مَتّی 19
19
آموج دوعِه طَلاقی خونِه
1هَنگومی کن عیسی اِم گَفون ژِشَه، وِلتِه جلیلیکا شَه و اوردونی رباری اَوَریرا، یهودیَه اَطرافیرا آمَه. 2یالَه جمعیتی عیسی دوملَه رَونَه بین و اَ اَیِنِش اَجگاکا شفا آداشَه.
3فَریسیِون فرقَه عالیمن عیسی وَر آمین تا بَی وَرداوَرد بکَن. اَیِن دَپَرسِستین: «شَرعا دِرِستَه کن مِرد اِشتَن ژِنی هَر چیی ایی خونه طلاق بدَرِ؟» 4عیسی چَوون جَوابیکا واتِش: «مَگَم خَندَرون نیَه دِنیا آفرینَندَ اَوَلیکا ”اَینِش مِرد و ژِن سِی آکَردَ“، 5و واتِشَه کن: ” اِمی خاطِر، مِرد اِشتَن دَدَ و نَنَه آهَرزِ و اِشتَن ژِنیکا دَرَچیکست و اَ دِ نفر، ایلَه تَن بَبین.“ 6پس اَیِن دِ، دِگِلَه تَن نینَّه بَسکَم ایلَه تَنین. پس اَچیی کن خدا پَیوَند ژَشه اینسان تاکَه آمَکَرِ.» 7اَیِن عیساشون واتَه: «پس چیرا موسی امر کَردِشه کن مِرد اِشتَن ژنی طلاقنومَه آدَرِ و اَی آهَرزِ؟» 8عیسی اَیِنِش واتَه: «موسی شِمَه خوعَه دِلی خونِه ایجاَز داشَه کن اِشتَن ژِنی طلاق بِدَر، ولی اَوَلیکا اِنتَرَ نِبه. 9بَه شمَه باتیمَه، هر کم اِشتَن ژنی غَیراَز خَیانت کَردِ ژِنو شو گیریکا، هَر چیی خونه طلاق بِدَر و دییَرَ ژنی بیگِرِ زینا کردشهَ.» 10شاگردِن عیساشون واتَه: «اَگَم مِردی وظیفَه، اِشتَن ژِنیرا اِنتَرَیَه پس ایزدواج نِکَردِ بیَتر!» 11عیسی واتِشَ: «گرد نینّشا اِم کلامی قِبول بکَن مَگَم کسِنی کن به اَیِن عطا آبَه ببو. 12اِمی خونِه کن بعضی خاجَه اینَه، اِمی خاطِر کن نَنه لَوَ کا اِنتَرَ دِنیا آمَه اینَه؛ بعضی دیَیر نی مردمی بالینه خاجَه آبه اینه؛ و بعضییِن نی آستامونی پادیشاهی خونِه ایزدواج نینَّکَرد. هر کم بَشایَه اِمی قبول بکَرِ بَرزِن اِنتَرَ بکَرِ.»
بَرزَ خِردَنن چمن وَر بان
13چَی به دوملَه مردم خردَنِنِشون عیسی وَر وَردَ تا چَوون سَر بال پِنَرِ و دِوا بکَرِ. ولی شاگردِن مردمی تَشَر ژِشونه. 14عیسی واتِش: «بَرزَ خردَنن چمن وَر بان و چَوون نَ مَگِرَ اِمی خونه کن آستامونی پادیشاهی اِنتَرَ کَسون شِنَه.» 15عیسی چَوون سَر بال آناشَه و اَجگا کا شَه.
ثیروَتمَندَ جوان مرد
16ایی روج مِردی عیسی وَرآمَه و دَپرسِستَه: «اِستا پی چه چاکَ کاری اَنجوم بِدرم تا زَیرونَه زندَگی بدارم؟» 17عیسی واتش: «چیرا چاکَه کاری خونِه بَمنکا کاش سوال کردِ؟ تاکَه ای نَفَرَ کن چاکَه. اَگَم بَپیرَ زَیرونَه زندَگی دِلَه دَشی حِکمون اَنجوم بِدَ.» 18اَ مِرد دَپرسسته: «کرَم حِکمون؟» عیسی واتِش: «”آدَم مَکِش، زینا مکَ، مَپِتار، دِروعَه شَهادَت مَدَ، 19اِشتَن دَدَ و نَنَه ایحترام بکَ،“ اِشتِه خَمسوعَه اِشتِه جَندَکی شیوار موحبت بکهَ. 20اَ جوان واتِش: «گردِ اِم حِکمون اَنجوم دوعَمَه؛ دِ چِه چیی کم دارم؟» 21عیسی جواب آداشَه: «اَگَم بَپیرَ کامیل بَبی، بش و اَچیی کن داری بِخرَش و چَی پولی گیدَلییون بِدَ کن آستامونیکا گنج هِستِرَ. چَی به دوملَه بِه و بَمنکا پیروی اَکَن.» 22اَ جوان وَقتی اِمی دَرستِشه، بَرضخ آبَه و اَجگا کا شَه، اِمی خونه کن وِرَ ثیروَت داری.
23اَموقه عیسی اِشتَن شاگردِنِش واتَه: «حَییقتا بَه شمَه باتیمَه، ثیروَتمندِن دِلَه دَشِه، آستامونی پادیشاهیکا خَیلی چَتینَ. 24هَنی تأکید بکَم کن شِتِری دَیوَردِ دَرزَنَه خِلیکا راحَت تَرَ تا ثیروَتمَندَ آدَمی دِلَه دَشِه خدا پادیشاهیکا. 25شاگردِن اِم گَفی دَرَستِه خونِه بَرک تَعَجُب کَردِشونَه و دَپَرسستین: «پس کی بَشایَه نیجات گَتِه؟» 26ولی عیسی اَیِنِش دَیشتِشَه و واتِش: «اِم کاراینسانیرا غَیرمُمکینَه، اَمّا خدا را گرد چییِن مُمکینَه.» 27پِطروس عیساش واتَه: «دَیَس اَمه گِردِ چیون آهَشتَمونَه واِشتِه دوملَه آمیمون و بَتکا پیروی بَکَمون. پس چِه چیی ایی چَمَه رَسَت بَبیَه.» 28عیسی اَینِش واتَه: «حَییقتا بَه شمَه باتیمَه، تازَ دنیاکا اَموقه کن اِینسانی زوعَه اِشتَن باشکوهَه تَختی سَر بنشِه، شمَه نی کن بَمنکا پیروی کَردرونه دانزَ تختی سَر بَنشتیرون و اسرائیلی دانزَ اِلی سَردِرِ دیوون بَکَرون. 29و هر کم چمن نومی خونِه کَه یا برا یا خالا یا دَدَ یا نَنه یا خردن یا اِشتَن اَملاکی آهَشتش ببو، چَی عوض صد بَرابر بَویندیَه و زَیرونَه زندَگی به‌دست بوعَردی. 30اَمّا خَیلیِن کن اوّلین هِستین، آخر بَبینِه و آخرینِن اوّلین بَبین!
Selectat acum:
مَتّی 19: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
