مَتّی 24
24
عیسی مَعبَدی ویراوِنِستِه پیشگویی بکَردی
1هَنگومی کن عیسی مَعبَدیکا بَرشَه، اِشتَن راه اَشیَه، چَی شاگردِن چَی وَر آمینه تا مَعبَدی ساختمونون بَی آمونن. 2عیسی اَیِنِش واتَه: «گِردِ اِم ساختیمانون بَویندیرون؟ حَییقتا بَشمَه باتیمَه، دِ اِم جِگاکا سِه ای سِه سَریکا نیَمَند، بَلکَم گرد ویرَریست.»
3وقتی عیسی زَیتونی کو سَریکا نِشت بَه، چَی شاگردِن خَلوَتیکا چَی وَر آمینَه و واتِشون: «اَمه بواج اِم ایتفاقِن کَینی دَرَگِنِست و اِشتِه آمِه و اِم دِنیا آخِری نِشونَه چِه چیَه؟» 4عیسی جواب داشه: «حواسِرون ببو تا کَسی بَشِمَه گمراه نِکَرِ. 5اِمی خونه کن، خَیلیِن چمن نومینَه بومَنَه وباتینَه، اَز وَعدَ آدوعَه مسیح هِستیم،“ و خَیلیِون گمراه بَکَنَه. 6شِمَه جَنگون خونِه دَنّرَست و جَنگون خَبَر شمَه گوش آرَرَست. ولی تَفشیش دَمَگِنَه، اِمی خونه کن اِنتَرَ ایتفاقِن پی دَگنِن، ولی هَنوزَنی دِنیا بَه آخیر آرَستَه نیَه. 7هِنتَرَکِه قامی دییَره قامی سَر و حکومتی دییَرَ حِکومتی سَردِرِ راست آنَّب. و قحطی و بومه لَرزَ مُختَلیفَه جگا اونکا بومَیَه. 8ولی اِمِن گِرد زَندِ داجی شِرو اَ کن داجون فاصیلَه هَی کَم و کمتر آرَبن.
9«اَ زَمونَکا شمَه غنیمی تَسلیم بَکَنَه و بَشمَه شکنجَه بَکَن و شمَه بَکِشتینَه. گرد قامِن چمن نومی خونِه شِمَکا نیفرَت بَداشتین. 10اَ روجونکا خَیلیِن اِشتَن ایمانیکا آگردِن، یَندِ خَیانت بَکَنَه و یَنده کا نیفرَت بَداشتینَه. 11وِرَ دِروعَه پَیغَمبرونی راست آنَّب و خَیلیِون گمرا بَکَنَه. 12اَنَه شَرارَت وِر بَبی کن، خَیلیِون موحبَت آرَسِریست. 13اَمّا هَرکم تا آخیر آمبَست بومونِه، نیجات بَگَتی. 14و خدا پادیشاهی خَشَه خَبَر، دِنیا گِرد آدَمونرا اییلام بَبی تا شهادتی گردِ قامونرا ببو. چَی به دوملَه دِنیا بَه آخیر آرَرَست.
15«پس وَقتی اَچیی کن دانیال پَیغَمبَر ”مکروهِ ویراوِن “ نوم پِناشَه موقدَسه جِگاکا پا ویندِیرون خوانَندَ دیقّت بکَرِ، 16اَموقه هر کم وِلَتِه یهودیَه کا ببو کومونرا بیوریجِه؛ 17و هَرکم کَه بونی سَردِرِ پِرِ، چیی ایی پِگَتِرا، ویمَرا؛ 18و هر کم کَشتوکاریرا زَمینی سَر ببو اِشتَن قَبا پِگِتِه خونِه کَرا آمَگَردِ. 19برامِه اَ ژِنونی حالیرا کن اَ روجون دِلَکا خامیلَه اینَه یا خِردَن شِت بَدان! 20دوا بِکَر کن شمه ویریتِه زمستون یا موقدسَه شَنبَه روجیکا مَبو. 21اِمی خونه کن اَ زمانَیکا بَرکَه غَرّی بومَیَه کن چَی شیوارخیلقَتی اَوَّلیکا تا ایسَه ایتفاق دگنستَه نی، و هرگز نی ایتفاق دَنیَگنست. 22اَگَم خدا اَ روجون کِتا آنَکَرییَه، هیچ آدَمی سَقَه جان نَمونیَه. ولی بَرگزیدَاون خونه خدا اَ روجون کِتا آکَردَشَه.
23«اَ موقِه کا، اَگَم کَسی بَشِمَه بواجِه بِوینَه وعدَ آدوعَه مَسیح اِم جگاکارَ!“ یا ”اَجگا کارَ!“ باوَر مَکَرَ. 24اِمی خونه کن دروعَه مَسیحِن و دروعَه پَیغمبَرِن بومَن، و اِنتَرَ نِشونَه اِن اَیر بَکَن و موعجیزَاِن اَنجوم دَرِن تا اَگَم بشان، بَرگُزیدَاون گُمرا بِکَن. 25بِوینَه نارتَر بَه شمَه واتمَه. 26پس اَگَم بَه شمَه بواجِن اَ وَیاوونیکارَ،“ اَجگارا مَشَه؛ و اَگَم بواجِن کَه چَمَه دِلَکارَ،“ باور مَکَرَ. 27چون هَتَه کن اَگَم شرقی آستامونیکا گِرَ خونَه ببو چَی شَپَق تا غرب آرَرَست، اینسانی زوعَه آمِه نی اِنتَربَبیَه. 28هر‌جگاکا، کن لاشه ایی ببو، لاشخورِن اَجگاکا جَم آنَّب.
29«جخت اَ روجون مصیبَتی بَه دوملَه
«آختاو تاریک آرَب
و مانگ دِ شَپَق نیَژ؛
اِسترَاِن آستامونیکا وینَّب.
و آستامونی اینجارِن بَلَرزِستینَه.“
30اَموقه اینسانی زوعَه نِشونَه آستامونیکا اَیر آرَبن و گردِ دِنیا قامِن اِشتَن سینه سَر بَژَن و اینسانی زوعَه بَویندینه کن یالَه خنَر و شکوه جلالینَه آستامونی خرون سَردِرِ آ. 31اَ اِشتَن فرشتَه اون زرنا بَرزَ سَسینَه رَونَه آرَکَرد و اَیِن چَی برگزیدَاون دِنیا چار کِچیکا، آستامونی ام گوشَه تا اَگوشه، یَندِ وَر گرد آنَّکَرد.
32«ایسَه، اِم دَرسی اِنجیلَه داریکا آموج بیگِرَ: هِنتَه کن چَی بَشو خال چیجَه بَژَی و لیو بَکَی، سَر آگِنَه کن تاواستون نِزِکَ. 33هن تَرکِه، هرموقِع اِم چیون بوینَه بزنَه کن اینسانی زوعَه نِزِکَه، بلَکم برَنگا سَریکارَ. 34حییقتا بشمه باتیمَه، تا گردِ اِم چییِن ایتفاق دَمَگِنه، اِم اودوم نیفیت آنیَب. 35آستامون و زمین نیفیت آنَّب، ولی چمن گَفِن هرگز نیفیت آنینَّب.
هیچ کَس اَ روج و اَ ساعَتی نیَموست
36«غَیراَز آستامونیَه دَدَ هیچ‌کَم اَ روج و ساعَتی نییَموست؛ حتی آستامونیَه فرشتَه اِن و زوعَه نی اَیکا خَبر نِدارِن. 37اینسانی زوعَه ظهور کَردِ زَمونَکا، هِنتَه نوح روزگاری شیوار بَبیَه. 38توفانی آمِه بَه نَ، تا قبل اِمکن نوح کَشتی دِلَه دَرا، مردوم هَرینَه و هِنجینَه، ژِن اَگِرینَه و شو اَشینَه. 39و نَزنینَه چه چَوون نَ کارَ. تا اِمکن توفان آمَه و گردی اِشتنَّ بَردشَه. اینسانی زوعَه اَیر آبِه نی هِنتَرَکه بَبیَه. 40دِ مِردیکا کن بجاریکا مَندینَه ایله بَبَنَه و اَیلَه بَمَندیَه. 41و دِ ژِنی دِلَکا کن یَندِنَه آستاو بَژَن، ایله بَبَردینَه و اَیلَه بَمَندیَه. 42پس بیدار ببَ، اِمی خونه کن نینَزنی شمَه سرورِ چه روجیکا بومَیَه. 43اِمی اَزونَه کن اَگَم کَه صاحیب بِزنی پتارچی شَوی چَه وَقتیکا بومَی بیدار اَمونی و نَرزی چَی کَ پتارِن. 44پس شمَه نی پی آمادَ ببَ اِمی خونه کن اینسانی زوعَه، ساعتیکا بومَیه کن اینتظارِرون نی.
45«پس اَ وَزیَر امین و اَفَم کیَه کن چَی اَرباب بَی اِشتَن خوانوادَ سَرپَرَستیرا آنوعَشَه تا چَوون هَردَ چیون وَقتیکا اَوون بدَرِ؟ 46خَشی اَ پاسَری ایی حالیرا اَموقعیکا کن چَی اَرباب بومَی، هَتَه کن چَی اَرباب واتَش بَه اَی اِم کاریکا بِوینه. 47حَییقتا بَه شمَه باتیمهَ بَی گردِ اِشتَن مالو اَموالی سَردِرِ آرَنا. 48اَمّا اَگَم اَ پاسَری، آوشَر ببو و اِشتَنَه بِواجِه کن. ”چمن اَرباب عَری آکَردَشه،“ 49و اِشتَن هَمکارون آزار دوعه مَشغول ببو و عَرخه هَرونَّه هَردِ و هنته کا دَرِ کببو، 50روجیکا کن اَ اینتظارِش نییَه و ساعتیکا کن اَیکا خَبَرِش نییه، اَ پاسَری اَرباب بومَیه و بَی پِرَزارنست، 51و بَی وَصَطیکا پِرَزارنست، و دِ سَرَ کَرچَنگون جِگاکا آرَفند، جگایی کن بِرَمِستِه و گاز گازی سَرسونیستِه بَبیَه.
Selectat acum:
مَتّی 24: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
