मर्कुस 10
10
सम्बन्ध बिछेदक बारेयँ सिछ्या।
(मति १९:१-१२; लुका १६:१८)
1उपाछु येसुइ उसे ठाउके छाडिकुन यहुदिया इलाका र यर्दन खोलाक ओपारपटि जाइकेभइल। र भिडसब ओनेन् भइल ठाउयँ जम्मा भइल, हसे ओनेनेइ रिति अनुसार उसब्के फेरि पुनु सिछ्या सिखाइके थाल्ल।
2उछिका कोलोउ फरिसिसब येसुकलघि आइकुन जाँच कर्तिन पुछ्ल, “किति कानुनेइ मानुसके आफ्न दुलिहिसाङ सम्बन्ध बिछेद करिके देइत्?”
3हसे ओनेनेइ उसब्के कहिकेभइल, “मोसाइ कस्न आग्या देल बाटइ?”
4उसबेइ कहल, “मोसाइ त एक्टा छोडपत्र लेखिकुन आफ्न दुलिहिसाङ सम्बन्ध बिछेद करिके सक्ताहाउ कइकुन अनुमति देल बाटइ।”
5तर येसुइ उसब्के कहिकेभइल, “उसे त तेउह्रसब्क मनक कठोरताइ कर्तेखना उहाइ इसे आग्या लेखिदेल हखइ। 6तर सिरिस्टिक सुरुसे नइ परमेसोरेइ ‘बेटा र बेटि’ बानाइकेभइल। 7‘उहइगुनेइ मानुसेइ आफ्न बुबा उइयाके छाडिकुन आफ्न दुलिहिसाङ मिलिकुन बोसित, 8हसे ओनेन् दुइ जेना एक्टाइ भइताहात्।’ उपाछु उसब फेरि दुक्टा नाभओइ, तर एक्टाइ देहि भइताहात्। 9उहइगुनेइ जोख्राके परमेसोरेइ जोडिकेभइल बाटत, उख्राके मानुसेइ झुनछुटाउस्।”
10जब ओनेन्सब घर फर्किकेभइल, तब ओनेन्क चेलासबेइ सम्बन्ध बिछेदक बारेयँ फेरि पुछ्ल। 11ओनेनेइ उसब्के कहिकेभइल, “जोनेइ आफ्न दुलिहिसाङ सम्बन्ध बिछेद करिकुन अर्किसाङ बिहा करित्, उहाइ दुलिहिक बिरोधयँ बेभिचार कर्ल भइत। 12ओसिनकरिकुन जोनो बेटिइ आफ्न दुलाहासाङ सम्बन्ध बिछेद करिकुन अर्क बेटासाङ बिहा करित्, उहाइ पुनु बेभिचार नइ कर्ल भइत।”
नाउनि केट्केटिके येसुक आसिरबाद
(मति १९:१३-१५; लुका १८:१५-१७)
13एक दिन मानुससबेइ नाउनि केट्केटिके येसुइ छिइ देउस् कइकुन ओनेन्कलघि आन्ल, तर ओनेन्क चेलासबेइ उसब्के हप्काल। 14जब चेलासबेइ हप्काइ राख्ते येसुइ देखिकेभइल, तब ओनेन् रिसातिन उसब्के कहिकेभइल, “केट्केटिसब्के मेरलघि आइके देओ, उसब्के झुनरोकउ, किकेकने परमेसोरक राज्जे यस्नइसब्क लागि हखइ। 15साच्चिकइ मोइ तेउह्रासब्के कहतम्, जोनेइ-जोनेइ परमेसोरक राज्जेके इसे नाउनि केट्केटि जस्नइ ग्रहन नाकरइ, उसे कइह्याउ पुनु उसे भितर पोसिके नापाओइ।” 16हसे येसुइ उसब्के कोरायँ लेइकुन ओनेन्सब्क उप्र हाथ राखिकुन आसिस देइकेभइल।
धनि मानुस
(मति १९:१६-३०; लुका १८:१८-३०)
17येसु जइतिन् कर्तेखना पइडायँ एक जेना मानुस दुघ्रतिन आइकुन, ओनेन्क आघु ठेउनो धसिकुन पुछ्ल, “हे असल गुरुजिउ, मोइ अजम्बरि जिबन पाइके किति करिके पोरित?”
18येसुइ उख्राके कहिकेभइल, “तोइ मेह्राके किके असल कहते बाटस्? परमेसोर बाहेक कोलोउ पुनु राम्र नइजे बाटइ। 19परमेसोरक आग्यासब त तेउह्रासब्के थाहाइ बाटइ, ‘नाचोराइके, नामारिके, बेभिचार नाकरिके, झुठो गवाहि नादेइके, नाठगिके हसे बुबा र उइयाके मान करिके।’”
20हसे उहाइ कहल, “गुरुजिउ, इसे आग्यासब त मोइ नाउनिहिँसे मान्ते अइल बाटम।”
21येसुइ उख्राके चाहिकेभइल र माया कर्तिन कहिकेभइल, “अझइ तोइ एक्टा काम करिके बाकि बाटइ। जाउक्, तेह्रासे जिति-जिति बाटइ उसे सभइ बेचिकुन गरिबसब्के देउक्, हसे तोइ सोर्गक धन पाउतस् उपाछु मेर पाछु लागुक।” 22तर इसे कुराइ उक्र मन बोथ्ल, हसे आन्धार मुहु बानातिन जइल, किकेकने उक्रसाङ धेरइ सम्पति रहइ।
23हसे येसुइ चारिओर चाहातिन् चेलासब्के कहिकेभइल, “धनि मानुससब्के परमेसोरक राज्जेयँ पोसिके धेरइ गाह्र भइते रलाहाइ।”
24येसुक कुरा सुनिकुन चेलासब छक्कइ पोर्ल, तर ओनेनेइ फेरि पुनु उसब्के कहिकेभइल, “केट्केटि हो, परमेसोरक राज्जेयँ पोसिके धेरइ गाह्र भइत। 25धनि मानुसके परमेसोरक राज्जेयँ पोसिकेकते त उटके सुइक नाथिसे छिरिके सजिल भइत।”
26हसे चेलासबेइ बेस्के अचम्म मान्तिन कहल, “ओस्न हखइ कने कोनो बाचिके सकित त?”
27येसुइ उसब्के चाहातिन् कहिकेभइल, “इसे कुरासब मानुससब्क लागि असम्भब भइने पुनु, परमेसोरक लागि सम्भब बाटइ।”
28हसे पत्रुसेइ ओनेन्के कहल, “चाहउ, हामे त सभइ थोक छाडिकुन तेउह्रइ पाछु लाग्ल बाटिहिँ।”
29येसुइ कहिकेभइल, “मोइ तेउह्रासब्के साच्चिकइ कहते बाटम, जोनेइ मेर लागि र सुसमचारक लागि घरबारसब, जग्घा जिमिनसब, उइया-बुबा, दिदिबइनिसब, दाजुभाइसब र छाहोक-छाहिकसब छाडित, 30उहाइ इहइ बेलायँ दुख र सतावटसाङ घरबारसब, जग्घा जिमिनसब, उइया-बुबा, दिदिबइनिसब, दाजुभाइसब र छाहोक-छाहिकसब सय गुनाकते धेरइ पाइत। हसे अइलाहार जुगयँ चाहिँ अजम्बरि जिबन पाइत। 31तर यख्नि धेरइ आघु भइलाहारसब पाछु भइताहात्, हसे पाछु भइलाहारसब चाहिँ धेरइ आघु भइताहात्।”
येसुक आफ्न मोर्लाहारबारे तेस्रा भबिस्यबानि
(मति २०:१७-१९; लुका १८:३१-३४)
32उपाछु उसब यरुसलेमपटि जइतिन् रहत, येसुचाहिँ उसब्क आघु-आघु पइडायँ हिठ्ते रहत। ओनेन्क चेलासब चाहिँ छक्क पोरिरहल रहत कने, पाछुपाछु अइलाहारसब चाहिँ डाराल रहत। हसे ओनेनेइ बाह्र जेना चेलासब्के फेरि एकपटि लेजिकुन आफ्नेन् भोगिके पोर्लाहार कुरासब कहिकेभइल, 33“सुनउ, हामे यरुसलेमपटि जइतिन् बाटिहिँ। उछिका मानुसक छावाके धरिकुन मुक्खे पुजेहेरिसब र धर्मगुरुसब्क हाथयँ सोपदेताहात्, हसे मानुसक छावाके मार्ताहात्, र अरुजातसब्क हाथयँ जिम्मा लागाताहात्, 34हसे उसबेइ ओनेन्के गिल्ला कर्ताहात्, थुथेताहात्, कोर्रा लागाताहात्, र मार्ताहात, तर तेस्रा दिनयँ मानुसक छावा फेरि जिउत भइकुन उठ्ताहात्।”
याकुब र युहन्नाइ बिन्ति कर्ल
(मति २०:२०-२८)
35उपाछु जब्दियाक दुक्टा छाहोकसब, याकुब र युहन्ना ओनेन्कलघि आइकुन कहल, “गुरुजिउ, हामे जिति माङ्ताहिँ उसे पाउयेइ हाम्र लागि करिदेओ कलाहार हाम्र इच्छा बाटइ।”
36येसुइ कहिकेभइल, “मोइ तेउह्रसब्क लागि किति कर्देइके?”
37उसबेइ ओनेन्के कहल, “पाउक महिमायँ हाम्राके एक जेनाके दाइने र अर्कके देब्रेपटि बोसिके देओ।”
38तर येसुइ उसब्के कहिकेभइल, “तोहेसब किति माङ्तिन बाटउ उसे नाबुझउ। किति मोइ पिउलाहार दुखक कचुरा तोहेसब पिइके सक्ताहाउ? अथबा मोइ लेलाहार दुखक बप्तिस्मा तोहेसब लेइके सक्ताहाउ?”
39हसे उसबेइ कहल, “हामे सक्ताहिँ”
येसुइ उसब्के कहिकेभइल, “जोनो कचुरा मोइ पिउतम् उसे तोहेसब पिउताहाउ, हसे जोनो बप्तिस्मा मोइ लेतम्, उसे तोहेसब पुनु लेताहाउ। 40तर मेर दाइने र देब्रेपटि बोसिके देलाहार मोइ नइजे, उसे त जोक्र लागि तयार भइल बाटइ, उक्रइ लागि हखइ।”
41जब इसे कुरा दस जेना चेलासबेइ सुन्ल, तब उसब याकुब र युहन्नासे रिसाल। 42हसे येसुइ उसब्के बोलाइकुन कहिकेभइल, “तेउह्रासब्के थाहाइ बाटइ, कि अरुजातसब्के सासन कर्लाहारसबेइ उसबउप्र सासन चालाताहात्। ओसिनकरिकुन बड्कसबेइ पुनु उसबउप्र अधिकार चालाताहात्। 43तर तोहेसब चाहिँ ओस्न भइके नाभओइ। यदि तोहेसब मद्धे जोनो बड्क भइके खोज्ताहाउ, उसे तेउह्रसब्कइ सेवक भइके पोरित। 44हसे जोनो आघु भइके खोजित, उसे पुनु सभइक नोकर भइके पोरित। 45किकेकने मानुसक छावा सेवा पाइके नइजे, तर सेवा देइके र धेरइक छुट्काराक लागि आफ्न परान देइके अइल हखइ।”
आँखि नइजेदेख्लाहार बारतिमइ निक भइल
(मति २०:२९-३४; लुका १८:३५-४३)
46उपाछु ओनेन्सब यरिहो सहर पुगिकेभइल। उछिकमाटे येसु र ओनेन्क चेलासबसाहिन बड्क भिड निस्कतेखना, एक जेना आँखि नइजेदेख्लाहार भिखारि तिमइक छाहोक् बारतिमइ पइडाक छेओ बोसिरहल रहइ। 47जब उहाइ नासरतक येसु आइकेभइल बाटत कलाहार कुरा सुन्ल, तब चिच्चेतिन् कहल, “हे येसु, दाउदक छावा, मेह्राके दया करउ!”
48धेरइ मानुससबेइ उख्राके चुप्लाउस् कइकुन हप्काते पुनु झन चर्को सोरेइ चिच्चेतिन् कहल, “हे दाउदक छावा, मेह्राके दया करउ।”
49हसे येसु टक्क अडिकुन कहिकेभइल, “उख्राके बोलाओ।”
उसबेइ उसे आँखि नइजेदेख्लाहारके बोलातिन कहल, “खुसि भइतिन् उठुक्, ओनेनेइ तेह्राके बोलातिन बाटत!”
50हसे उहाइ आफ्निक कोम्रि घुघाइकुन जुरुक्कइ उठ्ल र येसुलघि जइल।
51येसुइ उख्राके कहिकेभइल, “मोइ तेर लागि किति करिदेम्?”
उसे आँखि नइजेदेख्लाहारइ कहल, “रब्बि, मोइ आँखि देखिके पाम्।”
52येसुइ उख्राके कहिकेभइल, “तेर पइडा लागुक। तेरइ बिस्वासेइ तोइ निक भइल बाटस्।” हसे ओख्निहिँ उसे देखिके सक्लाहार भइकुन, उहइ पइडाहिँसे ओनेन्क पाछु लाग्ल।
Selectat acum:
मर्कुस 10: DRY
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
