1 Пачаби 4
4
1Шамуилил рагӀухъ гӀенеккулаан тӀолабго ГӀизраил.
Пилистимаз КъотӀиялъул гъамас бахъун ин
Пилистималгун рагъизе къватӀире рахъана ГӀизраилал ва Эвен-Эзералда аскӀоб къайи чӀван чӀана. Пилистимал Апекалда рукӀана. 2Пилистимал гӀизраилазда данде рагъизе рахъана, ва гьеб рагъулъ гьез гӀизраилал гъурана – гӀизраилазул ункъазарго чи чӀвана гьенив. 3Рагъухъаби къайи чӀвараб бакӀалде тӀадруссиндал, ГӀизраилалъул церехъабаз абуна:
«Кинан БЕТӀЕРГЬАНАС нилъ жакъа пилистимазул кверде кьурал? РачӀа нилъеца БЕТӀЕРГЬАНАСУЛ КъотӀиялъул гъамас Шилоялдаса гьанибе босизе, гьеб нилъеда цадахъ бугони, нилъ тушбабаздаса хвасарлъизе руго».
4Халкъалъ Шилоялде чагӀи ритӀана, ва хъерувимазул#4:4 Хъерувим – куркьбал ругеб малаик ва малаикзабазда гьоркьоб бищун тӀадегӀаназул цо тайпа. куркьбазда тӀад тах лъурав Гучал Аскаразул БЕТӀЕРГЬАНАСУЛ КъотӀиялъул гъамас босун бачӀана гьениса. Элил кӀиявго вас Хофниги Пинхасги рачӀана Аллагьасул КъотӀиялъул гъамас босун. 5Гьеб БЕТӀЕРГЬАНАСУЛ КъотӀиялъул гъамас гьенибе щварабго, гӀизраилаз риччарал кӀудиял гьаркьаз ракь сородизабуна. 6Гьеб гьаракь рагӀун пилистимаз абуна:
«ГӀизраилазда гьоркьоб бахъараб доб кӀудияб ахӀи-хӀуралъул магӀна щиб?»
Цинги гьезда лъана БЕТӀЕРГЬАНАСУЛ гъамас гьенибе бачӀун букӀин, 7ва гьел кутакалда хӀинкъана.
«Дозухъе Аллагь вачӀун вуго, – ян кӀалъана гьел цоцада. – Вай, балагь бачӀана гьанже нилъеде! Гьеб жеги ккараб жо букӀинчӀо! 8Вай щибдай гьанже нилъеца гьабилеб?! Дозул гучал аллагьзабаздаса нилъ лъица хвасар гьарилел?! ТӀаде кӀудиял балагьалги риччан, авлахъалда дол мисриял гъурарал аллагьзабилъидал дол! 9ЯхӀ гьабе, пилистимал! КъвакӀун чӀа, дол нужер лагъзаллъун рукӀарал гӀадин, нужго ккезе гурин гьанже дозул лагъзаллъун!»
10Гьебмехалъ пилистимаз гьезда тӀаде гьалагаб гьужум гьабуна ва гӀизраилал къезаруна. ГӀизраилал жидерго чадразухъе лъутана. ЦӀакъ гӀасияб рагъ ккана гьениб, ва гӀизраилазул лъеберазарго чи чӀвана. 11БетӀергьанасул гъамасги бахъана пилистимаз ва Элил кӀиявго вас Хофниги Пинхасги чӀвана.
Кашиш Элил хвел
12Гьебго къоялъ рагъ ккараб бакӀалдаса векерун Шилоялде вачӀана цо буняминияв. БотӀроде хӀатӀги бан, ретӀелги бихъун#4:12 БотӀроде хӀатӀ бай ва ретӀел бихъи – кӀудияб балагь, яги къварилъи бачӀун бугин абураб магӀна кколаан гьелъул. букӀана гьесул. 13Гьев гьениве щваравго, Эли жиндирго бакӀида нухлул ракьанда гӀодов чӀун вукӀана. Аллагьасул гъансил ургъалида нухде валагьун чӀун вукӀана гьев. ВачӀун гьев чияс ккараб жо бициндал, тӀолабго шагьаралда кӀудияб магӀил гьаракь бахъана. 14Гьеб рагӀун Элица цӀехана: «Гьаб щиб ахӀи-хӀур?» – ин.
Буняминияв хехго Элида аскӀове вилълъана. 15Элица ункъоялда анцӀила микьго сон бан букӀана, ва гьесул берал тӀуран беццлъун рукӀана.
16Буняминияс Элида абуна: «Дун вуго рагъ ккараб бакӀалдаса гьабсагӀат щварав чи, жакъа вахъана дун доваса». Цинги Элица цӀехана: «Щиб доба ккараб, дир вас?» – ин.
17Гьев хабар босун вачӀарав чияс абуна: «ГӀизраилал пилистимазухъа къуна ва гьезул боялъе кӀудияб ками ккана. Дур кӀиявго вас, Хофниги Пинхасги чӀвана; Аллагьасул гъамасги бахъун ана».
18Гьес Аллагьасул гъансил цӀар бахъарабго, шагьаралъул кавабахъ жиндирго тахида гӀодов чӀун вукӀарав Эли, нахъехун рехун гӀодов речӀчӀана. Гьев вукӀана жаниб цӀураб къаркъалаялъул херав чи, гьединлъидал, гьеб бакӀалдаго габурги бекун, гьев хвана. КӀикъого соналъ ГӀизраилалъе нухмалъи#4:18 Ялъуни къадилъи – пачабазул заман щвелалде цебе къадизабаз гьабулаан ГӀизраилалда тӀад нухмалъи. гьабуна гьес.
19Гьесул нус, Пинхасил лъади, лъимаде йикӀана гьебмехалда, ва лъимер гьабизе мех гӀагарлъулеб букӀана. Аллагьасул гъамас бахъун ун бугин ва вакьадги росги хун ругин рагӀидал, гьей унтиялъ гӀодой лъуна. Гьеб бакӀалдаго хӀараги чӀван лъимерги гьабуна. 20Хвалилъ йигей гьелда аскӀор ругел руччабаз абулеб букӀана: «Ургъел ккоге, дуе вас гьавуна», – ян.
Амма гьелъ гьеб рагӀуда данде щибго жаваб гьабичӀо. 21Васасда Ихавод (къадру-къуваталъ тарав) абун цӀарги лъун, «Къадру-къуваталъ тана ГӀизраил», – ин абуна гьелъ, щайгурелъул БетӀергьанасул гъамас бахъун ун букӀиндал, ва гьелъул вакьадги росги хун рукӀиндал. 22Гьелъ абуна: «Аллагьасул гъамас бахъун ун бугелъул, ГӀизраил къадру-къуваталъ тана», – ян.
Selectat acum:
1 Пачаби 4: АварАК
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2005-2023