मर्कुस 3
3
कुइच्या रोगइ क्रुत सुह्यो मान्ताकाय येसुइ स्याक्ताक्सास्यावो
(मति १२:९-१४; लुका ६:६-११)
1अर्को यहुदि धोओ दिन येसु सभाकिमहाङ आल्सास्यावा, र ओहाङ यातचाक कुइच्या रोगइ यातज्यो क्रुत सुह्यो मान्ता खेतो। 2येसुइ पबित्र धोओ दिनहाङ बिरामि मान्ताकाय स्याक्ताक्नउ त खेया, ओउकाय गाल बइसा परना त दाह्य्ति ओहाङ केहि मान्तालम येसुकाय जुःति योतिमुओ खेइतो। 3येसुइ यातचाक क्रुत सुह्यो मान्ताकाय तोसास्यावा, “नाङ इहाङ वाङ र जुदा मान्तालमको ङ्हा चिङ।” 4ओहाङसयको येसुइ ओहाङ मुओ मान्तालमकाय ह्वत्सास्यावा, “निको नेम-कानुनइ धोओ दिनहाङ दोह जाह्ङ्सा पेतो स्याउना त दाह्य्ना? पेओ जाह्ङु त तोनउ या पेमालो? स्याक्ताकु त तोनउ या सातु?”
तर ओउमयइ दोह जवाफमा बइनिलि। 5येसुइ ओउमयकाय रिस वाङ्ति योसास्यावा, र ओउमयको ल्हुङतुक चाक्तो स्यावो च्यउति दुखि स्याउसास्यावा। अनि येसुइ ओउ क्रुत सुह्यो मान्ताकाय तोसास्यावा, “नाङको क्रुत प्योताकु।” ओउइ लयको क्रुत प्योआकास र स्याक्माआ। 6ओहाङसयको फरिसिलम रेह्न्तोले सभाकिमसय ग्ल्युह्ङ्ति पाह्याकाय र राजा हेरोदको मान्तालमकुस#३:६ राजा हेरोदको मान्तालम इ मान्तालमखे यहुदि मान्तालम खेनय र इमय राजनिति जाह्ङो समुह खेनय, ओउमयइखे राजा हेरोदको सन्तानइले इस्राएलको राज्य जाह्ङ्सा परना त दाह्य्इतो। इको बारेहाङ अझ नाःतो चिःसाकाय सब्दलमको मानेलमहाङमा योसा खाइना। क्रुस्कायाक्तिको येसुकाय सात्सा जालसाजि जाह्ङाकानि।
मान्तालमको हुलइ येसुकाय गुह्ल्ति वाहो
7येसु लयको चेलालमकुस गालिल समुन्द्रको किनारताङ आल्सास्यावा, र नाःतो मान्तालमको हुल येसुकाय गुह्ल्ति वाङाकाय। ओउमयखे गालिल र यहुदिया छेत्रसय, 8यरुसलेम सहरसय, इदुमिया छेत्रसय, यर्दन खोलाको दाहन्यामसयको छेत्रसय, अनि तुरोस र सिदोन सहरसय वाङो खेइतो। येसुइ जाह्ङ्सास्यावो ग्याह्ङ्सिओ कामलमको खबर लोक्तोसम्मले भयभय त स्यावोझ्यान्ते नाःतो मान्तालम येसुकाय योलाङ वाङाकाय। 9नाःतो मान्तालमको हुलइ लयकाय न्हेङ्नाताङ या त म्हर्ति येसुइ लयको चेलालमकाय लयको लागि यातज्यो मयो दोङगा तयार जाह्ङ्ताक्सास्यावा। 10येसुइ नाःतो बिरामि मान्तालमकाय स्याक्ताक्सास्यावा, ओउतझ्यान्ते जुदा बिरामिलम येसुकाय धिन्ति स्याक्साको लागि न्हेङ्काइतोसम्म स्यावो खेइतो। 11अनि दुस्त ग्वालामइ ङाःयो मान्तालमखे येसुको ङ्हा प्लाहाक्तिको “नाङपाय परमेस्वरको चोः खेसास्याउतेना” त दाह्य्ति तोआकानि। 12तर येसुइ लय सु खेनाङ त दाह्योको बारेहाङ सुकायमा चिःताक्लाम त दाह्य्ति ओउ दुस्त ग्वालामलमकाय आन जोक्तो दर्कति आग्या बइसास्यावा।
येसुइ बाह्र जना मुख्य चेलालमकाय छ्युह्ङ्सास्यावो
(मति १०:१-४; लुका ६:१२-१६)
13ओहाङसयको येसु यातज्यो दान्दाताङ आल्सास्यावा, र लयकाय चाहओच्युक मान्तालमकाय गोत्सास्यावा। अनि ओउमय येसुकहाङ वाङाकाय, 14र ओउमयमध्ये बाह्र जनाकाय छ्युह्ङाक्तिको ओउमयकायखे लयको मुख्य चेलालम त दाह्य्ति मय्ङ्सास्यावा। र येसुइ ओउमयकाय लयको खबरदुतलम#३:१४ लयको खबरदुतलम कुनय-कुनय क्रुतइ लेखओ पुरानो कितापलमहाङखे लयको खबरदुतलम त दाह्य्ति तोओ सब्दलम लेखओ नाःल। त दाह्य्तिमा तोसास्यावा, धइतिदाह्य्सा येसुइ ओउमयकाय लयकुस मुसा र ओउमयकाय प्रचार जाह्ङ्साको लागि ल्होक्सा चाहसास्यावा, 15र ओउमयकाय लानलम रुःन्ति ल्होक्साकाय अधिकारमा बइसास्यावा।
16येसुइ छ्युह्ङ्सास्यावो बाह्र जनाको मय्ङ्खे इ खेना—
येसुइ पत्रुस त दाह्य्ति मय्ङ्सास्यावो सिमोन,
17जब्दियाको चोः याकुब, र ओउको हउ युहन्ना (ओउनिसकाय येसुइ “बोअनर्गेस” त दाह्य्ति मय्ङ्सास्यावा, ओउको मानेखे बजर भेसो लेखाताह्ङो बानि नाःओ मान्ता त दाह्य्ति चिःना, धइतिदाह्य्सा ओउनिस माहा रेह्न्तो रिस वाङ्चतो।)
18 अन्द्रियास,
फिलिप,
बार्थोलोमय,
मति,
थोमा,
अल्फायसको चोः याकुब,
थेदियस, देसभक्त त तोओ सिमोन,#३:१८ देसभक्त त तोओ सिमोन इ सिमोन त तोओ मान्ताखे येसुकाय क्रुस्सासय ङ्हा यहुदिलमकाय रोमिलमको सासनसय छुत्कारा बइसा परना त दाह्य्ति रोमि सासकलमको बिरोतहाङ लागओ मान्ता खेना। ओउतझ्यान्ते यहुदिलमइ ओउकाय देसभक्त त दाह्य्ति तोनितो।
19र यहुदा इस्करियोत, ओउइले येसुकाय बिस्वासघात जाह्ङो खेतो।
येसु र बालजिबुल
(मति १२:२२-३२; लुका ११:१४-२३; १२:१०)
20ओहाङसयको येसु किमताङ द्याह्न्ति पाह्य्सास्यावा, र ओहाङमा मान्तालमको हुल हुमाकाय। ओउतझ्यान्ते येसु र ओउको चेलालमइ जेःगा जेःसा समयले दोःइलि। 21जब येसुइ जाह्ङ्सास्यावो कामलमको बारेहाङ येसुको माचरलमइ सायाकानि, मान्तालमइ “येसुपाय ब्रःआ” त दाह्य्ति तोओझ्यान्ते ओउमय येसुकाय लेःलाङ आलाकाय।
22यरुसलेमसय वाङो केहि धर्मगुरुलमखे एत दाह्याकाय, “येसुकायपाय लानलमको राजा बालजिबुलइ#३:२२ बालजिबुल बालजिबुल त तोओखे सय्तानको अर्को मय्ङ खेना, अनि ओउखे जुदा दुस्त ग्वालाम र लानलमको राजा खेना। ङाःयो मुना। ओउ लानलमको राजा सय्तानकसय जिःङ दोःतिले येसुइ लानलम रुःनो काम जाह्ङ्नउ।”
23ओउतझ्यान्ते येसुइ ओउमयकाय लयकहाङ गोताक्तिको ल्हाकरायहाङ एतदाह्य्ति तोसास्यावा, “सय्तानइ सय्तानकाय गतहाइति मान्तालमकसय रुःन्ति ल्होक्सा खाइनउ र? 24यदि कुनय यातज्यो देसको मान्तालम लयमयले कायकायनय त खेया, ओउमयको राज्यखे म्हेत्ति वाइलेना। 25ओउतले यदि कुनय यातज्यो किमको माचरलम लयमयले कायकायनय त खेया, ओउमयको किममा म्हेत्ति वाइलेना। 26ओउतझ्यान्ते यदि सय्तान लयइ लयकोले बिरोत जाह्ङ्नउ त खेया, ओउखे जुगाङमा तिकलेल, र ओउको राज्य म्हेत्ति वाइलेना।
27 ङाइ निङकाय इ ल्हाकरायमा तोनेनाङ्स, हतियार लातो बल्यो मान्ताकाय चुमाक्तिको पाःन्ति गम्माच्युकसम्म, सुइमा ओउको किमहाङ पोक्ति ओउको धन-सम्पति कुःसा खाइलेल। यदि ओउ बल्यो मान्ताकाय पाःन्ति गम्ना त खेयाकाय मात्र कुःसा खाइलेना।
28 दोङ्सिले ङाइ निङकाय तोनेनाङ्स, मान्तालमइ जाह्ङो जुदा पापलम र परमेस्वरको बिरोतहाङ जाह्ङो अपमानमा छेमा स्याउलेना। 29#लुक १२:१० तर पबित्र ग्वालामको बिरोतहाङ नोःओ दुस्त कुरालमखे गलमा छेमा स्याउलेल, धइतिदाह्य्सा ओउ पापखे अजम्बरिसम्मले छेमा दोःमालो पाप खेना।”
30ओहाङ मुओ केहि मान्तालम “येसुकायपाय दुस्त ग्वालामइ ङाःयो मुना” त दाह्य्ति नोःओझ्यान्ते येसुइ ओउत तोसास्यावो खेतो।
येसुको आमा र हउलम
(मति १२:४६-५०; लुका ८:१९-२१)
31अनि येसुको आमा र हउलम येसुइ स्यानराय बइसास्याउधयमुओ किम बाहिर दाह्तिवाङाकाय। ओउमय बाहिर चिङ्ति मुआक्तिको येसुकाय गोत्ति बइताङि त दाह्यो खबर केहि मान्तालम दुवारा भित्र ल्होकाकानि। 32ओहाङ येसुको वरिपरि मान्तालमको हुल च्युःङ्तिमुओ खेइतो, अनि मान्तालमइ येसुकाय तोआथय, “साइसासास्याउपा, नाङको आमा र हउलम#३:३२ आमा र हउलम कुनय-कुनय क्रुतइ लेखओ पुरानो कितापलमहाङखे “आमा, हउलम र हउद्याङलम” त दाह्य्ति लेखओ मुना। नाङकाय क्रुस्साको लागि बाहिर ल्युह्ङ्ति मुनय।”
33येसुइ ओउमयकाय तोसास्यावा, “ङाको आमा र हउलम सु खेनय?” 34अनि येसुइ लयको वरिपरि च्युःङ्तिमुओ मान्तालमकाय योआक्तिको तोसास्यावा, “इमयले ङाको आमा र हउलम खेनय। 35परमेस्वरको इच्छ्या पालन जाह्ङोलमले ङाको हउ, हउद्याङ र आमा खेनय।”
Selectat acum:
मर्कुस 3: CHEP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2024 (Active), Mother Tongue Translators Society and Wycliffe Bible Translators, Inc. All rights reserved.
