Juan 6

Pinakan ni Jesus u Limma a Libu a Tolay

(Mateo 14:13-21; Markos 6:30-44; Lukas 9:10-17)

1Nadid, káttapos ay immahabes ti Jesus tu Minalno nu Galilea, a dáddulawan labe a Minalno ni Tiberias. 2Timmagubet nikuna u makpal a tolay dipo netan de u makataka-taka hide a ginimet na, u págpapiyya na tu te saket hide. 3Inumangay di Jesus tu buked, kaguman na u disepulus na hide sakay nággetnod hod hide. 4Adene dán tu itod u aldew nu kasayaan nu Judio hide, a dáddulawán a aldew nu Págtaleb nu Anghel. 5Nikuna a natannaw ni Jesus u makpal a tolay a paadene nikuna ay tinanung na ti Felipe, “Hádya kitam a makabale ti makan para makakan i tolayan iye hide?” 6Intanung na iye dipo gusto na a purbaan ti Felipe, pero tukoy dán ni Jesus u gimitán na. 7Timmábbeg ti Felipe, “Ti káppal diye, maski u walo a bulan a suweldu nu essa a tolay u ibale tam ti makan ay awan sapat para ipakan maski ni tagsabadit u bawat essa.” 8Kinagi nu essa tu disepulus na hide a ti Andres a kapatkakka ni Pedro, 9“Tehhod he a essa a anak a lállake a tehhod a limma a tinapay sakay duwwa a sinahab a ikan. Pero awan iye sapat ti káppal ni tolayáy.” 10Kinagi ni Jesus tu disepulus na hide, “Paetnudán moy i tolaye hide.” Immetnod be u tolay hide dipo ti lugaran itod ay kalamonan. U bilang nu lállake hide ay limma a libu. 11Inalap ni Jesus u tinapay sakay nagpasalamat tu Diyos. Káttapos ay intagtag na iye tu tolay hide. Konna bi hod u ginimet na tu sinahab. Sakay u tolay hide ay kinuman hanggan a nabassog hide. 12Káttapos de a kimman ay kinagi ni Jesus tu disepulus na hide, “Ipunán moy u atanan a nabuhay a makan para awan ti masayang.” 13Inipun di ngane u atanan a nabuhay a makan. U limma a tinapay a nepakan tu tolay hide ay nakaputat hide ti sapulo ay ti duwwa a lákba.

14Nikuna a mapatunayan nu tolay hide u makataka-taka hide a ginimet ni Jesus ay kinagi de, “Siguradu a sadán iye u prupeta a pinaangay he ti munduwáy!” 15Tukoy ni Jesus a plano nu tolay hide a pilitán siya a magin hare de. Kanya huway siya a limmakad hod sakay naggeessa a immangay tu buked.

Naglakad ti Jesus tu Dibbew nu Dinom

(Mateo 14:22-33; Markos 6:45-52)

16Nikuna a gibi dán ay immangay u disepulus hide ni Jesus tu bihebi nu Minalno. 17Gibi dán ay awan palla ti Jesus. Kanya simmakay dán hide tu essa a abang a paahabes a angay ti Capernaum. 18Sakay mentaras a umahabes hide ay nagsapul a bimmegsák u pahás sakay dimmáddakkál u tagmák. 19Nikuna a makaditaw hide ti mga ánnam oni limma a kilometro ay netan de ti Jesus a maglakad tu dibbew nu dinom a paadene tu abang de, kanya neántingan hide. 20Pero kinagi ni Jesus nide, “Hikán iye! Diyan kam manteng.” 21Masaya hide a nangpasakay ni Jesus tu abang sakay pagdaka hide a nakademát tu angayan de.

Inehyok nu Tolay hide ti Jesus

22Nadid, tu kadimadimangan netan nu tolay hide a nawahak tu bihebi nu minalno a eessa la u abang a atoy hod. Tukoy de ati Jesus ay awan kaguman nu disepulus na hide nikuna iye hide ay simmakay tu abang nan hide la u limmakad. 23Kanya ehyukán de ti Jesus. Nadid, te dimmemát a abang a gábwat ti Tiberias dimmung hide tu kinanan nu tolay hide tu tinapay a impasalamat nu Panginoon. 24Nikuna a ketan nu tolay hide a awan dán hod ti Jesus sakay u disepulus na hide ay simmakay hide tu abang. Hod hide a immangay ti Capernaum para ehyukán ti Jesus.

Ti Jesus u Tinapay a Makabiyag ti Tolay

25Káddemát nu tolay hide tu dibilew nu Minalno ay netan de ti Jesus sakay tinanung de, “Maisto, nikasangan ka pahe?” 26Timmábbeg ti Jesus nide, “U tatahoden, ehyukánnák moy bakán a dipo tu netan moy a makataka-taka, nan dipo nakakan kam tu tinapay sakay nabássog. 27U makan ay masida, kanya diyan moy iye sikapan a ehyukan. U sikapan moy a ehyukan ay u makan a awan masisida sakay makapangatad ti biyag a awan ti kahad. Hikán a Anak nu Tolay u makapangatad ti biyag a hanggan-hanggan, dipo hikán u inatádden nu Ama ko ti kapangyariyan.” 28Kanya tinanung nu tolay hide ti Jesus, “Ánya i gimitán miyay para masunud me u kaluuban nu Diyos?” 29Timmábbeg ti Jesus, “Sa iye u ipagimet nu Diyos nikam, maniwala kam nikán a pinaangay na he.” 30Nagtanung be u tolay hide, “Ánya a kamakataka-taka u mepeta mo para maniwala kame niko? 31U nuno tam hide ay kimman ti mana nikuna a hod hide tu parang. Dipo ayun tu Kasulatan ay inatádden hide ni Moises ti makan a gábwat ti langet.” 32Kinagi nide ni Jesus, “Kagiyan ko nikam u tatahoden: Bakán a ti Moises u nangatád ti makan a gábwat ti langet, nan u Ama ko. Sakay siya be u mangatád nikam ti tunay a makan a gábwat ti langet. 33Dipo u makan a gabwat ti langet a inyatad nu Diyos ay awan ti iba nan u immogsad la a gábwat ti langet, siya u makapangatád ti biyag tu tolay hide ti munduway.” 34Kinagi nu tolay hide, “Panginoon, sapul nadid ay lagi mo kame a atádden ti makanan itod.” 35Kinagi ni Jesus nide, “Hikán u tinapay a mangatád ti biyag. U deyaman a umadene sakay maniwala nikán ay awan magaláp oni mauwaw a hanggan-hanggan.

36Pero konna tu kinagi ko nikam, umád moy a maniwala nikán maskin netan moy dán u makataka-taka hide a ginimet ko. 37Pero maski ni ti deya u iyatád nu Ama ko sakay pasakup nikán ay awan ko siya palayasán. 38Dipo immogsadák a gábwat ti langet, bakán a para gimitán ko u sadile ko a kagustuwan nan u kagustuwan nu Ama ko a nangpaangay he nikán. 39Sakay iye u kagustuwan nu nangpaangay he nikán: diyan ko pabayan a mawan u maski essa tu inyatád na hide nikán, nan biyagán ko hide a huway tu katapusan a aldew. 40Dipo kagustuwan nu Ama ko a u atanan ay tumengge sakay maniwala tu Anak ay magkahod ti biyag a awan ti kahád, sakay biyagán ko hide a huway tu katapusan a aldew.”

41Nadid ay namágganasasan u Judio hide dipo tu kinagi ni Jesus a siya u tinapay a gábwat ti langet. 42Kanya kinagi de, “Awan beman ti Jesus ay u anak ni Jose? Bakin a kagiyán na a immogsad siya a gábwat ti langet, tukoy tam labe u dáddakál na hide?” 43Kinagi nide ni Jesus, “Diyan kam mamágganasasan ti tungkul nikán. 44Awan ti makaadene nikán maliban ni akitán siya nu Ama a nangpaangay he nikán. Sakay u umadene hide nikán ay biyagán ko a huway tu katapusan a aldew. 45Ayun tu insulat nu prupeta hide, ‘Tolduwan hide a atanan nu Diyos.’ Kanya u atanan nu mágsaneg sakay nakatukoy tu Ama ay umadene nikán. 46Awan ko kinagi a te naketa dán tu Ama. Hikán la a gábwat tu Diyos Ama u naketa nikuna.

47Kagiyan ko nikam u tatahoden: U maniwala nikán ay tehhod a biyag a awan ti kahád. 48Dipo hikán u makan a mangatád ti biyag. 49U ninuno moy hide ay kimman ti mana nikuna katoy hide tu parang, pero natay labe hide a atanan. 50Pero awan matay u deyaman a kuman ti makan a gábwat ti langet. 51Hikán u makan a mangatad ti biyag tu tolay, a immogsad he a gábwat ti langet. Mabiyag hanggan-hanggan u ti deyaman a kuman ti iye. Sakay u iyatád ko a makan a ikabiyag nu tolay ti munduway ay u bággi ko.”

52Dipo he ay namágtalu-talo u Judio hide a nágsaneg ni Jesus. Kinagi de, “Kodya a meatád nikitam ni tolayan iye i bággi naáy para kanán tam?” 53Kinagi ni Jesus nide, “Kagiyan ko nikam u tatahoden: Mentaras awan moy kanán u bággi nu Anak nu Tolay sakay inumán u dige na ay awan kam magkahod ti biyag a awan ti kahád. 54Pero u kuman tu bággi ko sakay uminom tu dige ko ay magkahod ti biyag a awan ti kahád, sakay biyagán ko siya a huway tu katapusan a aldew. 55Dipo u bággi ko, u tunay a makan sakay u dige ko u tunay a áinumán. 56U kuman tu bággi ko sakay uminom tu dige ko ay manatile nikán, sakay manatiliyák be nikuna. 57U Ama ko a nangpaangay he nikan u pinaggabwatan ni biyag; kanya katoy be nikan u biyag a gabwat nikuna. Konna be tu kuman tu bággi ko ay atádden ku be siya ti biyag a gabwat nikan. 58Hikán u makan a gábwat ti langet. Iye ay bakán a kapareho nu mana a kinan nu ninuno moy hide, dipo natay labe hide maski ni kimman hide ti itod. Pero u ti deyaman a kuman ti makanan iye ay mabiyag a hanggan-hanggan.” 59I bagayan iye hide ay kinagi ni Jesus nikuna magtoldu siya tu bilay a págsambaan nu Judio hide ti Capernaum.

U Upos hide Tungkul tu Biyag

60Nikuna a masaneg iye nu disepulus hide ni Jesus ay makpal nide u nagkagi, “Madágge i itoldu nae. Ti deya u makaintendi ti iye?” 61Maski ni awan ti nagkagi nikuna ay tukoy ni Jesus a naganasasan u disepulus na hide dipo tu intoldu na hide. Kanya kinagi na nide, “Dipo beman ti iye ay adágginák moy dán? 62Kodya dán wád ni ketanák moy a Anak nu Tolay a paontok a pasole tu ginábwatan ko? 63U Ispirito nu Diyos u mangatád ti biyag; awan iye magimet nu tolay. U upos hide a kinagi ko ay gábwat tu Ispirito a makapangatád ti biyag. 64Pero te sangan nikam a awan maniwala.” Kinagi iye ni Jesus dipo tukoy na a sapul pa ti sapul ni ti deya u awan hide maniwala sakay ni ti deya u mángtokyon nikuna. 65Indagdag pa a kinagi ni Jesus, “Iye u dahilan ni bakin kinagi ko nikam a awan ti makaadene nikán liban ni kagustuwan nu Ama ko.”

66Sapul ti itod ay makpal dán tu disepulus na hide u immadág sakay awan dán nákkuyog nikuna. 67Tinanung nadid ni Jesus u sapulo ay ti duwwa na a disepulus, “Ánya gustuwák moy beman be a lakaden?” 68Timmábbeg ti Simon Pedro, “Panginoon ti deya pa beman angayan miyay? Katoy dán niko u upos a makapangatád ti biyag a awan ti kahád. 69Maniwala kame niko sakay tukoy me a hiko u Banal a pinaangay he nu Diyos.” 70Kinagi ni Jesus nide, “Awan beman pinile takam a sapulo ay ti duwwa? Pero u essa nikam ay dimonyo!” 71U gusto he a kagiyán ni Jesus ay ti Judas a anak ni Simon Iscariote. Dipo maski ni kaguman ti Judas tu sapulo ay ti duwwa a disepulus ay itokyon na padi ti Jesus tu mangdakáp nikuna.

Selectat acum:

Juan 6: MBJC

Evidențiere

Partajează

Copiază