PIANCILNA 22
22
Isaac A Pia Khia Dingin Abraham Kisawl
1Hih thute khit ciangin Pasian in Abraham ze-et a, ama kiangah, “Abraham,” a ci hi. Amah in, “Hiah om ing,” a ci hi.
2Amah in, “Na it, na tapa neihsun Isaac, la inla, Moriah gamah pai in. Tua lai mun a nang kiangah kong gen ding mual khat tungah meihal biakpiakna-in amah hong pia in,” a ci hi.#2Khang 3:1
3Tua ahih ciangin zingsangin Abraham tho baih a, a la tutphah vawhin, ama nasem tangval nih le a tapa Isaac a paipih hi. Amah in meihal biakpiak nadingin sing ek a, ama tunga Pasianʼ gen sa munah a pai hi. 4A ni thum ni ciangin Abraham khuadak to-in a gamla ah tua mun a mu hi. 5Tua ciangin Abraham in a nasemte kiangah, “Hih lai ah la tawh na om un. Kei le tangvalpa hua lamah pai-in Pasian ka va bia ding uh a, note kiangah ka hong paikik ding uh hi,” a ci hi.
6Abraham in meihal biak nading sing la-in a tapa Isaacʼ tungah suan a, amah in a khut sungah mei le temta a tawi hi. Tua bangin amau tegel pai khawm uh hi. 7Isaac in a pa Abrahamʼ kiangah, “Pa aw,” a ci hi. Amah in, “Hiah om ing, ka ta,” a ci hi. Amah in, “En in, mei le sing om hi. Ahih hangin meihal biakpiak nading tuuno koi ah om ahi hiam?” a ci hi.
8Abraham in, “Pasian in meihal biakpiak nadingin ama ading tuuno hong pia ding hi, ka ta aw,” a ci hi. Tua bangin amau tegel pai khawm uh hi.
9Ama kiangah Pasianʼ gen sa mun a tun uh ciangin, Abraham in tua lai ah biakna tau khat bawlin, a ngeina ding bangin sing koihin, a tapa Isaac henin biakna tau tunga sing tungah a koih hi.#James 2:21 10Tua ciangin Abraham in a tapa a that dingin tem la hi. 11Ahih hangin Topaʼ vantungmi in vantung panin, “Abraham, Abraham!” ci-in a sam hi. Amah in, “Hiah om ing,” a ci hi.
12Amah in, “Tangvalpa su kei in. Ama tungah bangmah hih kei in. Bang hang hiam cih leh nang in Pasian na zahtakna tu-in ka thei a, na tapa khat neihsun keima adingin na humcip lohna ka mu hi,” a ci hi.
13Tua ciangin Abraham khuadak kawikawi a, khaumang lakah a ki a a awk tuutal khat a nungah na om hi. Abraham pai-in tua tuutal kai a, ama tapaʼ tangin meihal biakna-in a pia hi.#Heb 11:17-19 14Tua ahih ciangin Abraham in tua mun pen, “Topa in hong sik hi,” ci-in min phuak a, tu ni dongin Topaʼ mual tungah hong kisik hi, a kici hi.
15 Topaʼ vantungmi in vantung panin Abraham a nih veina sam a, 16“Kei mahmah ka kiciam hi, Topa in ci hi. Bang hang hiam cih leh nang in hih thu na bawl khin a, na tapa neihsun na humcip kei hi. 17Nang thupha kong pia taktak dinga, na suanlekhakte van a aksite le tuipi gei-a sehnel bangin tampi ka phasak ding hi. Na suanlekhakte in amauʼ galteʼ khuapite luah ding uh a,#Heb 6:13-14 #Heb 11:12 18na suanlekhakte thupha ka piak bangin, leitung minam khempeuh in thupha a ngah nadingun hong ngen ding uh hi. Bang hang hiam cih leh nang in ka thu na mang hi,” a ci hi.#Sawl 3:25 19Tua ciangin a nasemteʼ kiangah Abraham ciahkik a, Beer-sheba ah pai khawm uh hi. Abraham Beer-sheba ah a teeng hi.
Nahorʼ Suanlekhakte
20Hih thuteʼ khit ciangin Abrahamʼ kiangah, “En in, Milkah in zong na sanggampa Nahor tawh tate nei hi: 21Uz a u pen hi. A sanggamte pen Buz, Aramʼ pa Kemuel, 22Khesed, Hazo, Pildash, Jidlaf le Bethuel ahi hi,” kici hi. 23Bethuel pen Rebekahʼ pa ahi hi. Milkah in Abrahamʼ sanggam Nahor tawh tapa giat nei hi. 24Tua tham loin Reumah min nei a zineu in ta Tebah, Gaham, Tahash le Maakah a nei hi.
Selectat acum:
PIANCILNA 22: TBR17
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Tedim Bible © Bible Society of Myanmar, 2017.