Juan 14

Ti Jesus u Dilan

1Nadid ay kinagi ni Jesus nide, “Diyan kam mabalisa. Magtiwala kam tu Diyos sakay magtiwala kam be nikán. 2Tu bilay Nama ko ay makpal a kuwarto. Angayák hod para paghanda takam ti páppágyanan moy. Awan ku iye kagiyán ni awan tatahoden. 3Kapag nakaangayák dán hod sakay nepaghanda takamon ti páppágyanan moy ay soliyák sakay kuyugán takamon tu páppágyanan ko para maski ni hádyaák ay hod kam be. 4Sakay tukoy moy dán u dilan a patamo tu angayan ko.” 5Kinagi ni Tomas nikuna, “Panginoon, awan me tukoy ni hádya ka angayan, kodya me a matukuyan u dilan?” 6Timmábbeg ti Jesus nikuna, “Hikán u dilan, u tatahoden, sakay u biyag. Awan ti makaangay tu Ama ni awan tu pamamag-itan ko. 7Ni tukuyák moy ay tukoy moy dám be u Ama. Sapul nadid ay tukoy moy dán siya sakay netan.”

8Kinagi ni Felipe nikuna, “Panginoon, ipeta mu ped nikame u Ama, tán tama dán nikame.” 9Timmábbeg ti Jesus nikuna, “Awanák mu pad beman tukoy, Felipe, nalayák moy dán a kakaguman? U naketa nikán ay netan na dám be u Ama. Bakin a kagiyán mo a ipeta ko nikam u Ama? 10Awan ka beman maniwala a hikán ay hod tu Ama sakay u Ama ay hod nikán? U kákkagiyán ko nikam ay awan gábwat nikán nan tu Ama a hod nikán. U bagay hide a gággimitán ko ay siya be u maggimet dipo siya ay hod nikán. 11Maniwala kam tu kinagi ko, a hikán ay hod tu Ama sakay u Ama ay hod nikán. Ni umád moy a maniwala ti kinagi kuwan iye ay maniwala kam dipo tu ginággimet ko hide. 12Kagiyán ko nikam u tatahoden: U deyaman a maniwala nikán ay makagimet be tu gággimitán ko, sakay mas pa ti iye u magimet na dipo angayák dán tu Ama. 13Sakay maski ni ánya u agidán moy tu Diyos, tu pamamag-itan nu ngahan ko ay iyatád na, para maparangalan u Ama ko dipo nikán a Anak na. 14Kanya maski ni ánya u agidán moy tu pamamaggitan nu ngahan ko ay iyatád ko.”

U Pananto Tungkul tu Banal a Ispirito

15Kinagi na tu disepulus na hide, “Ni mahalák moy ay sunudán moy u utus ko. 16Sakay magdasalák tu Ama a atádden nakam ti Banal a Ispirito, siya u Tagagiyya nikam, kaguman moy siya a hanggan-hanggan. 17Sa itod u Banal a Ispirito a magtoldu nikam ti tatahoden. Awan siya matanggap nu taga-mundu hide dipo awan siya ketan oni makilala nu tolay hide. Pero tukoy moy siya, dipo siya ay kakaguman moy a hod nikam a hanggan-hanggan.

18Awan takam iwahak a awan ti kaguman, soliyák nikam. 19Sabadit dálla a panahun ay awanák dán ketan nu taga-mundo hide, pero ketanák moy. Sakay dipo biyagák, hikam be ay mabiyag. 20Tu káddemát ni itona a odas ay matukuyan moy a hodák tu Ama. Sakay hikam ay hod kam be nikán, sakay hikán ay hodák be nikam.

21U ti deya man a mangtanggap sakay mangsunud tu utus ko hide ay siya u mangmahal nikán. U mangmahal nikán ay mahalán be nu Ama sakay mahalán ku be siya, sakay magpakilalaák nikuna ti husto.” 22Tinanung siya ni Judas (Bakán a ti Judas Iscariote), “Panginoon, bakin a hikame la u pángpakilalaan mo tu sadile mo, awan mo ipakilala tu agum a tolay ti munduway?” 23Timmábbeg ti Jesus nikuna, “U mangmahal nikán ay sumunud tu upos ko. Mahalán siya nu Ama, sakay mágyan kame nikuna. 24U awan mangmahal nikán ay awan sumunud tu upos ko. Sakay u upos a nasaneg moy ay awan gábwat nikán nan gábwat tu Ama a nangpaangay he nikán.

25Kagiyán ko iye hide a bagay nikam, mentaras a kagumanák moy palla. 26Pero ni nakalakadák dán, u tagagiyya nikam ay u Banal a Ispirito a paangayán he nu Ama. Siya u mangtoldu nikam tu atanan a bagay sakay mángpaala-ala nikam tu atanan a kinagi ko nikam.

27Nadid, u iwahak ko nikam ay kapayapaan. Mismo a u kapayapaan ko u iyatád ko nikam ikapayapaanan iye ay awan meatád nu mundo. Kanya diyan kamon mabalisa sakay diyan kamon manteng. 28Nasaneg moy dán u kinagi ko tu itod a lumakadák pero soliyák labe nikam. Ni mahalák moy ay masaya kam tu káangay ko tu Ama, dipo mas dakila u Ama nan hikán. 29Kagiyán ko iye nikam nadid, bagu a mangyare para maniwala kam ni mangyare dán iye. 30Awan ku dán pakaatakdugán i kákkagiyán kuwáy nikam, dipo pademát dán ti Satanas a siya u maghare ti munduwáy, pero awan siya ti kapangyariyan nikán. 31Pero dapat a matukuyan nu tolay hide a mahal ko u Ama, kanya gimitán ko u inyutus na nikán. Kadtamon, lumakad kitamon he.”

Selectat acum:

Juan 14: MBJC

Evidențiere

Partajează

Copiază