मर्कुस 3
3
हाथ सुखाल मानुस निक भइल
(मति १२:९-१४; लुका ६:६-११)
1अर्क दिन येसु फेरि सभाघरयँ जाइकेभइल, उछिका एक जेना हाथ सुखाल मानुस पुनु रहइ। 2हसे नात्लिक दिनयँ येसुइ उसे मानुसके निक पार्ताहात् कि कइकुन दोस लागाइके उछिक मानुससब ढुकिकुन बोस्ल रहत। 3उहइ बेलाके येसुइ हाथ सुखाल मानुसके कहिकेभइल, “उठिकुन आघु आउक्।” 4येसुइ उसब्के पुछिकेभइल, “बेबस्थाइ किति करिके कहित? नात्लिक दिनयँ राम्र करिके कि नइजेराम्र, जिबन बाचाइके कि मारिके?”
तर उसबेइ इसे कुराक जबाफ देइके नसकिकुन चुप्लालि रहल। 5उसब्क कठोर मन देखिकुन येसु धेरइ दुखि भइकेभइल र रिसातिन चारिओर चाहिसक्लपाछु, उसे मानुसके कहिकेभइल, “तेर हाथ पस्राउक।” उहाइ आफ्न हाथ पस्राल र उक्र हाथ पुरइ निक भइल। 6उपाछु फरिसिसब सभाघरकमाटे निस्किकुन जइल, हसे येसुके कस्के मारिके कइकुन हेरोदिसबसाङ सल्लाहा कर्ल।
मानुससब्क भिडेइ येसुके पच्छेल
7-8उपाछु येसु आफ्न चेलासबसाङ गालिलि तालपटि जाइकेभइल। उछिका मानुससब्क बड्क भिड अइल। येसुइ करिकेभइल अचम्मक कामक बारेयँ सुनिकुन उसब गालिल, यहुदिया, यरुसलेम, इदुमिआ, यर्दन ओपारसे हसे टुरोस र सिदोनक छेउछाउसे धेरइ जेना ओनेन्कलघि अइल। 9येसुइ धेरइ मानुससब्क भिड देख्लपाछु, आफ्नेन्के झुनमिचुस् कइकुन ओनेनेइ चेलासब्के एक्टा डोङा तयार पारिके कहिकेभइल। 10ओनेनेइ धेरइ जेनाके निक पारिके भइलगुनेइ जत्का जेना मन्देल रहत, सभुनि ओनेन्के छिइके धक्ला-धक्लि कर्ते रहत। 11उछिका भुत आत्मा लाग्ल मानुससबेइ येसुके देख्ल बिथिकइ, ओनेन्क आघु घोप्टो पोरिकुन चिच्चेतिन् यस्न कहल, “तोहे परमेसोरक छावा हखउ!” 12तर येसुइ उसे भुत आत्मासब्के “मोइ कोनो हखम कलाहार कुरा कोख्राहुके झुनकहसब” कइकुन कडा आग्या देइकेभइल।
येसुइ बाह्र जेना चेलासब्के छानिकेभइल
(मति १०:१-४; लुका ६:१२-१६)
13उपाछु येसु एक्टा डाँडायँ जाइकेभइल, हसे आफ्न मनेइ खइल चेलासब्के बोलाइकेभइल, र उसब ओनेन्कलघि अइल। 14हसे उसब्के आफ्नसाङ रहिके र मानुससब्के सुसमचार प्रचार करिके पाठाइके लागि बाह्र जेना चेलासब छानिकुन “प्रेरित” नाउ देइसक्लपाछु, 15उसब्के भुतसब निस्कालाहार अधिकार पुनु देइकेभइल। 16येसुइ छानिकेभइल बाह्र जेना चेलासब्क नाउ इहइ हखइ, सिमोन जोख्राके येसुइ पत्रुस नाउ राखिकेभइल, 17जब्दियाक दुहइ छाहोकसब याकुब र उक्र भाहिक युहन्ना जोख्राके ओनेनेइ बोअनग्रेस राखिकेभइल, जोक्र अर्थ हखइ गर्जनक छाहोक्, 18अन्द्रियास, फिलिप, बारथोलोमाइ, मति, थोमा, अल्फयसक छाहोक् याकुब, थेदियस, सिमोन कनानि, 19हसे यहुदा इस्करियोत जोनेइ येसुके पाछु जाइकुन धोखा देल।
पबित्र आत्माक बिरोध नाकरिके
(मति १२:२२-३२; लुका ११:१४-२३; १२:१०)
20उपाछु येसु एक्टा घरयँ जाइकेभइल। उछिका फेरि मानुससब्क बड्क भिड जम्मा भइल, यत्कासमन कि येसु र ओनेन्क चेलासबेइ खइलाहार कुरा खाइके पुनु नइजे पाउल। 21इसे कुरा सुनिकुन येसुक जाहानेइ ओनेन्के लेजिके कइकुन निस्कल, किकेकने उसबेइ “ओनेन्क मन ठेगानयँ नइजे” कहतिन् रहत।
22धर्मगुरुसब जोनो यरुसलेमकमाटे अइल रहत, उसबेइ यस्के कहल, “इख्राके भुत आत्मासब्क मालिक बालजिबुल लाग्ल बाटइ, हसे उहइ भुतसब्क मालिक्क सक्तिकमाटे इहाइ भुतसब निस्काइत।” 23उपाछु ओनेनेइ उसब्के बोलाइकुन काथाकमाटे कहिकेभइल, “सइतानेइ सइतानके कस्के निस्काइके सकित र? 24यदि कोलोउ देसयँ एक-आपसयँ फुट भइत कने, उसे राज्जे टिकिके नासकइ। 25हसे जोनो घरयँ फुट भइत, उसे घर पुनु टिकिके नासकइ। 26ओसिनकरिकुन सइतानेइ-सइतानक बिरोध करित् कने, उसे पुनु टुक्रिकुन टिकिके नासकइ र उक्र नास भइत।
27 “यदि बलिय मानुसक घरयँ पोसिकुन उक्र धन-सम्पति लुटिके बाटइ कने, सभइकते आघु उसे मानुसके बाधिके पोरित। उपाछु बल्ल उक्र घर लुटिके सक्ताहिँ।
28 “साच्चिकइ मोइ तेउह्रासब्के कहतम्, मानुससबेइ कर्ल सभइ पाप र परमेसोरक बिरोधयँ कर्ल अपमानसमेत छेमा पाइके सक्ताहात्, 29तर पबित्र आत्माके अपमान कर्ल पापक छेमा कइह्याउ पुनु नापाओइ, किकेकने उसे अजम्बरि पापक दोसि ठहरित्।” 30इसे कुरासब येसुइ कहिकेभइल किकेकने उसबेइ, “उक्रसाङ भुत आत्मा बाटइ” कहल रहत।
येसुक उइया र भाहिकसब
(मति १२:४६-५०; लुका ८:१९-२१)
31उपाछु येसुक उइया र भाहिकसब उछिका पुगिकुन, आफ्निसब चाहिँ बाहारइ ठोडेइकुन येसुके बोलाइके पाठाल। 32उछिका मानुससब्क भिड येसुक चारिओर बोसिराख्ल रहत, हसे ओनेन्के उसबेइ कहल, “सुनउ तेउह्र उइया, भाइ र बइनिसबेइ तेउह्राके बाहार आइकुन खोज्तिन बाटत।”
33येसुइ जबाफ देइकेभइल, “मेर उइया र भाइसब कोनो हखइ से?” 34उपाछु ओनेनेइ घेरा लागिकुन बोस्ल मानुससब्के चारिओर चाहिकुन कहिकेभइल, “इसब नइ मेर उइया र भाइसब हखत। 35किकेकने जोनेइ-जोनेइ परमेसोरक इच्छा पालन कर्ताहात्, उसब नइ मेर भाइ, बइनि र उइया हखत।”
Selectat acum:
मर्कुस 3: DRY
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
