मर्कुस 8
8
येसुइ प्लय हजार मान्तालमकाय जेःसा बइसास्यावो
(मति १५:३२-३९)
1केहि दिन लोन्हे येसुको वरिपरि फेरिले नाःतो मान्तालमको हुल हुमाकाय, र ओउमयकुस सुकुसिमा जेःओ थोकलम नाःआक्ल। अनि येसुइ लयको चेलालमकाय गोताक्तिको तोसास्यावा, 2“इ मान्तालमको हुलकाय च्यउति ङाइ माहा जोक्तो योःनालाङ, धइतिदाह्य्सा सुम दिनहाङसय इ मान्तालम इहाङ ङाकुसले मुनय, र देङे इमयकुस जेःसाको लागि दोह जेःगामा नाःल। 3यदि ङाइ इमयकाय योङक्रायले किमताङ ल्होक्नाङ त खेया, इमय ल्यामहाङले योङक्रायइ प्रात्तो स्याउलेनय। धइतिदाह्य्सा इमयमध्ये कोय-कोयखे लोक्तोसय वाङो खेनय।”
4चेलालमइ येसुकाय ह्वताकानि, “एतताह्ङो सुमा याक्मालो थाउहाङ उच्युक नाःतो मान्तालमको हुलकाय, गतहाइति निइ जेःगा जुर्याउति बइसा खाइनातह्य्नि र?”
5अनि येसुइ ओउमयकाय ह्वत्सास्यावा, “निङकुसि गच्युक गोता लाङ मुना?”
ओउमय त्याङाकाय, “निकुसि सात गोता लाङ मुना।”
6येसुइ जुदा मान्तालमको हुलकाय चवरहाङ च्युःङ्साको लागि आग्या जाह्ङ्सास्यावा। ओहाङसयको येसुइ सात गोता लाङ त्याक्सास्यावा, र ओउ जेःगाको लागि परमेस्वरकाय धन्नेबाद बइसास्यावा। अनि येसुइ लाङ फह्न्सास्यावा, र मान्तालमकाय वेःति बइसाको लागि ओउ लाङ चेलालमकाय ल्हासास्यावा, र चेलालमइमा जुदा मान्तालमकाय लाङ वेःति बयाकानि। 7ओउमयकुस केहि म-मयो ङाःलममा खेतो। ओउ ङाःलमको लागिमा येसुइ परमेस्वरकाय धन्नेबाद बइसास्यावा, र मान्तालमकाय ओउ ङाः वेःति बइसाको लागि चेलालमकाय तोसास्यावा। 8अनि जुदा मान्तालमइ कोस्तोसम्मले जेःआकानि। र लोन्हे, वेतिमुओ लाङलमको क्लह्यो तुकुरालम हुम्धार्ना सात दालो ब्लिङा। 9ओहाङ जेःगा जेःओ मान्तालम प्लय हजारच्युककाय खेइतो, र जेःगा जेःति भ्याआपछि येसुइ ओउमयकाय बिदाइ जाह्ङ्ति ल्होक्सास्यावा। 10ओहाङसयको ओउच्युक खेरले येसुखे लयको चेलालमकुस दोङगाहाङ लह्न्ति दलमनुथा त तोओ छेत्रताङ आल्सास्यावा।
फरिसिलमइ लाङकाको चिनो तेओ
(मति १६:१-४)
11केहि फरिसिलम वाङाक्तिको येसुकुस बाद-बिबाद जाह्ङ्सा फाःङाकानि। येसुकाय परिछ्याहाङ पारसाको लागि ओउमयइ येसुकाय एतदाह्य्ति ह्वताकानि, “यदि नाङकाय परमेस्वरइले ल्होक्सास्यावो खेना त खेया, ओउ कुराको प्रमानको रुपहाङ निकाय चिनो छ्यान्ताङि।”
12तर येसुइ ल्हह्य्ङ सासाक्तिको ओउमयकाय तोसास्यावा, “इ पुस्ताको मान्तालमइ धइति ग्याह्ङ्सिओ चिनो बोःङ्नानि? दोङ्सिले ङाइ निङकाय तोनेनाङ्स, ङाइ इ पुस्ताको मान्तालमकाय दोह चिनोमा बइलेङल।”
13एत तोति भ्याआपछि, ओउमयकाय फेआक्तिको येसु दोङगाहाङ लह्न्ति समुन्द्रको पारिताङ आल्सास्यावा।
फरिसिलम र हेरोद एन्तिपासको खमिर
(मति १६:५-१२)
14येसुको चेलालमकुस दोङगाहाङ यातज्यो मात्र लाङ खेतो, धइतिदाह्य्सा ओउमयइ लयमयकाय चाहओच्युक लाङ आःल्साले म्हेःओ खेइतो। 15अनि येसुइ लयको चेलालमकाय दर्कधय तोसास्यावा, “होसियार स्याउन, निङखे फरिसिलम र राजा हेरोद एन्तिपासको खमिरसय#८:१५ फरिसिलम र राजा हेरोद एन्तिपासको खमिर यहुदिलमइ खमिरकाय पापको सङ्केतको रुपहाङ प्रयोग जाह्ङ्नितो, धइतिदाह्य्सा गतहाइति मइतो खमिरइमा नाःतो ओय्ककाय फताक्नउ, ओउतले पापमा मान्तालमकहाङ फइलिति आल्ना। फरिसिलम र राजा हेरोद एन्तिपासइ परमेस्वरको मान्तालमकाय पेमालो कामलम जाह्ङ्तो जाह्ङ्ताकोझ्यान्ते, येसुइ खमिरको उधारन वान्ति लयको चेलालमकाय दर्कसास्यावो र ओउमयको स्यानराय स्याताहा खेओझ्यान्तेमा एतदाह्य्ति तोसास्यावो खेना (मति १६:६; लुका १२:१)। दल्ति मुन।” 16तर लयमयकुसि लाङ नाःमालोझ्यान्ते येसुइ एतदाह्य्ति तोसास्यावो खेचा त म्हर्ति ओउमय यात-अर्काकुस बाद-बिबाद जाह्ङ्काइसा फाःङाकानि।
17ओउमय नोःकायो कुराकाय चिःति येसुइ ओउमयकाय ह्वत्सास्यावा, “लयमयकुसि लाङ नाःमालोको बारेहाङ निङ धइति बिबाद जाह्ङ्कायतेनय? दोह निङइ अझसम्मले च्यवो र चिःओ नाःतेइलि? दोह निङको मन ङाको स्यानराय चिःसा खाइमातोको मुना र? 18निङकुसि मिकपाय मुना, तर निङइ च्यउतेनिलि। निङकुसि नोपाय मुना, तर निङइ साइतेनिलि।#यर ५:२१ दोह निङइ सम्झसा खाइतेनानि, 19जब ङाइ पोङाज्यो लाङ फह्न्ति पोङा हजार मान्तालमकाय जेःसा बयालाङ, वेतिमुओ लाङलमको क्लह्यो तुकुरालम निङइ गुच्युक सोल्हे हुम्तेआकानि?”
ओउमय त्याङाकाय, “निइ बाह्र सोल्हे हुमालाङ्सु।”
20 “अनि जब ङाइ सात गोता लाङ फह्न्ति प्लय हजार मान्तालमकाय जेःसा बयालाङ, वेतिमुओ लाङलमको क्लह्यो तुकुरालम निङइ गुच्युक दालो हुम्तेआकानि?”
ओउमय त्याङाकाय, “निइ सात दालो हुमालाङ्सु।”
21ओहाङसयको लोन्हे येसुइ फेरिले ओउमयकाय ह्वत्सास्यावा, “ङाइ निङकाय जेःओ लाङको बारेहाङ तोओखे खेल त दाह्य्ति दोह निङइ अझले चिःओ नाःतेइलि र?”
येसुइ बेथसेदा गाउहाङ यातचाक मिक च्यउमालो मान्ताकाय स्याक्ताक्सास्यावो
22येसु र ओउको चेलालम बेथसेदा गाउहाङ दाहाकाय। ओहाङको मान्तालमइ यातचाक मिक च्यउमालो मान्ताकाय येसुकहाङ लात्ति वानाकानि, र ओउकाय धिन्ति स्याक्ताक्ति बइसास्याउपाना त दाह्य्ति ओउमयइ येसुकाय बिन्ति जाह्ङाकानि। 23येसुइ ओउ मिक च्यउमालो मान्ताकाय क्रुतहाङ चुम्ति गाउसय बाहिरताङ आःल्सास्यावा। जब येसुइ ओउको मिकहाङ लयको द्युःर ल्यान्सास्यावा, अनि ओउकाय स्याक्ताक्साको लागि ओउको मिकहाङ क्रुतइ धिनाक्तिको ह्वत्सास्यावा, “देङे नाङइ केहि च्यउसा खाइतेनउ?”
24ओउ मान्ताइ त्याःउताङ त्याउति योआक्तिको एत दाह्या, “मा, ङाइ मान्तालमकाय च्यउनाङ, तर ङाइ ओउमयकाय पेतो च्यवो नाःङल। ओउमयपाय सिङको बोतलम इताङ-उताङ वाह्तिमुओलेखा च्यउनाङ।”
25अनि येसुइ फेरिले लयको क्रुतइ ओउको मिकहाङ धिन्सास्यावा, र ओउ बेलाहाङले ओउइ मिकको ज्योति दोःआ, र जुदा थोकले पेतोकुसि च्यउसा खायाकान। 26ओहाङसयको येसुइ ओउकाय दर्कधय “नाङ देङे लयको किमताङ द्याह्न्ति पाह्य्तोकहाङ, गाउताङ आल्मात सरासर लयको किमताङ पाह्य” त दाह्य्ति तोति ल्होक्सास्यावा।
येसुले ख्रिस्त खेसास्याउना त दाह्य्ति पत्रुसइ सुइकार जाह्ङो
(मति १६:१३-२०; लुका ९:१८-२१)
27अनि येसु र ओउको चेलालम बेथसेदा गाउसय कयसरिया-फिलिप्पि सहर वरिपरिको गाउलमताङ आलाकाय। ल्यामहाङ आल्धयमुतोकहाङ येसुइ लयको चेलालमकाय ह्वत्सास्यावा, “मान्तालमइ ङाकाय सु खेना त तोनाताङ्स?”
28ओउमय त्याङाकाय, “केहि मान्तालमखे बप्तिस्मा बयो युहन्ना खेना त दाह्य्नय, कोयखे एलिया अगमबक्ता खेना त दाह्य्नय, अनि कोय-कोयखे अगमबक्तालम मध्येको यातचाक अगमबक्ता खेचा त दाह्य्नय।”
29अनि येसुइ ओउमयकाय ह्वत्सास्यावा, “अनि निङखे ङा सुखे त म्हर्तेनय?”
पत्रुस त्याङा, “नाङपाय परमेस्वरइ ल्होक्सास्यावो ख्रिस्त खेसास्याउतेना।”
30अनि येसुइ ओउमयकाय इ कुरा सुकायमा तोलाम त दाह्य्ति आन जोक्तो दर्कति तोसास्यावा।
येसुइ लयको दुख र सिमयको बारेहाङ तोसास्यावो
(मति १६:२१-२८; लुका ९:२२-२७)
31अनि येसुइ लयको चेलालमकाय एतदाह्य्ति स्यान्लाङ फाःङ्सास्यावा, “ङा मान्ताको चोःइ आन नाःतो दुख च्यउसा परनाङ र पाको अगुवालम, मुख्य पुजारिलम, र धर्मगुरुलमइ ङाकाय इन्कार जाह्ङ्नाताङ्स अनि ङाकाय सात्नाताङ्स। तर सुमम् दिनहाङखे ङा फेरि सिओसय उह्ति च्योक्लेनाङ।” 32येसुइ लयको चेलालमकाय इ कुराको माने दोह खेना त दाह्य्ति पेतोकुसि चिःतोसम्म तोसास्यावा। ओउतझ्यान्ते पत्रुसइ येसुकाय यातताङ आःलाक्तिको ओउत नोःलाम त दाह्य्ति दर्कआकान। 33तर येसुइ लयको चेलालमकताङ द्याह्न्ति योआक्तिको पत्रुसकाय एतदाह्य्ति थत्सास्यावा, “अ सय्तान, नाङ ङाकसय लोक्तो पाह्य, धइतिदाह्य्सा नाङको एतताह्ङो बिचारखे परमेस्वरकसय खेल तर मान्ताको गुनसय वाङो खेना।”
34अनि येसुइ मान्तालमको हुल र लयको चेलालमकाय लयकताङ गोताक्तिको तोसास्यावा, “यदि निङ सुखेयामा ङाको चेला स्याउसा चाहतेनय त खेया, निङइ लयको मनको मात्र इच्छ्यालमकाय फेनु, र लयको क्रुस लात्ति ङाको लोन्हे गुह्ल्ति वाङ्न। 35यदि निङइ लयको रुवाङ दल्ताक्सा बोःङ्तेनानि त खेया, निङइ ओउ रुवाङ मिह्ताक्तेनानि। तर यदि निङइ लयको रुवाङ ङाको लागि र परमेस्वरको पेओ खबरको लागि बइतेनानि त खेया, निङइ ओउ रुवाङ दल्ताक्तेनानि। 36धइतिदाह्य्सा यदि निङइ सङ्सारको जुदा थोकले दोःतिमा लयको रुवाङखे मिह्ताक्तेनानि त खेया, निङकाय दोह फाइदा स्याउना र? पक्कामा स्याउलेल! 37ओउतझ्यान्ते लयको रुवाङ द्याःन्ति दोःसाको लागि निङइ दोहमा बइसा खाइलेतेनिलि। 38यदि निङ पापिलम र परमेस्वरकाय बिस्वास जाह्ङ्मालो मान्तालमको इ समयहाङ, ङा र ङाको स्यानरायकुस रास्तेनय त खेया, ङा मान्ताको चोःमा परमेस्वर आपाको महिमाहाङ पबित्र लाङकादुतलमकुस द्याह्न्ति वाङ्तोकहाङ निङकाय लयको त तोसा रास्लेनाङ।”
Selectat acum:
मर्कुस 8: CHEP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
