मर्कुस 6
6
नासरतको मान्तालमइ येसुकाय इन्कार जाह्ङो
(मति १३:५३-५८; लुका ४:१६-३०)
1येसु ओउ थाउ फेआक्तिको लय हुर्कओ नासरत त तोओ मयो सहरताङ द्याह्न्सास्यावा, र येसुको चेलालममा येसुकुस ब्रकले आलाकाय। 2यहुदि धोओ दिन येसुइ सभाकिमहाङ आल्ति स्यान्सा सुरु जाह्ङ्सास्यावा। ओहाङ येसुको स्यानराय साइतिमुओ नाःतो मान्तालम ग्याह्ङाकाय र एत दाह्य्सा फाःङाकानि, “इ मान्ताइ एतताह्ङो कुरालम गाहाङसय स्यानाकास? एतताह्ङो बुद्दि इकाय सुइ बयाथय? एतताह्ङो ग्याह्ङ्सिओ कामलम इ मान्ताइ गतहाइति जाह्ङ्नउ?” 3अनि ओउमयइ येसुकाय एतदाह्य्ति थ्याउसा फाःङाकानि, “इपाय सिकर्मि मात्र खेना। इपाय मरियमको चोः, अनि याकुब, योसेफ, यहुदा र सिमोनको पुः खेना। अनि इको हउद्याङलममा निकुस इ सहरहाङले याक्नय।” ओहाङसयको ओउमयइ येसुकाय इन्कार जाह्ङाकानि र बिस्वास जाह्ङ्साले चाहइलि।
4अनि येसुइ ओउमयकाय तोसास्यावा, “अगमबक्तालमकाय लय नाःओ अनि हुर्कओ थाउको छिमेकिलम, लयको मान्तालम र माचरलमइ बाहेक अरु जुदा थाउको मान्तालमइखे मान-सम्मान जाह्ङ्लेनानि।”
5ओउमयको अबिस्वासइ जाह्ङ्धार्ना, येसुइ केहि बिरामि मान्तालमकाय क्रुत झाम्ति स्याक्ताको बाहेक अरु ग्याह्ङ्सिओ कामलम जाह्ङ्साले खाइसास्याउल। 6ओहाङको मान्तालमइ बिस्वास जाह्ङ्मालो च्यउति, येसु माहा जोक्तो ग्याह्ङ्सास्यावा।
येसुइ बाह्र जना मुख्य चेलालमकाय प्रचारहाङ ल्होक्सास्यावो
(मति १०:५-१५; लुका ९:१-६)
अनि येसुइ ओहाङ वरिपरिको गाउ-गाउहाङ आल्ति मान्तालमकाय स्यानराय बइसास्यावा। 7ओहाङसयको येसुइ लयको बाह्र जना मुख्य चेलालमकाय ब्रक्त गोत्सास्यावा, अनि ओउमयकाय दुस्त ग्वालामलम रुःन्ति ल्होक्सा अधिकार बइति नि-निसचाकको दक्कालहाङ ल्होक्सास्यावा। 8येसुइ ओउमयकाय एतदाह्य्ति आग्या बइसास्यावा, “निङइ लयको यात्राको लागि ङोःल्साकाय दाङ्ग बाहेक जेःगा-तुङ्गा, जाबि, र थेपो दोहमा आःल्लाम।” 9येसुइ ओउमयकाय जुत्ता लावसा बइसास्यावा, तर फेरसाकाय नायलम लात्साखे अनुमति बइसास्याउल। 10येसुइ ओउमयकाय एतमा तोसास्यावा, “सु मान्तालमइ निङकाय स्वागत जाह्ङ्तेनय, ओउ गाउ फेति पाह्य्माच्युकसम्म ओउ यातज्यो किमहाङले मुन। 11तर यदि निङ आलो गाउ-सहरको मान्तालमइ निङकाय स्वागत जाह्ङ्तेइलि अथबा निङको कुराकाय साइनिलि त खेया, निङको दोमपाकको धाह्न् ओहाङले काहाक्तिको ओउमयको थाउ फेति वाह्न। ओउखे ओउमयको लागि, परमेस्वरइ ओउमयकाय न्याय जाह्ङ्सास्याउना त दाह्यो कुराको चिनो स्याउलेना।”
12ओहाङसयको ओउमय ग्ल्युह्ङ्ति आलाकाय अनि जुदा मान्तालमकाय “ल-लयको पापसय पस्ताप जाह्ङ्ति परमेस्वरकताङ द्याह्न्न” त दाह्य्ति प्रचार जाह्ङाकानि। 13ओउमयइ लानइ ङाःयो मान्तालमकसय नाःतो लानलम रुःन्ति ल्होकाकानि, अनि नाःतो बिरामिलमको तालाङहाङ जयतुनको साति ल्यान्ति ओउमयकाय स्याक्ताकाकानि।
बप्तिस्मा बयो युहन्नाको सिमय
(मति १४:१-१२; लुका ९:७-९)
14गालिल छेत्रहाङ राज्य जाह्ङो राजा हेरोद एन्तिपासइमा येसुको बारेहाङ सायाकान, धइतिदाह्य्सा जुदा मान्तालमइ येसुको बारेहाङ नोःइतो। कोय मान्तालमखे “बप्तिस्मा बयो युहन्नाले सिओसय उह्ति च्योको खेना, ओउतझ्यान्तेपाय ओउइ ग्याह्ङ्सिओ जिःङकालि कामलम जाह्ङ्सा खाइनउ” त दाह्य्इतो।
15कुनय मान्तालमखे “ओउपाय एलिया अगमबक्ता खेना” त दाह्य्इतो।
र गच्युक मान्तालमखे “ओउपाय उहिलेको महान् अगमबक्तालम मध्येको यातचाक अगमबक्ता खेना” त दाह्य्इतो।
16जब हेरोद राजाइ इ कुरा सायाकान, ओउ एत दाह्या, “ओउपाय बप्तिस्मा बयो युहन्नाले खेना। खेसापाय ओउको तालाङ ङाइले तात्ताको खेङतो, तर देङेखे ओउ सिओसय उह्ति च्योक्लेआ।”
17हेरोद लयइले लयको सिपाहिलमकाय आग्या बइति युहन्नाकाय पक्रताकाक्तिको झेलकनहाङ कुङ्ताकाकान। हेरोदइ लयको पुः फिलिपको माचा हेरोदियासकुस बिह्या जाह्ङोझ्यान्ते हेरोदइ ओउकाय झेलकनहाङ कुङ्ताको खेतो, 18र बप्तिस्मा बयो युहन्नाइ “लयको पुःकमाकुस बिह्या जाह्ङो कुराखे परमेस्वरको नेम-कानुनको बिरोतहाङ खेना”#६:१८ लयको पुःकमाकुस बिह्या जाह्ङो कुराखे परमेस्वरको नेम-कानुनको बिरोतहाङ खेना हेरोदियासइ ङ्हाखे हेरोद एन्तिपासको पुः हेरोद फिलिपकुस बिह्या जाह्ङाकान। इ हेरोद फिलिप त तोओखे यातम् हेरोद राजाको सुमम् माचाको चोः खेना। अनि हेरोद एन्तिपासखे ओउ यातम् हेरोद राजाको प्लयम् माचाको चोः खेना। ओउ हेरोद एन्तिपासइखे लयको पुः हेरोद फिलिप जिउदो मुतोकहाङले हेरोदियासकुस बिह्या जाह्ङाकान। ओउतझ्यान्ते बप्तिस्मा बयो युहन्नाइ हेरोद एन्तिपासको बिरोत जाह्ङो खेना। त दाह्य्ति हेरोदकाय तोओको तोओ जाह्ङो खेतो। 19ओउतझ्यान्ते हेरोदियासइ युहन्नाकाय हेला जाह्ङ्सा फाःङाकान, र ओउइ ओउकाय सात्सा चाहतो। तर ओउइ राजा हेरोदको अनुमति बिना ओउत जाह्ङ्सा खायाकुलु। 20धइतिदाह्य्सा हेरोदइ युहन्नापाय धर्मि र पबित्र मान्ता खेना त दाह्य्ति चिःओझ्यान्ते ओउकाय दोह पेमातोमा स्याउताक्मातो सुरछ्या बइति गम्ताको खेतो। युहन्नाको कुरा साइधार्ना हेरोदको मनहाङ छतपत स्याउतो, तर खेयाकायमा ओउइ ओउको कुरा म्रोतिले सायुतो।
21तर यात दिन हेरोदियासइ मउका ङाःयाकान। राजा हेरोदइ लय नाःओ दिनहाङ गालिल छेत्रको ताह्ङो सरकारि हाकिमिलम, सेनाको हाकिमिलम र बिसेस अगुवालमकाय गोत्ति भोस बयाकान। 22ओउ भोसहाङ हेरोदियासको चोःद्याङ वाङ्ति स्याहा, अनि ओउइ राजा हेरोद र ओउको जुदा पाहुनालमकाय आसताकाकान। ओउतझ्यान्ते राजाइ ओउकाय तोआकान, “नाङ चाहओ कुरा ङाकुसि तेसा खाइतेनउ। तेअ, नाङ चाहओ दोह कुरा खेयाकायमा ङाइ नाङकाय बइनेनाङ।” 23ओउइ एतदाह्य्ति बाचामा जाह्ङाकान, “नाङ दोह ते तेना, ङाइ नाङकाय ओउले बइनेनाङ, यदि नाङ ङाको आधा राज्य तेतेना त खेयाकायमा, ङाइ नाङकाय ओउ बइनेनाङ।”
24ओउ मोम्चो बाहिर ग्ल्युह्ङ्ति आमाखेकाय ह्वताकान, “आमा, ङाइ राजाकुस दोह तेचाङ?”
आमाखे त्याङा, “बप्तिस्मा बयो युहन्नाको तालाङ तेअ!”
25ओहाङसयको ओउ मोम्चो रेह्न्तोले वाङ्ति राजा हेरोदकाय तोआकान, “हजुरइ ङाकाय देङेले बप्तिस्मा बयो युहन्नाको तालाङ थालहाङ काति बयो ङा चाहनाङ!”
26इ कुराइ जाह्ङ्धार्ना राजा माहा जोक्तो दुखि स्यावा, तर जुदा मान्तालमको ङ्हाहाङले बाचा जाह्ङोझ्यान्ते ओउइ इ कुराकाय इन्कार जाह्ङ्सा खायुलु। 27ओहाङसयको राजा हेरोदइ यातचाक सिपाहिकाय ल्होक्ति युहन्नाको तालाङ लात्ति वान्साकाय हुकुम बयाकान। अनि ओउ सिपाहि झेलकनहाङ आलाक्तिको युहन्नाको तालाङ ताताकान, 28र युहन्नाको तालाङ थालहाङ काति वानाक्तिको हेरोदियासको चोःद्याङकाय बयाकान, र ओउइखे ओउ त्याकाक्तिको लयको आमाकाय आःल्ति बयाकान। 29जब युहन्नाको चेलालमइ इ कुरा सायाकानि, ओउमय वाङाकाय र युहन्नाको म्हाङकाय लात्ति आःलाक्तिको तेसराङहाङ पाह्माकानि।
येसुइ पोङा हजार मान्तालमकाय जेःसा बइसास्यावो
(मति १४:१३-२१; लुका ९:१०-१७; युहन्ना ६:१-१४)
30येसुइ प्रचार जाह्ङ्लाङ ल्होक्सास्यावो बाह्र जना मुख्य चेलालम येसुकहाङ द्याह्न्ति दाहाकाय, अनि लयमयइ जाह्ङो जुदा कामलम र मान्तालमकाय स्यानो कुरालमको बारेहाङ येसुकाय ल्हाक्ति छ्यानाकानि। 31ओहाङ येसुकाय योलाङ नाःतो मान्तालम वाङ्धय र पाह्य्धय जाह्ङोझ्यान्ते येसु र ओउको चेलालमइ जेःगा जेःसामा मउका दोःइलि। ओउतझ्यान्ते येसुइ लयको चेलालमकाय तोसास्यावा, “लउ, निङमा ङाकुस वाङ्न, र सुमा नाःमालो एकान्त थाउताङ आल्ति आराम जाह्ङ्नि।” 32ओहाङसयको ओउमय दोङगाहाङ लह्नाक्तिको सुमा नाःमालो एकान्त थाउताङ आलाकाय।
33तर नाःतो मान्तालमइ ओउमयकाय आल्धयमुओ च्यवाकानि र ओउमय सु खेनय त दाह्यो कुरा ओउमयइ तह्याकानि, अनि जुदा गाउ-सहरलमसय नाःतो मान्तालम वाङाकाय र दोमइ वाह्तिले येसु र ओउको चेलालमसय ङ्हा ओउमय दाहाकाय। 34येसु दोङगासय ग्ल्युह्ङ्सास्याउतोक बेलाहाङ नाःतो मान्तालमको हुल हुम्तिमुओ येसुइ च्यउसास्यावा। ओउमयकाय च्यउति येसुको ल्हुङतुक योःन्मयइ ब्लिङा, धइतिदाह्य्सा ओउमयखे गोथालो नाःमालो भेदालम लेखा खेइतो। ओउतझ्यान्ते येसुइ ओउमयकाय नाःतो कुरालम स्यान्सास्यावा। 35जब राह्मको बेला स्यावा, चेलालम वाङ्ति येसुकाय तोआथय, “गुरु, इपाय सुमा याक्मालो एकान्त थाउ खेना, र न्याममा याह्तिले भ्याओ मुना। 36इ मान्तालमकाय बिदाइ जाह्ङ्ति ल्होक्सास्याउपाना, र इमय वरिपरिको गाउलमहाङ आल्ति लयमयको लागि केहि जेःगालम लेःति जेःपानानि।”
37तर येसुइ ओउमयकाय तोसास्यावा, “निङइले ओउमयकाय केहि जेःगालम बइनु।”
अनि ओउमय दाह्याकाय, “दोह इमयकाय बइसाको लागि निइ निस सय चान्दिको ध्याक#६:३७ निस सय चान्दिको ध्याक ओउतोक बेलाहाङ यातचाक मान्ताइ खेतराङहाङ काम जाह्ङो यात दिनभरिको ज्यालाखे यातज्यो चान्दिको ध्याक स्याउतो। निस सय चान्दिको ध्याक कमाउसाको लागि यातचाक मान्ताइ आथ महिनाच्युक काम जाह्ङ्सा परतो। खर्च जाह्ङ्ति जेःगालम लेःति वानो ते नाङ चाहसास्याउना?”
38येसुइ ओउमयकाय ह्वत्सास्यावा, “निङकुस गुच्युक गोता लाङ मुना? आल्ति योनु।”
ओहाङसयको ओउमय योआक्तिको द्याह्न्ति वाङ्ति एत दाह्याकाय, “गुरु, निकुसि पोङाज्यो लाङ र निसमोसा ङाः मुना।”
39अनि येसुइ चेलालमकाय तोसास्यावा, “जुदा मान्तालमकाय समुह-समुह जाह्ङ्ति चवरहाङ च्युःङ्न त दाह्य्ति तोनु।” 40ओउतझ्यान्ते मान्तालम सय-सय र पचास-पचास जनाको दक्कालहाङ च्युःङाकाय। 41ओहाङसयको येसुइ पोङाज्यो लाङ र निसमोसा ङाः त्याक्सास्यावा, र लाङकाताङ त्याउति जेःगाको लागि परमेस्वरकाय धन्नेबाद बइसास्यावा। अनि येसुइ लाङ फह्न्सास्यावा, र मान्तालमकाय वेःसाको लागि ओउ लाङ चेलालमकाय ल्हासास्यावा। ओउतले येसुइ निसमोसा ङाःमा जुदा मान्तालमकाय वेःति बइसास्यावा। 42अनि ओहाङ मुओ जुदाइ कोस्तोले जेःआकानि। 43अनि चेलालमइ वेतिमुओ लाङ र ङाःको तुकुरालम हुम्धार्ना बाह्र सोल्हे स्यावा। 44ओहाङ जेःगा जेःओ गोय्चो मान्तालम मात्र पोङा हजारच्युक खेइतो।
येसु तिः मल्ग वाह्सास्यावो
(मति १४:२२-३३; युहन्ना ६:१५-२१)
45ओहाङसयको रेह्न्तोले येसुइ चेलालमकाय दोङगाहाङ लह्न्ताकाक्तिको समुन्द्रको पारि बेथसेदा गाउताङ लयसय ङ्हा ल्होक्सास्यावा, र ओउतोक बेलाहाङ येसुइखे मान्तालमको हुलकाय बिदाइ जाह्ङ्ति किम-किमताङ ल्होक्सास्यावा। 46अनि मान्तालमकाय बिदाइ जाह्ङ्ति भ्याआपछि येसुखे प्राथना जाह्ङ्साको लागि त्याःव दान्दाताङ आल्सास्यावा। 47राह्म स्याउतोक बेलाहाङ दोङगा समुन्द्रको माझहाङ दाहा, तर येसुखे अझले दान्दाहाङ एकानले मुसास्याउतो। 48चेलालमकाय दोङगा चलाउसा माहा दुक्तो स्यावो कुरा येसुइ च्यउसास्यावा, धइतिदाह्य्सा ओउमयको ङ्हासयले ताह्ङो माःरु ओउमयकताङ वाङ्तिमुओ खेतो। अनि येसु लगभग बिहानको सुम बजेताङ तिः मल्ग वाह्ति ओउमयकताङ वाङ्सास्यावा। येसुइ ओउमयकाय च्योःल्सा लागतोक बेलाहाङ, 49ओउमयइ येसुकाय तिः मल्ग वाह्धयमुओ च्यवाकानि। र ओउपाय लान खेना त म्हर्ति हिह्सा फाःङाकानि। 50धइतिदाह्य्सा येसुकाय च्यउति ओउमय माहा जोक्तो रयो खेइतो।
तर येसुइ रेह्न्तोले ओउमयकाय तोसास्यावा, “निङ रइलाम! बरु साहस जाह्ङ्नु। धइतिदाह्य्सा ङा येसुले खेनाङ।” 51ओहाङसयको येसु चेलालम मुओ दोङगाहाङ लह्न्सास्यावा, र ताह्ङो माःरु वाङ्सा फेआकान। ओउत च्यउति चेलालम माहा जोक्तो ग्याह्ङाकाय। 52येसुइ पोङा हजार मान्तालमकाय जेःसा बइसास्यावोको दोङ मानेखे चेलालमइ चिःसाले खायो नाःआकिलि, धइतिदाह्य्सा ओउमयखे रेह्न्तो चिःसा खाइमालो मनको मान्तालम खेइतो।
येसुइ गनेसरेत छेत्रहाङ बिरामिलमकाय स्याक्ताक्सास्यावो
(मति १४:३४-३६)
53येसु र ओउको चेलालम समुन्द्र पार जाह्ङ्ति गनेसरेत त तोओ छेत्रको किनारहाङ दाहाकाय, र ओहाङले ओउमयइ दोङगाकाय न्यासाकानि। 54ओउमय दोङगासय ग्ल्युह्ङ्नातासले मान्तालमइ येसुकाय तह्याथय। 55ओउतझ्यान्ते ओउमयइ ओउ छेत्र वरिपरिको जुदा थाउहाङ तन्ति आल्ति येसु वाङ्सास्यावो खबर बयाकानि। अनि मान्तालमइ बिरामिलमकाय ओउमय एःनो न्हाप दोहिले येसुकहाङ लात्ति वानाकानि। 56ओउतले येसु आल्सास्यावो गाउ र सहरलमको बजारको चोकलमहाङ मान्तालमइ बिरामिलमकाय वान्ति गम्नितो, अनि ओउमयइ “बिरामिलमकाय नाङको नायको छेउ मात्र खेयाकायमा धिन्सा बइसास्याउपाना” त दाह्य्ति येसुकाय बिन्ति जाह्ङ्नितो। अनि येसुको नाय धिनोलमखे ल-लयको रोगसय स्याक्माइतो।
Selectat acum:
मर्कुस 6: CHEP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
