PIANCILNA 14
14
Abram in Lot Hon khia
1Shinar kumpipa Amrafel, Ellasar kumpipa Ariok, Elam kumpipa Khedorlaomer le Goiim kumpipa Tidal teʼ hun lai-in, 2hih kumpite in Sodom kumpipa Bera, Gomorrah kumpipa Birsha, Admah kumpipa Shinab, Zeboiim kumpipa Shemeber le Bela (Zoar) kumpipa, kumpi ngate va sim uh hi. 3Hih kumpi ngate in kipawlna bawlin Siddim Kuam (Ci Tuipi) ah a galkapte uh gawm uh hi. 4Amaute, kum sawm le kum nih sung Khedorlaomerʼ khutnuai ah om uh a, ahih hangin a kum sawm le kum thumna ciangin amaute in lehdo uh hi. 5A kum sawm le kum lina ciangin Khedorlaomer le amah tawh a kipawl kumpite hong pai-in sehnel gamgi Elparan ciang dongah Ashteroth-karnaim gam a Refaim, Ham gam a Zuzim, Shaveh-kiriathaim gam a Emim, 6le amauʼ gam Seir Mual tunga Hori mite hong zo uh hi. 7Tua ciangin amaute kiheikikin Enmishpat (Kadesh) ah hong pai uh a, Amalek miteʼ gam khempeuh le Hazazon-tamar gam a teeng Amor mite zong zo uh hi.
8Tua ciangin Sodom kumpipa, Gomorrah kumpipa, Admah kumpipa, Zeboiim kumpipa le Bela (Zoar) kumpipa kuan khia uh a, amaute kipawlin Siddim Kuam ah 9Ela kumpipa Khedorlaomer, Goiim kumpipa Tidal, Shinar kumpipa Amrafel le Ellasar kumpipa Ariok tawh kido uh a, kumpi li kigawm le kumpi nga kigawm kido uh hi. 10Siddim Kuam pen kultal khukte tawh kidim a, Sodom le Gomorrah kumpite a tai uh ciangin pawl khat tua khukte sungah kia uh a, a om lai teng mual tungah tai uh hi. 11Tua ahih ciangin galte in Sodom le Gomorrah-teʼ na khempeuh le a an khempeuh uh la-in a ciah uh hi. 12Amaute in Sodom a, a teeng Lot (Abramʼ sanggampaʼ tapa) le a na khempeuh zong la-in a paikhia uh hi.
13Tua ciangin a suakta mi khat hong pai-in, Hebru mi Abramʼ kiangah hong gen hi. Amah pen Eshkol le Anerʼ sanggampa ahi hi. Amor mi hi a, Mamre tawsawte gei ah teeng hi. Hih mite pen Abramʼ kipawlpihte ahi hi. 14Ama behpa salin a kimatna Abram in a zak ciangin, ama inn sunga a suak, a kihilh sa ama mi za thum le sawm le giatte makaihin Dan ciang dong a delhin a pai uh hi. 15Amah in zan hunin ama pawlte, amah le a nasemte, amaute a do dingin khenin amaute zo a, Damaskas leilu lam Hobah ciang dong a delh uh hi. 16Tua ciangin amah in Lot le ama na khempeuh, numeite le a galmatte tawh a ciah pihkik hi.
Melkhizedek in Abram Thupha Pia
17Abram in Khedorlaomer kumpipa le a pawlte a zawhna panin a ciahkik ciangin amah a dawn dingin Sodom kumpipa Shaveh Kuam (Kumpipaʼ Kuam) ah na pai hi. 18Tua ciangin Jerusalem kumpipa Melkhizedek in an le leenggahzu hong pusuah hi. Amah pen Sangpen Pasianʼ siampi zong ahi hi. 19Amah in thupha pia a,
“Vantung le leitung a bawl,
Sangpen Pasian in
Abram thupha pia hen!
20Na galte na khut sungah a hong pia
Sangpen Pasian in thupha ngah hen,”
a ci hi. Abram in na khempeuh sawm-ah-khat ama tungah a pia hi.#Heb 7:1-10
21Sodom kumpipa in Abramʼ kiangah, “A mite hong pia inla, ahih hangin a nate nang adingin la in,” a ci hi.
22Ahih hangin Abram in Sodom kumpipa kiangah, “Vantung le leitung a bawl Sangpen Topa Pasian tungah ka kiciam khinzo hi. 23Nangmah in, ‘Abram ka hausak hi,’ ci kha ding na hih manin mimkhau ahi a, khedap khau ahi a, nangma aʼ ahi na khat peuhpeuh ahi zongin ka la kei ding hi. 24Tangvalteʼ nek sate le kei tawh hong kuan miteʼ tanh dingte lobuang bangmah ka la kei ding hi. Aner, Eshkol le Mamre-te amauʼ tanh ding pia in,” a ci hi.
Selectat acum:
PIANCILNA 14: TBR17
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Tedim Bible © Bible Society of Myanmar, 2017.