مَتّی 16
16
فَریسیِن و صَدوقیِن نِشونَه ایی اَپیشون بَه
1فَریسیون فرقه عالیمِن و صَدوقیون فرقه عالیمن، عیسی وَرآمینَه تا اَی وَرداوَرد بِکن. هِم منظورینه اَیکا اَپیشون بَه تا آستامونیَه نِشونَه ایی چَوونرا دیار آکَرِ. 2عیسی جوابیکا واتش: «دیَرماز، باتیرون ”هوا چاک بَبیَه، اِمی خاطِر کن آستامون سِرَ،“ 3و سوکه خون باتیرون ”اومروج هوا خَراو بَبَیه اِمی خونه کن آستامون سِرَ و هوا پورآکَردَشه.“ شمَه چاک بَموستیرون چِنتَرَ آستامونی صَفَتی تعبیربکَرَ، ولی زَمونه اون نشونَه تَعبیر کَردِکا عِجِزیرون! 4اِم آوشَر و زیناکارَ اودوم نِشونَه ای بَپیشونَه، ولی غَیراز یونوس پَیغمبَری نِشونَه، نِشونَه ایی بِه اَیِن آدوعِه نیَبِن.» پس عیسی اَیِنش آهَشتَه و اِشتَن راه را شَه.
فَریسیِن و صَدوقیون خَمیراز
5وَقتی دَیراچَه اَوَریرا آرستین، شاگردِن سرآگِنینَه، یاد بَرکَردشونه کن اِشتَنَه نون پِگِرن. 6عیسی اَیِنِش واتَه: «حَواسِرون ببو فَریسیِن و صَدوقیون خَمیرازیکا دور بومونه.» 7پس اَیِن اِشتَن دِلَکا بحث آکَرینه و اَواجینَه: «اِمی خونه کن اَمه اِشتَنّه نون وَردَمون نی عیسی اِم گَفی بَژَیَه.» 8ولی عیسی اِمی اَزنیَه و اَیِنِش واته: «اَی کم ایمانِن، چیرا نون نِداشتِه خونِه یَندِنَه بَحث بَکَرون؟ 9ایسَه نی سَر آنینَگِنِست؟ شمَه یادیکا نیَه اَ پِنج گِلَه نون و پِنج هَزار نفر کن چَنگِلَه پَتلَمَه چَرگَه خِردَاونکا پِگَتِرون؟ 10یا اَهف گِلَه نون و چار هَزار نَفَر، کن چَنگِلَه پَتلَمَه چَرگینَه خِردَاونکا جمع آکَردِرون؟ 11پس چیرا سَر آنینَگِنِست کن شمَه نَه نونی خونِه گَف نیمَژ؟ بَلکَم واتِمه کن فَریسیِن و صَدوقیون خَمیرازیکا دور بومونه.» 12اَموقه شاگردن سَر آگِنینَه کن فَریسیِن و صَدوقیون آموجی خونه هوشدار دوعَشَه، نِه نونَه خمیرازی خونِه.
پِطروسی اِعتراف عیسی دربارهَ
13وَقتی عیسی قیصریه فیلیپی ناحیَه اونرا آرستَه، اِشتَن شاگِردونکا دَپرسِستهَ: «مَردومی واتَه نَه، اینسانی زوعَه کییَه؟» 14اَیِن جواب آداشون: «بَعضییِن باتینَه تَعمید اَدَرَ یَحیی ایشَه. بَعضی دییَر باتینَه ایلیاسِ پَیغَمبَریشَه، بعضی نی باتینَه اِرِمیا اِ پَیغَمبَریشَه یا ایلَه پَیغَمبَرونکایشَه.» 15عیسی دَپرسِستَه: «ولی شِمَه باتیرون اَز کی ایمَه؟» 16شَمعون پِطروس جواب داشه: «تِه وَعدَ آدوعَه مسیح ایشَه، زِندَ خدا زوعَه!» 17عیسی واتِش: «خَشی اِشتِه حالیرا اَی شَمعون، یونا زوعَه! اِمی خونه کن اینسان اِم حقیقتی تِرا دیار آنِکردَشَه، بَلکَم چمن آستامونیَه دَدَ تِرا دیار آکَردِش. 18اَز نی باتیمَه کن تِه پِطروسیشَه یعنی کازَ مَغار، واِم کازَ مغاری سَردِرِ اِشتَن کلیسا سِی آمَکَرد و مرگی اینجار هرگز نییَشا کلیسا نیفیت آکَردِ. 19اَز آستامونی پادیشاهی اَچَرون بَتِه آمَدا. اَچیی کن زَمینی سَریکا دَشبَست، آستامونیکا نی دَبَستَه بَبیَه و اَچیی زَمینی سَردرِ آج آشَکرد آستامونیکا نی آج آرَبن.» 20چَی به دوملَه عیسی اِشتَن شاگردون برک قَدَغَن کردشَه کن هیچ کَسیرا نِواجن کن اَ وعدَ آدوعَه مسیحَه.
عیسی اِشتَن مَردِ و زِندَه آبِه پیشگویی بکَردی
21چَی بَه دومله عیسی دَمندَ اِشتَن شاگردِن اِم حقیقتیکا آگاه آکَردِ کن لازمَه اورشلیمیرا بشو و اَجگاکا ایسبیه ریشن و سران کاهنِن و توراتی معلیمونکا وِرَ آزار بِوینِه و بِمِرِ و سوّمَ روجیکا پِبو. 22پِطروس عیساش قِرَقیرا بَبردَ و هَته کن بَی چمای اَکَری واتِش: «آقا بَتکا دورببو! نِکَرِ هرگز اِنتَرَ چیی اِشتِه سَر با.» 23ولی عیسی دیمی آگاردنستشَه بَی واتِش: «بَمنکا رَت آب، اَی شَیطون! ته چمن راه مانع اِیشَه تا مَشام چمن کارون اَنجوم بِدَرِم، اِمی خونه کن اِشتِه فِکرِن اینسانیَه نِه خدایی.»
24چَی بَه دوملَه عیسی اِشتَن شاگردون طَرَف آگاردِستَه و واتش: «اَگَم کَسی بخا بَمنکا پیروی بکَرِ، پی بَشتنکا بِگذِرِ و اِشتَن عَذاب و مرگی صلیبی پِگِرِ وچمن دوملَه با. 25اِمی خونه کن هر کم اَپیشه اِشتَن جانی نیجات بدَرِ اَی از دَست آرَدا؛ اَمّا هر کم چمن خونه اِشتَن جانی فِدا بِکرِ، اَی غَم بَردیَه. 26اینسانیرا چه فایدَ ایی دارِ کن گردِ دِنیا بدارِ اَمّا اِشتَن جانی از دست بدَرِ؟ اینسان اِشتَن جانی عَوَض چِه بَشایَه دوعِه؟
27«اِمی خونه کن اِینسانی زوعَه اِشتَن آستامونیَه دَدَ جَلالیکا واِشتن فرشتَه اونَّه بومَیَه و اَ زَمانیکا هَر کَسی چَی کَردَ کارون شیوار عَوض دَرِ. 28حَییقتا بَه شمَه باتیم کن بَعضیِن اِم جگا کا پامَندینه کن تا اِینسانی زوعَه نِوینن کن اِشتَن پادشاهیِ دِلَکا کا آمِه، نینّمرد.»
Selectat acum:
مَتّی 16: CTB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@ 2024 Korpu Company
