PIANCILNA 17
17
Vun-atna, Thuciamna Lim
1Abram kum sawm kua le kum kua a phak ciangin ama tungah Topa kilang a, “Kei, Vanglian Pasian ka hi hi. Hoihtakin gamta inla, paubaang kei in. 2Nang tawh thuciamna ka bawl dinga, nang tampi tak kong phasak ding hi,” a ci hi. 3Tua ciangin Abram kun suk hi. Pasian in ama kiangah, 4“En in, nang tungah hih thuciamna kong bawl hi: Nang pen minam honpiteʼ pa na hi ding hi. 5Na min Abram hi nawn lo dinga, Abraham hi ding hi. Bang hang hiam cih leh minam honpiteʼ pa-in nang kong bawl khin hi.#Rom 4:17 6Keimah in suanlekhak tampi kong neisak ding hi. Nang sung panin minamte ka piangsak dinga, nang sung panin kumpite hong piang khia ding hi.
7“Nang le nangʼ khit cianga na suanlekhakte tungah Pasian hih nading tawntung thuciam nadingin kei le nangʼ khit cianga na suanlekhakteʼ tungah amauʼ khang tawntungin ka thuciamna ka kipsak ding hi.#Luk 1:55 8Nangma tung le nangʼ khit cianga na suanlekhakte tungah tawl khat na omna Kanaan leitang khempeuh na neih tawntung dingun kong pia dinga, kei pen amauteʼ Pasian ka hi ding hi,” a ci hi.#Sawl 7:5
9Pasian in Abrahamʼ kiangah, “Nang le nangʼ khit cianga na suanlekhakte in zong ka thuciamna na zuih ding uh nong thukim ding uh ahi hi. 10Hih pen nang le nangʼ khit cianga na suanlekhakteʼ zuih ding keima thuciamna ahi hi: Noteʼ lak panin pasal peuhmah a vun ki-at ding hi.#Sawl 7:8; Rom 4:11 11Noteʼ vun dawn ki-at dinga, tua pen kei le noteʼ kikalah thuciamna lim khat hi ding hi. 12Noteʼ lak panin ni giat a pha pasal peuhmah a vun ki-at ding hi. Noteʼ khang tawntungin pasal peuhmah, noteʼ inn sunga suak hitaleh, noteʼ ta ahi lo, gamdang mi khatpeuh kiang panin na sum uh tawh na lei uh hitaleh 13na inn sunga suak hitaleh, na sum tawh a kilei pa hitaleh a vun ki-at tuak ding hi. Tua ahih ciangin tawntung thuciamna ahi keima thuciamna pen nomauʼ satak sungah om ding hi. 14A vun dawn a ki-at lo pasal peuhmah a mipihte kiang panin kihawl khia ding hi. Bang hang hiam cih leh amah in keima thuciamna palsat hi,” a ci hi.
15Tua ciangin Pasian in Abrahamʼ kiangah, “Na zi Sarai ahihleh, ama min Sarai na ci nawn kei dinga, ama min Sarah hi ding hi. 16Amah thupha ka pia dinga, amah tawh tapa khat kong pia ding hi. Amah thupha ka pia dinga, amah, minamteʼ nu hi ding hi. Mihingteʼ kumpite ama sung pan hong piang khia ding hi,” a ci hi.
17Tua ciangin Abraham mai kun sukin nui a, a mahmah tungah, “Kum za a pha pasal khat in ta nei ding ahi hiam? Kum sawm kua a pha Sarah in ta nei ding ahi hiam?” kici hi. 18Abraham in Pasianʼ kiangah, “Ishmael hong nungtasak peuh lecin,” a ci hi.
19Pasian in, “Hi lo hi. Na zi Sarah in nang adingin tapa khat nei dinga, ama min Isaac na phuak ding hi. Ama khit cianga a suanlekhakte adingin tawntung thuciam nadingin ka thuciamna amah tawh ka kipsak ding hi. 20Ishmael ading na ngetna ahihleh ka za khin hi. En in, amah thupha pia-in ka pungsak dinga, tampi tak ka phasak ding hi. Amah pen ulian sawm le nihteʼ pa hi dinga, minam lian khatin ka bawl ding hi. 21Ahih hangin, kum kik tu hun ciangin Sarahʼ sung panin nang aʼ dinga hong suak ding Isaac tawh ka thuciamna ka kipsak ding hi,” a ci hi. 22Amah tawh a kiho a man khit ciangin Abrahamʼ kiang panin Pasian pai khiato hi.
23Tua ciangin Abraham in a tapa Ishmael le ama sum tawh a lei hitaleh ama inn sunga suak hitaleh a sila, ama inn sunga om miteʼ lak panin pasal khempeuh samin, Pasian in ama tunga a gen sa bangin tua ni mahmah in amauteʼ vun dawn a atsak hi. 24Ama vun dawn a ki-atin Abraham kum sawm kua le kum kua pha ta hi. 25Ama vun dawn a ki-atin a tapa Ishmael kum sawm le kum thum a pha hi. 26Tua ni mahmah in Abraham le a tapa Ishmael a vun uh ki-at hi. 27Ama inn sunga pasal khempeuh, inn sunga suak hitaleh gamdang miteʼ tung panin sum tawh a kilei mite hitaleh, amah tawh a vun uh ki-at khawm hi.
Selectat acum:
PIANCILNA 17: TBR17
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Tedim Bible © Bible Society of Myanmar, 2017.