ ᐊᑖᑕᒥ ᓰᐱᖁᑎᖏᓐᓂᒃ ᓇᒃᓴᕐᓗᓂ; ᑲᒪᒋᒐᒥᒋᑦ. 10ᔧᑰᓪᓗ ᕅᒋᓕ ᑕᑯᒐᒥᐅᑉ ᓔᐸᓂᐅᑉ ᓰᐱᖁᑎᖏᓐᓂᒃ ᑲᒪᒋᔭᓕᒃ, ᐃᒥᕐᑕᕐᕕᖕᒧᐊᕐᐳᖅ ᐅᔭᕌᓗᒡᓗ ᒪᑐᒋᔭᖓ ᐊᒃᓴᑲᕐᑎᓪᓗᒍ ᔧᑰᑉ ᐊᓈᓇᖓᑕ ᐊᓂᖓᑕ ᓔᐸᓂᐅᑉ ᓰᐱᖁᑎᖏᑦ ᐃᒥᕐᑎᑉᐰᑦ. 11ᔧᑰᓪᓗ ᕅᒋᓕ ᑯᓂᒃᓗᓂᐅᒃ ᓂᐱᖃᕐᓗᓂ ᕿᐊᓯᕗᖅ. 12ᔧᑰᓪᓗ ᐅᖃᐅᑎᕚ, “ᐊᑖᑕᕕᑦ ᐃᓚᒋᕚᖓ, ᕇᐱᑲᐅᑉ ᐃᕐᓂᖓ.”
ᕅᒋᓕᓗ ᐅᓪᓚᒃᓯᕗᖅ ᐊᑖᑕᓂ ᐅᖃᐅᑎᔭᕐᑐᕐᓗᒍ. 13ᓔᐸᓂᓗ ᐅᔪᕈᒥᓂᒃ ᔧᑯᒥᒃ ᑐᓴᕋᒥ ᐅᓪᓚᒃᓗᓂ ᐸᕐᕆᐊᕐᐹ ᐃᕿᓪᓗᒍᓗ ᑯᓂᒃᐹ, ᐊᖏᕐᕋᒥᓄᐊᖃᑎᒋᓪᓗᒍᓗ. ᔧᑰᓪᓗ ᓔᐸᓂ ᐅᓂᒃᑳᕐᕕᒋᕚ ᖃᓄᐃᓐᓂᕆᓚᐅᕐᑕᓕᒫᒥᓂ. 14ᓔᐸᓂᓗ ᐅᖃᕐᐳᖅ, “ᓱᓕᔪᒥᒃ ᐅᕕᓂᖃᑎᒋᕙᒋᑦ ᐊᐅᖃᑎᒋᓪᓗᑎᓪᓗ,” ᔧᑯᓗ ᑕᖅᑭᓕᒫᒥᒃ ᑕᕝᕙᓃᓚᐅᕐᐳᖅ.
ᔧᑰᑉ ᐱᔨᑦᓯᕐᓂᖓ ᓔᐸᓂᒥᒃ ᕅᒋᓕ ᓕᐊᓗ ᐱᓪᓗᒋᒃ
15ᓔᐸᓂ ᔧᑯᒧᑦ ᐅᖃᕐᐳᖅ, “ᐃᓚᒋᒐᒃᑭᑦ ᐅᕙᓐᓄᑦ ᐊᑭᖃᖏᓪᓗᒍ ᓴᓇᔭᕆᐊᖃᓐᖏᓚᑎᑦ ᐃᓚᒌᖕᓂᕗᒃ ᐱᓪᓗᒍ, ᖃᓄᖅ ᐊᖏᑎᒋᔪᒥᒃ ᐊᑭᓕᕐᑕᐅᖃᑦᑕᕈᒪᕖᑦ?” 16ᓔᐸᓂᓕ ᐸᓂᖃᓚᐅᕐᐳᖅ ᒪᕐᕉᖕᓂᒃ; ᐊᖓᔪᒃᓯᖅ ᓕᐊᒥᒃ ᐊᑎᖃᕐᐳᖅ ᓄᑲᕐᓯᕐᓗ ᕅᒋᓕᒥᒃ ᐊᑎᖃᕐᓗᓂ. 17ᓕᐊᓪᓕ ᐃᔨᖏᒃ ᐱᖁᓐᓂᕐᑑᓚᐅᕐᐴᒃ, ᕅᒋᓕᓕ ᐃᓂᖁᓇᕐᑑᓚᐅᕐᐳᖅ ᑎᒥᑦᓯᐊᕆᒃᓗᓂᓗ.
18ᔧᑰᓪᓗ ᕅᒋᓕ ᓇᒡᓕᒋᓚᐅᕐᐹ; ᐅᖃᓗᓂᓗ, “ᐱᔨᑦᓯᕐᓂᐊᕐᐸᒋᑦ ᐊᕐᕌᒍᓂᒃ 7ᓂᒃ ᓄᓕᐊᕐᑖᕐᑎᓐᓂᐊᕈᕕᖓ ᕅᒋᓕᒥᒃ.”
19ᓔᐸᓂᐅᑉ ᑭᐅᕚ, “ᓈᒻᒪᖕᓂᕐᓴᐅᕗᖅ ᐃᓕᖕᓄᑦ ᑐᓂᒍᒃᑯ ᐊᓯᖕᓄᑦ ᐊᖑᒻᒧᑦ ᑐᓂᒐᔭᕈᒃᑯ; ᓇᔪᕐᓂᐊᓕᕐᐸᕐᒪ.” 20ᑕᕝᕙ ᔧᑯ ᐊᕐᕌᒍᓂᒃ 7ᓂᒃ ᐱᔨᑦᓯᓚᐅᕐᐳᖅ ᕅᒋᓕᒥᒃ ᐱᔪᒪᓪᓗᓂ, ᐅᓪᓗᐃᓪᓗ ᐅᓄᖏᑦᑐᑯᓗᒃᑎᑐᑦ ᐃᓱᒪᒋᓚᐅᕐᐰᑦ ᕅᒋᓕ ᓇᒡᓕᒋᒐᒥᐅᒃ.
21ᑕᕝᕙ ᔧᑯ ᓔᐸᓂᒧᑦ ᐅᖃᕐᐳᖅ, “ᓄᓕᐊᒃᓴᕋ ᐅᕙᓐᓄᑦ ᑐᓂᓕᕈᒃ ᐃᓐᓇᖓᖃᑎᒋᓂᐊᓕᕋᒃᑯ, ᐱᓇᓱᐊᕆᐊᖃᕐᑕᒃᑲ ᐅᖃᕐᓯᒪᔭᑎᑦ ᓈᖕᒪᑕ.” 22ᐊᓱᐃᓛᒃ ᓔᐸᓂᐅᑉ ᐊᖑᑎᓕᒫᑦ ᓇᔪᒐᕐᒥᓃᑦᑐᑦ ᑲᑎᖁᕔᑦ, ᓂᕆᕕᒡᔪᐊᓕᐅᕐᓗᓂᓗ. 23ᐅᓐᓄᒃᑎᓪᓗᒍᓕ ᐸᓂᓂ ᓕᐊ ᔧᑯᒧᓐᖓᐅᑎᕚ, ᔧᑰᓪᓗ ᓕᐊ ᐃᓐᓇᖓᖃᑎᒋᕚ. 24ᓔᐸᓂᐅᑉ ᐱᔨᑲᑖᓂ ᐊᕐᓇᖅ ᔨᐅᓪᐸ ᐸᓂᖕᒥᓄᑦ ᓕᐊᒧᑦ ᑐᓂᕙ ᐱᔨᑲᑖᖑᖁᓪᓗᒍ. 25ᐅᓪᓛᓐᖑᕐᑎᓪᓗᒍ ᑕᑯᒋᑦ, ᔧᑯ ᖃᐅᔨᓕᕐᐳᖅ ᓕᐊᖑᖕᒪᑦ; ᔧᑯᓗ ᓔᐸᓂᒧᑦ ᐅᖃᕐᐳᖅ, “ᓱᖕᒪᑦ ᑍᒤᓕᐅᕐᐱᖔ? ᐱᔨᑦᓯᓚᐅᓐᖏᓚᒌᑦ ᕅᒋᓕᒥᒃ ᐱᔪᒪᓪᓗᖓ? ᓱᖕᒪᑦ ᐅᐃᕕᕆᕕᖔ?”
26ᓔᐸᓂᐅᑉ ᑭᐅᕚ, “ᓄᓇᑦᑎᓐᓂ ᐱᐅᓯᕆᖏᓐᓇᑦᑎᒍ, ᓄᑲᕐᓯᕐᒥᒃ ᐅᐃᓂᒃᑎᑦᓯᖅᑳᕈᓐᓇᖏᓐᓇᑦᑕ ᐊᖓᔪᒃᓯᖅ ᐅᐃᓂᓚᐅᖏᓐᓂᖓᓂ. 27ᑲᑎᑎᑕᐅᓵᕐᑑᒃ ᐱᐅᓯᖓᓂᒃ ᐱᓇᓱᐊᕈᓯᖅ ᐊᓂᒍᕐᓯᐊᕆᓕᕈᒃ, ᐊᓂᒍᕐᓯᒪᓕᕐᐸᑦ ᕅᒋᓕ ᑐᓂᔪᒫᕐᐸᕋ ᐃᓕᖕᓄᑦ ᐱᔨᑦᓯᒃᑲᓐᓂᕇᕈᕕᖓ ᓱᓕ ᐊᕐᕌᒍᓂᒃ 7ᓂᒃ.”
28ᔧᑯᓗ ᑍᒤᓕᐅᓚᐅᕐᐳᖅ, ᐱᓇᓱᐊᕈᓯᖅ ᐊᓂᒍᕐᒪᑦ; ᓔᐸᓂᐅᑉ ᐸᓂᓂ ᕅᒋᓕ ᓄᓕᐊᕐᑖᖑᑎᑉᐹ ᔧᑯᒧᑦ. 29ᓔᐸᓂᐅᓪᓗ ᐱᔨᑲᑖᓂ ᐊᕐᓇᖅ ᐱᓪᕼᐊ ᑐᓂᕚ ᕅᒋᓕᒧᑦ ᐱᔨᑲᑖᕆᔭᐅᖁᓪᓗᒍ. 30ᔧᑰᓪᓗ ᕅᒋᓕ ᐃᓐᓇᖓᖃᑎᒋᒋᕚ, ᓇᒡᓕᒋᓂᕐᓴᕆᕚᓗ ᓕᐊᒥᑦ, ᑭᖑᓂᖓᒍᓪᓗ ᐊᕐᕌᒍᓂᒃ 7ᓂᒃ ᓱᓕ ᐱᔨᑦᓯᓕᓚᐅᕆᕗᖅ ᓔᐸᓂᒥᒃ.
ᔧᑰᑉ ᕿᑐᕐᖓᕐᑖᕆᓯᒪᔭᖏᑦ
31ᐊᑕᓂᕐᓕ ᖃᐅᔨᒪᒐᒥ ᓕᐊᑉ ᓇᒡᓕᒋᔭᐅᖏᓐᓂᕐᓴᐅᓂᖓᓂᒃ, ᕿᑐᕐᖓᕐᑖᕈᓐᓇᕐᑎᓚᐅᕐᐹ; ᕅᒋᓕᓕ ᕿᑐᕐᖏᓱᐃᑦᑑᓚᐅᕐᐳᖅ. 32ᓕᐊᓗ ᓯᖎᓕᕐᐳᖅ ᐃᕐᓂᕐᑖᕐᓗᓂᓗ, ᐊᑦᓯᕐᐹᓗ ᕉᐱᓂᒥᒃ; ᐅᖃᕋᒥ, “ᐊᑕᓂᐅᑉ ᐃᓱᒫᓗᖕᓂᓐᓂᒃ ᑕᑯᓐᓇᕐᐹᖓ, ᑕᕝᕙ ᐅᐃᒪ ᓇᒡᓕᒋᓂᐊᓕᕐᐹᖓ.” 33ᑭᖑᓂᖓᒍᓪᓗ ᓱᓕ ᓯᖎᓕᒃᑲᓐᓂᕆᕗᖅ ᐃᕐᓂᕐᑖᕐᓗᓂᓗ, ᐅᖃᕐᐳᕐᓗ, “ᐊᑕᓂᐅᑉ ᓱᓕ ᑖᑦᓱᒥᖓ ᐃᕐᓂᕐᑖᕐᑎᑉᐹᖓ, ᑐᓴᐅᒪᓕᕋᒥ ᓇᒡᓕᒋᔭᐅᖏᓐᓂᓐᓂᒃ”; ᑍᒤᒻᒪᑦ ᐊᑦᓯᕐᐹ ᓯᒥᐅᓂᒥᒃ. 34ᓱᓕ ᓯᖎᓕᒃᑲᓐᓂᕆᕗᖅ ᐃᕐᓂᕐᑖᕐᓗᓂᓗ, ᐅᖃᕐᐳᕐᓗ, “ᒫᓐᓇ ᐅᐃᒪ ᖃᒡᓕᒃᑲᓐᓂᕐᓂᐊᓕᕐᐹᖓ, ᐃᕐᓂᕐᑖᕐᓯᒪᓂᕋ ᐱᖓᓱᓂᒃ ᐱᑦᔪᑎᒋᓗᒍ”; ᑍᒤᒻᒪᑦ ᐊᑦᓯᕐᐹ ᓕᕔᒥᒃ. 35ᐊᒻᒪ ᑭᖑᓂᖓᒍᑦ ᓯᖎᓕᒃᑲᓐᓂᕆᕗᖅ ᐃᕐᓂᕐᑖᒃᑲᓐᓂᕐᓗᓂᓗ, ᐅᖃᕐᐳᕐᓗ, “ᑕᒪᑐᒪᓂ ᐊᑕᓂᖅ ᓂᕐᑐᕐᓂᐊᓕᕐᐸᕋ”; ᑍᒤᒻᒪᑦ ᐊᑦᓯᕐᐹ ᔫᑕᒥᒃ; ᑭᖑᓂᖓᒍᓪᓗ ᕿᑐᕐᖓᕐᑖᒃᑲᓐᓂᕈᓐᓃᕐᐳᖅ.
Selectat acum:
ᒨᓯᓯ ᓯᕗᓪᓖᑦ 29: EAIB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Eastern Arctic Inuktitut Bible © Canadian Bible Society, 2012, 2021-2023.